وقفات مع عباقرة اهل المسادير ؟؟

هذه المسادير والمجادعة للاخ منصور المفتاح وهي في غاية الروعة والجمال مع بعض الزملاء . ارجو ان يستمتع بها كل من هو من اهل المسادير :

البلد المجوبكه بالمحن مخجوجه
وموية نيلها ذاتها من الكنيف مخموجه
الروح فى الحلق حرقانه باقى خروجه
وناس هولاكو واقف فوقا شايل كوجه

الحال العلينا يعلمبو رب الكون ..
الوطن انقسم وفقدنا اولاد جون ..
القرش إنمحق وما مكفيه المليون ..
وحكومة السجم قاطعاها يد العون ..
********************
بُكره الحال بغيرو شعبنا المغبون ..
شعباً ثورتو موضوعا تب مضمون ..
تزغرد امُهاتنا ويفرحو الجنّون ..
وينال عقابو كُل من عمل فرعون ..

راجين الكريم يفش غبينتنا
من ناسا مكجنا لرفاهتنا
باكر تنصلح احوالا امتنا
ونرفع للامل ان عشنا هامتنا

المفتاح ازيك ومال عدوك مقاطعنا
مشتاقين كتير لكلامك الزين يعلمنا
معنى الوطن والحال الكم مؤلمنا
ونسلم عليك وعلى وليداتنا

المن الكريم يا سلمى ما بناباهو
لكين الوجع من الفقدنا نباهو
القمرى كان غناى سمعنا نباحو
حتى النوم كمل والناس تكوسو يحاحو

البلد الزهت رغم البكيدو وخانو
فارسها الصنيديد كالجبل في بكانو
سامها رويحتو شان صون الوطن وأركانو
ثابت ترسو تب راكز مع أخوانو

يوم قلنا البلاد كانت حداها موامره
كتار الكضبونا وصنفوها مشاتره
سلفا وبنيامين قالوها علني وحاضره
من بدري العلاقات كانت متينه وعامره

راكوبة الخريف الفيها داك عارفنو
والأسد العجوز من القرود داسنو
البلد إنقسم شفناهو ناس شايلنو
زى مولود جديد من أمو ديك حاجرنو

البلد البخاف من الكمر والصورة
اللابتوب واليوتيوب بقت محظورة

حزن النيل علي الحالة البقت مأسورة
في الفاشر تتاجر يركبوك ماسورة

مى بلد النعام العاليه زاهيه قصوره
ويات من قام بروس سوالو كم مقصوره
حزن النيل على الباعوها دون فاتوره
حزنو كمان كتير لى الفاشر الأسطوره

ماني شغيل بيوت بعقب بحل الصره
وما بتبن الجاره واخون الحره
بازل مالي للازمني واقف بره
وسايم روحي لليوم البقولو مشره
(ده شغل ناس البطانه)

ودشوراني المرغومابي قال :
يا ياقوتة الحضري الحضارمي زبونك
عازة وغالية طلعن في التريا تمونك
يا تمرة كريمة القاد سبيط عرجونك
إنكال بالجمال لامن دفق ماعونك

محن البلد بي خيوط العنكبوت منسوجة
وموية نيلها ترجع صافية مي مخجوجة
وقت الروح مخير سيدها عندو خروجة
ناس هولاكو موتم اخف من فروجة

بندورا محفله والعين تكون مدعوجه
وبندور نيلا صافى وجيدا مى معووجه
بندور التتر زى ما أستباحو زنوجه
يمضغم الهلاك ويبلع عقابهم موجه

بي سواعدنا نحن يكون بلادنا خروجا
من ذل الفتن وايضا ضرورات حوجا
زرعولنا الضغائن وبقت الامور ممجوجا
نحن جموعنا واحدة بعروبتا وبزنوجا

ملينا الوعود خطب الكلام ممجوجه
وحاربينا الدليل وكت الشراك مكجوجه
قالولنا البلاد عند الدول مدروجه
لا تقدر تبيع لا مروه تسقى مروجه

الحال بنصلح، وربك بزيل الكُـربة
ونتلملم جميع، حتى البعيد في الغربة
إن صفت النفوس، والعقلا خلوا الحربة
بتنعدل البلد، وتصبح جميع منطربة

الحال يا عماد داير أمانه ودربه
وداير ناس رجال مو ناس نفخ فى قربه
الخم والفساد بندورو تب ما يربا
وما بندور هلس لا ناس رقيص لا شربه

راكوبة الخريف في الطرفة مي مشكورة

عافتنا البنادر والدروب محجـورة

أطـراف البلاد منقوصـة جات محدورة

أمريكان هناك لعبوهـا لعبـة كورة

راكوبة السياسة، في الفتنة مي مستورة
اتبهدلت البلد، وأضحت دروب مهجـورة
أطـراف البلاد الفايرة ديك الفورة
حاملين السلاح، ضربوها في صنقورا

دايرين المعايير تختى كومي وكومك
تقطع للوطن من جنبتك وجضومك
التاريخ صعب وكتين جناكا يلومك
زينوها السير في البادية أو خرتومك

من نومك تقوم تلقاهو وافر كومك
وتلقى المارسيدس من بره جابو هدومك
لا بتعرف جياد لا الكورى جاك من يومك
وساكن فى الرياض دايما بسف حلقومك

الخملة وتبيع كل البشر كجنو
خوان الأمانة أخير شرودو وجنو
مابخاف الملامة لو العوين هرجنو
كيفن قدموهو وعلو رنو وشنو ؟

أخوي الأمير، الخملة مو وحيدن فردي
ديل خمخام "القطيع" الفي "الشمال" متردي
لو ما خوفي القصيد، يمرق يجاوز حدي
كنت بزيد وصف، ما يغباهو حتى الهندي

البلد آرفاق ناقصها دربه وسيستم
موروثاً همج في الطبع صار متلهم
السوداني خارج وطنو يوت متقدم
وفي داخل الحدود سجمو ورمادو يخمخم

البلد آرفاق مرضو الخطير في ساستو
يوم قال المغانم تب بقدم كاستو
وفي الواجب ضنين جاب نومتو ونعاستو
لا هماهو شرزيم الوطن لا تعاستو

في السلطه ومغانم كاتلو الجنون
ومن أجل البريق جابت حيل وفنون
ناساً في الغرب بغرت قلوب وبطون
لا تار لا غبينه...تلقاهو أخوك مطعون

قضية وحدتا، شاتوها زي الكورة
خصوبا الجنوبي، والشمالي برة الشورة
براهم قرروا، ولبسوهو تب طرطورا
ولما الفاس وقع، الشينة جات منكورة

شاشينا بنغنى وليلنا نجمو بضوى
وحاكينا الحدى لى عند فريستو بخوى
جدى السلم دا الفى المراح متحوى
وما بنقدر على عل بالشديد القوى

حسرات الشباب اتشـتت مقهـورة

حسرات الكبار الـ بالمرض مقبورة

حسرات الجزيرة حزينـة للعيكورة

محزونـة المناصير والجروف مغمـورة

مرقت من مراحها أتشالبنها كلاب
وزى سهما مرق من قوسو دزو وغاب
قناص المعيز قجالها شافها رهاب
وجاهو عجاجها يلوى يقولو أمرك خاب

الشعب العجيب شال نفسو والحيكومة
بدفع للعلاج ومن خيرو زاد في كوما
شن فايدة حكومة دوام شخيرا ونوما
جبناهم فزع ماأدونا حتى شمومه

نتابع

فراق الأهل صعب زي فرعــــــت الحمي
البلد سمح لكــــــــــن القايدنو زي الرمة
غلا وترضيات بس يكفيني فيـك ناس يمة
البلد إتوزعت وقالوا الفــــــــــــرق ما لمة

الشعب العجيب فتح الدككن وتاجر
أبفاتوره جاهو مع البويليس كاجر
سوى الشمطه شمعلو الدكيكين وغادر
حول للشعب شحاد بقدرة قادر

شن يسوى الشعب المسكين وكت جاهو اب كباس
طير النوم من عينوا خلى نوموا زى اب كرفاس
وقدر ما نقول يصبح يوم يطيروا نلقى زادو الدباس
شى سيدى وشي مهدى وناس تانى بلا راس

الشعب قايلو زول طلع دلدول
عدمان الفهم عدمنا موية الفول
إستعراضي فوق البارده حضرة صول
سايله ريالتو فوق مغنمها تب مكتول

البلد الحنينة الكان بقوقي بلوما
بي فت ضربة فرتقناها قبال يوما
إن طابت نفوسنامعارضة وحيكومة
يرعى بهمها "حنتوت" من تحِت بعشوما

البلد الحنينه الكان بقوقي قميرا
ضجت بي فساد حاكمها ثم وزيرا
سمحة جيرا قدح الكسره والأنجيرا
مابتاكل قبل ماتسخى تب لي غيرا

الحنتوت يبس والناس تبل في هدوما
كان تلفي الدغش كوس الرزق مهجومة

ما فضلت نفوس كان طيبة كان مظلومة
وبهمك امو لي الجزار بقت مسيومة

ناس تأكل (الكـــرتة) وناس تأكل شية بي ليمون
وناس لايكة الصبـــر قرضة عاضــة عليها سنون
السبب الخـلا الزول إتكلـــــم براهو زي مجنون
ناس كانت فقيرة بنت سابع دور وباقي الشعب مغبون

قلَبْ النمَّة غَنَّايَنْ أبوهو حسين
متشائم خلاس والختوة زي الطين
إن راحت سماحة ناسنا شن حارسين
بلا عطف الكريم سيد السما وياسين

من جوة المراح جروها من عرقوبا
ومن ضجة نبيحم، جعلوها قلبت هوبا
حاملين السلاح، القايدين فهوم مقلوبة
كم آذانا "القطيع"، وخلى الأمور معطوبة

فى الصى والخلا قداله مى مزروبه
وناعس ود عيونها وديسها سادل روبه
ماها عناق ضبيحه وقالو قرمت دوبه
وما لقو حاجه غيرها إن شاء الله يقرضو لوبه

منصور

شيتا عجيب الماهيتو رقما مشــــــفّر
وفي نص الشهر رصيدو قام اتصفّر
ما هماني الهلال لو صبغوه مصــفّر
ماغسني الربيع الفط دارنا وطــــــفّر

تحياتي يالمنصور

حقيت السلام يا شيخنا ود السيد
وحقيت الردود أمرك صحيحا جيد
ماك عدو البلاد إت للبفيد بتشيد
ووقت الناس تغيب عند ناس أبوك بتعيد

منصور

حسرات الشباب اتشـتت مقهـورة

حسرات الكبار الـ بالمرض مقبورة

حسرات الجزيرة حزينـة للعيكورة

محزونـة المناصير والجروف مغمـورة

أحمد الشايقي

إن طال الزمن لا بد تدور الدوره
ومافيش خير بدوم معروفه فى المعموره
إن قلت المناصير ب الظلم مخبوره
ربك عندو سر فسراع بقلب الصوره

منصور

لبلد آرفاق مرضو الخطير في ساستو
يوم قال المغانم تب بقدم كاستو
وفي الواجب ضنين جاب نومتو ونعاستو
لا هماهو شرزيم الوطن لا تعاستو

إن قلت البلد حق الجميع من ناسو
حقنا نحن ذاتنا وحق القبيل حراسو
الناس القبيل فى الدنيا غرقو ساسو
راعو جميع حدودو وخبرو مره أساسو

منصور

قلَبْ النمَّة غَنَّايَنْ أبوهو حسين
متشائم خلاس والختوة زي الطين
إن راحت سماحة ناسنا شن حارسين
بلا عطف الكريم سيد السما وياسينجاتك..

النمة قالباها البلد بي الشين
ويات من كان يجيك بطران قرف من دين

سماحة ناسنا من المولي ماهو ضنين
بنرجاه الكريم فرجو البلا لقنين

نحن عيال سرور وقت الضحك والفاقه
نحن عيال سرور وقت الحديد إتلاقا
نحن عيالسرور وقت الحديث إتمادى
والجمل البهيج بتقصو مننا ناقه

ناس تأكل (الكـــرتة) وناس تأكل شية بي ليمون
وناس لايكة الصبـــر قرضة عاضــة عليها سنون
السبب الخـلا الزول إتكلـــــم براهو زي مجنون
ناس كانت فقيرة بنت سابع دور وباقي الشعب مغبون

الكرته!وين؟ داك زمن المسور والقش
انقلبت كوش وبرميل قمامة.... وطش

القرض البلوكو الناس صبر ما طش
ونحن صبرنامن العصرة كرمش وكش

Quote:
إن طال الزمن لا بد تدور الدوره
ومافيش خير بدوم معروفه فى المعموره
إن قلت المناصير ب الظلم مخبوره
ربك عندو سر فسراع بقلب الصوره

تحزن للجهال الماها لاقية سـرورا

تحزن للتلاميذ ماها لاقية فطـورا

تحزن للمشاريع الـ خرب بابــورا

تحزن لي عجـف شـاتا وخلا المطمورة

أحمد الشايقي

لازم نطرد الغول الفي اركان بلادي اتربع
عشان نرجع نتحكر فى الواطه ونتربع
نـحسب الفات من الايام نعد اصبع فوق اصبع
نخت العشره جمب العشرة نعد نجمع

الخوف يوم نقوم نلقاهو هادن وطبع
ونلقى النيل حسى وترسوهو من المنبع
يا بت الرجال شوفى الزمان كيف بدع
وشتت ناسنا صر زى الدلاقين جدع

منصور

يا طير إن مشيت سلم على المفتاح
وقولو الظن فسد والقول بقالنا مباح
إركز نور هدى زمن السنين باباح
وفى السبقن قبيل نحن بنلم الداح

الأمين حسن البدرى
شاعر القبيله

صبيبا من عصير بيهو الودين سالو
ظبي الريم سفر رويان قدل في تلالو
مضني الريد معني الريل قلب أحوالو
شوفن لو منام بالحيل بريح بالو.

عذرا علي التأخير.

فيصل المفتاح

بهم الصيد قدل كبس الطلح حتالو
ما سولو كر ما درعو فيهو خلالو
عشاق الأرايل داك شقلبنلو خيالو
من ضهر التويس زى الحدى خوالو

منصور

قاعد بوسرر وأماتو نجعن منو
جديا داب قرم برم الطلح حارمنو
كحلا فى العيون برق السنون شالعنو
داك عاشقو إستخل قيدو المتين دارعنو

منصور

ما شاف الهجير جاهل صغير في سنو
جديا داب قرم طيب الاريج فاح منو
عشاقو استخلو وبي محاسنو تغنو
ادعج منفزر كاحل صقيل نور سنو

فيصل المفتاح

الموت ماشمت غايه البخود والببروا
والحد و الحزن ما جابوا زول من قبروا
الزول في الشدايد اولي يلزم صبروا
يترجي الكريم مولاه كسره يجبروا

فيصل االمفتاح

الموت حق ونافذ ديمه صادق نذرو
ما بعرف فوارق مافى زولا قدرو
غدر الله إن وقع مين غيرو قادر إجبرو
شوف زمن النوازل خلقو كيفن بجرو

منصور

ما شاف الهجير جاهل صغير في سنو
جديا داب قرم طيب الاريج فاح منو
عشاقو استخلو وبي محاسنو تغنو
ادعج منفزر كاحل صقيل نور سنو

فيصل

الفرع الرخص خيروز جناينو إتنو
كم حرق النفوس لا لحقو لا لتنو
ناس البكرى شوف غبو وغلبهم إتنو
من الرهبه زاغ ديش القنيص ما إستنو

منصور

يجزيك الله خير يا اليوت سماهو مخنق
يا بحر العطا الما صد منو مرنق
موجك حين هدر لا القيفة عرقو مزنق
فوق عمم الرجال تفضل عزيز و مشنق

فيصل.

