شعراء الحقيبة... توثيق شامل

تذكير بمساهمة فاتح الموضوع :

توثيق شامل لكلمات شعراء الحقيبة .. وهم :

ابراهيم العبادي--احمد محمد حسين(العمرابي)--احمد محمد الشيخ الجاغريو--خليل فرح -- سيد عبدالعزيز--صالح عبدالسيد ابوصلاح--عبدالرحمن الريح--عبيد عبدالرحمن--علي المساح --عمر البنا--محمد الرضي ودالرضي--محمد بشير عتيق--محمد علي الامي--مصطفي بطران..

صباح النور عليك يا بدور

كلمات / سيد عبد العزيز

[الأغنية من الحان الفنان : محمد أحمد سرور

.......................
صباح النور عليك يازهور
صباح يوم يقاس بدهور

يالزهر الفي رياض وزهور
في خدرك وحسنك مشهور
هلال محياك المابي ظهور
هلال ماهلت مثله شهور
****
زهر طاهر مالمغرور
عليه جناح الرضا مفرور
صباحه سعادة بكل سرور
جماله يغني عليه سرور
****
نظرتك جالس بين خدور
بدري هناك أنكشفوا بدور
تفوق نيشان ممتاز في صدور
العظما المثلوا أعظم دور
****
جلاله جلال ملكاً منصور
دلاله دلال مقصور في قصور
فيه جمال الكون محصور
بديع ماشافت مثله عصور
****
يلوح للعين من نورك نور
شعاع الشمس على البلور
جهرت عيوناً كفاك يانور
قلوبنا رميتن في التنور
****
فريد حسنك ودلك موفور
وأنا دمعي يجر مجرى البسفور
تزيد في عناد ودلال ونفور
وبرضي أقول ذنبك مغفور
****
أيا صاحب الطرف المكسور
كسرت قلب شجاع وجسور
تتجاهلني وأنا بيك مأسور
حسابي معاك بقى كله كسور

الأغنية من الحان الفنان :ا براهيم الكاشف

....................................

إنت عارف
أنا بحبك .. وبحلف بك...
ولا ماك عارف ..بالمرة
إنت صارف عنى مــدة
وأنا خايف تتحــــدى
أنا خايف ...
متى نبدأ ... التعارف
والتآلف و المــــودة
يا حبيبى من فضـــلك
جاملنى طـاوعنـى
لا تخالف واحدة مرة
أنا شايف
أنا شايف
المحاسن الطـــرائف
فى صمتك فى كلامــك
فى عيونك .. فى إبتسامك
فى خدودك فى قوامــك
أنت جالس ... أنت ماشى
أنت واقــف ... أنت نايم
صغير غرير الطرف حالم
ماك عالم ... ماك عارف
أنا طرفى جفا المنام
ألف الحب والهيام
مع الجمال بالعواطف
فى هواكـم أستمر
متين أصــــــادف
رضاك على وعلي توالف
هواى مناى حياتى حبك بالمحبة
بلاك أشــــوف النور ظلام
وأذوق طعم كـــل حاجة مرة
زورنى مرة
إن رأيتك بالقرب منـــى
سعد أظنى ... هل تدرى أنى
أحس بعظمة وشأن كبير
أفـــرح كتير فرح كبير
أكاد أطير من الفــرح
والأمل أحيا وأخالف المسرة

اغنية فتنه /غناء والحان الراحل والمقيم ابراهيم الكاشف

فتنه
لى حق اذا اتهمتا فؤادى عندك انتا ياحبيبى انا بيك افتتنتا

حبيب الروح سلمتا ما بيا لوعلمتا
انا الامين ووافى وليك ودادى صافى
ياملهمى القوافى ولكل معنى وافى
ذى بسمة الازاهرفى نظرى ابتسمتا ذى نقشة الخواتم فى قلبى اترسمتا
ياحبيبى انا بيك افتتنتا

اقوليك اذا سمحتا انا شايفك حبيبى شايفك
انا شايفك تبهرج كل ما ليك لمحتا كضوء الفجر لحتا
كزهر الروضه فحتا وذى اغصانا محتا
ياحلو المناظر ياساحرالنواظر
ان نظروك فرحتا وان نظرتا جرحتا
يا حبيبى انا بيك افتتنتا

بدر الحسن انتا وبين الناس عرفتا ان وصفوا المحاسن بسيماهم وصفتا
انابعيونى شفتا وصادق لو حلفتا
من تاثير عيونك خديتنى ورجفتا ومن تاثير عيونى على خديك فقتا

انا انا انا نارى نار انا نارى تعال ياحبيبى
ولى حق اذا اتهمتا فؤاى عندك انتا يا حبيبى انا بيك افتتنتا

يا فريع الطيب / الشاعر سيد عبدالعزيز

[font=Georgia]لحن وغناء / كرومة وعبد العال بريمة وغيرهم ...

يافريع الطيب والثمر
ياأم جبيناً فاضح القمر
كيف أنسى الحسن العمر *** في محيك دارة القمر
وليل ديس يمطر خمـــــر *** والغصن أتنى وخمر
كيف أنسى ذاك الحور
ولوغبت وبعد الجور
لي أوع في الجوف صور
من حبك وعقلي الزور
كيف أنسى ساعة ختـر *** حاديكم وسابنا في خطر
طار عقلي عني وإنبتر *** وقلبي يعزف نقر الوتر
من حبك بفيد حذر
ياليت العازل عذر
إن طيفك لي يوم نظر
لوصالك بالروح نذر
ماحيلتي إن نفذ القدر *** ببعدك وحظي أندمر
الحـــالـم ظلمـاً أمــــر *** بهجراً كالموت أمر
كيف أحمل بعدك شهر
والثانية عندي بدهر
صار فوقي النوح والسهر
ومن دمعي في الخد نهر
يانسايم أروي الخبـــر *** خبر شوقي الملأ كل بر
ما إتعالج كسري وجبر *** وفي نهار الهجران وإن صبر

[/font

حليف الصون-الشاعر/ سيد عبدالعزيز

من اغاني العام 1934 لحن وغناء سرور وسجلها أحمد حسن اسطوانة -سجلت للاذاعة بصوت الثنائي ميرغني المامون واحمد حسن جمعة- الجابري اول من تغني بها بمصاحبة الموسيقي.

ياحليف الصون
فلتدم في علاك
أنت زول معصوم
ولا إنت ملاك
إنت بدري وكيف ***** الخدر ظلاك
أنت كوكب نور ***** تشتهي الأفلاك
فيكم كم آيات ***** يالحياك جلالك
منظر الساحرات ***** ومنظر الأفلاك
ياجميل النور ***** ماسه من عيناك
بنظر الأنوار ***** طالعة من مغناك
والشباب يترنم ***** بي معاني غناك
والجمال الفيك ***** عن مديح أغناك

كل معاني اليوم ***** طالعه من معناك
تبسم الأيام ***** لوبسمت سناك
الزهور والنور ***** بانو في وجناك
والزي جمال الحور ***** ديه فته هناك

مهما أقول أوصـاف ***** أشوفها ما واصفاك
يانـقـي اللــون ***** أيه أقول في صفاك
الحريــر يخشــن ***** للصفا الصافاك
والتبــر يبـقــى ***** زي صفر لصفاك

تخشع الأبصار ***** من شعاع محياك
وعُقَّل الأفكار ***** يسرحن في ضياك

النفـوس في هواك ***** يالهواك في حياك
أنا عندي يوم الفوز ***** حبيبي يوم رؤياك
الـرآك غير شك ***** بي حبيبه دعاك
ليه لأنه يشوف ***** كل شئ يرعاك
حتى نور الكون ***** حجبوه معاك
يابـهـي الطلعة ***** أنا كيف قضيتي معاك

الليلة لا قيته / الشاعر سيد عبدالعزيز
ابراهيم الكاشف

الليلة لا قيته

القلب حباه

وبالشكر واليته

ما عشقت هندامه وقامته وتواليته

أنا عاشق أخلاقه وقدرته جليته

ياليته يشعر بى ياليته ياليته

بالزمة با مدهش

وجدانى هزيته

منى الفؤاد بالصد صدعته وأذيته

وأن حلفونى بأسمك عن ضررى عزيته

ليه ودى بالهجران يا حبيبى جازيته

أنا لو ضمنت رضاك

كان شخصى هنيته

وبيك تم لى أملى

الفى الكون تمنيته

وأقول صريح للناس يا ناس السعد ظنيته

عرج على بعد ما خلاص العمر أفنيته

اغنية انا راسم
......................
لحن وغناء زنقار كتبت في عام 1936
---------------------------------------------------------------------------------------------------------------

أنا راسم ....
في قلبي صورة الباسم
أهو ده ....

