وقفات مع عباقرة اهل النم والدوبيت

الدُّوباي جنس من الأجناس الشِعرية الشَّعبية التُّراثية الأصيلة في السُّودان، تماما كأنساقه القريبة منه الواواي والشاشاي والهوهاي والنوناي. وهو في مرصده التَّوثيقي لدى بعض الباحثين يفتتح بقول الشّاعرين ود الفراش وعبدالله أبوسن:
يا حسنين أغـــــا جاتك أذيــــــة
ضرباً مــــــــو كتير بي خمسمية
بركز وانستر واطرى البنيـــــــــة
ؤلى بلد أم شليخ باخد لى جية
وقول الآخر:
أمانة يا الدهب صادفاني غيـــــــــة
تعرّب في الضمير نيرناها حيـــــــــة
أكان ما خوف مديرنا أب خمسمية
بكمِّــــــل باقي عمـــــــري مع الجدية
فالدوباي أسبق لهذين الشاهدين والنضج الفني دليل على ذلك وعلى أنهما في طور متقدم جداً والدوباي سوداني النشأة وهو تراث في أغلب نماذجه القديمة تصدق عليه قاعدة المؤلف المجهول الغائب فيصبح الناس متداولاً مشافهة بين الناس فيزيدون ويضيفون ويسقطون عليه من ذواتهم الكثير.
وفي جولة توثيقية ميدانية في مسار مشال العربان في البوادي وقفت عند مضرب من مضارب أهلنا القواسمة في رحلة نشوقهم من الدندر إلى سهول البطانة فوجدت الأطفال من البنين والبنات يتغنون عند موارد الماء وهم يدفعون الماء على أفواه السعون والقرب لتعبئتها بالماء . وهو ما يسمى بالري ملان فكانت هذه اللحظة محور نظر عميق في مرجعية الدوباي وأصواته المنتزعة من حركة الري ملان ومن حركة أرجل الإبل في الخب والدج والست والرقد والطبق والجدادية والكربيت والمواغلة والزوع – كلها أصوات سير للإبل- والماء مصدر كل شيء يقول الله تعالى " أولم ير الذين كفروا أن السماوات والأرض كانتا رتقا ففتقناهما وجعلنا من الماء كل شيء حي أفلا يؤمنون" صدق الله العظيم.والمعلوم أن الرجز الذي يقترب من الدوباي من موسيقاه هو مرض يصيب أرجل البعير فلا تنهض إلا بعد محاولتين. وعندنا في الشعر القول:
غرفن جرايدو ؤدوبا
وعندنا القول :
قالن دوبا ليهن والزمان الفات
وعندنا:
دبتي الخيل
وكلها حركة، وعندما نستمع إلى شخص يخاطب رفيقه قائلا: أرح دوبتنا ودوبي لنا. نفهم معنى الحماس والدفع وبث الحيوية في الآخرين وتحريضهم على النشاط والهمة.
فالدوباي صوت سوداني خالص وهذا مبحث قد أشرت إليه وضمنته كتابي:
" من خصائص الشعر الشعبي السوداني" دار نشر جامعة السودان المفتوحة 2008م
أما الأجناس والأنساق الأخرى المرتبطة بالدوباي كالشاشاي والهوهاي والواواي والنوناي فكلها على مستويات صوتية متفاوتة ولها خصائصها وظروفها. فالشاشاي مثلاً من شاشى: أي اصدر صوتاً. كصوت الرايهوبة وهي تحانن جناها فيتعلق بها وهو كما ورد في قول أخي وصديقي الشاعر يوسف القسم الشوبلي:
شرفن شاشــــــى ليهـــــــن قبلـــن ربشنو
ؤكشكيش قشهن في الكوشة كشن منو
حدمن ؤقرجمن ؤود حينتن بشنـــــــو
عشن ود حشـــــــاهن ؤبالعسين نشنــــو
وهو أنواع شاشاي العد والبير وشاشاي الأناقيب وشاشي الحصاد وغيرها من الأنواع التي ترتبط بجو العمل لطرد الملل والكسل والرتابة فهو غناء للعمل.
والأغراض التي تناولها الدوباي تلبي كل حاجات الإنسان السوداني في مجالاته البدوية والحضرية فهو متنفس للدواخل واللواعج في الغزل العفيف وهو مفجر للطاقات في الحماسة والمشكار وهو يتأمل الوجود ويسبح في صفاء التصوف ورموزه وإشارته وهو يعالج الحكمة والوعظ ويهتم بالمراثي والوصف والمدح وفيه نماذج من الهجاء المر القاسي. فلم يترك الدوباي بابا إلا وطرقه معبرا عن رؤية الإنسان السوداني في الحياة وصروفها.
وفي الدوباي حرفية عالية وبنائية فريدة وله نزوع نجو التفرد والتميز والقطع الأخدر لهذا نجد المجاراة والمباراة والفتل.
الدوباي فن من الفنون التي يطول الحديث فيها وعنها. فمنه المقدرة ومنه ما يعالج أبجد الحروف وأبجد القدسي ومنه الربط والألغاز. ومن نسيجه الصوتي تأتي المسادير والربقيات وهو الذي ينمه الصييتون.