ختيت لى بياضه وورقى أصبح بايظ
وبابى الكان بعرفو دخولو صار مو جايز
يا حليل الشباب ما ختانا صرنا عجايز
والكان أمرو ساهل صرنا عندو جنايز

منصور

لي جلا ما بتقول دايما تكون الفايز
خصمك ما انستر إحساسو دائما بايظ
ورقك تامي يوت يا الي التقيلات رايز
قفلة نص كسبت وقال كفاي ما عايز

يمين أحمد ود أحمد ما يلحقك.

فيصل المفتاح

جلا شن تسو والشيش كبير فى السايز
ويك بيش آند جهار ما ظنى بيهن فايز
الشوله أم زغت قلبت نهارن قايظ
وبى الورق المعاى ما ظنى ببقى الحايز

الله يرحمهم لكن دى صعبه على أبو أمونه

جلا شن تسو والشيش كبير فى السايز
ويك بيش آند جهار ما ظنى بيهن حايز
زيفة الشوله قلبت لى نهارن قايظ
وبى الورق المعاى ما ظنى ببقى الفايز

منصور

الشيش و الدبش و البيش حسابن ليك
و الدرجي الجهار في القفلة ماشة عليك
أقفل و عدهن تكسب رضا والديك
وما تهم من برٍد لا حر سموما يجيك

فيصل

من ما قم صغير أنا فى الحديث حدباى
ومن قبل اللبن شربان لبا الدوباي
يا بت ود تناد اللمنيح هداي
ودربك داك عديل خابر الرحم وداى

منصور

هديك المكنى جات عقلى العديل بتقلبو
ديك المكنى جات قلبى التقيل بتخربو
هديك المكنى جات سيف النصر تقدلبو
ديك المكنى جات جلدى العلى بتسلبو

عمر ود محمد ود حسن

دا الأعوج ترا والشين نهاية حدو
وأن شاع دا الخبر بملأ الفريق لحدو
أقولو اب كبس من دخل ود أحدو
فرحوا وعرسو لا موجعن لا حدو

فيصل

الناس للجمال ضربوا البوادى ومدوا
فوق سرج البشارى الختوا فوقو وشدو
الصيدالأليف بنصيدو فوق عند عدو
للكاحل العيون رمل الطريق بنعدو

منصور

بالخير السلام من ابوجا جانا دعاشو

طالبين الكريم فسراع نشوفو رُشَاشُو

كل زول ينكرب ينقح يخُت رَشّاشو

شان تَعَمر بلدنا زرعنا يلقى فرَاشو

فيصل

الناس بالحروب حيرانه لامن داشو
كملت كوتتم عدموا الدخر وخشاشو
داب برق السلام شفناهو درنا دعاشو
والبغلط عقب بنملو ننعل خاشو

منصور

يحى المك أبوك الديمه قاطع الشك
ويا ولد السناير حاشا ما بتنشك
قلب الناس عليك قلبك هواهو شبك
ويا دانة المدافع حاشا ماكا فشنك

منصور

راكبين البطير لا بكسى لا دفار
وشايفين التخا الما صادوا مره غبار
زارعين الفضايل ما بنعرفو عدار
والفايت الحدود كان قلعه ببقى ودار

منصور

مانى الأندروس طبجوه مويه وفار
ومانى فطير دريش كبولو كوز خمار
إن درنا الحرف بنسلو يشطشط نار
وإن درنا الكماج عارفنلو سم الفار

منصور

الوطن البكوس ولداً يبرد بطنو
مابهم العرق مابهم فصاحتو ورطنو
كيف يمرق كنوزو يجيب معادنو وقطنو
الخيرات تعم دارنا وهدومو تعطنو

جبار الكسور ما بدور ظلم لى وطنو
ما بدور اللعب داير رفاقة فطنو
داير المنو فاتو وفيهو ديك تب قطنو
يجمعم الهدف إن نطقو كيف أو رطنو

منصور

الوطن الحفت كرعيهو كايس الرايحه
بين أجنابو كم مكلومه كمن نايحه
وزراهو الغوفل في العواصم سايحه
هاناس الفساد ريحتو البقت تب فايحه

الوطن الحفت كرعيهو من غير فايده
كم خرجت جموع يوماتي رجعت عايده
شان تبقى البلاد محسوبه ضمن القايده
حصدوهو السراب سببو الإدارة البايده

بكره مولده وخافس نسلها مغرق
وأصلا منو جات حايز الأصاله مغلق
أبو دومات أبوها المن التقايا معلق
وخبار للدروب ما هو الكفيف ومجلق

منصور

ود حسن الامين كمل فهم رفقاتو
و باروهو التلوب ما نظمو زي أبياتو
كان قرا للكتب في الجامعة قبل مماتو
كان خرب البلد حتي الفرزدق فاتو

خليهو الأمين عاين عمر وأفعالو
شوف خرز الكلام مطمورو فومو كالو
مهرة ود كلس من آخرو أس فكالو
جلدو الفوقو داك سلبوهو ناسا جالو

القول في البحقو القول بجيك متداعي
و الحاق الشكر بخطب مديحو يراعي
يا خوي طول عمر ما اظن بحصلو ساعي
فوق درب الامين ما بمشي زولا واعي

تمساح الكلام الشبروهو سباعى
ومن شيمة حسن لاواها جانا الواعى
نفاق الكتيره القومو مرقو دواعى
وفوق درب اللمين باريهو ساكت يراعى

مجادعات بينى وبين إبن عمى فيصل المفتاح دارت بموقع السروراب

مليونين سلام والعيد بركتو تجيكم
يا أولاد الكرام ما بقمح الراجيكم
قبال الإمام نازعنى شوقا أجيكم
ويا ناس كمال أرجونى داج جاييكم

منصور

يا منصور اخوي مرحب حباب ابياتك
و العيد الكبير في كندا فرحتو جاتك
شاحد الله الكريم بالفرحة يملا حياتك
و في مني كل عام في العيد تأدي صلاتك

ود المفتاح

اها ا منصور دحين دايرين وجودك ديمة
شان منبرنا يصبح لي بلدنا تميمة
بالراي و الفكر نبدا و نعيد تنظيما
و بالساعد القوي وما بي اندفاع بي عزيمة

فيصل المفتاح

من ناس اللمين يا ود خبرت أصولو
ومن أمثال عمر حققت عرضو وطولو
يا ولد الطوال الديمه زايد طولو
ما تبخل علينا الدن أطبقو وقولو

منصور

قصبة مفرق الوادي النشيط تربالو
عليل نسمة دعاش لو مس فرعو امالو
وزن صافي الشعر لو كان صدق غربالو
تريس عمك عمر ما فوقو اسات طالو

فيصل المفتاح

شيطان الشعر كان فى السماك سلالو
كان بحر الكلام دافر دمير شلالو
ناذر من طرف واقع القريب شيالو
فى الشبال حريف كان من بعيد نشالو

منصور

من سحر الكلام صافي الرحيق القالو
شيطان الشعر اعياهو حين بارالو
رقيق دل الحسان البكفي منو مطالو
تخطب ود مقالو وترجي بدر هلالو

شلال الدميرة القيف طواهو و شالو
بي موجو الهدر خرب البلد بي حالو
شبال الدهب منو الجدايل سالو
لفحو وقام سدر صافي الرحيق اسقالو

فيصل المفتاح

التربال كم عزق سعدو ومفرهد نالو
وكم مرتق جوانب جدولو النزالو
نى قصب التقانت ريقنا كم جمالو
دا الشاطب عقولنا الجيد وقت تلالو

منصور

قصبة طين قرير طيبة (ونجومها) تعالو
طن مرتينا شال قلب العشوق أبكالو
الجنن عقولنا و وشربكن في حبالو
ديسو الفوق كتيفو و قدمو اتوطالو

فيصل المفتاح

شرك الصيد مدنكلو للمعيز قجالو
ما بهبش تيوسن وليها راخى حبالو
المرهاء المكمله شوفها ريح بالو
والعجب أم صدوغ الديمه كانت فالو

منصور

ربرب رملة الوادي التقيلة رمالو
سايقو القارح الحارس المعيز بجلالو
من مرهاء و مشلخة حرة فايرة تلالو
دون شرك الفحل بالشوف بصيدو غزالو

فيصل المفتاح

فوق حدب الكبور شاف العبور ناقزالو
شافا من المراح خرتت صفاحا قبالو
عند تبس القويز طبق الطبنجى وشالو
طق هبش التتك نهر المراح علالو

منصور

سمع حس المراح صن و سكت و اصغالو
شافا و وقلت خزت عيان باينالو
كرس طابق الطبنجي و خزنتين في شمالو
عن نقر التتك الوادي قج علالو

فيصل المفتاح

إتلبج الحريص بهم المعيز همالو
حدرن فوقو ساكت فوتنو نعالو
كف ختف الطبنجى المن زمان فلفالو
خرتن فوقو ساكت قمحنو علالو

منصور

إتلبج الحريص سرحت نعاجو قبالو
حدرن فوقو شوف عين ماهو من قول قالو
لا لحق الطبنجي الفي القويز خلالو
لا سهمو انطلق لا ساعدنو نبالو

فيصل المفتاح

شرفن من بعيد شافنو عند سيالو
شافن كم شخيتير من مطيرات سالو
عنق الصيد سبنو ومنظرن سلالو
ديل بريب صباح الصافى دم أنسالو

منصور

نفس القارح الكسْر قيود حجالو
ما قام من جكيكة الدوبو قايم قالو
صيد قيع الخلا الدوخ دوابي رجالو
تقيل عن شوفتو يا الراسي المقتطر شالو

أكسر يا ابن عمي.

فيصل المفتاح

سمحات فى الفدو سمح الحجل خلخالو
سمح الجيد مكمل والعيون كاحلالو
بريب التمام الديمه شايف حالو
ما بنصاد عدل كضب البقول حلالو

منصور

أركب شب أرح نلحق مطرة رشت
ونلحق للكبور قالو المعيز إدشت
علق الخريف غطى الشقيلات بشت
وقالوا البكره من طرف الفريق إتعشت

منصور

أركب يا زميل سود التعول انفشت
وفوق حدب الكبور رعت المعيز ما طشت
دريتا كست حدب المعالي و هشت
نحمدو تب بروق القبلي ما يوم غشت

كسرة مجنونة جن لكن.

فيصل المفتاح

ملاح البندق المعلوم ختاها ونشت
وللطبقو السلاح حصدو القماح ما عشت
دقوا النى وكت صفقات خريفم قشت
وقالت للبنيش أم الرجاك إتعشت

منصور

سدد ضربو طلقتو بي بصارة اتمشت
وفي فرق العيون بي بشويش مسددة خشت
الواقفات قريب وبعيد جلودن كشت
وقبال المغيب ام الرجال اتعشت

فيصل المفتاح

كرست شافتم من صوت كلابن فزت
وكربيت صقعتم حجر الحصايه ونقزت
لا شوف كملو لا مراح كلابن مزت
ومرقت زى سهم من قوس نبالم دزت

منصور

كرس كامنلها وفي الطين كراعو انغزت
وكللبو علي الكللب جت قمزتو هو بزت
كان بي سهمو كان بي كللبو ما يوم عزت
ومن دهن البطون عقبان سغارو اتغزت

فيصل المفتاح

وهذا اخى منصور ما دار بينى وبين شيطان الشعر ( القرين) الذى آثر النوم لمدة طويله وحاولت إيقاظه بالقوة

الشاعر :
خبار لٌغَتكْ بِقَت متـبهدله ومُنحطه
؟يامالك زُمام حرفاً سواك ما أنخطا
نايم لَى بدرِّجْ فيك محطه محطه
ماك عارفنى كحّال للعيون بى الشطه

القرين :
خطوطى الحمرا حاسِب ْ ليها ما تتخطى
أنا ود كيفى سرجِك فوقى ما بـِنخطا
َشَرطى معاكِ لا تهددنى لا تششتطِّ
وحذاراك تانى فى ضيل النِمِر تتوطا

الشاع :
بَحَرَك موجو أصبَح ما بِـِعِوِّم ْ بطَّه
َّوفى الباقيلى جمّام الينابيع قط
راجع ْ الخلفى مالَكْ والسنين منشطّه
لامِن ليكا أقزام الشِـعر تتخطى؟

القرين :
جيبْ إيدكْ رِهان يا زول نسيبةْ النطّا
سّهم فى شارد النــم لا عِلا ولا وطّا
وَكِتْ ما أشــِدُّ ووتـــر القوس معاى يــتمطى
جهِّــزْ لـَىْ دفاترك وقول سطُرْ ما أنفطا

القرين

واقف ديدبان كاشف ذكاك ما أتغتا
وزى ورق الجواكر وين نقول تتختا
شفتك يوم تقوم ملك الكواسر نطا
وحرفك نار مولع كيف تقول لى شطه

الشاعر

خطوطك كان جهنم يا قرين تتفطا
وسرجى بختو فوقك وديمه تبقى ف ورطه
مانى ورل صنق تمساح بحر ما قطا
ويا العامل صقر يا دوب مقامك بطه

القرين

دايس للزرار فو زى حدى فوق طرتا
وكضب القال حداك يا الفى العلالى مطرتا
بحرك لى غريق أنا فى الضحل كم عطتا
ونبعك لى محيط أنا فيهو متل القطه

الشاعر

إيدك لمها وخلينى كانت فرطه
وداير أكون براى مليت عطية القرطه
منك ما بدور لا نقطه لا خت شرطه
لا داير حرف لا زول مدور عرطه

منصور

نحن سياده مانا بياده
والقبل التمانيه نحن أسياده
الجرح المغور نحن ليهو عياده
عن ساعة الكتال شرطا تجينا زياده

حماد الرجاله

قاعد بوسرر وأماتو نجعن منو
جديا داب قرم برم الطلح حارمنو
كحلا فى العيون برق السنون شالعنو
داك عاشقو إستخل قيدو المتين دارعنو

راقدات باسـرَرْ نجعن كبار أُمَّاتِنْ
جديات الخلا البرم الخريف ما فاتِنْ
كاحلات العيون يتلاصفــن باسماتِنْ
مجنون عاشِقِنْ حت إن سكن مانهاتِنْ

بنقص دربهن نبراهو وين ما فاتن
وخابرين الطليح الشاققنو وباتن
حارقات الفؤاد وأرواحنا ليهن إهاتن
وكم كتلن نفوس بى سهام نبالهن شاتن

منصور

جدنا الخدر أبَّريم:

ود حمودة داير ليا منك خوسة
سمحة مطرقة لي غيري مي ملبوسة
تاكل حدتها إن ركت الناموسة
تتلقف كما تفعل عصاية موسى

البرق البشيل ســايق السحابات وقَّنْ
شال نوم عيني بي شلعة كهاربو البقَّنْ
غير السمحة في الوش والضفاير شقَّنْ
حــالي البيَّا لا بنحــــلَّ لا بَتْيَقَّنْ

محمود

حالك إنت ساهل وأنا حالى وجعو أتمكن
وسببو الفوق تقانت المويه ديمه مجكن
برقو أكان شلع أعضايا منو اندكن
ومتل الميج صقع شحن القنابل فكن

منصور

أريت البيك يزول "منصور" قنابلك يركَّنْ
ولي تقنت جماعتك بي شداعة يدُكَّنْ
المرض القبيل نوسربي فيا اتمكن
سببو البي جمالها بنات فريقا يحَكَّنْ

محمود

حافظات للعب ورق الغرام هن شكن
وقبال أرمى آس سبقنى جلن ودكن
شاطبات عقلى دايما والمزاج كم عكنن
وشارطات قلبى يوت عصب العشق كيف حكن

منصور

والينا القنيص جفلن معيزو وفزن
وصقعن للحصايا وللضنيبات هزن
قوقا القمرى فوقنا وديك قماحن أذن
وخربن شوق دقونا وبهدلنو وجزن

منصورر

قايمين بالخميس جبنا البكاسي يئزّنْ
ويات من قال بقوم عمَّرْ سلاحو ؤوزّنْ
ود الأريل الفوقو الكــــللَّبْ رزّنْ
خاتيات القماح جابنو نُخري ينِزّنْ

محمود..

