للناس البحبو شعر الشوايقه

زول في وضوحو بلا الشمس ود حمد احمد يارفاق
من شب قام درفون صغير سوالو جو الناس عرش
يا هو الركيزة الفي الفريق زول حوبة شقيش ما يمش
تلقاهو قدام الرجال حاشاهو كلمتو ما بتطش
من شب قام زولا قنوع ما زك يوم درب القرش
وما شالو حق زول بالغلط وما بيرضي سمعتو تنهبش

في ليلة كان راقد حزين وسارح في الزمن الوحش
كيفن بعد كان حالو زين والسوق مفرهد ومنتعش
مرت عليهو سنين عجاف خلت ضماير الناس تطش
بس فجأة سمع الباب يدق ويا الله قام من الفرش
بي سرو قال إن شاء الله خير واطرافو كلها ترتعش

فتح البوابة بلا نفس وقدامو كان ود الفتح
قال ليهو ادخل قالو لا انا حالي ما داير شرح
قال ليهو جيت والعشم سايقني يا اب رايا سمح
وقفت قصاد بيتي الظروف حلفت يمين ما تزح
البيت معاهو المدرسة خلني بي ايدي ازح
والنخلة هادي قدر تشيل ياخدوهو قبال يصطبح
قال ليهو بس نقع البنوك سلفية والحال ينصلح
قلبة وقلبتين يا رفيق وبعدين نشيل نحن الربح

يا إمة نقع الفتل ما الدنيا اصلو فرندقس
يوم انت طاير في السماء ويوم تحبو في جمر الفلس
بس قوي قلبك يا رفيق ونضمك يكون عجوة محس
من بعدو كان درت النجوم تلقاها في شهقة نفس

قبال كمان تصحى الشمس مشى للخزين ود العوض
قال ليهو إلا تمشي معاي اولادي ديك اكلو القرض
اتماسكو الاتنين سوا ودحمد احمد داير يطير
مرات يجك ومرات يخب ومرات تحسبو زي عزير
بس فجأة في لمح البصر لقى نفسو قدام المدير
نفذلهم كل الشروط وفيهن شرط قاسي وعسير

كان الشرط إيه الضمان ما البنك منهجو برمكي
صاحبنا قام رهن الارض الشاربة من دمو الذكي
مداهو معنى الانتماء والضحكة في الزمن البكي
ذرات ترابا تقولو لا والدنيا غرقت في البكى
وين تاني تلقالك حضن ياويك وكتين تشتكي
مين السواي البفهمك يا حمد احمد غير حكي
انا ياني امك يا جناي من قمت زي تمر الفكي
يومو اليشيل فوقك تعب لا بد فوقى انا تتكي

لا بد ترجع لي صاد لو حتى في اخر العمر
ربيت اعمامك وابوك وما احتاجو لاعند القبر
يا ابني لا ترهني هو يا ابني عضي الصبر
ود حمد احمد بي اختصار خلط البيصلح باليضر

ما همو ايه باكر يكون ما طالا حقق للغرض
شال القريشات وانطلق وفي جيبو شيك سمو السند
مبسوط ويضحك منتشي وصاحبك يخوجل في البلد
اولادو دايرين يابا جيب صاحبنا يدي بلا عدد
البت تجيهو المدرسة صاحبنا يدي بلا عدد
الحاجة همها توب سمح صاحبنا يدي بلا عدد
لامن شهور الجن مضن لقى نفسو مخنوق بالمسد
الشيكا باقي وقيتا جا اقصاهو لا يوم الاحد
ودحمد احمد انضرب بقى يجري زي القنقرد
مرات يفوتك في السلام مرات يسوى بكى وحرد
بس فجاة صاحبك اختفى همل عقابتو وشرد
ما راعي احساس الورا وما راعي لى البت والولد
ولي زوجتو الممكن تضيع في زحمة الزمن النكد

حواء



ضمه جسم الليل عويله وضمت الاهات زليله
حوا ياناس ياحليله وثاني ياناس ياحليله
ماسكي كف الثوب تخيط والدموع تنزل هميله
كان متاكي الباب وخايفي من ابوها يشوف حويله
مالعليهو هو ماهو هين كيف تعل روحو العليله

كان يقول لها حوا مالك والعذاب كيفن مشى لك
حوا لا تزيدي العليكي فوق كتيفي انا شايلو فالك
حوا ماهميني حالي الا بس هاميني حالك
حو ا حوا باقي نصبر ونحبس العبر الثقيله

