من اشعار ود ودبادي العكودابي

أرمى الدمعة فوق الدمعتين يا عين

و بعد الليلة حابساها الدموع لي مين!!!!

نزيف الدنيا من حد البلد غربى ..

نزيف الدنيا لى حدالبلد شرقى..

وجوم..عم الليالى العامرة..

كل الدنيا خاتة الخمسة فوق اتنين..

رحيلك وجعة يا اسماااااعين..

رحيلك نجعة.. من دار الفرح و الزين

رحيلك طعنة فى لهاة الحبى دريفين..

رحيلك رجعة.. فوق درب العليك باكيين

فيها نهاية المشوار..و حد الفرحة و الآمال..

و حد الفال و حد الزين..

أرمى الدمعة فوق الدمعتين يا عين

و بعد الليلة حابساها الدموع لي مين!!!!

بعد نزلت سكاكين القدر مسنونة..ديل فوق ديل..

و شربت من بواكير المعتق..حالتو يا الداسنو من السيل..

و يا المخزون حرابنا متكلات قدامو..و فوقو مشنكتات الخيل..

و يا الداخرنو من زمن التسامح.. شفعنا رابطين الحبل بالتيل

و فجأة ..يجينا غراب هابيل..و يبقى رحيل!!!!!!!

رحيل كل الغيوم الهااااامعة متواترات..

رحيل كل السهول العااااامرة بالخيرات..

رحيل الطينة من طرف الجزر يومااااات..

رحيل الخضرة قدام منجل الهدام جفاف و ممات..

رحيل البادية فوق برقا ورا نجيمااااات..

رحيلك ..ما رحيل ابيااااات..

رحيل اجيال..رحيل بلدا تمام و كمااااال..

هوى يا وليد يا دلوعة يا مرنوعة
أعدل إيدك المفدوعة
واتلحلح واقيف دغرى وواس صدرك
مع صدرى واتشدّع


ليك الحق
شان ولدوك فوق اسفنج
وحتى أول جديد سوهو ليك بالبنج
وهسع هوايتك إنك تلعب البنق بونق
وليك الحق عشان فطموك بعد مازدتا فوق سنتين
وفى سن عشرة نومك كان على الليدين
غطاك بالشاش وفرشك بحرير الصين
والبتدورو كلو بتلقى غاب قوسين
ابوك مليان وجيبو سمين وقلبو سمين
وفاتحلك حساب فى البنك والتأمين

وليك الحق
عشان ما خضتا فى وحل المطر والطين
ومن الترعة ما سويت شراب الهين
وما قيلتا فى ضل دومة بى فرعين
وما شاققتا عرق النيل مع الوزين
وليك الحق
عشان ادمنتا عيشة اللين
مشي الاسفلت ما جربتو بالكرعين
ركوب اللورى فى شمساً تصر العين
وما عانيت وقوف الصف وراء التموين
عشان يا انتى ما بتدرى سجل ابواتك البدرى
دحين اسمع .. أقيف واسمع
سماك الباكى مجدو الزال
يا ما كانوا تحتوا رجال
ابوخنجر وابوشوتال
والصقر البجيك خوجال
صوتن كان يمين جلجال
ومكسيين كمال وجلال
لكن الزمن اسرع
سيفن بلحس الفقره
وما كان برضو بالحقرة
وكانوا بضبحوا الشقره
وكانوا بضوقو العادوه نوم الكوع
وكانوا بموتوا فى شان حرمة المفزوع

الجعلى اب شرابا حار وقالوا بعدى يومو خنق
والشايقى البياكل النار وفوقو نحاسو متخنق
ودرفون البجا الصقار وحاقب سيفوا ياكل الشق
والغرباوى عينو شرار وكضب القالوا عندو عرق
والنيلى البعرفوا كتار على كتل الأسود جرّق
والبطحانى والشكرى وغيرهم من أهل فخرى
ومنهم أصلى لا بشبع ولا بقنع