عند القومه جن حضرن ركوبنا يعزن
وصيد لى صيد بدور إدى التحايا يلزن
بندور فرحتن شبه الأرايل يمزن
من عنق الطلح وأصوات طبولن يرزن

منصور

شفنا البط بعوم والوز قفاهو بكاكى
وشفنا الصيد قدل فرق الشدر متاكى
شفنا القمرى طار شفنا الحبار الراكى
شفنا الغيث نزل دقنا الدعاش الزاكى

منصور

شفنا الفي المدارس للنباغة يحاكي
وشفنا الـ للجراح يشفي المريض الشاكي
شفنا الفي الطعم تحلف تقول كنتاكي
شفنا الناقصو في الرسمية لبس الكاكي

محمود

]color=#000066] فوق أصهب مولد للصفيه مشرق
وقاصد الشوقو هابل جمرو فيا محرق
درك الوعر شاقيهو ما مدرق
وطالب الأصلو واصل فى السماح ومغرق

منصور

بدور اضبح تني جاتني الإجازة علامة
من منصور كبيرنا الشاعر العلامـة
قريب من السروراب ساكي ليا إقامة
في اسلانج بنيت في الزايلة مي دوامة

محمود

قبال الخدو ناير وفوقو بانت شامه
ومحروس بالقبايل ناس كرم وشهامه
أهل إسلانج عدال ما بتلقى فيها غشامه
فيهم ناس صلاح أهل العلم وأبوشامه

منصور[/color]

دوماتو بيخرن من جكيك الباجا
وقانص لى أم حجول والفيها خايل عاجا
الليل عد نجمو وللكريم كم ناجا
يشبع فيها شوف ويسرح معاها نعاجا

منصور

شرفت وقلت شافت كـلابنا معانا
وأنسندت على ساقا رهيف بنيانه
شوف دخان الضحى القالباهو فوق سيقانا
يا بدرى الأمين شبنا السفاهه كفانا

الأمين حسن البدرى

قفل بابو بالضبه وجدع مفتاحو
خلا الناس تحوم من شوقو ما برتاحو
بندور بس نطايبو الديمه حالى ملاحو
وبندور شوف عيونو الديمه ماضى سلاحو

منصور

الحر والسموم إتشالبنا وقمنا
وطاردين المعيز القصرنو عمرنا
بندور شوفتن ريحة مسكهن درنا
ما بنصد براهن كان لحقنا قبرنا

منصور

فرق المغارات جسنا فيهن غرنا
وتنينا الطواف لاعند مراحهن زرنا
يا رب السماح إيمانا زاد آجرنا
من بريب صباح أكرمنا زيدو أجرنا

منصور

الحر والسموم مو بمنعني وصالن
الحرات بنات الطابو في صلصالن
كتب الغزل موجابت خمس في خصالن
بي فد فتحه كتلني الرموش بنصالن

دعت الغرام عضانا درنا أمصالن
ودايرين الشفا وبندور دعاش آصالن
كتب الغرام ما دوننو خصالن
عرفنو القلوب خبروهو ناس وصالن

منصور

بكره وبت لبون الليله ياك بتللب
ومهره منسله وحامداك وفوقا تقلب
قوال حق دوام ما قالو قط بتدلب
وأهل الكيف حضور الليله أكيد بتعلب

منصور

منصور الأريب اطربنا طرّز واكتب
أسحر للبيان وشي الدرر واستجلب
يا سمح الخصال أفضالو دايما تغلب
حيّاك النبوغ من صدرو دايماً تحلب

هاتفن من بعيد جاب لى غناين بطرب
ودودن فوق رعود عصرن سحابن بحلب
وقت الناس تضيق تبقالا إنت درب
وهن حتلت تحت تبقالا إنت هلب

منصور

نقرن من بعيد أصوات شتامة تطرب
ودودن زي رعيد براقو لامع بعجب
في وقت الكرب واقف عديل متكرب
و في وقت الرخا زاهد عفيف متهذب

فيصل المفتاح

مالك يا صديق للمفردات بتألب
دايرات المروق من الحلق بتلب
وكتين تنكتم بين الضلوع و تصلب
تخرت لي لهات الأغنيات و تعذب

فيصل المفتاح

ختمت فوقنا ساكت وشوفا كيف بتلب
وتوقد فينا نار الجوف تزيد وتعلب
يا ترب الفصاحه المن قديم متدرب
إنت بلجو فيك وأنا بالبلود متغرب

منصور

خاتمة ديارنا حودا وفوق رووسنا تتلب
و لي نار الضلوع توكي و تزيد و تهبب
متغرب سفير ماك الطريد و مخرب
لجوك من زمان لامن بقيتا مدرب

فيصل المفتاح

مليت عينيا فيها وجسمى كلو بكـلب
وهبلت نار كمينه بتشوى فينا تقلب
يا ود ناس حسن وقتين تقوم بنقنب
وياقايد الديوش متلك دوام ما بذنب

منصور

مالك يا صديق للمفردات بتألب
دايرات المروق من الحلق بتلب
وكتين تنكتم بين الضلوع و تصلب
تخرت لي لهات الأغنيات و تعذب

البوح يا صديق بيهو القلوب كم تقلب
يرتاح الضمير يسبي الدواخل يخلب
يا فيصل جزّم تبهر عقولنا وتسلب
يا سيد الكرام للحكمه دايماً تجلب

بتنخب فى الكلام فرق الضلوع وبتجلب
وتقلعو زى ضرس من اللهاة وبتجذب
ببراك الأليف عارفك عديل ما بتكذب
وزراع للمكارم وللرزيله بتشجب

منصور

مالك يا غزال بعد الولف متضاير
ومالك شوقنا ليك بحرا ترسلو حفاير
مالك سم غرامنا الليله هايج وفاير
وبابك طب قفلتو على البشوف والزائر

منصور

الفخة

دوب يا الفَخة دوب وين القماري الفَرَّن
ووين شدرك خَبَار نيران سمايمك اِضَرَّن
هداكي المحل عندك برك واتجَرَّن
وعودك باسَرَر فوقك تعُول ما كَرَّن

باكر بعد مايجيكي هطال البروق الفرّن
بقومنلك شواقيراً زمان ما ورّن
الزرقن صباح شال ام رويق واتقرّن
وبادرلك خريف قلب الليالي الحرّن

سايق ضهري عام سالن جروف وخورّن
والساري الحلوب مطراتو فاقن ودرّن
اصبح رابط الضحوي البصب واتحرّن
وسقايك كسر غادي وجواسرك شرّن

بعطنن فوق جواديلك تلوب وحورّن
وابو الجاعورة بتدقو الكتيرها تورّن
البرقة ام جرس رقت فحول وعبرّن
ولي شدر العديد ناس ام قرين بتطرّن

عجبي السرحة والقش البعقرو بزرّن
وبرعنو ام قريطع من جفاف ما انصرّن
سماح نيلك دفر شايل قعوي وطورّن
ويا بخت البشوف حزمك خضار وغدرّن
هذه واحدة من روائع شاعرنا جمعة البري الكباشي والفخة هي بلدة وقرية جنوب ام بادر وهي (اضاه) ومنهل كبير ومورد مياه عندما يمتلئ في الخريف يكون ملتقي لقبائل الكبابيش والكواهلة وبني جرار وحمر وقبائل اخري خاصة في اواخر الخريف وبداية الشتاء (الدرت)

منقول

وإليكم المسدار كاملاً لمافيه من وصف وفخر ومعان تستحق الوقوف عندها إضافة لوصف طريق النشوق ..
الليلة المزرقن ختـّا غادي وبيـَّت

ماخد الليل صبيب واصبح سماهو مخيـَّت
الباشندي أرسل زعفرانو وظيـَّت
ضفدع ريدا في موج المرانع عيـَّط

ودعلي كرَّب المن الرُباط قام مارح
واتوجه صبيب تِعلا ًً بشوفو البارح
صيَّا ً موجو بالعـُلـُو والهباطاط سارح
لفـّا بدري بى تور أم حقيبة القارح

قبل النجمة لزّوا علي الدُقاقة سُغارُن
وشايلين قـلـّة مارجعوا القلب لديارن
الماتعشـّا بى الضيم والمغايس جارُن
بتبـّوا سريع علي صيحة المروّة كبارُن

أصحاب الرجالة الكاملة ماهن عيـِّل
عزموا الشـّيل وجابولو القفاهو منيـِّل
عقيدتن قالهن بدري الضعينة تشيـِّل
قبـّال السحاب في أمـّات دروع بنقيـِّل

حزموا النـّوق يعجـّن ويمصع الهدّار
وحور أم دِرعة لولاهو الخبيبو كبار
ضقل الضيف وركـّازة العشير والجّار
ختفوبهن لـُبد قشـّا ً بقوم قـُمبـــار

يوسف كرّب الحوري السنابو مردّم
قال الرحمة عمـّت والحريحير قدّم
قبـّال شقـّة البيـّاح فريكـُن هدّم
الزّين درّج الفوق الجديـّن حـُدّم

كوفار الجبل نزلوا العزاز بجوارو
ركبوا جماعة للشايب المزكك زاروا
أهل المكرمة الفوق العشير بضـّاروا
دوب لى ليمُن أولاد البيفقد جارو

السما جال وقلعات الطوال أنغمّن
والكانن عُجاف فوق المِمِخات لمّن
ليالي الرحمة عادت والغرايز رَمّن
ضعاين البادية فوق ضهر العواتي أنخمّن

رحلوا وقالوا يالجيلاني من العاقة
قطعوا أبسَعَنة بي جيهة المخادة شفاقا
وصلوا أمات قماري وختوا في الدقداقة
عشاهم بالعتيم ماكشّنوا الفرطاقة

برّاق العِيَن قلـّع سحاباً سود
غاس الأرض وسـخّاها أم هبج للجود
نحمد ربنا البيهو النِّعَم بتعود
الطوفان طلع عمّ العزاز والفود

من أمات قماري صباح ضعنهم قام
ودايرين النزول سدر الفويل قِدَّام
عقيدتـّن قالهم : لازم يكون في مقام
أبجلوا الشيل وخلـّونا أنقنـِّب أيام

يوم الرابعة عزموا الشيل مع الشهلال
ولقوا مقلب جراد شابك قِعور النال
أبت ترضابو بت اللي الرميم شيّال
بتدور رتعة الحدبة الورا الجبّال

فوق وادي الحمار قطع الضعن باكرية
وقالوا مبيتنا في صلب أم متيلة عشية
اللوب المفرق وببسُط الحورية
دشنبو الحُنان عِن رتعة الضهرية

شالوا الليلة من رِد أم متيلة صباح
مسافات ريرة قِربن وعمّت الأفراح
سافل أمات سيوف بلج الضعن وأرتاح
والباشندى أرسل عنبرو الفوّاح

قريرك فى الملاين دافقه فوقو أراك
وبريبك سرب عقب الشخاتير جاك
مرحات البكار بى حنهن حاوياك
ولايكات عود شفاك ياالشافيه درنا شفاك

منصور

فوق منصور أخوي حجر الرحايه الكك
بينين في الفراسه وفيها قاطعين شك
لابعرفو التخرمج لا لعبهم عك
ناس سلطه وملك بدوها مك لي مك

بعد ماكبرنا والقلب بي التديُّن لقّنْ

وراقن وهوننْ ؤيشاتو من داك دقّنْ

بانن لي درعاتنْ جباهن بقّنْ

وبي الحدق المزرقِنْ زعزعنو ولقّنْ

الشيخ محمد شريف

هنا اتنين عنانيف شرق

نواوير عاطفة لا ضاقنَْ سموم لا حرق

ادين مهدوله لا بتحمل غزِلْ لا طرق

وشعر من لونو دهراباً بفجو البرق

ابوالبرعي

كزيمة الدابو دايف وقرنو يا دوب مارق

ورقابة تري وتامن فصوصك زارق

لونك زي صفا السويتي شف ومطارق

وحسابي معاكي اصبح دين قيامه وفارق

حنفي

عين زينوبا ساعتي الرادو

وشعر زينوبا زي حالك الضلمه سوادو

كفل التبربولو حليبو والزول قادو

والله جدية النقا ومرح ########و

علي الشيخ

لا بتريدي لا بجاملي

لا بهمك تعب زول لا تعب لي زاملي

العزالا ياديفة البتسرح هاملي

ريدك كمّل الناس واتي راحتك كاملي

علي ابراهيم دياب

ليه يا صيدا ليه ياصيدا

مشطوب اسمي من دفتر حساب الريدا

قالت لي شان طولت طولة شديدا

اخر مرة شوقارتك معاك حميدة

ابراهيم الدلال

صيد المحريب مدهب للعوائد خرقن
وحادق دوق سماحن للبعاين شرقن
وقتين الشريف الشيخ معالقو إنحرقن
نحن السمبا سوينا وقلوبنا إنسرقن

منصور

الهرع آجنا شبال طنابره وطاير
وشوقك بلو شوف من أم وجيها ناير
الزامك ريدو غارس فيك سهيمو الغاير
وقالو الليله قاصدك ولى مرابعك زاير

منصور

زنزانة الرماد قاطعه البصيص والضو

وفيها مسجنين ناساً أسوداً حو

أرجا الباري شن ما يريد عليك يسو

وإن وقع القدر تلقانا يابسين كو

شعفوفة السجم فوق راسنا سوت شو

والقبل التمان من تالا عوص بو

يا الدايقين حلوها الليله أنبحو هو

وإن درتو السلام الليله بنقول كو

خابرانا البلود قاطعاهو فينا الشك
وناس دربا عديل ما بنرضى شغل العك
وقت الحال يضيق نحن العلينا الرك
ويات من قال صقر متل الدريش بندك

منصور

رحلوا وقالوا يالجيلاني من العاقة
قطعوا أبسَعَنة بي جيهة المخادة شفاقا
وصلوا أمات قماري وختوا في الدقداقة
عشاهم بالعتيم ماكشّنوا الفرطاقة