أخاطب بلدنا فأقول عنه:
فيه شمال نخيل فدع الجريد واتتنى
فيه شرق خلاوي قلبنا تديو سنة
فيهو غرب خيول ركبتها يوت تتمنى
فيهو جنوبنا بى خيرو الكتير طمنَّا
***
من بلدي سلام لى كافة المخلوق
للأرض المرتعة للخلا الواقوق
للنيل التسابو مكفي ما ممحوق
ؤللقمري الحياتو تملي قوق في قوق
***
من بلدي سلام للدنقر البتقنت
للصيد الشرف فوق الضهور يتسنط
للسارية التسوق ليلاوي تب ما ونّت
للقمر البقج للعنقريب البنت
***
من بلدي سلام لى الفي شقوق الغربة
للقايمين ربيطة واخدوا بالليل سربة
للشاقين دهم واراضي صي منكربة
لى ولداً ختر خلا الجبيلات غربة
***
من بلدي سلام للسافل الحقاني
لى أرض الشروق النورها بق فوقاني
لى شدر التبلدي المن حنانو سقاني
لى طبل الصعيد الرزّة واتلقاني
***

الصيد بالكلاب السلوقية اليمنية الجذور، قديم قدم الحضارة الإنسانية. فالكلاب ترافق مسيرة الحضارة وشواهد ارتباطها بثقافة الشعوب كثيرة
وتكفينا من القرآن الكريم الآية 18 الكهف.
والصيد له أشكال وصور كثيرة يضيق المجال بحصرها، وهو في مجمله نوع من الكدح الذي يبذله الإنسان قديما للحصول على طعامه. وافتن الناس فيه وأعدوا له الوسائل والأدوات المساعدة للتمويه وجذب الفرائس.

والسودان غني بالمناطق الخلوية التي يمارس فيها الصيد بأشكاله المختلفة وهناك ضوابط وقوانين مهمة تضبط عملية الصيد حفاظا على ثرواتنا الطبيعية وحياتنا البرية الرائعة.
وفي السودان خبراء عرفوا بالقنيص وفنونه. أذكر منهم على سبيل المثال عبدالله الدكيم الرفاعي بالدندر وعمر محمد صقير السَّدراني بالرفاعيين الفوق. وعمر محمَّد صقير بالتحديد من أمهر الذين عرفتهم وشهدتهم يقنصون. فهو بارع في العديد من الفنون التراثية الشعبية كالدوباي بصوت قل أن تجد له مثيلاً. وهو مغن بارع وعراض من العراضين المشهود لهم بالإجادة وهو خبير بالقنيص وله "حرحافة" أو سفروق يشرع به الكلاب للقنيص يجدعه أمام الكلاب في الجهة التي يتوقع فيها الفريسة، فينطلق( السفروق) جهة الفريسة ويأخذ دورته مرة أخرى عائداً إليه ليتناوله بيده.
فالقنيص رياضة وتدريب على ضرب من أضرب الفروسية والصبر ، وهو للحصول على الطعام والحاجة. والأفضل أن يكون بالكلاب والصقور وليس بالسلاح الناري. فالكلاب وخاصة السلوقية تصطاد وتعود بالصيد لصاحبها الذي يحسن التعامل مع الفريسة حسب الموجهات المشروعة. لأن السلاح الناري له أضرار جسيمة وكبيرة على مخزوننا من الثروات القومية.
وعلى الناس مراعاة الموجهات القانونية المهمة في هذا الصدد. حفاظا على خيراتنا.
والنظرة المرهفة الأكثر حساسية لهذه الحرفة تجد لها سندًا من مرجعيات قديمة " في كل كبد رطبة أجر" في حديث رسولنا الكريم صلى الله عليه وسلم كذلك: لا تتحذوا شيئاً فيه الروح غرضاً " رواه مسلم (1957) أي هدفاً .فالصيد للتلهي والعبث مكروه. ونجد بعض الشعوب تنظر إلى الكثير من الحيوانات الأليفة هذه النظرة وتتحاشى صيدها، والحاردلو يخاطب الصيد تقديرا بقوله:
أقيقن لا تجفلن من خالكن
لا بياكل لحمكن لا بريد كتالكن
قلبي بيكره اليوم البياخد فالكن
عشان كون البنات بتمثلن بامثالكن
وأتمنى أن تسعفني الذاكرة لاسترجع بعض أبيات إدريس محمد جماع:
وإذا سقط الطير جريح
يضرب الأرض بريش ويصيح
حوله زغب من الطير تنوح فتلمست بجنبيك الجروح
أنت إنسان وروح
وهذه الإنسانية المرهفة جدا تتجلى عند تولستوي والمهاتما غاندي وهنري ديفيد ثورو وكثيرين ممن رقت مشاعرهم وذوقهم فهم أميل إلى السلم والمحبة،