****
أنا قاسم في عمري ليك أقاسم
أيام لقاك ياباسم
سويتها تاني مواسم ... أعِّيدا
أنا هائم ... بيك يالفريد ونائم
تتنى إن جيت قايم
في المشية راسي وعايم
كدا .... وكدا
****
هل عالم ... إني بيك متألم
ياخالي قلبك سالم
وحالي طرفك حالم
في غريدا
****
ياظالم ... إن فت مابتكالم
وإن عدت مابتسالم
بالله سيب دي مظالم ... تأيدا
مين زاعم ... في الكون مثيلك ناعم
لذيذ لهيجك طاعم
رشيق قوامك ناعم
غصن الندى
يالحاتم ... يالبسمة تضوي العاتم
ثناك برق القاتم
وفاك دارة خاتم

سيدة وجمالا فريد/ سيد عبدالعزيز

من أغاني 1929 لحن وغناء كرومة وكذلك غناها الحاج سرور وسجلها اسطوانة
وغناها أخرون منهم بخيت عمر وعبدالعال بريمة وابراهيم عبد الجليل.

سيده وجمالها فريد *** خلقوها زي ماتريد
في خديده وضعوا الريد
يامن جمالها فريد *** أنا قلبي ليكي مريد
شايقني فيك تحديد *** قامة وحذوذ في وريد
قط مابراله نديد *** حسنك ووصفه عديد
يامنتهى التجديد *** دي مراية ولاخديد
ياجاهلة الله شهيد *** بتميلي من الهيد
والفي الصدير فرهيد *** رمان دا ولا نهيد
ياناعس عيون الصيد *** قاتله وحداها فصيد
يلمع في ضوه تصيد *** قلبي البقالها القصيد
أنا لي فيك نشيد *** بدرر صفاك مشيد
يوزن ملوك جمشيد ***و الفي زمانه رشيد
مابهم كلام ناس زيد *** قلي الهلالي أب زيد
ياحبي أنت تزيد *** بالله زيدني وزيد
حبي ... بطل التهديد *** وحد للهجر تحديد
أنا عظمي ماهو حديد *** بس ليه تهجري شديد
هل دا إحتفال أم عيد *** أم جنه غير وعيد
دنا فيها كل بعيد *** للسيوح أهله سعيد
يالساحرة للتأكيد *** عزك عزيز واكيد
فلتحيا دون تنكيد *** ياللحسود بتكيد

جارو أهلك وجورهم امر/ سيد عبدالعزيز

جاروا أهلك وجورهم أمر بالبعاد والأمِر الأمَر

في ديارهم حجبوا القمر

البديع السحر الفكر بالجمال والحياء أنذكر

حسنو يرمي الزول في وكر شوفتو تسكَر من دون سَكَر

للقلوب ياصاحي أحتكر شئ يخلف خالد الذكر

مفخر الأجيال والدهر حسنه اعجز على ماظهر

في خدوده الحياء إزدهر والطبيعة تناجي الزهر

تدي منظر جذاب بهر زي نجوم السما في النهر

نوره للبدرين أحتقر البهيج النضر الأغر

المحتشم من الصغر يزدري البراق بالثغر

منه كل الجيل في بغر فيه شارد الحسن أستقر

من عيونه أين المفر جيده جيد الظبي النفر

محيه فيه البدر السفر كم بافئدة واعين ظفر

هو الحاز الحسن الوفر زول ويوزن مليون نفر

لويحجبوا الأمر الصدر ماحجبوا دمعي الأنحدر

وكل شئ إن صفا أو كدر في أيادي القضاء والقدر

إما دهري إن صد أو غدر البعرفوا الوفاء ماندر

حبي هاك القول الأبر العيان يغنيك عن خبر

كم نظرت في دهر العبر نظرة أل للحياة أختبر

الجزع في الناس والصبر شفته طوع القدر أنجبر

الجمال والحب في بلادي/ سيد عبدالعزيز-اداء رمضان حسن

والحضارة إزدهارها وإنتشارها
في المدارس والنوادي
العلوم العالية والفنون الراقية
جمالها بادي

ينبي عن أثار قوة الأفكار
والأيادي

الأنجزت أعمال وخلدت تذكار
في جبين الوادي

سودانا العاجبنا رسمه
في نفوسنا مقداره يسمو
الطيور غنت بي أسمه
وكم صايح ينادي

بأسمك يابلادي
هتفت به الجنود
وغنتبو الشوادي

في بلادنا مناظر الطبيعة
حافيها السحر الحلال
في الشرق الميناء العظيمة

بيها الثغر بسم الدلال
والغرب الحرست مداخله
الهيبة حصون التلال

وجنوبها ينافس الشمال
حيوية وعظمة وجلال
في بلادنا القرى والمدائن

أثر النعمة عليها باين
وتاني محل ما العين تعاين
تشوف بهجة وروح وإعتدال

في منظر جذاب ودادي
أحي السودان وأرضه
والأرض الطاهرة النقية

أحي السودان وأهله
أهل العبقرية
أهني السودان بشعبه

طموح النفس الأبية
الوافي راعي المحارم
أكرم من الغيث مكارم

وأصلب من الحده صارم
إن في الحرب وإن مسالم
يمتاز بالروح القوية
مقدام ومن طبعه هادي

اجلي النظر/ سيد عبد العزيز

اجلى النظر يا صاحِ منظر الانسان
الطرفه نايم وصاحي صاحي كالنعسان
فى الضي جبينها النادى والبدر خلان
تجمع لطافة ورقة ونفرة الغزلان
مابين أن جسيمها اللادن الكسلان
يزرى الحرير الناعم والفريع اللان
دعجة ومكحلة خلقة عظمها الرحمن
بكمال جمال الخلقة وشحها الإيمان
جذب المناظر مننا منظرها الفتان

حين جات تميس تتختل وشفنا فيها البان
بدرى وغمامة ودميه فى فريع البان
وردفاً يتب بدروعه والقديم غلبان
من دون مرور النسمة أم قوام نديان
تجى فى الدروع منقسمة تميل تخذ أحيان
تقدل تتاتى كفيلة ويلعب الطغيان
وتبرع المتبرع وبالخمرة نديان

أنا قلب طار من صدرى يا صديقى عشان
شفت حور الجنة داخل الحيشان
شفت العيون بتقهقر ضابط النيشان
شفت الجمال الوافر فى عظيمة الشان
اقسم يمين يا بنيه الهلاك لى هان
ذرفت دموع عينى والفؤاد ولهان
أنا فى الخلوق ما عليّ الراضى والكرهان

لو كان وهبتى الى نظرة با أم دلهان
أنت نور الدنيا الضاوى ليه زمان
أنت وهبك ربك تاج بها الأزمان
إنتى آمنة خدرك وبهجة أمدرمان
أنتى أنتى مناى اللى مخافى أمان

ليكى السلام ما غنى شادى أو رطان
ليك السلام ما حن مفارق الأوطان
يخضب بنانك حنة وللوريد قيطان
وانيل رضاك يا الملكة نجلة السلطان

مسو نوركم / سيد عبد العزيز

مسو نوركم شوفوا المن جبينة صباح
والصباح لو لاح لا فايدة فى المصباح
هل اتلك حديث الكوكب النطاح

قمرة تمطر خمرة حارسا الفضاح
لو تعيرنا محاسن شمس للايضاح
مابتعيرنا محاسن محيها الوضاح

نور جمالا دهشنا معشر الفصاح
بين ناطق صامت بين صامت صاح
غالية غالية محاسن فيها شوق يا صاح

الجمال الفيها..كل معنى صاح
نصدر الايات من نور على الالواح
المعانى الفرد وميتة الارواح

فى العيون المرد والسحر لاواح
تجلب الالباب ويفرح النواح
القوام اللادن والاريج الفاح

من جسيما الناعم الاسمر التفاح
خلا عقلى وخلا فى هواى كفاح
جيش هواها احتل قلعة الاصفاح

روضة غنى جمالا يجلب الافراح
حورا من الجنة تسقيك راح
كل هذا تراه ما بزيل اتراح

من بحبو تهانت واستراح وراح
ياليالى احبابى ما شفيتى جراح
بل شفيتى فؤادى ومدية الجراح

صرت اتلو حديثك فى الوجود بصراح
لو تليت بو كتابى سميت بالشراح
كم نظرنا مناظر يعلم الفتاح

لو قفلنا قلوبنا كانت تكون مفتاح
ادرى ام ما ادرى صرت كالمفتاح
لو رضاكى هلكنا للهلاك نرتاح

ما جنيت بهواى ما على جناح
ه شكيت للقمرى لو يعيرنى جناح
يكفيك لسانى الغنا فيك ليك وناح

لو رثيت بو حياتى ما زلت لى مناح.