الكتراااااااااااابل

منصور لك الشكر الاف الاف وللاخوة الرائعين المتداخلين اخيرا ادريس ابراهيم وامير فتحي وعلي النعيم والشايقي وعربونكم كلمة دوبيت كاربة بعد ساعات (بسو خلوني الابربحها)لكن قبلها بديكم (كبروس حليب) وهي خريدة ومن عيون الدوبيت وهي لعمنا الشيخ جامع علي التوم وهو من اميز شعراء الدوبيت
حلال الكرب الحلَّا ناس قَمَّاد
يحل دعتورة من بابور جمال ؤعِماد
يجينا الساري يملأ الحمرة والرّهّاد
تقلب ضحوي غرب زرقينها ليهو سواد
تعم القوز جميع ما تخلي لولا بلاد
ونرتاح من هموم الدونكي واللعداد
ؤقبل القلة تبقالهن هلاع ؤغداد
ؤربي يشبع العين المساهرة رقاد
اجب الدعوة يا الساجدنلَّك العٌباّد
وجادول منمرس في شوفتو زيف فراد
ؤعاقرو بليلة فوق الفي رقا البولاد
والشيخ قسم الله ساقلو البكر ابو لُباد
ؤ سالم نازلو بي راموس ابو التيلاد
يارب يا مجيب لي دعوة النشاد
تجمع ليّ بيهن وبي علي الاجواد
ونرجع تاني نشمي جزونا ابو غراد
نشيل التاية فوق زملاً عواتي غِلاد
ويبقي غدانا ابو كتحة ولبنهن زاد
وبي الجادول نفر بي بسطة ما بتنزاد
وكيرهِن يزوم يخنِّق دُلَّق الفدَّاد
واحمد جودة لف بي بندقو الصّيّاد
وقدام كالج ابودكة ومعاهو رباد
وقول لي موسي ارح عقباني مافي قعاد
وبت الحوّة دارت الدجِّي والممداد
ونلقي هناك نعوم اخوالنا والاجداد
وكل البادية ناس حبجور وناس حماد
وأخط التاية جنب ودعمي خال قمّاد
ونبعِد من حوالي الكلهن حسّاد

مو الرّافِع رويسو الفي خبيبو بِلٌوج
ومو الطيبق صديرك يا البِنَاك مَفْجُوجْ
الوادي الغزير شِقلُو وعدارو بِسُوج
لبعو وسوَّي طفري الهبَّر المَقْجُوج

راجيك آ يحى أرح عند الشقيل فى الباجا
وراجيك شان تشوف بهما قرم لى نعاجا
فايح ريح حزاها وفيها نار شوف عاجا
وصيدا أكان جفل ريحة المسك فى عجاجا

منصور

الليلة القمر لي السَّربة عان ها سماحو
والقلب من هموم الديف كِتر جراحو
البهم الفي المنام بعرض علينا بجاحو
فيهو فيريقة لي الما بِندرج مُرواحو (ودعبيدالله)

الزول وكت إكون فى النوق تمانيه مراحو
وتايات من أقانيب أورطى بس سراحو
لابس القرمصيص داغس العيون فراحو
متل أدو البنج راجى الطبيب جراحو

ود المقدم أتقدم

منصور

ألبِل غيَّسَن حجَرن وقع في زاوي
ؤقطعن صعدن دمّرن مع ال....
ؤجَن مادات كيف هرع الصعيد الداوي
عَقَلَن فوق اهلهن ؤ ساقن الفدقاوي

شوف ايامنا السجم تجارى زى الخيل

عابه هموم تكيل الدار تفيض بالحيل

شلناالفات وشلنا الجاى ولسه نشيل

ولكنا صبر مدادى حبلا متين وطويل

يا المنصور ونمّك خلانى زى مسحور
ونسانى التعب نسانى كل كل فتور
واصل ما تقييف وادينا من مطمور
ما بنشبع يميين لو عبيتو لينا شهور

راجيك آ يحى أرح عند الشقيل فى الباجا
وراجيك شان تشوف بهما قرم لى نعاجا
فايح ريح حزاها وفيها نار شوف عاجا
وصيدا أكان جفل ريحة المسك فى عجاجا

منصور

جيت يالحبيب ناغِم فَطوم من صاجا
الليلة الوحيد جاب الخبر من " راجا "
الشوق نزف مَسَكْ الجِسِم رَجرَاجا
أهلاً بالمحبة الزي سيل الجبل فَجاجا

الشقليني

دوب لي رحيل ضعن ناس ام شَوايِل
ؤدوب لي ليم بوادينا البِفِشُّو الصّايل
ؤ دوب لي لمَّة الناس البِعدلو المايل
ؤدوب لي كرفة الرَّيم والسحاب الشَّايل

بت اللَّدرَع البتَّاقا يوت من شينها
وياالمفتاح بتين نرجع نحلحِلو دينها
دايرين الدِّعاش وبِندور نَكِرفو قرينها
ودايرين قارِص النوق البشيقنا حنينها

يتمايل عصير طيرا يرف بى جناحو

فاحت ريحتو عمت الجماعة الصاحو

كان يغشانا بس خلى القليب فى صراحو

كت ياعبيد تقول المنصور سكت وحواحو

النَّاس شوقرت ومن الصعيد جات مارقة
والقلب شاشا والعين لي غميدها مفارقة
يا استاذ يحي من ناساً سهامهن زارقة
المنصور بِوَحْوِح لي طِلوع الشّارقة

وحواح اللدغ من شوفها باقى يهدرب
وشايل كم جبال من ريدها بيهو مسدرب
ممكون بالعشق ودر بدورلو درب
وما بشفيهو إلا الداك لباسو كرب

منصور

جيت يالحبيب ناغِم فَطوم من صاجا
الليلة الوحيد جاب الخبر من " راجا "
الشوق نزف مَسَكْ الجِسِم رَجرَاجا
أهلاً بالمحبة الزي سيل الجبل فَجاجا

الشقليني

أم لهجا عسل حاشاها مى لاجاجا
وماها مسيخه زى واحدات ولى حاجاجه
إن قالو الجمال فايزابو من كم حاجه
وإن كجو الشراك هباره مى ولاجه

منصور

ألبِل غيَّسَن حجَرن وقع في زاوي
ؤقطعن صعدن دمّرن مع ال....
ؤجَن مادات كيف هرع الصعيد الداوي
عَقَلَن فوق اهلهن ؤ ساقن الفدقاوي

البل فوقا قال سمح الكلام الراوى
وسيدن فى المجالس للجميع كالحاوى
لى بلد الحجاز بحرم عليها الناوى
وكان وقع القدر زى الرفيق بتخاوى

منصور

يا المنصور ونمّك خلانى زى مسحور
ونسانى التعب نسانى كل كل فتور
واصل ما تقييف وادينا من مطمور
ما بنشبع يميين لو عبيتو لينا شهور

بشرى

مطمورة الكلام غرزت بلا طنوب
وبيت النم وقع وأتشالبوهو الطوب
الناس يوم تجيك ما ببقى من عرقوب
ويومها الداك تقيف تحلف تقول كلوب

منصور

جرينا الشخيت كضب البقول بتخطا
وعلينا العلم للناس بقينا محطه
كحال العيون ختيتنا فى كم ورطه
دقق شوف تعال كان تلقى زولن نطا

منصور

مابنقطع شخيتكن دون اذن او خرطه
إلا بلاغنا يوصل بالتمام دون فرطه
يامنصورنا يامفتاح سجون الورطه
الناس حالا ضايقه والعوين منعرطه

نفسى أزوره وأسمع من كلامه الحالى
وما داير أطول بس كيف أقضى ليالى
بحسب فى النجوم وسادى إيد ومخالى
يا رب يا كريم شد حيلى كل أوصالى

نفسى أزوره وأسمع من كلامه الحالى
وما داير أطول بس كيف أقضى ليالى
بحسب فى النجوم وسادى إيد ومخالى
يا رب يا كريم شد حيلى كل أوصالى

الغنا والنميم ؤحوش بكري كلُّوتَسَالِي
مابنفعنا يا السقاي متل ناس ام لهيجاًحالي
ناس أبَّان شماخ والقطرة والبنقالي
ليمهن ضُل ضحي لا بشقيني لا بحلالي
بتين الرجعة لي العرب الهِناك حاسبالي
مطروح الجبين الفي بشاشتو هِلالي
فرَّ إيدينو قالدني السَّلام شاشالي
بسوِّي القوق يعرجن في الكلام دوبالي

نار اليشب في الجوف تهب نيرانا
والمذراة بتلاكد ومن بعيد دخانا
يوم سمعوبها ناس قيقرنا قالو: كفانا
صورة الطيرة والطاقية دي بتحجانا

عاشر من صفر فاتت وبوردنا صفّر
بي إنذار حريق والنام قبيل قام طفّر
قشة عينو من الخلعة بدأ يتنفّر
هبة الباري مين؟ محسن يمين يتكفّر

مو عارفنو ولدا بالدواية مسقي (ا)
قلبو صلد حديد للمكنة ما بتشقي (ا)
باب التوبة لا مسدود ولاهو متقي (ا)
شن الغاغة والسكليب؟ قمرنا أنشق؟؟

نيران شيخن بكضب لابتجينا لابتغشانا
تجر سرايا في جوف المدعين إعـلانا
الناس البعــرفو الآخرة بي القمصانا
حديثــن ما بنعيرو إن قيمة الضبانة

الناس فى العروج لله شنو الهمانا
والروح إن ختت خالقنا خابرو بكانا
الزول بى خلوتو المولى برفع شانا
ما بنعرف حقيقتو إن صابنا كان غشانا

منصور

نفسى أزوره وأسمع من كلامه الحالى
وما داير أطول بس كيف أقضى ليالى
بحسب فى النجوم وسادى إيد ومخالى
يا رب يا كريم شد حيلى كل أوصالى

بشرى مبارك

إن شارقك حديثو تقوم تزور طوالى
وتمشى تبلو شوقك وشوف جناب العالى
لا تحسب نجوم لا تقولى سفرا غالى
تمرق بدرى تركب وأوعى لحظه تبالى

منصور

: مى بلد النعام العاليه زاهيه قصوره
ويات من قام بروس سوالو كم مقصوره
حزن النيل على الباعوها دون فاتوره
حزنو كمان كتير لى الفاشر الأسطوره

أيا بلد النعام من غيرخلاف لا شورة
طعنت سنها وصبحت تعيسة صورة
بعد ما كنا مسموعين نفُرضْ الشورة
بقينا أهداف وللجيران ركوب ماسورة

أن طالوا السما وحتى القمر دلوّهو
ياهم البعام نفس الدرج نزلوّهو
هم باعوا الزمم والتمن قبضوهو
الحسرة يامنصور علي البلد باعهو

العين القبيل فوق التتك مصروره
خابره العندها ورافعاهو فوق صنقوره
قوتها مجكنا وسارفاهو كم مطموره
عارفه البسترا وخابراهو داك طرطوره

منصور

البلد القبيل بطربنا صوت طنبوره

ونحلف نقول مانفوته سمح الصوره

جارت بينا ايامه وسكت بابوره

شاحد المولى سعدا عميمم بالبنوره

عُربان عبلة أخوان فاظنة عقدوا الشّوره
ركبوا ؤشدُّوا في الكاكليت أبو فاخوره
ظعن السَّمحة شال وإتيامَنو البزّوُره
كم جفَّل عناق الرَّيل وناس أُم شوره
مُشْهادْهُن بعيد قالو العِريد ممطورة
والقوز إنشبك بي الدفرة والخافوره
طربان طيرها شادي القمري والزرزوره
ؤبسرِّح تورها يقِنِت دقَّ ابو الجاعوره

عبيد الطيب

حليل زمنن قبل عـاجـبانا بى حنطوره
حليلها قطرها داجى وكان ظبط صنفوره
حليل خيراتها واجده وكان فرق بنضوره
حليلها حليل خلاها حليلو داك قنطوره

منصور

يا شبك الغرام الخالى من حشاش
ويا مطر العصير الرشا جابلو دعاش
يا ترب الغزال الهارده للفشفاش
وشيخى الجابو لى من نور عوينتك داش

منصور

الباب تربسو وجدعو المفاتيح غادى
وأصبح شوقى لايص زى لديغ الدابى
فتال للكلام ما بطولو ناس الشابى
وركاب للبزوزو فى أم هبج عيشابى

منصور

يا بلح التموده الطعمو بملأ الجوف
ويا بريب عسين البجمال معروف
إن ضبحو الإبل والكبده طبخو الدوف
منو البقدر على شوفتك وكاتلو الخوف

منصور

شتلة فله فى قصر الحنايا تفوحى
وكتكوت قمرى رقص صوت غناك لى دوحى
كل ما نقول نجيك لى طول علاك بتروحى
وهاريه كبادنا مره وفى القلوب بتدوحى

منصور

قلى البن بحرق لى معالق جوفى
وبشطب دفتر الريد السقنو حروفى
قمرى الدوح غناه سلبنى عمرى وشوفى
ومروه الحب بنينا صفاه شدنا تطوفى

منصور

نور عينيك بهر نور قلبو مره محاصرو
وكتف ساق مشيهو على اللمينه وعاصرو
يا رب الجمال أرعاهو ديمه وناصرو
وأرفع شر بلاهو من البحب وأواصرو

منصور

ثابت قلبو كان زحن جبال ما بزح
ودايس نار غرامو مع العذاب ما بويح
شايل شوق سنين راس قلبو منو بنح
وكايس سم عشيقو الشايلو منو بفح

منصور

قطع جسمو ساكت ومره أسمع قولو
وعارف سم عدوهو والله قال بى قولو
حافظ سر غرامو الديمه داير حولو
ونايم زر كلامو وديمه شاطب كولو

عد الريد بكارنا عليهو دايما بردو
ولالوب الغرام شايلنو ماسكين وردو
نور من عينو كهرب للبشوفو بوردو
وعندو حسابنا جارى وإنتو ليهو أجردو

منصور
آخ من طلتو والكاب مع التسريحه
وآخ أنا من كلامو السوا روحى كسيحه
صرصر من غرامو ضعيف هواها وريحه
ولى غرف العنايه ودونى أبقى طريحه

منصور

قلبي الصلو مجبول فوق الطبايعوا سمحه
ليك ساقتو في دروب المشاعر لمحه
حاولت جهدي اكبحن خواطري الجمحه
عارفة اقداري لي رايع الاماني بتمحه

وضاحة

البرق البِولْوِل قِبلي يرسُم ويمحه
شان ما يشيلُّو من فرَّت فِويطْرِك لمحه
مع الدُّغشية سارق وجاب دعاشةً جمحه
قلبي الغاوي شارف وشاشا ليك يا السمحه

عبيد الطيب

أسألو شوفو كيف سوالى داك السالى
وكيف التما كيف روحى وبقالى تسالى
عسل المنقه من كلماتو كيف سوالى
من بخس الغرام صباهو سالو وسالى

كيفك وكيف جناك يا الما بتغيب كافاتك
وكيف الحال معاك يا الماسكه فوق آساتك
لبن الطير معاك من الندار ما فاتك
وصوت نضمك سلاح من ذره قاتل وفاتك

خريدة العين قوامها مع الحداقه نخيله
وملمس أيدها صرفة غز حريرة التيله
جيدها من الغزال والخد يرارى أسيله
كيف ليها الوصول ورونى ليها وسيله

مالك منى جافل وديمه عامل كاش
وبنك الريد هداك إستلمو حاضر وكاش
شايل جوز عيونك زى تتك فى كلاش
وزى فى دروه قانص راسى منك داش