حرقوصك نتل جاب من هواكي دعاش
خيّم فوقك الليلي ومكاييل هاش
اتهتم سماك اسقى الـ كانوا عطاش
عربك تالتة واقفين ، لا برش لا فراش

ركزنلك بروقك عكّلن قيزانك
انهلن بشايرك واستعد عربانك
اتدلقن سحابك نعّ فوق وديانك
بي فرحة وطرب دقو الرباب عربانك

أضحو مبسطين شاكرين كريماً حي
سندوا الواقعة حلبو وشربو من الني
اتملى التبوب مصعن حمير الري
قاموا يعافرو في الشقق الرباطن ني

أخدوا الهجسة لي الكيفة الشميشا ضحي
يات من كان حلف قال الكرامة علي
أم ريد لولت القلاي ، جميلة الزي
أرياح الدمك غمرن ربوع الحي

هييييييييييييييييع

الدرب الطويل دايرلو قربة وتيقة
ما بمشي أب سريويلا مسيلو بنيقة
لقيمتن من حلالا تندركلو حقيقة
إبريق ليل مقشّط ؤتبنتو مسيريقة

قبال العمل النية دفة مركب
الختاها قادر للمقاسيات يركب
القام مندرش من غيرها لا شك بضهب
شركا قام هبر لا صاد مسك لا بقرب

صعيد سافل غروب ؤشروق
جميع الفيهو متعافي ؤهمو بروق
وكت تتعمر الفجة ؤفوقنا سمانا كلو بروق
تعال قرب تكوع ؤللسمــــح بتضوق

أولادك بشاير جبهتم مرفوعة
نيلا سيلو تسَّب شيمتو مي مقروعة
بالنفس السخية والهمم مرفوعة
شمس العزة نايرة اتخنتلت في طلوعة
ضوت فوقنا صولة وقدرتاً مشروعة
سودان حر قبايلو أصيلة مي مقلوعة

وللموضوع بقية - مع - محمد الفاتح ابوعاقلة - وغيره من اهل النم...

ابشر والله
الاخ عادل والله كان ماخائف الهنود والبنغاله المعاى هنا بالمكتب يقولوا السودانى جن كنت قمت اخدت لى صقيره
هههههههههههههه
لك شكرى وتقديرى

هههههههههههههههههههههههههههههههههههههههه لك عزيزي من الشكر اجزله ومن التقدير اعظمه .. مع خالص الود والتقدير لك .. بالمناسبة الهنود هنا اكبر جالية ثم ياتي بعدهم الصينيين..

اخير لينا ام رقيقه ولاملاح روب تقيل بجماده
من مشوى الفراخ الكل يوم فى ذياده
انفلونزا الطيور السبتت اوتادا اخر الزمان الموت
يجـــــــــــــيك فى جــــــــداده

قال الشاعر محمد يوسف الدالى
ليل الغربة طال ايه ذنبى انا الجانية
اساهر والنجوم جسمى الجمر كاوية
فوت يا طيف فوت للحبيب ورية
قول ليه المسافر النوم ابا مجافيه
قدرما ادور انوم صورتك بتعرض ليه ذى سمش النهار حوى القليب تكوية

يوم الخميس الساعه سبعه صباح مريت بالظلط الماشى للاسياح
شفت الجدى فى صديروا فى التفاح وفى عيونو السهام حامل معاها رماح
وقفت حداى سالتنى بايضاح ومن فاها العبير بجانبى عطر وفاح
جنيت يا جماعه انا عقلى طوف راح جافانى المنام انا صاحى للبياح

الزول كان اباك من غير سبب لا تسكو
امسح اسمو من خارطة ضميرك حكو

مسدار ابو السٌرة لليانكي - محمد طه القدال

--------------------------------------------------------------------------------

اماتي القبيل بي حنهن لجني
كرفة وقلدة كيف شوف اللبن رجني
حزنا جاني في ميع الصبا يلجني
أطلع مني يا جلدي المنمل جني
واطلع مني يا حزنًا بقى مكجني
خلني ابدا مسداري
و اودي قفايا لي دارا بقت مي داري
جيت الجلدي بيني وبين عضايا الشحمة ،إلاّ النار بقت قدامي
جلدي الليلة بيني وبين عضايا المافي
إلا تراني شوال الكِبس نفيخ جلاليب الورم هدانّي
في جلدي الورم قولنلي ولا صحي الورم عضاني
سفريتك مي في النية
ماها الكانت محرية
خابراك عريف زم العربان ولاّ قيام الوردية
مالك تريان ومندي كاسي الكتان والهندي
قولك ككيف ترجى البيشان ولا الغربة البي زندي
برق العبدلي الوزني يا طاش يا جاب المزن
فرق يا الضيف فعل الغضبان انفر تيران الحزن