هوى يا وليد
حصل جربتا كب السارية
فى القلعة وخلا العتمور
وشفتا بروقه تترقص وتتحرقص
تقول مطويه فى قرقور
وعاوى الزيفة ينفخ فى جبال النقعة زى الصور
والحصحاص يجرفوا السيل
يكنسوا على مهاوى الخور
وقلب الصاقعة يتطرقش
يكب النار دمار وشرور
وشفتا الحال عرق مقلوع
جبل متروم فرع مكسور
جمال غرقانة بى حالا وحد المويه فى الغرغور
ود ابن ادم المسكين نجاتو تحت قرون التور
والعوتيب يجيك يجرى يشيلك وانتى ما بتدرى
وما بيرفع


هوى يا وليد ...
حصل سادرتا بالديداب
وقدامك مراحك وراكب الخباب
ودربك طولوا يملا العين
سحاب وغبار ومويتو سراب
وهوى كرباجك البكاى
يبكى على ضهور الضمر الانجاب
وتسرى الليل وما تضوق هجدة
لو كان النجم ما غاب
وبعد أيام تجيك لفته
ويلوحلك فى البوادى سحاب
وتكرف من دعاش العينة تملا رئاك
عطر وأطياب
تلقى الوادى خضر زى تقول
ماكان خراب ويباب
وبت ام ساق تقييل من ضحاها
على المعالى ونسمة الهباب
وتفرش ليك حزمة نال تحت
سيالة تريانة فروعها قراب
وتنفخ كل آهاتك مع المزمار
تصوغ الحان ملانة شباب
وتنسي الدنيا كل الدنيا
ماعندك معاها حساب
خلاف برقا يشيل حرقاص
أو رعدا تقول رصاص وكت فركع


هوى يا وليد ...
حصل صحاك عز الهجعة
صوت شتماً بعيد مخنوق
وجاتك شخرة الطنبارى مشتاقاً يسوى القوق
ونومك طار واتقسم والرشرش صبح مفروق
واتلفحت نص من توبك الجرجار
على الدلوكة سايق سوق
وتلقى هناك بنات بلدك ولاد بلدك
يعلو الصفقة تقدح فى القلوب الشوق
ونغم الفال ابشرن يا بنات بالخير
والجنيات تطير لا فوق
وكم زغرودة تتفجر تفور بالناس بعد ما تروق
يعوم الوز صدورو تشابى للمجهول وما بتضوق
تميل زينوبة زى البان يمين وشمال تودى الطوق
واخوان ام شلخ ينكبو جوه الداره
زى صقرا نزل من فوق
ضرب الصوت والركزة بيفرق الناس
عشان زينوبة ما بتحوق
وعاد تتحزم الجنيات وتتنظم تقيف في روق
وكل واحد يهز ضرعاتو والحجبات تزح لافوق
جفير الخوسة فايت الكوع
وسيرو مع العضل مطبوق
والطاقية تحت الحاجب المعقود
هدية أم زين وما مشرية من السوق
ويتقدم عريس السمحة رافع صوتو
كان بسوقوا بيهو النوق
والعنجاوى ينزل فوق ضهورن
بس تقول منشحطة فيهو بروق
يبدا مجرو بالترقوة ويتحدر
مع الضلع القصار ملصوق
واحمر عين يشم الدم بعد ما يرش بنات
عمو ويزيدن شوق
وثابت حيطة لا بتهز ولا بتلز
وصارى جبينو كلو عروق
وقال بعد العقد طلقانة ما يحجزوهو
إلا يخلو ضهروا شقوق
هناك الحال مغير جد وهيجة الناس تفوت الحد
وكان حجازو مد الليد بتسمع كع