يا بت ملوك النيل يا أخت البدور/ سيد عبدالعزيز
مين لى علاك ينيل فى البدور والحضور

الجبرة فيك بتخيل محمية الحما
الما حام حداه دخيل
ماكان أبوكى بخيل بت عز الرجال
أهل الدروع والخيل
والهنا... والسرور
يا السامية ست الجيل طرفك من حياء
فى عصر السفور خجيل
حسنك وضع تسجيل فى صحف الدهور
يتلوه جيل عن جيل
لى يوم النشور
الهيفا يا الخنتيل حروف آيات محاسنك
أرتلن ترتيل
يعجبنى فيك تمثيل أخلاق الملاك
فى سطوة القتيل
الفارس الجسور
غضنك رطيب وعديل شعرك ليل
جبينك يخجل القنديل
النور عليكى سديل يا معنى الجمال
الما أتوجد له عديل
فى ناس ولا حور
فقتى الكانوا قبيل ما خدات فى الجمال
جائزة نوبيل
حيرتى كل نبيل عيناك سحرهن
يسحر سحر أبابيل
يخترق الصدور
يا صاحبة الأكليل ما أظن النهار
العين تدور له دليل
محياك نوره جليل كنت أقول شمس
لو ما الزمان كان ليل
أن عليك نور
لا زلت ليك أميل يا رمز السعادة
الما أتوجد له زميل
يا آية التكميل يا مراية الجمال
الفيكى كل جميل
ريحانة العصور

اقيس محاسنك بمن/ سيد عبد العزيز

ياالدرة الماليك تمن
والله نور عيني نور الزمن
ما شوفنا في طول الزمن
سواك بدري في داخل كمن
الانوار يتزاحمن
في خدودك اخدن امن
ومن فاهك يتقسمن
بروق في بروق يتقسمن
دي الدنيا أم جنة عدن
شوفنا ملاك لابس بدن
انسان لكن مفرداً
حاز النور حاز اللدن
غصنه مهفهف أملداً
وهيبة اسد في عيون شدن
يالجبرة المازجة العجن
جبينك زي فلق الدجن
وجسمك بالطيب أنعجن
اذا النسمات بيك عرجن
طبقات الجو يتأرجحن
والانفس يتهيجن
أنت نرجس من الوسن
لعيونها الأعين جسن
وأن آية الحسن الأسن
وغصون الروض يتمايسن
في ذاك الزي الحسن
وكل حُسن مالك حَسن
روضك زي عارضين صفن
حلال سحرك ماسحر فن
كواكب النور البلصفن
بصفاتك ما أتوصفن
بدور الكون لو ينصفن
يسجدن ليك ما يكون وفن
فيك عيون الرائين يرن
محاسن بالحسن إزدرن
ومهما أفكارهم يكبرن
زي حسنك ما يعبرن
مع البدرين سيرك سرن
ومن وزنك هن يقصرن

قائد الأسطول/ سيد عبد العزيز

يا قائد الأسطول تخضع لك الفرسان

ياذو الفخار والطول أرحم بنى الإنسان

مين لسماك يطول ما يطولك اللمسان

معناك شرحه يطول والله يا إنسان

أصدق كفانا مطول يا ذو الحسن إحسان

أنا عقلى بيك مختول والناس عقول ولسان

ما بنكر المعقول آمنت بالأيمان

بالطلسم المصقول بدل لخوفى أمان

بالنور سحرت عقول كانت صميمة زمان

يا من تحق القول قتل النفوس حرمان

وما الجندى والمكتول و طالب الغفران

من أيده راح منتول واتوهد النيران

فاقد الصواب مبتول مما رأى حيران

أصبح زهر مشتول وفاح ملا الجيران

يا علة المعلول كم أومى ليك بنان

كم من أٍسير مغلول مالاقى فى لحظة حنان

يرى وعدك المحلول زى حجة الوسنان

والكان سكونه تلول ما ببدلهم بجنان

يا حبيبي كون ممهول وليكون ماكان

الفى غد مجهول والماضى أسمه الكان

نفديك شباب وكهول ونبقى ليك أركان

فى حبك المأهول ونخدم السكان

يالفى سماك مفصول تنشاف عيان وبيان

ما عرفنا ليك وصول وما دنيت أحيان

إنت الخطاك أصول يعلم الديان

مثلت فينا فصول ما بدرسها النسيان

يا مداعب الغصن الرطيب/ سيد عبدالعزيز

يا مداعب الغصن الرطيب
في بنانك إزدهت الزهور
زادت جمال ونضار وطيب

يالمنظرك للعين يطيب
تبدل الظلمات بنور
وتبدل الأحزان سرور
إن شافك المرضان يطيب

تعجبني والشيء العجيب
هادئ واليف ماك النفور
بى عفتك صنت السفور
والحسن والأصل النجيب

أنا وأنت في الروض يا حبيب
راق النسيم وحلى للمرور
بقى أحلى من ساعة السرور
وأدق من فهم اللبيب

والروضة في موقع خصيب
حضنوها وإتلافوا النهور
ترى فيها أنواع الزهور
من كل لون أخدت نصيب

يانع ثمارها ونص وطيب
أشبه بربات الخدور
الإنبرجن في يوم حبور
زادن جمال ونضار وطيب

في الروض غنى العندليب
ورددوا غناه الطيور
ترتيل أناشيد الحبور
وفتيانها يوم عيد الصليب

دنت الثريا بقت قريب
بين السلوك في تاني دور
في ثانية كم سطعت بدور
وأهلة كان نوعن غريب

شيء ينعش الروح في الأديب
ويحيي روح ميت الشعور
للقاك تنشرح الصدور
ويفرح القلب الكئيب

يا أنة المجروح / سيد عبد العزيز

يالروح حياتك روح

الحب فيك يا جميل

معنى الجمال مشروح

الحب لهيب فى الجوف زى الزناد مقدوح

منه الجبابرة تلين لصوت بلابل الدوح

وتصاحب النسمات تفضل معاها تروح

بين نغمة الأشواق ومحاسن الممدوح

الناس تحب رؤياك بالخاطر المشروح

يا ملفت الأنظار يابسمة المفروح

وانا أهدى ليك الحب حب من فؤاد مجروح

حب الشحيح للمال حب الجبان للروح

حورية فى السودان بحبى ليكى أبوح

عنب جناين الشام أتمنىمنه صبوح

وانشد فؤادى الضال بين الرياض مذبوح

وأرى الهلال فى ظلال..تلك الخميلة يلوح

أنا لو ضمنت رضاك اكون سعيد ممنوح

يا من تسر رؤياك تفرح وتنسى النوح

تكسى النهار بجمال خديك جمال ووضوح

منها الغزالة تقيف فى موقف المفضوح

من الوله للقاك دمعى الغزير مسفوح

ناقم على الأيام مع أنه طبعى صفوح

انا والخيال فى جدال وانت بنداك منفوح

كل ما النسيم يغشاك زى الحديقة تفوح

رايق كحيل نعسان انسان رقيق وجموح

ساحر العيون بجمال فى سواك ما مملوح

ان كان تميس بنميس وان كان تموح بنموح

عدل الطبيعة جعل جور الحبيب مسموح

مع كلمات اغاني/ الشاعرصالح عبدالسيد -ابوصلاح

- ولد الشاعر ابو صلاح او صالح عبد السيد بحى الموردة امدرمان عام 1890 م .

- درس القرآن بخلوة الفكى مكى حسن حسين.

- مكث بحى الهجرة امدرمان مع اقربائه ثم انتقل الى الخرطوم بحرى والتحق بمدرسة الامريكان الابتدائية
لكنه لم يستطع مواصلة دراسته فعمل صبى نجار بمصلحة الوابورات ثم بالحملة الميكانيكية
وبعدها استقال منها وتنقل بين الاعمال الحرة.

- تزوج مرتين وانجب البنين والبنات.

- توفى عام 1963 وعمره لم يتجاوز الثالثة والسبعين.

صالح عبدالسيد ابو صلاح «إشتياقى وهجرك حرام»
صالح عبدالسيد أبو صلاح «أضيع فى هواك»
صالح عبدالسيد أبو صلاح «اعطف علي يا ريم»
صالح عبدالسيد أبو صلاح «القمري المظلل»
صالح عبدالسيد أبو صلاح «بدور القلعة»
صالح عبدالسيد أبو صلاح «حِن يا قمر»
صالح عبدالسيد أبو صلاح «رشا يا كحيل»
صالح عبدالسيد أبو صلاح «شوف العين»
صالح عبدالسيد أبو صلاح «ضامر قوامك لان»
صالح عبدالسيد أبو صلاح «غزال الروض»
صالح عبدالسيد أبو صلاح «في الخوجلاب»
صالح عبدالسيد أبو صلاح «قسم بي محيك البدري»
صالح عبدالسيد أبو صلاح «قلبي همالو»
صالح عبدالسيد أبو صلاح «لحظك الجرّاح»
صالح عبدالسيد أبو صلاح «لو تجازى ولو تسمحي»
صالح عبدالسيد أبو صلاح «وجه القمر»
صالح عبدالسيد أبو صلاح «وصف الخنتيلة»
صالح عبدالسيد أبو صلاح «يا أم جبين بدري»
صالح عبدالسيد أبو صلاح «يا جوهر صدر المحافل»
صالح عبدالسيد أبو صلاح «يا حبيبي فؤادي طبعاً يهواك»
صالح عبدالسيد أبو صلاح «يا ربيع في روض الزهور»
صالح عبدالسيد أبو صلاح «يا ليل أبقالي شاهد»