شن القعدة يا ابو السرة شن القعدة
في ضل العمارات ام كمرتًا برا .. ضقنا الحنضل اليانكي
وبلعنا المرة كملت كوتة التمباك صقعنا الجرة
وكت اتقفلت شقيش قبل بالمرة لن
يأمرنا في بلد المعاني الحرة
الشم خوخّت بردن ليالي الحرة
والبراق برق شوف عيني الصقير بي جناحو كفت الفرة
تلقاها ام خدود الليلة مرقت برة
مرقت برة تغلي مديدة الحلبة التسمن ردفها
السمن المبستر يانكي
والويقود قعيرات الدخان في العين وفي الفشفاش بسوي عمايلو
شن فايدة مديدة الحلبة يا ابو السرة شن فايدة مديدة الحلبة
الويقود يشيلو اليانكي
قامت من دخاخين العمى تلمع وشيها اليانكي مستنيها
كان اليانكي مستنيها في مراية السجم
في الليل لقيتها متل فرايخ الطير مرق ود عينها من ود عينها
رجافة المزمة الحمى جفلت منو وقعت عندي صدرها بغلي
يا ابو السرة شفت اليانكي في ود عينها
حسها للبحر
يمكن يغسل عينها من اليانكي
فتنا الحجرة بالكتة وغتسنا مسافة
تبقى قدر مسالك الريده ما لاقانا من يغبانا في
البحر الفضا التحتاني
ناس عارفاها ناس عارفاك ناس عارفاني
نادينا القعونج والبلطي قرقور السمك ودانا لي دابي الخشش
نادينا عمال الطمي الصارقيلا والقرموط وود الموية وقتنا عليها
كانت نايمة عجال البحر حارساها
كا نت نايمة بين حجرين
وضل ساسوية وعمال الطمي
الصحونا خابرين الدروب لمّو حصى البحر قسموهو
يات من كان سبع جمرات دابي الخشش قال ادوها
في الجمرات تلات سبعات
قلنا ادوها في في الجمرات تلات سبعات
مسكنا دربنا وعمال الطمي مرقوبنا في مشرع مسارب الضي
لقينا الدنيا تترجانا قوقى القمري خوّى صغيرو وعوّى حدي
وعمال الطمي الصحونا لمّو على البعرفو الصي
حصى القيزان دوابي الدارقة والسحلية والناس التحت
خابرين عمايلاليانكي
قولن للاخلا ديارو
دمك فرهد في نارو
غورّ في الارض طارو صقرين
اولاد الارض ما طاروا
لحمي غطى بن عمي شو صار حالو يا امي
منديل العرض في بيت الدين دمي ما يخلي دمي
انا من دير يسن صرنا في جزر التين
عم نسقي بعض حب الزيتون
بدو يرجع للطين صابرا تحت الدورية
صابرة تحت الدورية .. صابرة فوق الدورية
يا حالة ضد لحم الطفلين نابت غصن الحرية جزري مو في شاتيلا
ما قال حالي يا ويلا احنا في الارض
ارض فلسطين يا امي
هيلا هيلا
قوقي القمري خوّا القي وعوّا حدي
وكنا جماعة دابات الارض والسايمة وعوامة البحر والطير
وحتى الغيمة دفاقة المطر فوق راسنا شايفة الدرب
دريب اليانكي لا يودرنا قال الدابي للضليلة خليك صاحية
زوغ اليانكي لايودرنا
قال الدابي ان يغباها ما بيغباني
ولما الشم مودع غاربة وصّت جملة الصقار عيونن كاربة
ابقو الف بفوت للمتلكم ناهدين
وفوق دينن عريبا غادي
قال السحلي لا تغشوهو دول عربان توابع اليانكي
قال الجمعي لا نغشاهو دول عربان توابع اليانكي
وخلوها العريب الغايبة السراق طليقو معاهو
تيجانا عروشها الخروع الهش العويش النار تعلق فوق عقال العرش
ولا خسانا بي هادي العروش الغربة
يا ابو السرة لا عقام مسكنا دربنا وعمال الطمي الصحوها
خابرين الدروب
مرقوببنا من وادي الضلمة الكان عقب لمينا في باقي الجمع قاصين دريب اليانكي
شمور الضيب في الكنغو وخبرا من جنوب امريكا ومن كلهاري ديبا ضاري
والتمساح وليد امزون ونمرا في النمور كمبودي ونمرة خلا الله مكسيكية
ولما لميمنا والشمس البتوقد فوقنا شد شديدنا التمثال مشيل روقنا وعالم حر
يدوعل فوقنا لي يوم فوقنا نبزغ فيهو في عينيهو جر واسوقنا

