الرســـــــــــــــــــــــــــــــالة
بت الخير يجيك الخير
وصل جوايك الكاتباهو للولد الحتالي
اكان ترسلي ليه هين هينين من البركاوي
داك الطعمو حالي
وهنا والله ني ومسيخ وغالي
سؤالك يمة عن احوالي
كان شفتيها تغنيك عن سؤالي
انا اتوكرته في قلب البنادر
زي غريب شرقان مدلدل في الدوالي
جات شايلاني حر الجوف
واانا اتحديت مجالا مومجالي
مصايب الجامعة اكبر من جميع الشفتو
ولا سمعتو في ايام الخوالي
قاعد الكرسي كان شفتيهو
ورم ساقي زي سيد الزلالي
اقلب في الدفاتر من صباحا
بدري لامن تمسي
ما بنسي انشغالي
اسوق الليل تحت ضوء الكهارب
ديمة هارب من فراشي
وهادو حالي
ده كلو عشان اجيب نمرا
انافس بيها واستر بيها حالي
والله عاد حالتنا ما بتسر البال
ومن يوم ما اهديت
ما انسره بالي
سلاطين العلم يايمة
ينسوا العشرة في فد يوم
يدفروك بره زي دفر الطبالي
واخايف اجيكي مرفود
وهادي الفكرة من ما جيت
معشعشة في خيالي
واخير افتح اضانك
قبل ما تلقي في اضنيه
ملهات حبالي
وكان حصل القدر يايمة لا تلوموني
زي علي البنادر اقوي من احتمالي
بناتا فيها جسومن رويانات بالدهون
تلصف بلا جلود السحالي
سبيبن ديمة بالحزم الكبار مبهول مردم
فوق قفاهن..........و حلالي
صدورن طامحة زي موية الدمير
الهايجة تكشح في العوالي
عيونن واسعة تبلع مية
زي ولدك تشرق للموحد والضلالي
وساعة اقيف قدامن
انكس راسي بقدري وجلالي
مشيهن سوه زي سرب الغزال
لكن نفورن ماغزالي
عددان مابخبرو
الا وين ما امشي الاقاهن قبالي
وقصاتن مايفرق دريبن
من دريبات القماري
بخورن في سماء البندر
يدوخ متل مسك العشاري
رقيصن ينهزنو بلا الفلو
اللماتو غابن منو في ضل المضاري
يجمع في قفاهو وينطوح
يتمطط...........مفاصلو
والياهو الفاقدو بالي
دالالكين تجيب الضلة برضو
علي متاهات الضهاري
غناين اصلو ما سمعناهو
اكنت بقول ليكي الا هسع ما ناي طاري
وطنبورن حسوا فاقع
لا فيهو كنتر لا ودع فوقو بيراري
عشوقن في الرقيص
يتلوي زي سيد المغص
يوم يبقي في حالة طوارئ
والمداين ديمة فاير
زي وحوشا في البراري
والمـأسي كتيرة حاصلة
والمكضب يلاقي بوليس السواري
عاد ده حالتنا بقدر استر معاها
خلاف احاكي الناس واضاري
وانتو راجيني يوم اجيكم بشهادتي وينسط ضهري وكباري
وبرضو خافين من اجيكم بغربية في خجل
قايد صغاري
والقدر بقادي كاتب ليه شيتنا
لاني حاني ولا اني داري
الا حاجة واحدة تكون في علمك
اني جاي وتاني راجع لدياري
وياني حميد القديم
الا بس فاقد حجابي وراح سواري
يمة كتري من رضاكي
وسلميلي علي المعاكي
قولي للحبوبة ازيكي
انحنا شبنا وما براكي
سلميلي علي وزينا وحتي جدادنا البكاكي
سلميلي علي بناتنا
وقولهن والله ماني ناسي
طاري شلاخا مواسي
زي شقوق ويكا سداسي
طاري نقشا فوق خدودن
بين ضفايرو وشوفو قاسي
جسمي في البندر ممدد الا بينكم بحواسي
سلميلي علي البكادن والبشتت في التقاوي
في الكرد محراتو قالع
وصوتو فوق ترانو عاوي
ماحزم بقجة ثيابو وقام فجر لاحق اللواري
اخيرو يحفر في الجداول
ومالو ومال حفر المجاري
سلميلي علي الضرايع
والفقير الفوق حصبرو تكتب البخرة ويداوي
مع السلامة ودعك الله
وللوصيتك مانساني
وابقي عشرة الراعي واعي
في بحور اهل البنادر من زمن طالق شراعي
كان نحجت بجيك غانم
وكان فشلت بجيك ضراعي
السبت أغسطس 18, 2018 5:13 pm من طرف متوكل هاشم عثمان العوض