البديع الهواك سباني / ابوصلاح

البديع الهواك سباني يا اخا البدر يا مكمل
*******************
كل من طرفه فيك تامل.......... قلبه من الغرام تحمل
كم عقل فى هواك مهمل ........ مزوى بين خصرك المزمل
المضمر فريعه بانى علاه بدر الصفا المجمل
*********************
يا جميل هجرى طال تسلسل .......... بين ايديك حبى ليك تمثل
يا رشيق عن قتيل هواك سل ........... برقك المن ثناك يرسل
نور عقيد درك الجمانى ضاوى بين فاطرك المعسل
************************
لى سواك قلبى لا يرى محل ........ ومستحيل عن فؤادى ترحل
وما يجد عن شروط هواك حل ........ والسهم منه جسمى ينحل
كم سحب لحظة اذانى من طريفه السقيم واكحل
***********************
ديل ايديك ام حرير مجدل ....... والوريد ولا القامه اعدل
هل صباح بالمحى تبدل .......... وده الاسيس ولا نور مسدل
والكتيف لى ضميره تانى فى ارايك الدروع مهدل
**************************
ركنى ليه من هواك تزلزل ......... والنفوس فى رضاك تبزل
يالرشيق الحشاك مهزل ......... ياملاك من علاك منزل
المريض فى الهلاك يعانى يحيا لو طرفو فيك تغزل
*************************
يا قمر فى سماك مدلل ........... شوقى ذاد ومنامى قلل
الملك للغرام تذلل ........ لى قلب برضاك تعلل
يا الهواك اضحى لى تهانى لابسه تاج بالدر مكلل
**********************
كيف هواك عن فؤادى ينقل ...... ده المحال ما اظنه يعقل
يار قيق الحشا المفقل ......... يضوى سيف طرفك المصقل
لو سحب لحظه هندوانى للجمال الرواسى قلقل
**************************
قلبى بذكرتم تاهل ............ وشوقى كاد منه عقلى يزهل
والدموع من عيونى تبهل .......... ما اظن بالعلى تجهل
فى الخيال احيا لو ترانى والنجوم من وصالك اسهل

يا سمير بنظرتك / ابو صلاح

يا سمير بِي نظرتك اوفي المِعاد العيون الشافتك ما اسعدا
من هواك انا جسمي دايماً في ارتعاد امّا نومي الفرّ ما منظور يُعاد
يكفي وجدي ويكفي هجري والبُعاد ِرق وجود وانظر لي راحات قلبي عاد
لو رضاك ينجز حظوظي يساعدا
زاد غرامي و عيشي قط ماليّ لاد يانُسِّيم غيثني من الم الجلاَّد
جيب لي طيب الجسمو أحلي من الجلاَد تسري بين اكمام بساتين البِلاد
مافي زهرة و الا عزمك قالدا
يانُسيِّم نومي قلّ وزاد عناد استعد اصبَح عليك الإستناد
اجتهد في سرعه زي قدح الزناد تلقي سيّاف لحظو صاحي وطرفو ناد
احتفِلبو و لِفُّو بي توب النَدا
قولُّو ياالمكحول طبيع من غير ثماد يالصديرك شال ثمارو وخصرو ماد
ياالمحجّب في غُرف ذات العماد لو سهام عينيك صدف راسي الجماد
غير شك دكَّ الحجاره و هَمّدا
صرت اعجب دمعي ليه ملأ المِهاد صبري ولَّي وشوقي دايما في اجتهاد
الغرام بي جيوشو لي حصون قلبي هاد طرفي خاصم نومي و انطفي بالسهاد
ماشكيت الحب شكيت ما اللي هَدا
ليلِي طال عتَّم نشر توب الحَداد من نجومه توشح الدُرر الجُداد
طرفي ساهر يتلو آيات الوداد الشجر اقلام جميع و النيل مِداد
لو كتب اشواقي ليك ما عددا

ولهان هامى دمعي/ ابو صلاح

ولهان هامى دمعى سهران ساهى بالي
بعدك لى ميسر وقربك ليه ابالي
اخشى يكون حبيبى ترك البين حبالي
ما ضراك وطيفك لو فى النوم صبالي
يوم ودعت حسنك يوم ودعت بالي
امتى اشوف جمالك وامتى تكون قبالي
بى ذكراك معذب كل ما الليل مسالي
قلبى يزيد حنانو وقلبك ليه قسالي
جرت وجار زمانى وخاطرك طاب تسالي
مهما جد بينك صابر مانى سالي
ابكى حبيبى بعدك ايامى الخوالي
انشد فيك صفاهن وانشد فيك موالي
لولا سيل دموعى بلانى وروالي
حرقت جسمى نارك وحرق الكان حوالي
صدو سبب ذهولي وبعدو سبب ملالي
حبو ملك فؤادي واتمازج خلالي
نور محيو الهلالي ونور خدو البلالي
بعدت عنى دارك وشط البين رحالي
انا سهران حبيبي وطرفك ما صحالي
انا ولهان وراضي ومرك عندى حالي
واللايمني فيك يا خالي يصيبه حالي
عنب الشام بحبو الا مثالو غالي

لو تجازى ولو تسمحي/ ابو صلاح

لو تجازى لو تسمحي .............. منى ريدك ما تمحى
***********
بى خيول الشوق ارمحي ............ واردي دمعي البطمحى
بس عشوقك لا تــقمــحى ............ بى طريف العين المحي
***********
تمسى بهجة ونور تصبحي ........... وفى قلوب الناس تربحي
خــلى القـلب البتنبـحـــــــى............. وهاك نوم العين اضبحى
***********
مــن عيوني بتروحــى ................وفى قلبي بتســــوحــى
برضي فاهم سر الوحي .............الفى حـــواجبك يتلــوحى
***********
من سهــامك تتراشحى............... وزاحمي كشحك اكشحي
خلقه عرقك مسك ارشحى..........والنســيم بالطيــب كشحي
***********
كيف خصيمك بتمدحى.............. وكالحــمــائم بتصدحــى
كيف عزولك لا تردحى.............. وأنت جنة ونار تقدحي
************
بالمـــــبنة البترزحى .....فكـــرى مالك بتزحزحي
عن عزولك لا تفصحي...........وبى سهام الدغس الفحى
************
خلى دمعه يسيل طفحى ............وبالغرام غطى ولفحي
يازهيرة الروض فتحي ............والنسيم بالطيب كتحى
***********
العزول المــا بســـتحى ..........بى سيوف العين نتحى
يا الحمامة البتصـيحى ........... وبى فروعك بتميحى
***********
لا تحرقي الجوف ريحى ...........وشوفي دمعي البتسيحى
من غصونك ما بتبرحى ..........يوم تبـكى ويوم تفرحي
***********
في المطيرق بترجحى ............وبالنســـائم تتمرجـــحى
لا تفرى ولا تسرحى ............هاك قليبي البتجـــــرحى
***********
تابعي فن الحب تنجحي ...........كان صدقت وكان تبجحى
المـــــبكم بتنصحــى.................وبى نغيــمتك بتفصحـــى
***********
جيبى عقلى الطاش انصحى ...........كــان مغيب والان صحى
***********

من اغانى ابوصلاح التي سكب فيها دموعه أغنية لو تجازى أو تسمحي وهى أغنية غير مشهورة سجلها الفنان بشير الرباطابى سنة 1928 بالربابة ومعه ابن عمه احمد عبدالله ككورس ... وبشير الرباطابى هو أول فنان سوداني سجل على اسطوانات لأنه كان موجودا بمصر في ذلك الوقت بينما الفنان عبدالله الماحي هو أول فنان يسافر من السودان إلى مصر لتسجيل اسطوانات وكان ذلك في العام 1928 بواسطة التاجر نيكولا كاتفانيدس وهو والد ديمترى البازار.. ومن الاغانى التي سجلها بشير الرباطابى بالإضافة إلى أغنية لو تجازى لو تسمحي أغنية اشتياقي وهجرك حرام وكذلك أغنية وسطا ضمر واتهادى وأغنية فريع البانه المن نسمة وهى من الحان سرور وهى الأغنية الوحيدة لابوصلاح التي لحنها الحاج محمد احمد سرور....وجميع هذه الاغانى من كلمات ابوصلاح

منقول

اضيع في هواك / ابو صلاح

أضيع في هواك يا مهفهف حرام....ما ذنبي عندك خلاف الغرام
حبيب قلبي زاد الفؤاد انضرام....يذوب قلبي لذكركم احترام
خلاف قربكم خلى مالي مرام...وقرب المحب من شئون الكرام
وحيد في الجمال حبه لروحي سام.....يبق در عقيد فاطره في الابتسام
مسلح عيون لحظه لجروحي سام...وسيف العيون أقوى من الحسام
رقيق خصره سادل عليه الغمام....يجاذبه النسيم في المرور كالذمام
يميل بالشمال والجنوب والأمام....يكاد أن يرك فوقه غصنه الحمام
بعادك صعيب يامدلل نعم....وقربك الىّ من ألذ النعم
وذكراك شرابي وشوقي الطعام....وليلة لقاك خير من ألف عام
عن وصفك لسان العزول في بكم....محكم جمالك دقيق الحكم
وكم أبدو ليك شكوىياخلى كم....وأنت خصيمى وأنت الحكم
جمالك شهير في الخلوق زى علم....تقيد من شعاعك كواكب الظلام
محال استنط لي عزولك كلام....أضيع في هواك يا بديع والسلام