يا شمس طلي طلي
شاوري على بيتي دلي
كيال الكيل ختياري مات
ظلي عم يحرس ظلي
عادل على خيي ميلي خيي لا يحمل شملي
ما خف الشمل تاني المرات ما كل الرصاص شيلي
عيني في الفيل ما ظله
كلنا ندريه ما نضله
يا ويل الويل نرمي الجمرات
عدّي المستشهد كله
عدي المستشهد كله

النجار مسيلها تسهلك الرايهوب
والوسار مسيلها القد وتر واندوب
الشداها فى نيتو البطارد اللوب
والدلاها ملص الفركة لبس التوب

دحين ياخي الطامع في كثيرة الغير قليلتو تضيع
وسيد بيت القزاز ما ببدأ بالجديع
بولاد الحديد القاسي في القطيع
العربي إن حرن وسط المحاص مابطيع

نحن والله لا بنخاف لا بنعاف ولا بنتهدد
لا بنكل ولا بنمل ولا بنتردد
كمان للزول البخون عُشرتنا ما بنتودد
نبقالو البلا في كل فِجَة مَمَدَّد

إت ياودود الله يديك عافية
دوما تجيب النضم السمح بالقافية
وتوثق كمان لحاجات كانت خافية
أرقد في امان في بلد الحبيب الصافية

رد الشوبلي لي محمد موسى كان
كي في محل الوجع
الزول نجض الجنى تب وماخلالو صفحة ينوم عليها

دحين يا غبار الكبرياء المن المعالم حاجب
أحذر منّوا لا ينسيك حقوق الواجب
ومن أمثال تراثنا الفي العرف والواجب
مهما العين تطول مابتعلى فوق الحاجب

وعشان ما نغلط معاك ونشيل النقط من شينك
أوعى تعضعض الناس البوضحوا شينك
هسع وقعت في الحلة ووجب تكشينك
شن ودّاك لشعراء البطانة تشينك

دي المخلوفة يا الصنديد اكان ماخاتي
كان شدوها فوق الريح جنى البعاتي
بحاكي الطير مغرّب زعزعوا الحواتي
ولفحة ايد يوصلك ام خديدا نادي

الليلة السجن جابلو انكتامه وحرّه
نمّن جرارقو حدثلي الجني البره
سحار الغروب راجينا كاضم الجره
بلحق بيك مراح حسب الله وين ما خرّه

قدر ما قلت اتوب ابليس يلولح راسو

يقولي ماتوب التابو قبلك خاسو

قدر ماقلت اتوب ابليس يقبل غادي

يقولي ما توب انت الكبير في ولادي

فال ود شعيت في ام هبج:

ياام هبج اللواري قطعت فسحانك
الموت عزتك لكن زمانك خانك
يوم اتكشفت عنيبه اتدافرت فرسانك
شقوا وبردوك ومركوها اركانك

ود الشلهمه قال في وصف البطانه:

مسَك القبله في كوع الشمال براقِك
وقشَط سدرو في عامر سحابو و ساقِك
إتبونك قرنِن والسيل دهك شقاقِك
الضايق نشوقِك حار عليهو فراقك

نزلتي فوق أم صفاة باينه
وبستامن علي البيت اب نزلتن دانيه
إيداً من جهل لي بت أعم مي خاينه
وضهري وتر حديد مافي عصبتن لاينه
_______________________

نحنا نسوي وبي البنسيها ما بنتمزى
سودانيه عزاز أهل الكرم والعزه
كفوفنا نقيه من تهم النكب والهزه
تصرم عندنا ال**** المواركه اللذه
------------------------
سودانيه نحنا مانا بالبلود ننجال
ونحنا الفي فريقنا بصرمن الحيال
نحن مجدعين هامات الترك في النال
ونحن الموت مداوسنا ولقينا رجال

ساقتني وقامت بالواجب هي اصيلة وراسية وست حوبات
نادت صاحباتا بنتعارف
نانسي وناندى وشيماء ولمياء ْ وحوراء وكفا
من وين! من لندن جينا امس راجعين باكر زي ها الحظات
من الطايف والمنشية ومدينة النيل وبنوت راقيات
طيبات طيبة وكل كليمة معاها ضحيكة
ونضاااف ورهااااف زي اللعبات