حوا برد الدنيا اكبر والله اكبر من عغتاها
كان بامكانه تسرق بس ضمير الخير حماها
زاد ازاها وزاد شقاها لمه ابوها الراجيه ودع
وروحو دقت بوغ رحيله

حوا قالت داير تاكل لو لقت لها لقمه نيه
قالوا ليها ان دايري تاكلي اكلي في خاطرك شويه
اضحكيلم وابسميلم تلقي بدل القمه ميه

حوا قالت دايره تغمر لو حلم بالفرحه طافه
قالو ليها الدايري تغمر الا في صدر السخافه
بينا وبين عيشة المعزه ماخلاص بعدت مسافه
حتى قدر الموت اباها مش حرام الموت ياعافا

سوت الشاي للعطالي ماجنت غير الرزاله
حامت الحلات تغسل شالو ناس الحله حاله
مدت الايد للعمايه ختو في ايدينه لالا
قنبت في ضل مصغر سارحة تلتق في نعالة
في ضجيج عجلات زمانه مانست صرخة جماله

ما لقت غير انو ترحل لي مداين الهم زليلة
حوا ماتت لمه ماتت امها وكانت طفيله
حواا ماتت لمه ابوها روحو دقت بوغ رحيله
وحوا ماتت الف مره لمه سلبوها الفضيله

وقفت بعد حلبت لبينة الشاي تكورك يا الحسن
يا ام الحسن وينو الحسن
لمن صفت رغوة شخيبات اللبن
في حلتا المبني من طبق السكن
واقفي في حوش البهايم ولسع تكورك يا الحسن
جاها حسا من بعيد مارق من القاطوع ورا
قال ليها خير يا الحاجي خير
قالتلو خير تعال لي جاي دايراك تعنون لي جواب
يا الراسي لي ولدي الخدير
لا تبقي زي شافع السرير يقول لي زين آيمة زين
وزين تبقي بعد شهير
وان جاني يكتب فد سطير
اقولو يا سجم السجم انا زي قرايتك ما قريت
لكن عويناتي بيفرزن الوريقة البيضاء من لون القلم
بعد المغيرب بي شوي جاها الحسن تعبان يسير
دا العشى غنمو من الدرب سرقت ندي وشو الهجير
سوتلو شايا بي لبن قرض معاهو حرف فطير
قالتلو بسم الله قول واكتب وصيتي انا للخدير
الزمن يا ولدي ماحقاهو السنين
البعيش في الدنيا ما بعيش مرتين
العمير فاضلي بس منو اليقين
وانت طول في البنادر يا الحبيب لا متين
تعال اوريك حق ابوك الجم حقيق حاج اللمين
ان عرفتو بلا عمار يقولو ولدا عندو طين
العلاج لا تنسي رسلو لي دحين
العوينات آجناي شوفن ضنين
سلامنا ليك مطرز للبنيات والبنين
ولو الارض يا ولدي تنشال في الايدين
انا كت برسلا ليكا في لوري الخزين

رهين الغربة
مسكين يا رهين الغربة.. مسكين طال إسارك
لامـــتين القـــيود تتحــل.. ترجــع لـي ديـارك
جيتا وعش مآسي.. تقـاسي.. متوطـيها نارك
وحــتى العــيد سمـعتبو مــره.. مـاطلاك زارك
لا صـحاك صـبيح الرؤيـه.. لاهـو قعـد جوارك
قـال ليك: عـيد مـبارك يلاّ.. ألبس داك غـيارك
لا اتعمعمت لا اتجـلببت.. فرحـان زاد نضـارك
يا مســكين تـراك تحـنن العـدو.. بـي غُــبارك
لا عــيد عــلى الأخــوان.. ولا هــنيت جـــارك
لا رح (ود عجل) صليتا.. لا زول قـال مـبارك
لا شافــت عــيونك فرحــة.. لا لاعب صغـارك
لا غــنيت أغـــاني البهجــة.. مـــتبكم كـنـارك
ممــا جيتا بس وريني.. قول لي: شن عمارك
غير حرقة ونحيب متوالي.. قاعد شن خـبارك
بوصيك كان سمعت وصيتي.. لي حالك تدارك
وصية زول عيونو عليكا.. من كل قـلبو دارك
ايه خـلاك تفـارق الحـله.. لي مين سبت دارك
مين شالك رماك في قفرة.. من نيلك هو دارك
وين داك الزمان الصافي.. نازل قاص خـدارك
والجدول متسبي مويتو.. قـراع طـول نهـارك
كت سعـيد بحـالك راضـي.. ليه فـكيت جبارك
ليه درب الأهــل فـارقتو.. ليـه غـير مســارك
مــا كان اليقـين ماليكا.. ده المقسوم شعـارك
مالك ومال لهـيب الغــربة.. يتطـاير شــرارك
في خـــيرين هــناكع كـت.. تـاكل في ثمــارك
وخوفي عليكا مـن الفــيهو لا يـاكل حســارك
تبكي وتشكي لي طنبورك.. آمسكين ضرارك
أجارك الله.. اجارك الله.. فـي فقــدك أجــارك