هوى يا وليد ...
حصل شارفت دغشا بدرى
فوق حجرة مخانق النيل
فى سنة تساب والشرقي
حزم القيف وطفح الكيل
وشوفتا الهيبة فوق اسيادا
والشخرى البكتل الحيل
وشفتا الجارى يحفر فى جروف كوكبنا
بس داير يشقو عديل
يجيك بي صدرو متحزم ومتلقف صفوف فى صفوف
يحاكى الخيل
ومويتو الهايجة تبلع جب
وتجقم فى مدالق السيل
وفوق الرملة مشرور العشارى طويل
معشعش بين نوايبو الطير
حليلو جزايرو جاها النيل
وحالف ما يخلى شبير
حزم اطرافا يكسر فيها
بالهدام وينحر فيها بالقرقير
وبكرة يموصها يشرب طينها
يزرع فيها شلالات هدير وهدير
وتكسح مركب النواتة عايمى
على قرون الموج جناحها كسير
رواسيها مالى اصابعوا فى المجداف
يقوم لافوق ويجى من تانى فوق الدفة
رافع ايدو ينده فى جملة الصلاح واهل الخير
هناك الموت يمين شافوهو شوف العين
ومافى شفيع ومافى مجير
تقول الزول يعرف اجلو
ومكان موتو لولا إنو ما كشفو الإله لى غير
عاد ما دام رقاب الموج تمد لسناتا
فوق للحيف تكب الصير
وشن فضل بلا الغرق البدور ناعى
وفعلا كانوا يا هو مصير
ومشيت المركب الغرقاني بين موجتين
طفروا منها النواتا بطن اللجّة قالوا اخير
تماسيحاً يقالدوا الموج يصارعوا
عتاوة العرق الكتالو مرير
ساعة يعومو بالضرعات وساعة فج
صدورن ضمة مااتبلت ولو قطير
ديل يا وليد ولاد النيل
رضو الهيجة من صدروا
ومن الطيبة رضعوا كتير
الواحد فعايلو كتر ونضمو دقاق
نهرتوا يمين تسوى الفاق
ومراً أصلاً لا ضاقوه لا بنضاق
كفاك يا وليد بلاش فاقة
خلاص أنا تهتا فى الاشواق وما برجع
وهسع ضمة لا شايفك ولا بسمع

من اروع القصائد
د /محمد سعيد ودبادى العكودابى
بت الخير يجيك الخير . وصل جوايك الكاتباهو للولد الحتالي
وكان الظن ترسلي ليه هين هينين من البركاوي
داك الطعمو حالي
ولو بالقل شخاليب دوم
وهنا والله ني ومسيخ وغالي
سؤالك يمة عن احوالي
كان شفتيها تغنيك عن سؤالي
انا اتوكرت في قلب البنادر
زي غريب شرقان مدلدل في الدوالي
جات شايلاني حرّة جوف
انا اتحديت مجالا مومجالي
مصايب الجامعة اكبر من جميع الشفتو
ولا سمعتو في ايام الخوالي
قعاد الكرسي كان شفتيهو
ورم ساقي زي سيد الزلالي
اقلب في الدفاتر من صباحا بدري
لامن تمسي ما بنسي انشغالي
اسوق الليل تحت ضوء الكهارب
وديمة هارب من فراشي
وياه حالي
ده كلو عشان اجيب نمرا
انافس بيها واستر بيها حالي والله عاد حالة ما بتسر البال
ومن يوم ما هديت ما انسر بالي
سلاطين العلم يايمة
ينسوا العشرة في فد يوم
يدفروك بره زي دفر الطبالي
وخايف من اجيك مرفود
وهادي الفكرة من ما جيت
معشعشه في خيالي
واخير افتح اضانك
قبل ما تلقي فوق اضني
ملويات حبالي
وكان حصل القدر يايمة لا تلوموني
لومي علي البنادر نورا اقوي من احتمالي
بناتا فيها رويانات جسومن بالدهون
تلصف بلا جلود السحالي
سبيبن ديمة بالحزم الكبار مبهول مردم
فوق قفاهن..وا حلالي
صدورن طامحة زي موية الدميري
الهايجي تكشح في العوالي
عيونن واسعة تبلع مية
زي ولدك تشرك للموحد والضلالي
وحاتك ضُمّه ما بقدر عليهن
ساعة اقيف قدامن
انكس راسي بي قدري وجلالي
مشيهن سوا زي سرب الغزال
لكن نفورن مو غزالي
عدادن مابخبرو
الا وين ما امشي الاقاهن قبالي
وقصاصن ينقّر بي عصاتو
ومايفرّق دربهن
من بين دريبات القماري
بخورن في سماء البندر
يدوخ متل مسك العشاري
رقيصن ينهزنو بلا الفلو
الّلماتو غابن منو في ضل الضهاري
يجمّع في قفاهو وينطرح
يتمطّى تتحتحت مفاصلو
وده ياهو الفاك جباري
دلالكين تجيب الضلّ
علي متاهات الضهاري
غناين اصلو ما سمعنابو
كنت بقول ليكي الا هسع ما ني طاري
وطنبورن مبرقع وحسو فاقع
لا في كنتر لا ودع فوقو بيراري
عشوقن في الرقيص
يتلوي متل سيد المغص
يوم يبقي في حالة طوارئ
والمداين ديمة فايري
زي وحوشا في البراري
والمـآسي كتيرة حاصلة
والمكضب يلاقي بوليس السواري
عاد دي حالتا بقدر اتستر معاها
خلاف احاكي الناس واجاري؟
وانتو راجيني يوم اجيكم بشهادتي
وينبسط ضهري وكباري
وبرضو خايفين من اجيكم بي غربية
وفي خجل قايد صغاري
والقدر بي غادي كاتب ليه شيتا
لاني حاري ولا ني طاري