عبدالله حمد ود شوراني من أميز شعراء المدرسة الرابعة في الشعر القومي، وهي المدرسة ذات الملمح الغزلي ومسدار الرحلة والقصائد الطويلة بالمعنى الأدبي القومي مع الإحتفاظ بالمربع الشعري، وقد ظهرت فيها ـ أي المدرسة الرابعة ـ بوادر الشعر السياسي وشعر الدعابة ووصف حال الناس ومعاناتهم اليومية ، وشاعرنا ود شوراني 1923 ـ 1989 يأتي على رأس شعراء المسادير حيث ألف ثمانية مسادير طِوال، وهذا لم يتأت لأي شاعر آخر في البطانة قديماً أو حديثاً غير أن البعض يقول: إن الشاعر أحمد عوض الكريم أبو سن يُضاهيه في ذلك ، ويقول الباحث الكبير حسن سليمان محمد ود دوقة في كتابه ( مسادير ورباعيات الشاعر عبد الله حمد ود شوراني ) الذي صدر حديثاً ضمن سلسلته ( أدب البطانة) عن شاعرنا:" ود شوراني له دراية فائقة ومتفردة بأصول الإبل وأنواعها وقد برع في وصفها إذ عايشها منذ نعومة أظافره ، و يتصف بأدبٍ جم وتواضع معروف ، فهو يوقر الكبير ويحترم الصغير ، وله معرفة كبيرة بأنساب القبائل وفروعها وأفخاذها وأصولها، ويحفظ أسماء الكثير من شيوخ الطرق الصوفية وقد ذكرهم في كثير من شعره، وهو موغل في المفردات العامية مما دفع المرحوم البروفسير عون الشريف قاسم أن يستشهد بأشعاره في أكثر من ستمائة موضع في قاموسه الشهير ( اللهجة العامية في السودان) ، وود شوراني يلجأ للرمز في شعره -خاصةً شعر الغزل- فاسم المتغزل بها لا تسمح الأعراف بذكره، وذكر المفاتن ومواضع الجمال في المرأة في سفور وابتذال تمنعه الأعراف أيضاً لذا لايحس المتلقي بوصف مفاتن المرأة في شعر ود شوراني إلا نادراً.وود شوراني صاحب بديهة حاضرة في المجادعات والمساجلات ،وله معرفة واسعة بالسهول والوديان والجبال والغابات وأماكن المشاهير وهذه المعرفة بطبغرافية المنطقة مكنته من ذكر تلك المناطق في مساديره بصورة مرتبة مما يجعل المتلقي يحس وكأنه يرافق الشاعر في تلك الرحلات. بالرغم من أن ود شوراني أُميٌَّ إلا أنه يلم إلماماً واسعاً بالكثير من تاريخ الأمم السابقة خاصة قصص وحكايات الغرام عند العرب قديماً وحديثاً، كما له معرفة جيدة بعلم الفلك وفصول السنة والمنازل وحركة الرياح وله مسدار في ذلك.

ولنبدأ الآن مع شاعرنا ود شوراني في غزله بمرابيع النجوم ولنعش معه حبه الذي يتجدد وتتجدد آلامه وتزداد عليه كلما دخلت عينة جديدة طوال أيام السنة. ولنبدأ بفصل الصيف الذي بدأ به، وقبل الدخول في شعره أريد أن أوضح أن فصل الصيف عندهم يبدأ بعينة بعينة "النطح" ويوافق ذلك اليوم الحادي والعشرين من شهر أبريل في كل عام تقريبا.

غَابْ نَجْم النًطِحْ والحَرْ علينا اشْتَدً
ضَيًقْنَا وقِصِرْ ليلُه ونِهَارُه امْتَـــــدً
نَظِرة المِنو لِي القَانُون بِقِت اتًحدي
فَتَحَتْ عِندِي مَنطِقْة الغُنَي الْ انْسَدً

جيت عارق الدكاكين البناها زناكى
رسنك زاغت الوردان ودومك باكي
تفاح دنقلا العنف الصبيط متاكي
ألذ منو رد سيد الذكاء الإدراكي