مرام ما جات

كلمات للمبدع حاتم حسن الدابي

مرام ما جات
مرام مرقت علي الجيران
ومرت ديلة كم ساعات
وغابت نجمة الضيفات
واكتست الأرض ظلمت
مرام ما جات
حكايته كان ويا ما كان
حكاية تشيب الولدان
حيرت الإنس والجان
وبرهنت انو مافي امان
رجع وأد الطفولة زمان
زمن عبدت هبل والات
مرام ما جات
بعد لبست جديد في جديد
مرام قالت تبارك العيد
ووقفت سمعتنا نشيد
حلاة موبايله الفي اليد
مع التسريحة والباندات
مرام ما جات
أتاريهو القدر منصوب
مسطر ومافي منو هروب
برغم رضانا بالمكتوب
ده غدراً ما وراهو سكات
مرام ما جات
بدون إنذار بدون أسباب
مرام غدروها جنب الباب
مرام هجمت عليها ذئاب
طباعن من طباع الغاب
ملاكاً حولوه رفات
مرام ما جات
قلوب لا رحمة لا إحسان
مدبجة بي صفات شيطان
وظهرت قدرت الرحمن
محل اسنانه كان اثبات
مرام ما جات
دريبة علي الأرض منقوش
وسريره من العصر مفروش
معالمه باقية وسط الحوش
ملابس الروضة واللعبات
مرام ما جات
بعد شمس العصاري تغيب
مرام كانت تودي تديب
عندها بسكويت وحليب
في تلاجتن راقدات
مرام ما جات
وحيدة أخوانه والوالدين
عليها يخافوا متمنين
تتعلم وتتم الدين
وليها يوزعوا الشربات
مرام ما جات
عيال الروضة يا سمحين
ما شفتوها راحت وين
مرام سرقت منام العين
مرام حرقت حشا الامات
مرام ما جات
يا صاحباته وينا مرام
سماح يا دوبو فرهد وقام
عمير ما تم خمس أعوام
ملازماها البراءة سمات
مرام ما جات

منو البيقول مرام ما جات
مرام كل ما شعاعه يلوح
تبق جوانا إحساسات
مرام بقت القلب والروح
سحابة تخدر البلدات
مرام عصفور يئن مجروح
ما شفعنلها الدمعات
مرام جزء من محمد ونوح
تبارك وعمَّ والنازعات
مرام دعا للجميع مسموح
بعد ما تكمل الصلوات
مرام شربة محاية ولوح
مرام عند المغيب بخرات
مرام صفحة كتاب مفتوح
يقروا الطلبة والطالبات
مرام حا تظل سؤال مطروح
وسط الطلبة في الجامعات
مرام حا تظل سؤال مطروح
موجه للشباب بالذات
ليه بدت السماحة تروح
إرث أجدادنا والعادات
مرام ما جات
أخيراً داير أجيز القول
منو المسئول
الكاتل قصاد مقتول
دي ماها حلول
نقول دي ثقافة البترول
وسيف العولمة المسلول
الديجتال مع المحمول
مع الغزو اللي ما مقبول
عموماً نحن في فك غول
بيهزموا انطباع الذات
مرام ما جات

صحيح انو الدنيا بقى مافيها امان واكيد مافيهم جعلي

اه من شعر الشوايقة والطمبور
ديل كلامن صعب شديد
يالبادرابي

البادرابى مالك علينا كاتب قصيدة الغريب عن بلدو انت قاصدنا ولا شنو ماعارف نحن دموعنا قراب ومابنحمل متل الكلام ده

معليش لو أجرخت أحد ـ قصدي أفرق عليكن