يا زول الزراعه بلاوى ما بتنحاش
ومن محرات تتيرب وتانى تصبح حاش
عمال للزرع وتقاوى مارق وخاش
ويكه وطن كجيك والباقى للأوباش

جدى الصيد عقبنا وبالعو طول نالا
وبالحصحاص صقعنا عمتنا منو علاله
مين الداق جهنم وفوق جمر لالا
ومين الفوقا مشوى وتحتو ملاله

شفنا بنات نعش زى البدور لاحو
وشفنا ثريا تضوى وتهدى من راحو
شفنا جضيع جدى بتهادى فى مراحو
وشفنا شدر قلوب من ريدو كم ماحو

المنصور اخوى مرحب بيك تانى وعاشر ومعاك شاعر البوادى الماهر ودالمقدم والسماح للطولة والمعذرة لتغيير قافية المربع

أسالو شوفو كيف طتلنى الخالى

وكيف خلا الوايح حالى

طيب اللقيا والونسة التروق حالى

اريتنا نطولها ونطوق طعمها الحالى

ود المقدم

فوق شنكيب خلف خشش الوعر شقاهن
عقب الصيد وقف متل البكار عداهن
حدق أم صدوغ باقى المراح رداهن
طبق الجيم برك ضيب الكبور فقاهن
منصور

فوق ماصع ركب خطف الطبنجه الباسل
وسارب بالنجم طالب أم لهيجا عاسل
ريم بت ريم مأصله فى الجمال متناسل
ومن ناس طى كرام مو ناس بخيل أو فاسل

منصور

أسالو شوفو كيف طتلنى الخالى

وكيف خلا الوايح حالى

طيب اللقيا والونسة التروق حالى

اريتنا نطولها ونطوق طعمها الحالى

ألف حبابك يا يحى دعنا ننادى هواتف الشعر ونرد عليك فقافيتك قاسيه

منصور

لأخ منصور المفتاح

لك التحية وأنت تنثر هذه الدرر من تراثنا الجميل ومشاركة منا في هذا الجهد دونكم هذه الأبيات التي جادت بها القريحة بعد إطلاق سراح إبننا المقدم إبراهيم عبيدالله الذي ألقي عليه القبض متهما بالمشاركة في المحاولة الآخيرة:

من قومت الجهل فايتهم كتير أندادك
فارس الحوبة وارث الشكرة من أجدادك
نسلك صافي يا إبراهيم نضيف تيرابك
شرّفت القبيلة محربتين ياولدنا حبابك

إبراهيم فارس الكرنة أم سلاحن رزّا
ثابت قلبه دملوج خاتي الرجف والنزّا
خاض هجليج لا قالوا خاف لا فزّا
زغرتي فرّحينا وبشري الأهل يا عزّا

إنت يا قمر العشا البضوّّي الليل
سند الهاكعة أجواداً تعدل الميل
يا خريف الماحلة الضلو باقي مقيل
مهما كان تراه السويتو سار بلحيل

(محمد التجاني)

ما قبضوك في شينه سيدها يمشي ذليل
يا تمساح الكواني الحجّر مشارع النيل
في هجليج نباك يوم الدانه والقمبيل
زعزعت الخصيم تايهاً ما لقالو دليل

(مالك إبراهيم)

دي المحرية فيك يا الولد العزيزة قبيلتك
شرفتهن ناس عزا ركزت شلتها شيلتك
أبو عبد الرحيم البحر المزرقنه نيلتك
معركة هجليج تشهد بي نباك وسيرتك

أبو عبد الرحيم ضي الليالي السوده
شرفت القبيلة حمد الله بسلامة العوده
من دم العدو سرّف سقاها بلوده
أصلو الخوف ما بحل كان تمت المعدوده

(فاطمة إبراهيم)

سمحات فى المساير والضفاير جالو
وسمح الخد منور والكتيف جوالو
اللهج العسل برميك أختا مجالو
وربك داك لطف مدالنا فى آجالو

منصور

سمحه مسالبه جلا الخالق الباصرهِن
لا ساهن طوالن شوح ولا قصرهِن
ظبي العُنّس الأدرع بطوني حسرهِن
خرب اطباعي البراي عليْ خسرهِن

دقش

الوز فى الجزر شافنو قالن كاك
والريم والأرايل قالو عنو ملاك
سالينا الحضور لو كان غنانا سلاك
وكهربنا الجمال من غير زرار واسلاك

منصور

أسالو شوفو كيف طتلنى الخالى

وكيف خلا الوايح حالى

طيب اللقيا والونسة التروق حالى

اريتنا نطولها ونطوق طعمها الحالى

يحى عبدالكريم المحامى

أسألو شيخ جمال شوفوهو كان يمحالى
وشوفو أكان قدر إمسح سواد أحوالى
الكان عندى جايز صار منالو محالى
وزى لبن الطيور مارضنى غير حالى

منصور

من قومت الجهل فايتهم كتير أندادك
فارس الحوبة وارث الشكرة من أجدادك
نسلك صافي يا إبراهيم نضيف تيرابك
شرّفت القبيلة محربتين ياولدنا حبابك

محمد التجانى

من ما قم صغير لامتين مشيت يا دابك
وزى ولد الدقر يات من يشوفك يهابك
عارفاك الحروب عارفاهو حد نشابك
وبتخافك ديوش عارفاك يوم تتشابك

منصور

إبراهيم فارس الكرنة أم سلاحن رزّا
ثابت قلبه دملوج خاتي الرجف والنزّا
خاض هجليج لا قالوا خاف لا فزّا
زغرتي فرّحينا وبشري الأهل يا عزّا

محمد التجانى

شاف ديش العدو وكرج سنونو وكزا
وهبلت نار شداعتو ونما فيها وهزا
شقاق للدروب ما كاس غنيمه ولذه
وفرتاق للصفوق بقليها شيه ومزه

منصور

إنت يا قمر العشا البضوّّي الليل
سند الهاكعة أجواداً تعدل الميل
يا خريف الماحلة الضلو باقي مقيل
مهما كان تراه السويتو سار بلحيل

(محمد التجاني)

هجليج خضتها وخشيتها بالتهليل
ومالك داك حلال ما جبتو من تنزيل
يا زول العليك مولانا ليهو بزيل
وبكرم جاه فداك بالهيبه والتزليل

منصور

أبو عبد الرحيم ضي الليالي السوده
شرفت القبيلة حمد الله بسلامة العوده
من دم العدو سرّف سقاها بلوده
أصلو الخوف ما بحل كان تمت المعدوده

(فاطمة إبراهيم)

وقت الناس تسو فى الفارغه والمقدوده
حارس للحدود الفى الدرك ممدوده
أيدك فى التتك عينك سهم مشدوده
يا ترب الرجال إنت البلاد بتزوده

منصور

ولد مفتاح سلاااام يا البي القريض تتغطي
وجدعك دانه دانه لابيخيب لا يخطأ
صاحبك والقرين صبحتهم في ورطة
ياك سيد النضم وسليييييقة ما سمكرتا

عوض المفتاح

من سابع سماها رمتنا فرت وطارت
وبى فرق السلم من عينا مره اتوارت
يا دوب الجرس دقوهو قالت فارت
ونحن ورقنا فوق رجفت قلوبنا إنهارت

منصور

أمِس دُغشية يا المفتاح مطرةً رشَّتْ
ودعاشةً فايحة شاشت لي الرِّويحة ونشَّتْ
معالق قلبي بشويش غافلتها وخشَّتْ
وسلوك الرَّيد نقرتها ووين شبكتي الطشَّتْ

عبيد المقدم

وين بت الخزام من عينا غابت وطشت
وين شدرة غرامنا عليها ماحت وهشت
وين أرواحنا ليها تهاتى يوت ما أنفشت
ونحن سلوكنا حرقت يا الشبكتك طشت

منصور

برقاً فرّاَ دُغْشيَّة وسحابو ادَّكّنْ
طلق واويرو نسَّامو ودعاشتو إنفكَّنْ
ريشات قلبي لي الرَّايماهو طارن وركَّنْ
وطيور الذكري في جوايا جاجَن وعكَّنْ

(ود المقدم)

وقت الدغشاوى شال وبروقو شلعن وشبكن
ريحة الخمره جات والبوخه داخن وعبكن
هوى يا عبيد أخوى من العجايب سبكن
ونحن قلوبنا ريش هن بشتننو وربكن

منصور

جمالك فات جمال الخضره فى الرماش
وفات بت الأرايل الراعيه سعد القاش
لحظك زى سهم درو القلوب نياش
وزى مرواد مجمر بشوى للفشفاش

منصور

فطيمة البي البياييح طاردو النوَّاش
بتاتي القنَّة بي شِقْلاً فَتَقْلُو رِشاش
سمح النَّافلة يوم باشرني ضاحِك وباش
ودَّردت قلبي في فرقانو رايح وطاش
(ودالمقدم)

دروبكم عاصية وسروجكم عالية ياالمنصور وود المقدم لى المتلى ما بنتنطال .... علا محاكاة الرجال رجالة

جمالك فات جمال اب غوفة الصغير وحاش

وفات غزلان البرارى عديل وما تراش

المتبور من فوق لاتحت ان جلس اوماش

خلانى من كتر الوحايح ادودر وطاش

يحي

حالك إنتى حال الفى القصور بتكن
وماسكات زر غرامن لا رضن لا فكن
لاعبات بالقلوب سعن العشق هن وكن
وعين الشوق عليهن بهدلنها بكن

منصور

وين ود المقدم فى البلود مدكن

ماك طارينا بلكلمة التسر وسكن

ألحق المنصور درك فى الغرام مجكن

عارفاك سالك وفى العلاج متمكن

يحي

شبه بي المريق جفلن رواينو وجكَّن
غرز نشابو فوق تمرة فؤادي ومكَّن
يا أستاذ يحي إن كان الظروف ما دكَّن
بتوق الشاشا لي قلبي وعيوني إتبكَّن

عبيد الطيب

وين الريح خزامن للدعاش زكن
وين النار غرامن فى الفؤاد فكن
وين الفى الطليح الغافلننا جكن
وين الطير قماحن قابلننا ركن

منصور

مصل الغرام يا الطالقه فينا سخانه
يا عجب البنات الفى البرد سخّانّه
نضمك ديمه حالى وبيهو يوت ساخانّه
ولحظك سيف هلاك سالاهو فوق سالخانا

منصور

قوقا القمرى قوقا ورقصن كبور الدوح
وقوقا ونارو هابله وفى القليب مجروح
باريت صوت غناك البى النسيم ملفوح
وعنبرو والمسك وسط الدعاش بتفوح

منصور

نظرة وين بتحرق قامه زى البانه
حارقه قلوبنا نحن ويوت تزيد هببانه
بارود اللحاظ فى الجوف كتير عابانه
زى فنجال صباحا مبهرا وشاربانه

منصور

ريدك كتفو وفى سوق غرامك يدوح
و جبلك تحتو بارك لا بفوت لا بروح
زولو الهالكو داك ملك الجمال ممدوح
وما بختاهو تب لا متين تمرق الروح

منصور

الدهب المجمر للبصيغ معروف
محفوظ فى البنك حدو الحلق مسروف
يا زول همبى وأعمل معاى معروف
وبختم شيك بياضى بمدو ليك مصروف

منصور

قادل فى الطليح والنال مفرهد وسعدو
وفايح مسكو ناشر للبجيهو بسعدو
مطر الشوق سقاهو من الزلال ما جحدو
وخلق الكون حضور شافوهو قرو وشهدو

منصور

ياخ جن شنو وجنك مكجن جنى
وحرفك زاد زمان متل الزمان لجنى
يا برك الصلاح من العلى نجنى
بى بارود كلامو حرقنى طب لجنى

منصور

ياخ جن شنو وجنك غريبة اوصافو
وحرفك زاد زمان متل الزمان وفاهو
يا برك الصلاح القلدو الحجر والطافو
بى بارود كلامو حرقنى ما طفَاهو

مشتاقين يا منصور يا مفتاح

عيدروس

ريدك كتفو وفى سوق غرامك باير
و جبلك تحتو بارك لا بفوت لا طاير
زولو الهالكو داك ملك الجمال الناير
وما بختاهو تب لو روحو تبقى غراغر

عيدروس

aydaroos
السلام ورحمة الله عليك يا رجل ياخ هذا إبداع بأقل تكلفه وكما يقولون من دقنو وأفتللو!!

رائع يا هندسه

منصور

بى عين الغرام زى الذبيح سالخانا
من شدر الهوى الزارعنو ليك مالخانا
درب الريد نفرشو من القلب فاجخانا
زى ثمر الطمام مُبْهِرّا وتابخانا

منصور

بى عين الغرام لو نظرة واحدة اهدينا
من شدر الهوى الزارعنو ليك مدِينا
درب الريد نفرشو من القلب أمشينا
زى ثمر الطمام مُبْهِرّا وتقلينا

عيدروس

ريدو شبك سلوكنا وبالكهارب مسا
وطب شطب الفوايل مسح الحواس الخمسه
رحماك يا عدول الحقنى لى ما تنسى
كلمة تعيد عضاى وأرحمنى بس بى لمسه

منصور

.
ريدك شال نهار مفتاح و قـيـّــل و مـســا
ولـّـع نار غرامو و زين عـُـقــب حـمـســا
كان زول لـيلى فـاتك بالجـنون المـســا
بتفارق العـفاف؟ كايس كـمـان تـلـمـســا

الطيب بشير

جمالك نابع من جواك ماهو بس برانى
حاجبك هلال
طبعك دلال
شكرا للخلقك و بيك برانى

هشام المجمر

براك بس براك يا المابتشوف زول تانى
وكرم المولى دافق للبعيد والدانى
بى أب حاجبا هلال زى ما حباك حبانى
ولى أب طبعا دلال ورانى شوف دلانى

وحباك بمعنى أعطاك حتى لا تقرأ عشقك

ولك السلام توليفه يا باشمهندس

منصور

مرقت من مراحها أتشالبنها كلاب
وزى سهما مرق من قوسو دزو وغاب
قناص المعيز قجالها شافها رهاب
وجاهو عجاجها يلوى يقولو أمرك خاب

منصور

فارقت المراح هجمن عليها كلاب
وافاها الاجل عن مرقة النشاب
قناص المعيز الحاشا مو كضاب
جاهو عجاجا يلوي يقولو سهمك اصاب

فيصل المفتاح

قناص المعيز يوم شافا جن وشاب
وإتلبجن كلابو وودر النشاب
قدلت فوقو ساكت دى أم جمالا حجاب
وكضم الدار هواها ولا نضم لا جاب

منصور

قناص المعيز راسي و رزين ومهاب
كلابو اتقامزن د فرن عليها حراب
معروف من قديم قط لا نقص لا عاب
و ما بتملك لبابو مهما زانا شباب

فيصل المفتاح

حاشا رمى الشراك طب ما تركلها باب
وجات تقمز تتلب زى مهر قلاب
الجمل الإصيهب كان جضيع كان ناب
وعشم الراكبو ضاع وقتين بقتلو رهاب

منصور

بروق القبلي فرن و سلبن الطايوق
و حربسن الدروب البي تحت و الفوق
حرمني الغميد جلبن كلاي في السوق
اما كبيدتي ديك فركنبها اللايوق