ياليل ابقي لي شاهد / ابو صلاح

يا ليل أبقالي شاهد على نار شوقي وجنوني
يا ليل صار ليك معاهد طرفي اللي منامي زاهد
دن لي سهر وأشاهد فوق لي نجمك ظنوني
يا جميل لي سهري واجد وأراك نايم وهاجد
مين لي عيني ناجد بي دموعي الفرقوني
لا تكون بالنظرة جاحد حلمك في المية واحد
منك لي ربي شاهد بين ايدك يا حنوني
خده البي مطارقه فاصد جامع كل المقاصد
طرفه المكحول وراصد بي سهامو الألموني
براق سنك يساعد الغيم المزنه راعد
ساكن قلبي ومباعد تشتاق شوفتك عيوني
حبك في الجوف يطارد ما بين صادر ووارد
يا حبيبي اللي فارد نظراتك يأسروني
بعدك لعقلي فاقد وقربك جوه جوفي واقد
أشواقك ضيعوني

في الخوجلاب / ابو صلاح

مـاكنت رايق وساكن في صفاء وتأمين
فـي الـخوجلاب ياقلبي مني شالك مين
ديـل الـبروق الـشالن ام درر ياسمين
مـابين ظـل الايـك ونـفحه الياسمين
أم ديـل شلوخه تلاته ومن تحت وسمين
يـاقلبي بـينه وبـيني اليقسمك قسمين
جـات روايـح الورود مع الزلال والتين
فـوق الـجمال الـفردي اليلة ملتفتين
بس ايه لزوم انوارنا من شموع ورتين
مـادمت انـت وبـدر الـتم زي اختين
بـقي ديـسك اطول منك ولله متقايسين
شـفنا الـضفاير جـرو للقديم كايسين
أنا شوقي دايماً زايد وماشي في تحسين
انـا صـبري قل ويشهد بي ازاي حسين
برزن نهوده وعامن في الهواء مجاهدين
وعـلي هـلاك العاشق ديمه مجتهدين
صاح وهبه فاقد عقله كم جريح وطعين
الـناس جروحن تسعة انا جروح تسعين
عـد الـشوادي الـغنن يالغرام نايحين
عـد القماري القوقن في الفروع مايحين
عـد الـنسايم الـمرن بالمسك فايحين
تـغشاك ياعثمان نعمة وسرور كل حين

ضامر قوامك لان /ابو صلاح

ضامر قوامك لان قلبك قسى وجافيت
ليه يا جدي الغزلان أسهرت جفني ملان
يذرف دمع نازل كالمزن في الهملان
ما بصح ليك يا فلان
طرفك دوام ناعس وأنا طرفي ما غفلان
ظهرت شكلك بان
كوكب منير أشرق من فوق غصين البان
كم ليك محب تعبان
درب العشق ساهل ودرب الوصال صعبان
كالظبية في اللفتان
أما الخديد ناعم ذي زهرة البستان
تجد الطباع آمن
وحسن بديع رائع منظر جميل فنان
لا يحصى وصفه لسان
وجهك بدر كامل من البدور إحسان
ما قصدي فيك لمسان
مقصودي بس شوفتك لا تضيعني يا إنسان
القمري في الاغصان
ذكرني ألفاظك وقلبي إنطرب فرحان
يتواري لي لمحان
بروق درر فاهك بالراح والريحان
ليه كفك إتحنن
وليك قلب قاسي ما فيه لي حنان
يالراقص الفنان
حبك ملك قلبي وجننت عقلي جنان

يا ربيع في روض الزهور / ابو صلاح

يا ربيع في روض الزهور ......... عيش منعم طول الدهور

بى رنين الصوت الجهور ........... واحتفال غاليات المهور
نجم حظك بدأ في الظهور .......... ساعة بينن توزن شهور

صابنى ظبيا عيناه حور .......... والدو بدري وأماتو حور
سيف مهند طرفو الجسور ...... وفى خدودو النار والبحور

وجهو يخجل نور الفجر ..........شعرو فوق الأرداف يجر
ديمه تابع الصد والهجر ......... اصلو حكم الغي كلو جور
****
يا خلاصة نــور البدور ........يا المحجب وساكن الخدور
كأس غرامك في الناس يدور......عبـى زود لايفـوتنى دور

ديسو وافر كامل الغزر ..........صيد عيونو الرماش فزر
واللحاظ ما بتقبل عــذر ..........في قلوبنا تحاكى الجزر

الضمير اللان في قصــر..........من صديرك غالبو البصر
هزّ يشبه سيف النصــر ..........يا مليكة حسـن العـصور

ردفو رجا وقلب الصدر ..........في الكتيف الدعك السيور
فكرى طشه وقلبي الغيور ...... منى فرّ وسبق الطــيور

من غرامن أين الفرور .............ليت دمعي يطفى الحرور
يا ربيع أتوقى الشرور ..............دام عليك الهنا والسرور

قلبي همالو / ابو صلاح

قـلبي هـمالو خـديدك وجـمالو
مـعذب فـي هـواك مـالو

بـدر حـسنك لاح والـقليب مالو
لي هواك وشوق قلبي عمالو

يافريع ياسمين متكي في رمالو
قولي عاشقك وين ضاعت آمالو

شـعره حـاكا الـليل وحاجبه هلالو
فر بسميو الغيم والبروق لألو

مـافي مـانع لـو مـوتي حلالو
نهدو جوز تفاح صدره لو لالو

الشادن المحكول قلبي يصبالو
وأخشى من لحظو ومن رمي نبالو

كـم جـريح سهام عينه ضاربالو
وبيه لايدري ولا علي بالو

الـجوهر الـفردي الـما إتلقي مثالو
ليهو قلبي يلين وقلبو يقسالو

حبه صبحني وحسنو مسالو
غير رشيم في خدودو دماعي ماسالو

خصره ناحل زاد جسمي إنحالو
طرفه ناعس نام وطرفي يصحالو

الـفريع الـلان دمـعي سحالو
يانسيم أرجوك شوفو كيف حالو

فـي الـنجوم مرفوع مجده يبنالو
بين سماك أعزل حظي مانالو
وحـرسه حـولو يدور إستعدالو

جوهر صدر المحافل / ابو صلاح

يا جوهر صدر المحافل ..........روحي معاك اتلطفيله

ما النور الفى حليه رافل.........في حق نهده قلوبنا قافل
كالظبي الفى مقيله غافل......تاره يميل والتانيه جافل
وجهه ينور والبدر آفل ......فوق للبدر يزيد نفيله

بالنور خدك لاح مقابل..........للشعر الطال ليله سابل
سهم ألحاظك لي نابل.........بى كل شئ دون هجري قابل
ينسب نوحي على البلابل.......وانتى القمره بتنسبيله

ليك جوز عينين نعسان وكاحل.......وخصرا يميل وصدر راحل
ولى وجدي اللي جسمي ناحل.......بحر الشوق ما ليه ساحل
بيني وبين النوم مراحـل.........وين للطيف أنا القى حيله

الفرع البتنى راتــل...........طيره ينوح في غصونه حاتل
بهوى نسيم لي فكرى شاتل.........والأسد الفى القيد يناتل
يتأكد ما ليهو قاتل ............غير مكحول ظبي النتيلا

ضاوى سناك لي بريقه راسل........لاح بين عنابتين عواسل
صدرا يرجح وكتفو خاتل...........رنا طرفك للسيف يماثل
ليه ما يجندل كل باسل ..........وساحبه دغس وخدود اسيله

المرنوع لي كتفو هادل.........في دروعه ولى معاصمه جادل
أنا ساهر والليل سادل ..........شرط الحاكم يبقى عادل
لا اقبل بهواك مبادل...........كيف اعشق وارضى البديلا

تمنع طيفك لي يغازل.........داخل قلبي أنا ليك منازل
يا لايم لا تبقى هازل..........أنا في الحب لروحي باذل
هل عاشق يسمح لعازل.........خلى نصيحتك عنى زيلا

يوقد جمري ودمعي باهل .............كيف نار تشعل في مناهل
ضاق بى الكون مع انه ماهل........نومي تصعب ووجدي ساهل
لو بى حالة سهري جاهل ..........دى الأنجم أسال سهيلا

لى طيفك ما لقيت وسائل................غير بسط النسمات رسائل
اغرب شئ وأعجب مسائل................حلم الصاحي ودمعه سائل
لو شكيت في امرى سائل................البدرين كونك مثيلا