وانا من زمنا خدو مشلخ

وهى من ازمانا خدها ساده

اتعجبت سماحا مواتر

طبقات عالية وكلها ساده

وكانت بينا فوارق شاسعة

اتعارفنا

وكانت جاده

وقالت عيد ميلادى الشهر الجاى

ولازم تحضروا

قتلها خير

قتلها خيييييييييييييييييييييييييييير

ودخل فى اضافرى

تقصدى ايه بى عيد ميلاده؟

ايا ربى اتولدت يا دابا؟

يبقى الاعياد سوها زيادة؟

امكن ولدت وانا ما عارف؟

يمكن ميلاد عيسى واجدادها

يا ربى بدقوا الدلوكة؟؟؟؟؟؟؟؟؟

وبعزموا الحلال كالعاده

بس قتلها خير وانا جاييكم

وعديلة وزين

والشهر الجاى

مرق مركوبى من السحارة

داقاهو المطرة قبل شهرين

ونكت طاقيتى من العضاضة

سليتلى ثماد رقعتها زين

سديريتى ابوى مسويها لبد

فرتقت اللبده مرقتها طين

عراقى مغزوز فى الكوكار

كان سوهو وقاية وكت فازعين

سروال مدفون فى رهل العيش

ملفوف محشور بين شوالين

لميتن واديتن شطفة

شريتن فووووق فى زريبت الزين

والزين بقراتو مكوفرات تب

مدغن طاقيتى هرنها زييييييييييييييييييييييييييييين

شافتن السرة بت الهراف

طردتن وجابتن لتاف

وغضبت غضب

وعزمت اقوم

جفن ما جفن

اقوم فى الحين

مرقت ووشى مطوطو تب

وصتنى الحلة رجال وعوين

وصتنى ام نوفل لى كركار

كان تلقى ودك جيب لى رطلين

وقروشى حلف صرة وبى خيت

وصتنى حليمة بت العجبين

سروال لى محمد ورطلين بن

بنبيعلنا شي ونديك بعدين

وصانى الهابر لى مركوب

مخلوفة وسرج وكرباجين

عنقريب وموسر بى حبال قد

تيبار ومسلة وابريق طين

والناس بتوصى وغبيانة

والناس غبيانة وبتوصى

وانا ظرفى مكدر زى الطين

وبتوصى وزى بايعلى بعير

وانا بايع تيسى وعيش كيلتين

والتيس اعور ما جابلو سعر

والعيش بتاب ومسوس وشييييييييييييييييين

تتسود ختوة هالسفرة

انا ماشى لواجب اقوم بالدين؟؟؟؟

وركبت الباص مخلاتي دفس
كدوسي وحقتي وعود سكين
وانا راكب في الباص بتأمل
ياربي بجيبو الحكامات
بتسو دلوكة بيجوا الحلال
ضابحين تيران ام خرفان صر
مدققين كمين شوالات عيش
وانا مالي ومال عيد ميلادن
ان نقروا الدلوكة اولادن
انا بنزل حربي ومتعكز
وادارق اصقر في الدارات
وانا معروووووووووف خراب حفلا ت
وامسك صوتي المدهون قطران واركز واندق
شان السمحات ما يقولن ضيفنا قريزن ساكت
ووصل وسعل لامن جيتن
وهداك البيت يرقش لوحات
وصل ولقيت البيت مزرود لاحدو بنات سمحات

شايلات هديات
وحدات وردات
وحدات زهرات
شايلات رسمات في شكل ارنوب
واسودونمور سبحان الله زي الميتات
يضاحكو قر حايشين صينية تبق شمعات
ماف زول قالي انت منو مابعرفو الضيف زي الخواجات
لتيت عكازي وقفت طرف
ملص نعلاتي اتفرجختا
لي تفه خلالي مضنقلو تب سكيني ملسنه بالجمبات
تبماكي وحُقتي مزرودا ولعتا كدوسي واخد جبدات
وان بتأمل هذا العالم ياتو البنوت وياتو الجنيات
وبحرت عيني لامن برقن
كل البنوت زيها سمحات
والبقر اشابه لي ضمة
ما عرفت الراحن والفايتات
لي حسن الحظ هي النقرتني
ما شالت شك من شافتني
ساقتني وقامت بالواجب هي اصيلة وراسية وست حوبات
نادت صاحباتا بنتعارف
نانسي وناندى وشيماء ولمياء ْ وحوراء وكفا
من وين! من لندن جينا امس راجعين باكر زي ها الحظات
من الطايف والمنشية ومدينة النيل وبنوت راقيات
طيبات طيبة وكل كليمة معاها ضحيكة
ونضاااف ورهااااف زي اللعبات
واحدتاٌ فيهن سمحة سماح لكن مي طاعمة
وانا زول مستغرب في حاجات
ان زول اسراني سماحتاً كاسيا
بنت البلد الهاديه وراسية وضميرا الحي التب مامات
وقالت لي
عرف نفسك بي عبارات
عرف نفسك بي عبارات
قتليها : انا الاسد الحرس غابتو الضريا
وانا الساعة الكتال بختف حديا
وانا الدايرني مابجيب لي هديا
وسارح مدرج ام هبج التخيه
مراتع اللبل الضان السعيه
وادرج عاصفة اللقدة السخيه
وادرج عاصفة اللقدة السخيه

_________________

مرحب حباب اهل البطانة الخضرا
اهل الكرم والجود يديم دوام مرتفعا
للجار والقريب اهل مروة وفزعا
خليك في حماهم تب ما تجيك الوجعا