فيصل المفتاح

بروق القبلى ضون لى جوانب السوق
وكشفن سر جمال الفى الضمير محدوق
جريعة البنونى الحادقه ما بندوق
ولا بنسمع كلامو الحالى سمح الذوق

منصور

فرعونك أتفرعن قال للمحال سواى
قال للبطولك يوم بى سيفو داك واساى
وأنا فى القلب خابرك لاك قاسى لا نساى
جرحى الغريق شايفو داويهو يا عيساى

منصور

نحن يمين ملاقات الرجال تفرحنا
ونحن كرمنا مودابو البجيبو قمحنا
نحن الحاره ما بدمل بلاها جرحنا
عوج الطنضب القادر يجي يصلحنا

عبدالله عباس

نحن المن زمان الناس بعرفو سمحنا
وعارفين يوم نقوم دود الكداد فى المحنه
نحن المن طرف ضيف الهجوع بفرحنا
نحن الداب قرم متل التقول قارحنا

منصور

نحن الليهم الحق يوم نقولها النحنا
ويانا الصاقعه والهم البزيد المحنه
نحن نباشرالضيف البجي يصافحنه
نحن بشاعة الموت للبجي يقابحنا

عبدالله عباس

لبن الطير نجودبو على البجى يصافحنا
وسم دقر الجبال نسقى البقول كاسحنا
ناس طى الزمان فى الجود جدودم نحنا
ونحن أولاد عبس كضب البقول بحبسنا

منصور

سخاوة إيدينا للعشمان وكف المحنه
كرمنا يحير البطران وقايل النحنا
من أبواتنا جود وارثنو ما مبارحنا
نحن عدونا بتجرع غصب ماسخنه

عبدالله عباس

إبليس جنو جت كان للبكار سارحنا
وعنتر وقت إكر كان فى الدواس شارحنا
حاتم فى الكرم شايل صفات فالحنا
وجا الكرار على دافق الثبات مانحنا

منصور

شدر المنقه يا الرسل دعاشو كرفتك
ويا مطر الغرام المن رهيدو غرفتك
قرياف البن بفك لكن هلاك قريفتك
وشوقك كان سلاح ديش الأعادى بيفتك

منصور

عقب التوبة مشاعر ريدي لسلوكهن عادن
وطاعون السيدة في صدري غايرات زادن
فطيم ام ماتو حقو المن الزوالات حادن
من يوم شفتو يا خلان نومي ورقادي تعادن

قش

.ما حسبن فواصل العينه يوم ما عدن
و لا مرقن بكوسن للمراتع عدن
جؤذر شام صباح حدب البطاين مدن
وكضب القال سلام بتلفتنلو بردن

منصور

منو البنسى الغرامو سرف شرايين دمى
مين القال بسد نبع الحنان من جمى
ورد الناس ذكر وردك هوايا ويمى
يا الأنناسه من شتل الفراديس يمى

منصور

قبل القومه ملحوا لى أم خشيمن عفن
وشدوا على البزازن وبالبطانات لفن
كواسر ضيب خشش ماهم رخم بتفن
قنيصهم صيد مبوخ بالكليت إتدفن

منصور

حاحيت الحدى كان فى سماهو رآهو
يعكس لى ملامحو من الزوايا أراهو
يرصد لى مزاجو يجيب عجيب آراهو
يمكن يبقى حاكم كونى كان سراهو

منصور

سجنك فيهو قاعد من زمن أسراهو
ساريهو الألم يا البى الأمر ساراهو
ممكون زى فقير ماسك الورد ساهراهو
قيدك فيهو شابل شن بسو آسراهو

منصور

كاحل طرفو ناعس ديسو راصع كتفو
وحادق طعمو حالى مع الصيام بتختفو
قوام السحر حافظ الكتاب وبعرفو
راسو ضرب كهارب يوم رآهو وعرفو

منصور

البارح بريقات البطيني بشوفن
قطعن قلبي بنسام نزيلن و فوفن
وين ستات ريدن كتير معروفن
يا مولاي تطلق لي امشي أشوفن

عمر قش

آخ أنا من كبادن ومن سناكيت دوفن
وآخ أنا من نقيزن يوم يدقو دفوفن
آخ أنا من مشيهن فوق عضاى لى دفوفن
وزى ملكات زمان أرواحنا دايره دفوهن

منصور

ااخ من قدلة عصير كاويه القلب شاوياهو
سوت ضرب الفلخ حتي الوريد جارحاهو
كان ما قال سلام أنا عمري شن معناهوا
الحق بالمنصور اخوك جدع وشفع فريق تابعاهو

دايما بخفى روحو بدس عجايب لحظو
وين بتفوت تخلى الفى السماك بنلحظو
بى سر ميم ونون يا ربى ديمه تحفظو
وترفع سر جمالو تزيد فضايل حظو

منصور

نزلت فوقنا ساريه وسيلا جانا مقرن
ونقزن جوز قطايات من صبيبا وفرن
بروق القبلى شلعن صوت رعودن كرن
وحنن نوق ركوبنا حلم شطورهن درن

منصور

بِتْجَمع مِتِلْ فُرْصَةْ خريف مِتَْنى
خَالِفْ كيّو فوق وجع القلب ومْتَنّى
نيران ريدو هابل فوق عضاى َمتَنْىِ
لهجو المن عسل زايد أزاى وفَتَنْىِ

منصور

عشرين حول وخت من فوق عليها تلاته
توبنا الكان حرير ما برقعو الخياته
ساكين زى نمل لا جزمه لا حت باتا
سلبو أرواحنا ديك بى غش معاهو غتاته

منصور

شارفه موقله وسيقانا نشاب قوسا
حارقه أرواحنا مره وفينا ظاهر عوسا
شوفا وشوف وجيها عشان عقب بتكوسا
شارطه قلوبنا عنيه الحاده شفرة موسا

منصور

صنفت روبزت عاطَت أُمِّحيجين رزَّت
جفلت توقرت شال البعامي وفزَّت
شرفت شوفها تنبت وناضرتني وغزَّت
وبي سهما سنين حلقت معالقي وجزَّت

عبيد المقدم

درارة الخريف شدرة هوانا وهزت
وقدلت فوقنا كى طالبه النجيله النزت
قماح الصد قبضنا هبوب عجاجا وصدت
وقطعت جوف كبادنا وفى الهبايل لزت

منصور

طيفو متل ملاك وقتين طريتو وطبا
والوجع العلى من شوفتو ودر وطبا
الصوم والقيام باقيالنا منو مطبا
شال بصر القلب والجوف معالقو وطبا

منصور

جريعة البنونى الأصلو شدر المنقه
ضاقتلو أم وسيع ختانا فى كم زنقه
الكون والكواكب قالو دنيا دبنقا
والسحره الكجور رفعو التحيه كدنقا

منصور

ريدك داك عرفنا وشفنا رقم بريدو
وشفنا الشال منامك وليك شاقى وريدو
يا زول أصحى قوم ما تمادى فى ترديدو
جيب قدحك تعال والدايرو الله بريدو

منصور

النم نحن ناسو العرفو غالى جريدو
ونحن الفكا لوحو عقب كتبنا جريدو
الزول إن نضم بنخبرو بى جر إيدو
وإن كسر الكلام بجبرنا بى تجريدو

منصور

نادينا الطوال بان لينا تور الدبه
وخدر الريد مسك عصب العواطف ودبا
القلب إنزرد جغم العشق واتعبا
نازف زى مطر قبض التروس وانكبا

منصور

لهجك منو شال نحل العسل ميزاتو
عسلا صبو شو فات العسل بى ذاتو
يا بهم الخزام الحادقه زايده حلاتو
عارض رسمو فوق شايل شعار لوحاتو

منصور

يا ود أبنعوف بلدك ملانه جرارق
فيها السلوباق فيها البتورب شارق
هبلت فيها نار دوف جوفنا ماكل وحارق
وعاطت للفزع كان فيها إنسل مارق

عارفاكم عزه ناس نبلن معاهو شهامه
وعارفه مكانه فيكم خاتيه ضمه ملامه
لابساكم درع دايما تكروا أمامه
زى رتل الأسود كضب البقيف قدامه

منصور

.حجر كيفِك النم النغمته عجيمـــــه
ما شايف البعاشيم في لحمنا كجيما
مشغول عن شياطين الإنس ورجيما
ما قال في أميرة وفي البدورو هجيما

سلــــــطانا عماه حيّرنا تب بالمرة
قسيم البــــــلد من نصو سوا مسرة
كاتل للخلق لاتفـــــــه سبب قال مرة
وما شايف عوج غير طرحتك يا الحرة
...
أمن المجتمع يا ربـــــي أم فـــــــــزّيعه؟
سادر في البنات بي سوطو زايدو رزيعه
ضربا لي القلب شواي تقــــــــول لنزيعه
ونحن نقوللـــــــــو لااااا وبيانّا فيه نذيعه

نون النسوة لمّت كلمتا الدغـــــــرية
لا للقهر لا للذلة لا للسلبطة الغجرية
جوة سجونا كم نمينا لي الفجــــرية
وباكر نطلقك زغرودة آآ الحرية

رباح الصادق

بعد الودع زادت أمور تنجيما
زادت غيها والبت حلال ترجيما
قدر الناس تقول متطانشه عامله عجيمه
ما بتدور زمام بتدور تسو تلجيما

البلد المجوبك صايتو راجل الضره
ومنو الناس تفز طالبه البلود البره
غرزت نعمو طب حتى العشر ما درا
نصو هداك وقع قسموهو لينا مضره
...
الخير فيهو واجد والحياه البريه
وفيهو ترب مهيره متل رباح ورقيه
فيهو أسود تحرسو من الغريب دوريه
فيهو دهب مدفق فيهو طاهره وريه

الهول جانا داك والحاله باقيه شنيعه
والوح والوحيح بنجيد جزم تسميعا
لكناهو الصبر بى روح ملايكه منيعه
وقدر الجانا داك مافينا ليهو صنيعه

منصور

البلد الجعيص شيبنا شيت حُكامه
وين فرسانا ديك وينها التقود حَكّامه
الشعب إندفق والثوره جاد إحْكاما
للبنبان بثبتو بدون دروع كمامه

منصور

الضيم والظلم لى عازه يوت شاغلالى
وتازقى حسابو فيها مع الكوار شاقيالى
قومة أولادا ليها مع الحزم رايقالى
روحى مع الوساع فى الغربه تب ضايقالى

منصور

فى التحرير سلام يا رابحه ما تنكسفى
شمسن فى علاك جاهرانا ما بتكسفى
إن زرعو الجبال كى يحجبوك تنسفى
وكم جنزير ظلم فى كراع عدوك بترسفى

منصور

جرولى شخيت قالولى أوعى تنطو
ودرب الشوك هداك إن درتو أقدر فطو
بلعت كلامى زى الكينيا جت قرطعتو
وقت يا فرسى سوق قوام عرف برطعتو

آخ يا النحل من شوكك

منصور

تمساح البحر مين البقول غراقو
وين دابى النقع سمو الزعاف زراقو
يا عسل الكلام وقتين يزيد شراقو
جمر الريد بهب جوف الغرام حراقو

منصور

كتيل الريد متل بتق بدورلو رشاش
بدورلو حجاب مجرب بمنع الرشاش
ضابط القلب ناحل الضمير والقاش
متل قناص مدرب لا ختا ولا طاش

منصور

حقاها المكانه وهيلو ماها كريه
ومين المتلو وقتين تبقى باب فكريه
مو تمساح خمج حوباتو فى العكريه
مو مدفوع محرش بى غنا المكريه

منصور

شرك الريد لقنو وفى المنازل قجن
وقعدن منو ضروب نار غرامن فجن
قومسيون الغرام شخصنى حالا لجن
وفزن صيد هواى من سوحى بعدن لجن

منصور

كتفتى القلب بالريد مكنتى عَقِلْتو
لا رقلن نياقو ولا ختاها جَقِلْتو
قبلان بالحكم رضيان حواها شِقِلْتو
لى سجن الغرام راجيهو يوم نَقْلّيْتُو

منصور

حباب المنصور وضيوفو

الرِزِق مقســوم, والمَقَـدَّر حاصِـل
والداير الفلاح,بي جَدُّو لا بُد واصِل
أعمل واجتَهِد, تلقى المصَعَّب ساهِل
رِزقك في السَّما, لا تكون غِشَيِّم وجاهِل

مطر الخير نزل, رتَع الحلال و روينا
برِق عبـادي يقـدح, والإلاه طارينا
مسـايل الحَدَب الباتت تشَـخِّر فينا
المنصور اخوي, سهرتنا عِند الزينه

ود المكي

يوم جانا الخِبير من الديار هَبّينا
سربنا العِصير، ألبِلنـا خَبَّت بينا
الشَّـم غَرَّبَت ، زغلل نظـر عينينا
المنصور اخوي وين المبيت افتينا

الخبر الأكيد قالوا الشِّقيق مطرانه
فارقنا السَّموم صِبْحَ المَحَل بي قفانا
يا رب يا كريـم بي رحمتك تلفانـا
ألْبِـل سَفَّلت، أدُّوا الخـبر لِفلانـه

و\المكي

ود المكى أخوى جور الزمان حاربينا
وبرغتنا البعد دا الشالنا من والدينا
مكر الغربه حار زى العصار طاحبينا
والبلد الزمان بندورو ما طابلينا

منصور

سلك الكهربا المن البعد مساس
ويا شمس السماء اللنور بقالنا أساس
عجوة وين حداك يا الفقتا للأنناس
ويا قهوة هواى الظابطه ديمه الراس

منصور

قوماك يا صديق ، قالوا الديار اترشَّت
وادينا القِبيل عطشان عجايفـو اتعشَّت
السرّايه صِبحت والضحَوي لاقى وشتت
قبيـل تلقى ام سمـاح ادخَّنت واتقتت

محمد فضل المكي

وادي السيسبان رويان مفرهِد قشُّو
والطير ان رحَل ما ظِن يفارِق عِشُّو
الجنني يـوم هَمَـد الفريق وِاتعشُّو
جاني النسـيم شايل بخورو ورشُّـو

محمد فضل المكي

نزلت ساريه فوقنا وضحكت كبورها وهشت
ونقزن فيها عبران بى قفانا ونشت
مرحات ألبل أتشبحن شقيلها أتدشت
وكبد الناس هدت من غل أصابها أنفشت

منصور

مِتِل جديَ الغزال جات ام تمايم عابره
وفي طرف الفريق، اتنين لزمنا الجابره
دردرني الفقُر يا نفسي اهجعي صابره
بير سرّار قريب، متمنّي بير في بوجابره

محمد فضل المكي

إن بَرَقَتْ بروق، بتْوحوح وازيد تنهيده
بطرى النقرشوله درب الطير في خديده
يوم شاقني الحنين، واتذكَّرت سِت الريده
جفلتَ على الفريق، سلوقي ناشْدَ الصيده

محمد فضل المكي

السهره طالَت، والنجمه رحلت غابت
ونسـه وقرقراب والقَعْدَه حِليت طابت
ناقصين ام سماح، ميروده والعين صابت
عِقداً نقص من وسْطو ، شمعه ودابَت

محمد فضل المكي

دِيانا الوصيفه ، والرايقه هيَّ الملكه
ناعِم جيده من صنف الحرير والسِلْكه
وكْت النم حِلا ، مفدوعه جادعه الفِركه
يااااا ستّار عليْ سطلتني الخُمَر والدِّلكه