زايد شوقي ودمعي هامل..........جمر الحب لي جسمي شامل
حتى الطيف لي لا يجامل............مع كلا ما كنت آمل
دمى تحنن بى الأنامل............وهل يرضيك كده ياجميله

شوف العين قالت ده لالا / ابو صلاح

شوف العين قالت ده لا لا
صدت من تيها ودلالا
ريدتك ساكنة الجوف خلالا
و الاعضاء امتزجت خلالا
براق سنك شق لالا
وسهمك صاب احشاي قلالا
اسباب الغي و العلالا
ضمرتها والخصر العلالا
نور في نور ياذا الجلالا
وخدانا بالمعه انجلال
في الترنيع ماليك مثالا
علمتي الغصن الرتالا
شوفتك كم عاشق اتالا
يانسام اوصف جمالا
والقامة السيرك امالا
اوصف لي اسباب كمالا
وقول لي ام خد هجراني مالا
النسام شال الرسالة
وفي التوضيح روق رسالا
ذكرني الرطب العسالا
وهاج الشوق والدمعة سالا

لحظك الجراح / ابو صلاح

لحظك الجرّاح
أذاي فيه ، وفيه الطرب والراح
مناي يا زهرة الأفراح
***
للقلوب شرّاح
مبتعد شيء عجيب ،
مسجون وعندو سَرَاح
بيّ ضاق الكون ،
لا أجدلو بَرَاح
منّي فارق ، وشال
نوم عيوني ورَاح
***
عمري أضحى مُبَاح
وفي الغرام لا أقصد
غير لقاك أرباح
سِرِّي ليك يُبـاح
مع الظلام تتبسم
وليلي يبقى صباح
***
جيش غرامك زَاح
هَـدَّ حِصـن المُهجة ،
ولي دِمَاي نَزَّاح
وعقلي كـاد ينزاح
وقُلّي هجرك جَـدْ
يا جافي ولاّ مِـزاح
***
ليك مُحَي وضَّـاح
وليك جبين بي نور
ماء الحياءْ نَضّـاح
والدمع فضَّـاح
وبي سِـرْ هواي البَيْ
تعلمبو دون إيضَاح
***
تِعبَت الأصْـفَاح
وطرفي جافى النوم
من طِيب عبيرو الفاح
من جفونو صِفَـاح
في مِبيسمو عقد الدُر ،
في صدرو جوز تفاح

القمري المظلل / ابو صلاح

القمري المظلل بى ورق الأراك
روح لي حبيبي وقولو متين أراك
****
يا الفى قوس حواجبك ناصب لي شراك
بيعك في المحاسن والأرواح شراك
يا الفارم فؤادي يا الضارب ضراك
شيل النوم ورجع قلبي الطاش وراك
****
الــدر المنظم عقــدك ولا فـــاك
والعناب مكنتل أم خضرة شفاك
عيد النظره داوى الجرح الما خفاك
الصد والتدلل والهجران كفاك
****
الظبي المروقل جـــافــل بى وداك
يسكر سمعي صوتك من راحة نداك
يا الكاتل عشوقك بهدل بى عداك
عندك جوز قنابل في صديرك هداك
****
الفرع المفرهد في روضة نداك
شعرك ليل وخدك ولع نور هداك
كيف ما تشيل قلوبنا روحي تروح فداك
والردف المرجرج يلعب بى فداك
****
الصدر المقبقب يا الضامر حشاك
من ميلة ضميرك فرع البانه شاك
بى سهم الرشارش جوّ ضلوعي شاك
أصلك لي ودار أعمارنا الله نشاك
****
تايه فكرى عايم في النور الملاك
من بهجة محاسنك كيف اتاملك
عبدالحـــافظ ابشر حــظك تملاك
هل تدرى أب عوارض إنسان أم ملاك
****
يا المن در مخلق كيف انظم صفاك
وين نومي المعلق يا أب طرفا غفاك
عبدالحافظ أصلك نجم الحظ لفاك
عيش بين سرور أتمتع في صفاك
****
يا جدي التمائم ظل الغيم رعاك
راتع في الخمائل قانص ما سعاك
كيف تصطاد قلوبنا وما الشئ الدعاك
ارجع من هزارك جيب قلبي المعاك

غزال الروض / ابو صلاح

فيك رايح بالي
تفداك الروح
أظهر ولا تبالي
يا غزال الروض

في دجاك يا ليل
كم طيب..أقبل هبالي
ده الجنن قيس
و كُثير قبالي
متي لي يعود
عقلي ويصفالي
يرد الروح
في الجسم البالي

طيفك في النوم
لو كان يصفالي
أتغزل فيهو
ينظر لحالي
متي مني يفيق
عقلي ويصفالي
رحيق مختوم
في لهيجو الحالي

يا الفاطرك نور
وفاهك عسالي
جننت ألوف
عشاق أمثالي
في حبك أضيع
و لهواك ما سالي
بس قصدي دوام
يا جميل تطرالي

حبك يمزج
أعضاي إجمالي
لو كنت يمين
يهواك شمالي
يا بديع ليه فيك
ضاعت آمالي
كان مالو هواك
يا مدلل ومالي

يا أنيس الصيد
الحاجبو هلالي
كان مالو هواك
يا مدلل ومالي
لا أسمع فيك
أقوال عزالي
أسمع وأطيع
أمرك يا غزالي

يا رشا يا كحيل / ابو صلاح

يا رشا يا كحيل غيثني
الهـــــــــــوي ســـــــــباني
يا الامرضني وماطباني
في خديدك يلوح نور رباني
نيران اشواقك لاهباني
واسهام الحاظك ناشبانـــــــي
ومن ضمن الحاله التاعباني
مهضوم كشحك وصدرك باني
يتمادي يميل خصرك فريع باني
من شفت الحسن الفتاني
قلبي ترحل ووجدي اتاني
ومال جيش حبك عتاني
بسهامة الما بتختاني
ومال صدركلحشاك تاني
وكتفك مال به فريع بستاني
يتكل في دروعه يبوس تاني
لو للشعر قصيدو مساني
ما بجيد وصفك غير لساني
في فؤادي الحب مساني
واصبح بي هواك وما ساني
مايصح منك تنساني
لوغاب شخصك عن انساني
غير شك اوصاف حسنك مؤانساني
هبتلي روائح داهشاني
يانسيم عقب عود علشاني
قول ليه غرامك اغشاني
وادركني الدمع الرشاني
الجمال شانك والحب شاني
يا نسيم روح بلغ واغشاني
بي حق من انشاك وانشاني
ليه يا ملاك حسنه سباني
ليك نوره وليك نار سارجاني
طرفي اللمحك هو الجاني
في بحور اشواقك زجاني
فيك خاطر بي ونجاني
اعلم اقبل سعدي وجاني
لو في الاحلام طيفك نجاني

يا حبيبي فؤادي--ابو صلاح
::::::::

يا حبيبي فؤادي طبعا يــهواك أنا أرضى هلاكي ولا أرضى سواكـــا

يتلألأ خدك يلمع ضواك يتمايل خصرك ما حمله قواكـــــــــــا
يامساوي البدرى وهو لا يـسواكا لحظك يمرضني وحق من سواكـــا

يا الزهرة اليانع رايق في خبـــاكــــا العين لغرامك شـــوقــا تتبــاكـى

يا ساكن قلبي متى طرفي يــــراك هل تدري عشوقك هو من أسراكــــا
ما أصعب حبك وياما أطـــــــراك أنا قابل هجري لو كان ســــراكـــــا

طبعا ما اعلم بالحب لــــــولاكــــا يا منعش روحي ويا معنا هـــلاكــا
مهما تسلاني انا لا اسلاكـــــــــــا في قــولـــه لالا مـــــا أحـــلاكـــا

مع احد نجوم الشعر الغنائي / عبد الرحمن الريح

أسطورة أشعار الغناء:
...............................

لم يكن شاعراً فحسب بل تعدى ذلك ليكون أحد المزاوجين ما
بين التلحين والغناء واكتشاف الفنانين ورعاية المواهب ساعده
في كل ذلك حياته الهادئة ونظرته الإبداعية لكل ما يرتبط بالفنون.

في العام 1919م بأم درمان وبحي العرب كان ميلاده والذي من
حظه أن تلك الفترة شهدت بداية ما يعرف بفن الحقيبة وهو في
سن العاشرة من عمره.
تفتحت عيناه على مكتبة والده القارئ الممتاز والذي يحكي عنه
المقربون ودارسو سيرة الشاعر عبدالرحمن الريح أنه كان من
أوائل قارئي التراث العربي والإسلامي وله في ذلك مكتبة ضخمة.