حاجة واحدة تكون في علمك
اني جايي وتاني راجع لي دياري
وياني حمّيد القديم
الا بس فاقد حجابي وراح سواري
يمة كتري من رضاكي
وسلميلي علي المعاكي
وقولي لي حبوبة زيك
نحن شبنا وماك براكي
سلميلي علي جروفنا وحتى وزينا البكاكي
سلميلي علي بناتنا
وقولي ليهن ماني ناسي
طاري شلاخا مواسي
زي شقوق بيتاً سداسي
طاري نقشا فوق خدودن
بين ضفايرو وشوفو قاسي
جسمي في البندر ممدد الا بينكم بي حواسي
سلميلي علي البكادن والبشتت في التقاوي
في الكرد محراتو قالع
وصوتو فوق تيرانو عاوي
ماحزم بقجة ثيابو وقام فجر لاحق اللواري
اخيرو يحفر في جروفو
مالو مال حفر المجاري
سلميلي علي الضرايح
والفضل من الخلاوي
والفقير الفوق حصبرو
يكتب البخرة ويداوي
مع السلامة ودعتك الله
ولي وصيتك ماني ناسي
لي شفقتك مافي داعي
وابقي عشرة الراعي واعي
في بحور اهل البنادر من زمن طالق شراعي
كان نحجت بجيك غانم
(وكان فشلت بجيك ضراعي)