محمد فضل المكي

سلام يامنصور والصحبة الطيبة من الزملاء
ووالله يامنصور كشفت لينا فطاحلة فى الدوبيت بهذا البوست
وعندك محمود الفنان ومحمد فضل الله المكى

نشاغلكم شوية هههه
جدنا الزين ودابراهيم قال:

جنيات الزمن سااااكت تنم مبسوطه
تشرب حالى تاكل من لذيذ بنوتا
الحب الأصيل منو النخيل منحوته
والصادق أزاهو مخلى كبدو بلوته

والزين ود ابراهيم هو صاحب مسدار اب حلقة

ومنه:
يا ابحلقه الرحيل عز العرب من يومو
قوم خترنا فوق بلد الطريه جسوما
عيب ود الفراش كان يمشى فى البتلومو
عريان العرض مابسترنو هدومو

يا اب حلقه الرحيلك جض منو الكور
وفرق اليوم معاى بحسب سنين وشهور
ياعسلية الجهنى ام سكونا خور
جروحك غورن مابعالجن دكتور

يا اب حلقة القعاد طولنا فيهو خلاس
لكن فى القعاد قاعدين مع اولاد ناس
والله العظيم يومى الاعنيهو خلاس
اشوف ياقوتو درا بقلعو الغواص

وجدنا عطا المنان قال:

صديه وفوقا لكبيت السياسه يسارا
وطلقات اليمين دكه وفصل دينارا
الدرعا ام جزويا فوفا بالنواره
بدر التم بهمد ومن ضياك بتضارا

الصادق عندما كان بالمستشفى تعود على رؤية حسناء اعتادت زيارة ابوها فى نفس العنبر..
يوم اتأخرت والزيارة فتحت ليها وقت..
قام عاين شافا الغفير مانعا تدخل..
صفق يدينو فى العنبر وقال:
قوموا يامرضى نشكى ونبكى للدكتور
ونكتب ورقه لى كل البجينا يزور
وقفن بره منعوهن بنات الحور
والله يتلتل البنى للعنابر سور

وقام طلع مشى للغفير قال ليهو:
شيشك ياغفير ماتدفر الفرهيدة
مابتقدر تقيف شايلا العمود فوق ايدا
ماتخرب عليها الحنه رصه جديده
شوف عرق الوجينات فوق خدود الصيده

وفى يوم مشى العياده الخاجية شاف واحدة جميلة شايله حقنة الملاريا عشان يطعنوها
قال:
فرع المحلب الشاتلنو فوق القيف
سيدو مبطرو وساقى ليالى الصيف
اللابس كرب ليلى وجليدو نضيف
سعلتك بالله يادكتور بتطعنو كيف

شيخ العرب أحمد عوض الكريم مشى مستشفى مدنى وشاف بنية حلوه وعاين فيها قامت قنتت و بصقت فى الواطه.. قال ليها:
مالك قنتى وبزغتى من شفتينا
وا أسفاى يا العجوه اللقيتك كينا
ارجوك ياسمحه فى الغلطة دى سامحينا
وان شفتينا تانى بى شبشبك دقينا

وفتكم بعافية ومتابعين

بله موسي

الناس سمعو بس بالسمحه روسم شابت
والشافها إتلدغ لحست عقولم غابت
مهره منسله وحافظه العهود ما عابت
وكَرْ السبحه جرّتْ للمحبين جابت

منصور

دكتور بله يا الفى النمه عالى جنابك
ويا قاصع الكلام المن قديم مو دابك
وزاع للمعارف ديمه فاتح بابك
وصقاع للعدو ورماى ظبط نشابك

منصور

العزيز بله
مشكور على الإطراء وعلى الدُرر التي اتحفتنا بها ،
والتقدير للمنصور الذي جعل هذا ( المَرْبَع ) متواجِداً في الرُبع الجديد.

قالو الصَّبُر صبرين مِن حَـرُّو ما بنتوب
يوماً نسيم ودُعاش،يومـاً رُعود وهبوب
أرحـم يا كـريم، من قسـوة المحـبوب
أنا لايْكَ الصبُر ، مين ضاق صـبُر أيوب

محمد فضل المكي

كملنا الصبر لامتين نطقنا الروب
وكل آمالنا صارت زى وعد عرقوب
درب الريد طويل بمشيهو كان أقروب
ورب الكون حكيم بسويلنا شيت يعقوب

منصور

ربْعـه ، جماله طبعـه ، فايته زمـانه
قالت للقمره قومي،واتحكَّرت في مكانه
حاس في قليبي فرَّه، قُلتَ البريدو طِرانا
أنا راكب الصعب،وطاوي المسافه عشانا

محمد فضل الله المكي

أنا مت عديل ياالمكى فى رمانه

ساكن حداها امش واعود لبكانه

كان ما الحيا والاداب ما سكانه

بدخل فى الغرف وابقى من سكانه

يحيي

يا يحييَ الســلام منِّي، وليكَ تحيَّه
حباب ود الكِرام قَدَحُم صباح وعشيَّه
الزول الأصم ، بهديكَ صافي النيَّه
قالوا الحي بِلاقي، إن في الرِويحه بَقيَّه

المنصور اخويْ، مرحب حبابك مِيَّه
الزول الفطين، ماك زول بِسوِّي النَيَّه
من ناســاً كِرام ، هُم ناس ذِكِر وبَنِيَّه
قُبّال رد الســلام، تلقى البَهَم متْكِيَّه

محمد فضل الله المكي

طال بينا المجال، دوبيت ونَم وطِرِبنا
والليل انقَسَــم، وِدْرتْ عقولنـا ضِهِبْنا
يوم الحَظْ يقوم، نصحى وننوم في لِعِبنا
ويوم الحظ ينوم، نلقى العضُم في الجِبنه

محمد فضل الله المكي

قوقا القمرى قوقا ورقصن كبور الدوح
وقوقا ونارو هابله وفى القليب مجروح
باريت صوت غناك البى النسيم ملفوح
وعنبرو والمسك وسط الدعاش بتفوح
تحيايا عطرة ،واشواق،،ارح كلو بشرنا فوقو.

عبالعزيز عثمان

أجدع بى قفاك كعب المصايب فوتا
وأحرص من بشر ساويلنا السافوته
أزرع سى جديد للبذره بى حنتوته
وأرعى كما اللقانيب للبلد بنوته

منصور

بدور ياقوته تلمع زي نجـيمة الزهره
وسط في مقاسه تتلألأ ثرية سهـره
أحمر لونا من نوره العيون منـجهره
أمشي بيها لي ود مله صاحب الشهره

أحلي مراحل التعليم وفيها حلاوة
بداية الريد ومعرفة الجماله نقاوة
تمسك في حروف الانجليز تتقاوة
الا الواي قسم فيها الجريد إتلاوة

المله عمر

يا المله الهميم لازماك رفيقة الستره
فى الرخا والعدم سانداك لزم منستره
يا معطى الجنان تصدقلو هذى المسره
لامن ناس زكاتو تجيهو ديش منكسره

أرقد للجلده يا المله وأنصر

منصور

يا يحى اللصم نحن الوريف ساخانا
لامن صرنا نمله من الجلد سالخانه
آخ يا قدر ختيتنا فى ها الخانه
لا زولن بحل لا حيل بشيل شفخانه

منصور

المنصور أخوى عارفك لزوم تالانا

فى المر والحلو نمتك طاريانا

مابنسى القبيل والجاية منتظرانا

وان عز الصبر الملا الحويط يحجانا

يحيي

بوصيك يا البلوم ، زور التقيله اردافه
مرضان السِنين يطيب بالزياره مُعافى
الطيب يقع مرضــان شديد لو شافه
خلوني النزور باقي الملامه بخــافه

محمد فضل الله المكي

رسمولنا الدرب للجديه ضامر هافا
دافق ديسها سابل فات حدود أكتافا
صدرن برتقال قامه ومعاها نحافه
نصل العين سهام جوف القلوب هدافه

محمد فضل كل سنه وأنت بألف خير

منصور

قوقا القمرى رقص للطليح فراعا
حتن للبرم عنقن رعنو جماعه
يا خالق الجمال فى جوفنا هابله مجاعه
ها الجديه المحفله للشباب نجاعه

عبدالعزيز عثمان ألف سلام عليك

منصور

في دار ام سماح ، لَمينا صُلحه وسُتره
الونسه طالتْ ، والفِكْره جابْتَ الفِكره
الخدار رويان ، والطَّرْفه عاقبه النتْره
الما ضاق العديل ، لابُد تصيبو الحسره

محمد فضل الله

جالسنا أم وضيب الليلة لا عن بكرة

فى ونسة وضحك ودرنا التعب والفترة

سكرانين تمام من دون كؤؤس ولا خمرة

يطربنا اللهيج وتصحينا ريحة الخمرة

يحيي

العين من غزال والسن رخام لصافه
وخصرن مسكة إيد خفنالو من أردافه
الوجنات تشع كبده التقول أشفافه
تيار شوفها بس دم الوريد نشافه

منصور

الغزلان تحوقل من بعيد بي مسافة
من العينا نشابا وكتر وصافها
مرة يقولو ساحرة...ومرة يوت متسافهة
ولمان حارو فيها ؟ دي سمحة لامن ت ا ف هة

خصر نحيل وثابت زي مقاس الاريل
ما بتلفاهو لا بي مسطرة ولا برجل

ساقا خلقه مخروطه وتجيك في مسلسل
قطر الردف بالامتار وعند الفتر داك كم مل

نزار حسين

أمها من بجا والجد زمان ريافا
زى بت اللرايل ناصله فينا أسيافا
إن رصو الغزال من حواء سابقه مسافه
مين البشبها اللايكه القلوب نسافه

منصور

فات عليّ البوست
و الوقت أصلاً مافِي
وكان عاوِز ألاحِق
القي الوكِت ما كافِي
أعزرني يا منصور
يا الديمة قلبك دافي
ضَيّعت الزمن
فوق الكلام الفاضي

حامد الصاوي

طِريت الزول اللذيذ نضمو،وحالي قصيدو
طِريت الضامِر اب دِيسـاً بِكتِّف سـيدو
وكِت ليلي انقسم ، والسَّهراجَه حَمَّتْ ريدو
مكتـولاً جَـفَل ، مجنـون وكاسِــر قيـدو

محمد فضل المكي

أمها من بجا و من الكنانة أسلافا
معتق بنها و بالهيل معبي سلافا
أريل و للإسود ضرباتو ما بتتلافا
فايت حسنها كل حسن بي أضعافا

فيصل المفتاح نور الهدى

عينيك كاحلات من غير كحل و قيافة
متبورة قوام كالمهرة ضامر هافا
ما زي البروق وجناتا احلي اوصافا
نشفت الوريد و أسقت دموعي لحافا

فيصل المفتاح نورالهدى

بدَّرنا ابتدينا، يا شيقا عاقْلَ الجافله
جملك ان شرد ، خَلُّو وألفى الحافله
المجلِس عَمَر ، والسايقه لابُد واصله
إن فاتَك فَرِض ما ظِن تَجُبْرو النافله

محمد فضل المكي

الروح يوم تشوفها تروح وما بتتلافا
والقلب البدورا كما البرق تلافا
القالو ملوك عشق قصاصه ليهم آفه
لى جَبَانْ غرامهم بالكتير زفافا

منصور

عيرتني بالشيبِ والشيبُ وقارُ .... ليتها عيَّرتني بما هوعارُ
إن تَكُـن شـابت الزوائب مني .... فالليالي تُنيرها الأقمـــارُ

قالَتْ كبير وعجوز ، والعمرِ أصلاً فاني
الشيب حَق الرِّجال ما بيهو زول سباني
الدِّهِن في العتاقي ، والعافيه شي ربّاني
والشِّدر الكُبار ، من طبعــو يثمِر تاني

محمد فضل المكي

سِنونه برّاق القِبلي ، الكركابو هزَّ ورزَّ
وعيونه مِتِل كهارْبَ العِشى اب ضلاماً فَزَّ
تجيك الحاله من كُتُر دلال ناس عَزَّه
وِكتين تِســويلك مشـيت فِريـخ الـوِزَّه

محمد فضل المكي

أجمل من دهب شيبون
وأجمل من قمر عشرة البضوي الكون
سوت قلبي كوره ورتبتلو فنون
مرة تشوتو آوت ومره جووووه القون

المله عمر

الجاب الوصف قال مافى قط أوصافا
أحلى من العسل ما بتلحقا الجوافه
عشرق مسكها الضواح بيملأ مسافه
نورن من عيونا كهاربو ليك كـتـافه
منصور

عيون المها بين الرِّصافةِ والجِّسرِ .... جلبن الهوى من حيثُ أدري ولا أدري

يوم شُفتَ العيون ،لا حوله لَيْ لا قُوه
سهماً خَفَس صدري وصاب الجُّـوه
يا رب العِباد ، مالو القِليب شِن سوّا
فقدتَ الإتجاه ، عميان وقع في هُوَّه

محمد فضل المكي

ود شيقوق تدودر لا بتجيب لا تجدع
وعارض فوقنا ساكت غير كلام متجدع
عبران دار صباح ختمن قفاها مودع
وهبلن فينا نور شوقن سماحتو تبدع

منصور

كورة البيضه فاتا من البلد خلاهو
لا خرش الدخن لا ساق مبارى خلاهو
شوقو على المسوح المتلو وين إلقاهو
داك كجامو هابر صيدو دز عجاهو

منصور

الزول نرمى طوبتو نقول خلاس يبرانا !!
وزى ما قلت إت ساو للسان سخانه
ذكر الليل حبابو بودى فوق بالزانا
ما برمينا زول كان بالكرين لزانا

منصور

ياخ لجونا ديك لبنا بقرتو حلوبه
كانوا رباعه فى الخير والحرابه تلوبه
شقولنا الدرب ديك البعزو أم روبه
ما بنختاهو لامن الروح تروح فى دروبه

منصور

تقولُ وقد مال الغبيطُ بنا معاً .... عقرتَ بعيري يا امرؤ القيسَ فانزِلِ

أنزِل يا الحبيب، خَفِّف حِمولو شويَّه
الجمل اتمكن، والمايله دي الشِّبريَّه
بخـاف من العيون ، وكلمـةً ملوِيَّه
وان شافك عزول،لابُد تصيبني بليَّه

محمد فضل المكي

قرب يالحبيب عودتك دوام مطرية

نترجاك تطل والسمة هى المحرية

وقتين شلع النور بى جيتك البدرية

عمانا الطرب لاطبلة لا صقرية

يحيي

إن مُدَّت الأيدي إلى الزادِ لم أكُن .... بأعجلِهِم ، إذ أجشع القومِ أعجَلُ

إن حضر الطعام، ماني اللهوف السايب
العجـلان بخيل، بى طبعـو زولاً عـايب
بِنعشِّي ضيف الهجعه،نرويهُ حاضِر ورايب
ونواسي سيد الوجعه، لامِن يقوم متطايب

محمد فضل المكي

تاتن فوقنا ساكت لى شراكن قجن
وهبلن نار غرامن لينا عنيه وفجن
كيدن فينا نافذ لا بفك لا بنجن
وفى باستيل هواهن كتفننا زجن

منصور

نعم، خير الطعام فيهو الأيـادي كتيره
إلا المهَلَه سمحه، والتَّقَلَه ما في نظيره
كُل مما يليك، لا تخلِّي المعاك في حيره
وكم زولاً أكول، الدنيا ما ضاق خـيره