في سن الثامنة الحق بالخلوة فكان أحد قراء القرآن الكريم وعلومه
فتمكن خلال فترة وجيزة من الإلمام بالنحو والصرف وبلاغة اللغة.
ارتبط بأحد أبناء حيه (حي العرب) لمساعدته في شرح المستعصي
عليه من قراءات اللغة والأدب.
ما إن بلغ الثامنة عشرة من عمره حتى ظهرت أولى أشعاره وهي
(هل تدري يا نعسان) التي غناها عميد الفن سرور.
تتالت أشعاره الغنائية فكتب (لي غرام وحيد).
التي لم تجد حظها من الانتشار إلا في العام 1952م عندما نفض
الغبار عنها الفنان عبدالعزيز محمد داوؤد.
كتب خلال مسيرته الفنية أكثر من 85 نصاً غنائياً وجدت حظها
من الانتشار جميعها فكانت مجموعة من أجمل أشعار الغناء في
تاريخه.
بدأ التعاون مع الفنانين في العام 1936م بكرومة وسرور والأمين
برهان.
في العام 1945م بدأ في كتابة الشعر الغنائي الحديث على غير
نمط الحقيبة فكان أول فنان يتعاون معه هو الفنان التاج مصطفى
عبر أغنية (الليل حلا) وهي من ضمن الأغنيات التي لا تبثها الإذاعة
ومن ثم أتت (إنصاف) التي أظهرت الفنان التاج مصطفى كفنان في
عداد فناني الصف الأول أيامها.
في العام 1951م استمع للفنان عمر أحمد ابن السادسة عشرة
فأعجب بصوته فكان أن أهداه أغنية (كان بدري عليك) التي أحدثت
مفاهيم أخرى في اللحن والجمل الموسيقية وهي الأغنية التي دخل
عبرها الشاعر نفسه استديو التسجيل الإذاعي كعازف للعود.
في أبريل من العام 1953م تمكن من رعاية الموهبة الصاعدة
إبراهيم عوض فدربه على حسن إخراج الكلمات والتطريب فكان
إبراهيم عوض خير ناشد لأغنياته.
تعتبر أغنية (هيجتني الذكرى) هي الأغنية الأشهر التي سكب فيها
عبدالرحمن الريح كل إمكاناته الشعرية واللحنية زائداً تقسيم النص
الشعري لجمل موسيقية فكانت حين ظهورها إيذاناً ببدء عصــر
الفنان الذري إبراهيم عوض الذي أدهش الجميع بدخوله الإذاعة
لأول مرة عبر هذه الأغنية.
ما إن مرت ثلاثة أشهر حتى شهر يوليو من العام 1953م حتى ظهرت
قنبلة غنائية أخرى من أشعاره وألحانه وهي (أبسمي يا أيامي) فصارت
واحدة من ذوات الألق والجمال الغير موصوف حين افتتاح الإذاعة في
1940م كان له شرف الدخول في موسوعة الشاعر الأوفر كتابة
للأغنيات التي ظهرت من على أثيرها بصوت الفنان حسن عطية
وهي (هل تدري يا نعسان) (هات لينا صباح) و(خداري) و(يا ماري
عند الأصيل) .
تعاون مع عدد آخر من الفنانين فأظهر الفنان رمضان حسن عبر
أغنية (افتتان) وتبعها بثلاث أخريات هي أغنية (أسى الجمال) التي
لحنها الشاعر بنفسه وغناها الفنان إبراهيم إدريس فظهر مقدرته
على المزاوجة بين صناعة الجمل الموسيقية وأسلوب صناعة
التطريب عبر مقاطع النص الغنائي.
له ديوان (الأشعار الحبيبة في أغنية الحقيبة) الذي تضمنت جميع
أشعاره الغنائية.
من شهيرات أغنياته (ضيعني ساكن الموردة) التي غناها أولاد
الموردة (ما رأيت في الكون يا حبيبي أجمل منك)، كتب كذلك
عدداً من الأشعار في مواضيع أخرى منها ذم لاعبي المنتخب
الوطني حين هزيمتهم من الفريق المغربي في تصفيات كأس
العالم 1970م فكتب:
وروني وين راح الجداد
الأكلوا منتخب البلاد
لا من عزموا زاد
لا من تمارينوا استفاد
في أبريل من العام 1991م لقي الشاعر ربه
مسجلاً اسمه بماركة خاصة كأسطورة للشعر
الغنائي السوداني

عبدالرحمن الريح «أسحار الجمال "إحترامي إليك"»
عبدالرحمن الريح «أسعد الأيام»
عبدالرحمن الريح «أقول أنت نور»
عبدالرحمن الريح «الدنيا حظوظ وأنا حظي جميل»
عبدالرحمن الريح «الشادن الكاتلني ريدو»
عبدالرحمن الريح «الطاووس»
عبدالرحمن الريح «ألم الفراق»
عبدالرحمن الريح «أنا بيك سعادتي مؤكدة»
عبدالرحمن الريح «إنت حياتى»
عبدالرحمن الريح «أنفاس الزهر»
عبدالرحمن الريح «بدر الحُسن»
عبدالرحمن الريح «جاني طيفو طايف»
عبدالرحمن الريح «حائر في أمري معاك»
عبدالرحمن الريح «خداري»
عبدالرحمن الريح «غبت عن إنساني يا وحيد الكون»
عبدالرحمن الريح «لى فى المسالمة غزال»
عبدالرحمن الريح «ما رأيت في الكون»
عبدالرحمن الريح «نجوم الليل اشهدي»
عبدالرحمن الريح «هات لينا صباح»
عبدالرحمن الريح «يا الحرموني منك»
عبدالرحمن الريح «يا الفريد في عصرك»
عبدالرحمن الريح «يا جميل يا مدلل»
عبدالرحمن الريح «يا حمامة مع السلامة»
عبدالرحمن الريح «يا غائب عن عيني»
عبدالرحمن الريح «يا مدلل سيب دلالك دا»

مارايت في الكون / عبدالرحمن الريح

مارأيت في الكون ياحبيبي اجمل منك
فـي دلالك و تيهك وفي جهالة سنك
من كمالك وظرفك ومن جمالك اظنك
يا حـبيبي نـساء الدنـيا ما ولدنك
راجي عطفك ولطفك وراجي حلمك وحنك
ديما يا مريودي تجدني سائل عنك
ياجميل المنظر كيف كيف اذمك
سيبني في آلامي وبالعلي مايهمك
خالي عقلك وقلبك وفاضي فكرك وهمك
المدام المسكر والعسل في فمك
ياحـبيـب الانفـس مـابتوب مـن حـبك
ان صـليتني بنـارك بـرضي برضي بحبك
مـرة تـيه فـي دلالك ومـرة ارعي محبك
و مـرة خـليك جـاير ومرة خاف من ربك
قلبي ذاب من نارك وصبري ضاع من صدك
هـــل اداري حـــياتي ام اعـالج ودك
نســمة الاســحار مــزاجا نفـحة ندك
وزهـرة الازهـار بسـتانا صفحـة خـدك
السـرور اوقـاتك والمـحـاسن خـمـرك
و الزمان خـدامـك وممـتثل لـي امـرك
ان امـرتني بقـبل بالوقـوف فـي جمرك
نحـن والايـام اعـمـارنا يفـدن عمرك

هات لينا صباح / عبالرحمن الريح

يـخـجـل البـدر ويـخـمـد المـصـباح
يـالـيــل هــات لـيــنـا صـبـاح
انحنا كل صباح نبني في الآمال ماوجدنا رباح
سـرنـا المـكـتـوم بـالـدمـوع انـباح
والسـهـاد اصـبح لـينـا امـرو مـباح
القلوب ترتاح للكمال التام في الكمال نرتاح
اصلو زول لكن صورو الفتاح
من سلاف الروح محنة للملتاح
الجمال شراح للصدورلكن للقلوب جراح
قالو اهل الحب في الزمان الراح
نشوة الاشواق احلي من الراح
النسيم لو فاح يمتزج بزلال دمعنا السفاح
كم عشوق مهجور مضي بالاصفاح
عينو في الورد وروحو في التفاح
ياهوي الارواح انت للعشاق كالشذي الفواح
عطر الدنيا واملأ الاسواح
يزهو بيك الكون في غدو و رواح

جاني طيفو طايف /عبدالرحمن الريح

جاني طيفو طايف لحاظو كالقذايف
وانا من عيونو خايف
جاني طيفو طايف في ثوب من الطرايف
خدودو كالقطايف وليهو العنب شفايف
حبيبي انا حالف لي عواذلي فيك اخالف
قلبي ليك محالف ومتي ياجميل توالف
تلا في هواي صحايف ولقي حبي غير زايف
قال لي اراك خايف ودون تشرح انا شايف
ياملهم العواطف ومهدل المعاطف
متي ياجميل تلاطف وتكون علينا عاطف
حبيبي دمعي ذارف غرقني سيلو جارف
لماذا عني صارف وهالكني وانت عارف