بعد عشرين حسبتها يابا يوم فوق يوم وعام فوق عام
حنينكم طش فى طشيش
ويا مالقيت تملى الحنين جمام
اتلفحت شال الشوق احادى الراحلة لا قدام
كسحت شمال وحس طمبوركم الولوال نحاس ابواتكم الرزام صليلن
يصحى فى الشوق اذا ما نسم النسام
نزلت قرير اهالى الشان بعشو الضيف بخيلم فنجرى وعزام
كرفت الطينة ارث الفاتو وما كفانى
الا بركت فوق الدار واتنسمت
من السام
شرفت على رمال القوز واترحمت على حرزا هناك مركوز
على راسم سريع النهمة كان ودتوم وكان فى الماضى مو نوام
ردفت الصيحة فوق الصيحة واتحزمت ابكى رجال
بكيت سيوفن المدروعة فى الحيطان
وزى ما هم رقادن طال رقادن طال
بكيت فرواتن المفروشه للجهال
ويا ما قال ويا ما قال ويا ما عرض الصهال
نشدت الفى الضريح راقدين
عليكم الله يا خالدين
عليكم عزتن كان زمن زينكم
ودنياكم لبن معسول وتشربوا فيها بى هينكم
جدى سعيد ولد بادى العكودابى
دحين يا ابواتى كان بينكم
قالوا اتربى فوق خيركم
ويوم الحارة شايل شيلتو من شيلكم
يخالطكم قداحة الخير
ويتحزم وكت شينكم
وشكاراتو سمعن قولى قالن سى بدن شكرو
وقالن لى يمين ما قلت فىجدك كلام قدرو
وكل القلتو فيه قليل وما قارب عشر عشرو
الصهالة والوقالة والرقالة وام غره هو ركابن
الجهنية والقطنية والمحوية وام درة الباريها حلابن
العشاية والشاشاية والسباية وام ضرة لى ضيفانو بسخاين
المزروعة والمقروعة والمفدوعة لا برة متمسح ديمة قيسابن
المفزوعة والمقلوعة والممنوعة بالمرة كان من مافى جيابن
راكب الفصلوا انسابن ودايما قدمو فى ركابن
اسود الغابة غلابن وبعرف يكسر انيابن
حلفوا الشافوا قدحو الحار وشافو كتار وماهو كضب
قالوا وساعو مركب زان يشيل اطنان وخرسو هلب
جفير سكينو دمو ينز وداك برادو واسكت كب
اهل السايحة والمتراوحة خاتمة وعاقبة بى قدامو سوا درب
ده ماهو كتير على ولدا مربى على ضفاف النيل
ويوم ولدوه دفنو ابواتو صرتو فوف مراقد الخيل
عكود الكان بعبر الكيل
يمين الدنيا جاتو هينة ولينة بالخيرات مشيلة شيل
سواقى تسوق تلوت الليل
ونخلوا متنى شايل العجوة والقنديل
عيوشو مصوبرات كيمان
وعيش الريف ولد تيمان
وخاتى البودة والعسيل
ده شيتا كم دقون شافنو بين شفقة وحرص عبدنو
والعقار لعابن يسيل
الا سعيد الطلق الزايلة وخطب بى مالو دارا خالدة
كان عزام وباعو طويل
بساطو الاحمدى المحضور
غدا وعشيات ملاقية فطور
وديمة ضيوفو ديل فوق ديل
يختف من مطايب الدكة لى ضيفانو
ما ضباح حميل وسخيل
طحاناتو ما نامن جبال اللقمة كم عامن
فوق سمنا مصفى تقيل
ويوم الودع الحبان
ونورو الضاو تحت التراب ما بان
كان الفقد فيهو كبير
وكان اليوم ده ما خاتنو فى الحسبان
وكان ميراثو كل ميراثو
قدحا ناز وسيف فولاذ وفروة ناس اصال وعزاز
وسبحة ملانة يا حنان ويا منان
قبل العم وقبل الخال بكوا العدام ..
بكوا الايتام بكى الكرم الصبح مشلول
وكل ابواتو راحو وغابو فى الرهبان
ونحن عشنا لازمنا قبل ما يبنوا فيه البيت
يكوسو الطبلة والجنزيز مع البيبان
زمان الصالة والصالون
زمان الرغوة والبالون حليل الكان
حليل الدانقة والديوان
حليل النافق اموالو
وتدى يمينو وما تعرف حسابو شمال
خليك من يعرفوا فلان
كل فضيلة فى الاجداد
ابت ما تبقى فى الاحفاد
ومسكت فى النعوش الطاهرة
واندفنت مع الجثمان
وكل مكارم العابرين
معاهم راقدة فى شبرين
وبقت امجادنا
كانوا زمان
وكانوا زمان

لك الشكر قمة فى الروعة

اشعار المبدع ود بادي من الاشعار المحببة لدي على الرغم انو لي معاتبة عليو انو دايما النقض على ناس المدن ويرفع شاَن القرى
وناس المدن غالبا من اصل قروي اذا لسه فيهم العادات السمحة
وكتير من الشعراء يمجدو القرية وكانها خالية من العيوب ويدو صورة عكسية عن المدينة على حسب اعتقادي مادام هم مابحبوا المدينة لي الغالبية بجو يسكنو فيها
والواحد يجي يزور بلدو بي العافية
انا في راي انو الاتنين مكملات لي بعض
وشكرا