محمد فضل المكي

قالولنا الخطاب جضينا تب نتنبأ
وفرغنا النفوس كان بيهو شان تتعبأ
قدانا البشير بالفارغه عاط واتدبا
ولاك الوثبه قول للزوغه حالا كبا

منصور

النيم داك عرطنا وما تركنا الحبه
وقرطعنا الحناضل من خطابو العبا
بحر الناس دفر جبل الكبار كم جبا
وإنكسرن خواطر ليها طب ما لبا

ألف شكرا يا حنفى بى قدحك أبو خرز ولك السلام
منصور

ما بنسابق الضيف ، ناقصَ القُداحه نزيدو
المرض من الله ، ومرض البطُن من سيدو
الراجـل التقيل ، أجـواد وباسِـط إيدو
والزول البِطيني ، في الحاره خاتي نديدو

محمد فضل المكي

الشوق فى القلب ودانى ليهن ساق
وفيهن نور عيون فيهن محال الساق
زولن وين بقيف ببلنو بالساساق
وزى بقر السواقى بدون ترس سواق

منصور

قناص المعيز حصحص خلاهو لقاهن
وهبرلنو الشرك متل البهم باراهن
خلاق السماح زاد فى الجمال بَرّاهِن
عنقن داب ربن برم الطلح رباهن

منصور

كشح الخلا بى عجاج صميم والاهن

لماهن فد صفيف ومتل البرق بى وراهن

ما تكاسل وقف جر النفس وعناهن

غز نشابه دا النقاد وشال احلاهن

يحيي

راتعات فى السعد نقر الطبنجه ختاهن
ونقزن خيل سبق كتحن عجاج بقفاهن
كلابو منسلات حجر المعيز عجاهن
وبى سيقان نعام المولى شاف نجاهن

منصور

يا سلام يا المنصور نشابك هبر وصابنا فى جرحا ماببرا الا نزور دارا صيدا فى الخلا بجدع وبالطويلة سارح بلا خوف
بعد ان انقطع الناس عن الصيد ومطاردة الغزلان
بجيك انشاء الله لو فى الدنيا فسحة

تحياتى

يحيي

نعم، خير الطعام فيهو الأيـادي كتيره
إلا المهَلَه سمحه، والتَّقَلَه ما في نظيره
كُل مما يليك، لا تخلِّي المعاك في حيره
وكم زولاً أكول، الدنيا ما ضاق خـيره

تمساح القداحه الفيها ديمه مغرز
وإيدو على الحلق مَكَنْ الخياطه تَطَرِّزْ
القدح أبوخُرُزْ دايما بلبو مبرز
وزى ولد الأسد خَرشْ الطعام ما بِفرِّزْ

منصور

وَكْـت الليل برد وقمرالسبوعين تَـمَّ
خلق الله هجعت ، لا أتَر لا لَمـَّه
غالِبني المنام سهران رفيقتي الحُمَّه
لا دوبايـاً يفيـد لا شِعِــر لا نَمـَّـه

محمد فضل المكي

جدي الأريل الورد الرِّهيد ضُهريـه
ولَّع جمرو في جِسمي وطلق ناريَّه
بِكريَّه شاربه من لبن البكاري تَريَّـه
يغتيها الكريم من عين الحسود هي بريَّه

محمد فضل المكي

جبخانك حى بيكتل ما بْتَخُتى فشنكه
وسهمك قايدو جن جوف القلوب كم شكا
الحال ياهو ذاتو لا أنبدل لا أنشكا
والشاك فى المقام شربك شبكتو شَبكّا

منصور

قل للمليحةِ في الخِمارِ الأسودِ .... ماذا تُريدُ بِناسِكٍ مُتعبِّدِ
قد كانَ شَمَّرَ للصلاةِ ثيابَهُ .... حتى وقفتِ لهُ ببابِ المسجِدِ
رُدِّي عليهِ صلاتهُ وصِيامهُ .... لا تقتليهِ بِحقِّ دينِ مُحمَّـدِ

قول للمليحه ، اللابسه الخِمار مُنستره
جرجرتي الفقير من الصـلاح للعتره
شمَّر للصلاه ، وظهرتِ في الباب شترا
رُدِّيلو الفروض ، لا يموت كمد بالحسره

محمد فضل المكي

قول للمليحه ، الجات مبلَّمه مارقه
مالِك ومال فقير جارِد سِبِحتو الفارقه
يوم مرقَت مِتِل شمس الصباح الشارقه
لا خلَّت صيام ، ولصلاتنا صِبحت سارقه

سَقطَ النصيفُ ولم تُرِد إسقاطهُ .... فتناولتهُ واتَّقتنا باليدِ

يوم داك العِصير ، التوب فَلَتْ من جِيده
إتناولت بي إيد ، والساتره كانت إيـده
لازمين الحـدود ، لا أنـَّه لا تنهـيده
إلاّ السرقه بي طَـرَف العيون بنريـده

محمد فضل المكي

التوب يوم وقعْ،في قلوبنا شعلل ريده
ختَفَت طرَفو واتلافَت عيـونّا بِإيده
أركِز يا صديق، السمحه مُهره عنيده
فارق التوب سِتُّو واتمنينا الله يزيده

قالو الصعيد رويان ، وِاتَّرعَن وِديانو
طراني التقيل ، الراجِح دوام ميزانو
الزول البعيد،ضوَّقني العذاب والوانو
الجواب كتبتو ، وعُقباً نسيت عنـوانو

.
البارِح طِريت ناسـاً فُراقُـم قاسي
كاتِلني الوِلِف، بحراً ما ليهو مراسي
المواجِع صَـدَّت واصبحتَ ماسِك راسي
يا لحّاق بعيد ، خابْرَ الدَّرِب ولا ناسي

.
.هبوب الدَّغَش الأحْيـَت مواجعاً لـيّا
توَّرت الجروح والحُمَّه جات فجريَّه
الصِدير نَبـَّت وحُرّاسـو منعو الجيَّه
شِن طـعم السـباته ام لمـبةً مطفيـَّه

محمد فضل المكي

التحية لي المسدرة والمسدارة .
تسمي هولندا ببلد الزهور وهي اكبر مصدر لها .
ومن هناك ارسل اليكم احبتي المسدارة هذه التحية لعلها
تليق بهذه القامات الشامخة العملاقة من المسدارة .

من بلد الزهور سلام ..

من بلــد الزهـــور مرســـل ســـــلام بعطورو
للحـوش الوطـــن الفيــــها زوووول بنـــدورو
مشتاقين كتيييييير غارقيين هناك في بحورو
ويا ما شوقنا طاااااال مسكر حواسنـا شعورو
وياااارب يا كـــريم تجمعنـــــا نحنــــا نزورو
ومـــا يبقالنــا يوت جبــر الحساب بكســـورو

وسلمتم ..

ولي قداااااااااااام .

بت عمسيب

.
الغالية منى
أكيد فإن عبق كلماتك قد ضمخ مساحة الجمال هذه
بمزيد من الجمال.
شفتي يا منى الإنسان لما يطلع من مواطِن (القرف)
أكيد بتحصل ليهو راحة نفسية .. بنلقى نفِسنا محتاجين
لحاجة زي دي .. بعيداً عن اللت والعجِن الإنسان ممكن
يبدع ..أنا سعدت بنظمك الجميل.

بت عمسيب ما تنقطعي مننا
كامِل الود

آخ أنا يا التمر يا الفيك بَكِسْر الرُكْبَه
وفيك أسباب أزاى يالديمه فاك الكربه
الزول إن ختاك أفضلو بيت التُربه
من محن الزمان وآلام هموم الغُرْبّه

منصور

المنصور تحياتي
دائماً آخالك فوق ضهر أب قماقم خالف كراع فوق كراع ممتشقاً أب كسره ، وهذه محاولة متواضعة لمجاراة الجمال والإبداع الذي عودتنا على نثره ذات اليمن وذات الشمال في هذا المحفل الجامع ، فإن دخلنا وأستزدنا وخرجنا دون تعليق فلا لركاكة أو لسؤ ما جاد به كيبوردكم ولكن لقصور في أننا لا نملك ما نحسبه إضافة لهذا الإبهار وبالضرورة بيكون كلامنا فاضي ساكت والصمت في هذه الحالة أبلغ عملاً بالقول : الصمت في حرم الجمال جمال. ونبقى هنا:

يوماً في بسط عند المقسِّم نومنا
ويوم نضارى من لفح السموم بي هدومنا
===
وبرضو Still نكون عايشين

المله عمر

يا الطير المهاجر شيل السلام وتحتــــي
للزول الشغل عقــــلي وسلب عافيتـــــي
ويا مريودي هاك اسمعها باقي وصيتي
احســن تنقـــــرع قبـــال تعــــدم الحتـــــي

ودمتم ....

بت عمسيب

دا الحاجر المشارع ما بيكتلو غرق
ودقر المويه ساح لى سم كهاربو زرق
السكن القلب بس كيف تقولو مرق
وشطب الراس مسح لخبط مزاجنا فرق

ألف حباب بنت عمسيب لكن الحوت ما بهددو بالغرق!

منصور

حبااااااااااب منصـور اخــــــوي
عااااااااااقد الفهـــــــم والـــــــرأي
يا ترب القبيل الأسمهم سرااااااي
يا الدرق التقييييل اللجميـع ضاراي
يا حوت البحــر وغرقني يا مـولاي

وعشتم ...

ولي قدام ..

بت عمسيب

كل ما اشوفو هيبة وعمتو اللافيهـا

والوش الصبوح والعظمة خايل فيها

اركز يا قليب والجرسة ديك خليهــــا

واحسن لا تبوح والظاهرة لا تسويهـا

ودمتم ...

لي قدام .

بت عمسيب .

إنجمعن تعولو وقِبْلّى فوقنا بَرّقْ
وُدُرْنّا البفدى مِنّو الروح ويبقى دَرّقْ
حادق اللهيج حَلْقَ المحبه شَرَقْ
وشالخ للفؤاد متل التكنو وَرَقْ

منصور

ضيب الخلا الدوماتو نزن خَرّفْ
وكرف الشيح قَمزْ كَبْرَاتْ نشوقُنْ شَرْفْ
سيل الوِدىْ كَبَسْ الشخاتير جَرّفْ
وتيساً للمعيز لَبْلَبْ حِداهن طَرّفْ

منصور

قليعات الرزق أمست تعولن ماطرة
حمريبن طلق ريحة الفلير والباترة
أكان جيتن فوق أم محاجما قاطرة
تلقى العافية من غير بنسلين ودكاترة

المله عمر

قوقن فى الطليح جوزين دباس بين ناله
هبلن فينا نار عشقاً تقول ملاله
عبران التقانت فوقنا كاشحه دَلالا
سامن فينا ساكت بيع ودار ودلاله

يا المله ومنى والمكى

منصور

.
عاليه عديله سمحه ومن وسط مقسومه
إن مرقت تبهر القمرا وتحاحي غِيومه
غزال الريـل ، المفروده ترتـع يومـه
حاميـاني المنـام ، القايله شُفت نجومـه

المنصور د. محمد مقبول بدري يقريك السلام

.
طِريت الزول اللابْسَ السماحه قِلاده
طِريت الزول الوسَّدني ديسو وسـاده
إن شاقني الغرام في الهجعه أنا نشّاده
ياااا لحّـاق بعيد مَصعيكَ خلُّو زيـاده

محمد فضل المكي

ود بدرى الأمين من ناس أصول تيراب
ومن فرسان محرقه باقيه فينا عقاب
سواى السمح للخير فتح ديداب
وراكز فى المراكز عمده للسروب

ألف تحايا وود للدكتور الجنرال محمد بدرى الأمين بدرى وألف
سلام عليه وألف شكر يا ود المكى والسلام والشكر لك معاك
زول ضو

منصور

من بلد الزهور مني السلام واللـؤم
للناس العزاز الحامية طرفي النــوم
جسمك ان سلم فكرك معب همـــوم
ومن بعد النسيم اصبح عليلي سموم

ودمتم ..

لي قدام ..

بت عمسيب ..

فى بلد الزهور فكرك معبى هموم!!
ونان بلد الحروب ناسو بتعرف النوم
ياخ أستغفرى وقيمى الهجوع كل يوم
وشوفى أكان يجيك هم اليجينا اللوم

منصور

الريد فى القلب جمام بزيد ما شَحا
زى جبل الروكى لا يوم وقع لا زَحا
شرك الغرام فوق دربو شافو ونحا
خَلّ قلبنا زى مكن البواجير تحا

منصور

يا فرس الحماسه الفى النحاس ترتار
ويا ناسج القلوب زى الفراد مترار
كل ما نقول نجيك تجفل كأنك تَارْ
ونحن من الضباع درفونا جايب التار

منصور

الداق لدغ الدعت جرالحبل بختاهو
ديمه بذكرو العوس القديم وخطاهو
الدرب العديل ببراهو ما اتخطاهو
داك جبل السماحه الشالو ما ختاهو

منصور

من بلد الزهور مني السلام واللـؤم
للناس العزاز الحامية طرفي النــوم
جسمك ان سلم فكرك معب همـــوم
ومن بعد النسيم اصبح عليلي سموم

ودمتم ..

لي قدام ..

بت عمسيب .

من البادية والبلد الشَّقي ومحروم
سلام ليكم محبَّة وبي النَّفل مختوم
سلام صارنُّو في طريف الدِّعاش وبلوم
سلام شابلِنو طوق قمري وعلق مفطوم
ودالمقدم

الريد فى القلب جمام بزيد ما شَحا
زى جبل الروكى لا يوم وقع لا زَحا
شرك الغرام فوق دربو شافو ونحا
خَلّ قلبنا زى مكن البواجير تحا

منصور

رزمي النَّّأقة سوِّيتو وبنين من وحَّا
قلبي الرَّايمو لي فُرقانو شاشا ورحَّا
شبه بي العتامير تيسها جوذر ونحَّا
جمام ريدو ساساق لا أنقطع لا شحَّا

ود المقدم

الداق لدغ الدعت جرالحبل بختاهو
ديمه بذكرو العوس القديم وخطاهو
الدرب العديل ببراهو ما اتخطاهو
داك جبل السماحه الشالو ما ختاهو
منصور

الزّول في أم قدود إن دار يذكرو نبَاهو
يكون مردوع فطين المِِنْ سنين داخراهو
يكوس لي الزَّينة والدَّرب الكعب يبارهو
ومع الأخوان يكون باسم صباح ومساهو

ود المقدم

الحبيب منصور
ذلكم الإنسان الذي رايمته الرّوح
الرائع الجنرال ود المكي
كتبت: عبيد ما تطوِّل الغيبة
لك التحايا من جوّه الحنايا
وسلام مصرور في طريف دعاش ومشبول في طوق قمري لكل الجميلين
سمحين النَّافلة والذين شبَّت نارهم في تلال المنصور ود المفتاح

سلام مدفور مع الهرع الفَجُر مِتراحِل
سلام لي ناس بريدهُن وشاشو قلبي الماحِل
سلام لي ناس مراسي وناس ضفاف وسواحِل
وسلام لي ناسْ جرارِق نَمْ كبار وفطاحِِل
ود المقدم

» وقفات مع عباقرة اهل النم والدوبيت
» وقفات مع سجن كوبر
» وقفات مع صلاة التراويح