يا نجوم الليل اشهدي / عبدالرحمن الريح

يانجوم الليل اشهدي
علي لوعتي وتسهدي
علي بكاي وتنهدي

من ليه حسن الكون هدي
النافر الجافي الهدي
ياعيني يوم تشاهدي
اقري السلام واستشهدي

ياعيني دمعك بندي
وقول العوازل فندي
انا لي غرام يامعاندي
زي زهرة الخد الندي

ياعيني ابقي ترصدي
عسي توجدي ماتقصدي
مهم جرح قلبي الصدي
هو برضو غاية مقصدي

قمرآ حماني تهجدي
وتركني فاقد منجدي
آه من صفارو العسجدي
وعينه المتل عين الجدي

يامن خرقت عوايدي
ونظمت فيك قصايدي
لو عمري شيئآ في يدي
لوهبتو ليك يا سيدي

يا جميل يا مدلل / عبدالرحمن الريح

ياجميل يا مدلل

ياجميل يا مدلل قولي ليه بس حكم الغرام قد حلل
عذابي يدوم
++++
ياجميل يا مدلل كل ما اطراك بالدموع اتبلل
جسمي صار منحول والمنام يتقلل
طرفو لي رؤياك دمعو كبر وهلل
جفاني النوم
++++++
بالعلي لا تجهل يا حلو النغمات يا لذيذ المنهل
نارو حارقة الجوف و المدامع تبهل
بعد هذا الحال هل وصالك يسهل
تحن يا ظلوم
++++++
ليل ضفايرك مسدل يا رشيق القامة والمعاطف الهدل
القوام ممشوق و المعاصم جدل
ده البخلي اليك حبي ما لا يتبدل
يزيد كل يوم
++++++++
ما العقول تتخيل والاديب للقاك يتهبل
بيد اني عزيز خفت في المستقبل
اهدي ليك الحب وانت بي ما تقبل
اكون محروم
+++++
في هواك لو اعزل برضي لا انساك في الخيال اتعزل
العجيبة كمان قلبي صار ليك منزل
انت فوق للقوس
والسماك الاعزل

مالي غيرك حياة / عبدالرحمن الريح

ماليا غيرك حياة
يا اسمر يا رمز الضياء
انت حياتى
يا فاهم يا دارس معنى الحياة
من ادبك ليك حارس من غير رياء
يا باسم يا ناعس
يا ملاك يا لابس توب الحياء
انت حياتى
ما شوهوك بفصادة
على الخدود السادة
طبيعى خلقة ربك
ما داير زيادة
مع لونك الاسمر
ورد الخدود محمر
لا بودرة لا احمر
ايات محاسنك زى ماء الحياة

لي في المسالمة غزال / عبدالرحمن الريح
........................................

لي في المسالمه غزال نافر بغنى عليه .....جاهل قلبه قاسى وقلبي طائع ليه
مصــــــباح الظــلام الربنا معليه ................... زايد في الكمال نور الجمال جاليه
إن شافه الغزال مع نفرته يواليه ................... وان شاقه القمر أنواره تخجل ليه
كل من شافه قال أنا بالنفس افديه ............ هو غصن الرياض الزاهي في واديه
أزهار الربيع ما زى زهور خدّيه ............... وجدلات الحرير ما لينه زى ايديه
ان جاء النسيم زى الفــرع يتنيه .......... والثمر الرطيب كـذب اليقول يجنيه
باللّمى والخدود يأذى العشوق يفنيه ... الصحا والنعاس والسحر في عينيه
والده معجنه وعلى فطرته مربيه ........ الفرد الوحيد في الدنيا مافى شبيه
يتجاهل علىّ وأنا حالي ما غابيه ......سابني في نارهواى وشال قلبي يلعب بيه
هو أمير الهوى وقاضى الغرام مفتيه .............. إن جار علىّ في قتلى كيف يفتيه
يا قلبي الحزين انت الصبر خاتيه ................. إن جار أو عدل سيبه اليتيه في تيه

الفريد في عصرك / عبد الرحمن الريح

الزمان زمانك أهدي لي من فضلك نظرة من رمانك
ياالفريد في عصرك قلبي فاقد أمانك
حرام عليك تهجرني وترضي بحرمانك
بالكمال شرفت مواطن أمدرمانك
بالجمال امتزت علي شباب أزمانك
يا أنيس الصيد أنا في الغرام إنسانك
إنت روح شعري وأنا في الشعر حسانك
لوقصدت هلاكي تجدني من فرسانك
وان عطفت علي فذاك من إحسانك
ياالحنين في نفسك قول لي وينو حنانك
شلت قلبي ودمي خضبت بيهو بنانك
لو مرقت تمر في الروض علي أفنانك
النجوم تتغزل في بياض أسنانك
يافريد الريد مال بالقلوب ميزانك
من لطافة حسنك والجمال الزانك
طول حياتي أفاخر واروي في أوزانك
إنت في أفراح وانا في ازدياد أحزانك
أيها الفتان حلمك علي ولهانك
ذبت من آلامي وعقلي ضاع في رهانك
برضي خاضع ليك وانا ياحبيبي مهانك
وان نكرت هواي وريني إيه برهانك

يا مدلل سيب دلالك ده / عبدالرحمن الريح

يا مـدلل سـيب دلالك دا هـاك قلبي هديتو ليك وردة

يامـدلل ايـه حصل مني اسبوع كامل بقيت تغيب عني
احب شوفتك الليها متمني دلالك
سيبو حن علي زورني

يـا مـدلل ياشـبيه الفـل احـبك
انت وانت سيد الكل

احـب حديثك ولو حديثك ذل لأن حديثك زي غنا البلبل

يامدلل عقلي فيك احتار دوام خيالك عندي ليل ونهار
يامدلل عشقت فيك خدار
خدار روحي للاشعار

يامدلل انت يوم ولدوك كم شعرا
عجزو ما وصفوك

ياملاكي انت يوم خلقوك تمام
قمرا والملايكة حفوك

الشادن الكاتلني ريدو / عبدالرحمن الريح

الشادن الكاتلني ريدو هلك النفوس و الناس تريدو
مـالو لو يـرحم مـريـدو
في الكون وحيد والكون وحيدو
فـيـه لا يـوجـد طـريدو
نـظم القلوب في سلك ريدو
لبسـن قـلايد في وريـدو
الجيل قديمو علي جديدو بيه اعـترف مـعدوم نديدو
فاق السلاح وفضح حديدو نـقرابي فـي صفحة خديدو
يصعب علي وصف فصيدو صـعبان علي انظـم نشيدو
دا غزال وسارح بين صيدو يازيد
مـحال شركك يصيدو
انسان كحيل ناعس هجيد جيد
الغـزالة كـأنو جـيدو
مهما اقول والقول اجيدو انا
وصفو كـيف اقدر اجيدو
كلما اقول الحظ يعيدو نحس
الزمان يشرح سعيدو
القطر دانيهو وبعيدو هو
هلال صيامو ويوم عيدو

خداري -- عبد لرحمن الريح
..................................

خداري
البي حالي ماهو داري
جافاني

متين يزورني حبي
محياهو يضوي داري
أقول جلست مره
مع الطير الخداري

من بعدو في هواهو
و لي روحي كم أداي
إيه قصدو من عذابي
لو ما قصد وداري

كل ما رأيتو باسم
الطيب يجيني ساري
كل ما رأيتو تايه
يزداد علي حساري
لولاهو ما إشتبهت
في يميني أو يساري
لولاهو ما صبرت
على ذلي و إنكساري

في فكرة الكواكب
و الأنجم السواري
و الحور مع جمالن
بالنسبه ليك جواري

أظهر أمام عيوني
لا تبقى متواني
أنا جارك البحبك
أوعك تخون جواري

لو ما حبيبي يرحم
لاشك في دماري
نار الغرام صلتني
في الأدمع إنهماري

ما دام صبحت عاشق
و الحب صبح ثماري
سيبوني في الأرايك
أسجع مع القماري

الطاؤوس ( ملك الطيور ) / عبدالرحمن الريح

ملك الطيور أرقص
وسط الطيور نشوان
خلي الزهورتفتح
مختلفة الالوان

أرقص وهل في الكون
طاير جميل مثلك
بيهو الوجود مفتون

من درك المكنون
أكشف كنوز حسنك
ورينا فيك كم لون

ما بين جمال وفنون
للزهر تصحو عيون
تهدي الشذي واحيان

تهدي الهوي النديان
للعاشق الولهان
يا اجما الاطيار

ليك في الحديقة ديار
مبنية بالورد
ومعروشة بالازهار

مخضرة الاشجار
في شواطئ الانهار
ملتفة والاغصان

بالخفة والميسان
تلهب نهي الاتسان
انشر جناحك و ميل

حيي الربيع يا جميل
خلي الشمس تسكب
ذهب الاصيل في النيل

في رياضك النضرات
النور يسير قطرات
محمرة العبرات

الروعة تستكمل
يبقي المكان اجمل
زي لوحة الفنان

» فنان الجماهير - سيد خليفة - توثيق شامل......
» من هو شيخ شعراء السودانيين ؟؟؟؟؟؟؟؟؟؟؟؟
» رحيل كروان الحقيبة / مبارك حسن بركات