الخبر الأكيد قالوا البطانة اترشت
وسارية تبقبق با الصباح ما انفشت
هاج فحل أم صريصر والمنايح بشت
وبت أم ساق على حدب الجميل اتعشت
**
برق القبلة شال شالت معاه بروق
ختت له أم رويق عم السحاب من فوقو
العفرت رحل يبكي ويسوي القوق
والضحوي اتردف ليله ونهاره يسوق
***
البارح بشوف يشلع بريق النو
وحس رعاده يجرح في الضمير كوكو
داك طير القطا الدور مشارع الهو
وفرقان البطانة اتماسكت بالضو

قال إدريس ود علي في البطانة:

دي بطانة أبعلي العند الشعور مفهومة
شرطاً للبدورها محنضلة ومسمومة
كم لله فيها مفقشين هام رومة
بالدم والرمم لا عند جزم موسومة

حسان وابعلي واب سن حدار الجار
كاتلين عز مكوك كم بردوها الدار
من الهايكوته لي البلد ابو قنا وصغار
ما خلوها نية تتقلب للنار

وقال العاقب ود موسى العشيابي في الفخر:

نحن نسوي لكن ما بنقول سوينا
نحن نفرتق الكرنة ام صفوف بايدينا
الزول البضيف عدم الشراعة علينا
يفهم مني ويسأل من توارخ النينة

نحن الود لبونا بشيل حمول النائب
تصرم عندنا القحية البصيبها الصائب
نحن اولاد شكير جور نالنا كلو نقائب
ديمة نلولي في المحن الكبار وغرايب
وقال ود عبشبيش يخاطب البطانة:
بندق فيك نحاساً من قديم راجينا
فيه خيولنا عارضات كيه للمابينا
كان ما تجرتقك دماً علوجه سمينة
لا تجيبي لنا حنتوت يا ام هواياً زينة

حليل اهلك حليل البردوك قبيل
دا هجين المقادير بي مرور الخيل
قبال التصاويت والبهادل ديل
ما شافو الاضافر في جوامع السيل

عنــــاق الاريل المسدارهـــــــــا جَبــرة‎
تحدِّثنــــي‎ ‎حديثـــــــاً كُلــــــــّوْ عَبـــــرة‎
أنا إن جَنَّيـــــت قط ما‎ ‎ظنَّـــــي بَبْــــــره

غاب نجــــــــم النَطِح والحر علينا إشتدَ‎
ضَيـَّـقـْنـــــا وقِصــــــر لَيلُو ونهــــارُوْ إمتدَّ‎
نَظِرة‎ ‎المنـــــــــــُّو للقانون بِقيـــت إتحدَّى‎
فتحـــت عنــــــدي منطقـــة‎ ‎الغُنا الإنســَدَّ‎

أرُبْطو الجـــــــــانا ضامر لا كَبد ولا كرشة‎
سحّار الغروب جيب لي العلوق بي الورشة‎
نفِّضــــــنْ المراتب ؤطرَّحن‎ ‎بــــــي الفُرشة‎
داير يبــــــرى جرحاً في القلب مُــو خرشة‎

شعر الحاااار دلو
الليلة البلوم اصبح يقوقى وينوح

وميزان قلبى اصبح من بكانو مفوّح

على بـهماً لِوَيِّنْ بى النتيل مِسَّوِّح

لى شوفتو بترد الروح بعد ما تروّح

الليلة البلوم طربان يقوقى ويصيّح

والعاشق ينوح لامن صباحو يبيّح

عناب الحجاز فدّع غصونو بميّح

ترا الحارق حشانا ولى قلوبنا مسيّح

يا قميرية نغمات الغرام زيديهن

وسوى القوق ونماتك عقب رديهن

على بهم النديمات القفر واديهن

ليهو سلامى والشوق يا أم جناح وديهن

انزلى فوق فريع قبل الفريق يا نايحة

كترى في الطنين متل الحوارة الرايحة

مربوعة بنات لينة ورطيبة ومايحة

قوليلا السلام ليك يا أم ضفيرة سايحة

قوليلا العشوق تعبان اذاهو مطوّل

يات من شافو اصبح في العليه متهوّل

عشان عينيك مبارى البى القفار متجوّل

لاكين لى الممات من عهدو مو متحول

كل ما شاف برق في القبلة يشلع وجّة

يتقافى المنام من عينو ياخد لجّة

نيران الجحيم ليهو في الفراش منفجة

دكتور الغرام مع اهلو عامل حجّة

قال مرضان هواك لى شفاهو مافى طريقة

في كبدو الحراب في جوفو باقة حريقة

قط ما ليه علاج من غير يقرطع ريقا

والا يمددوهو ويمسحوه بى عريقا

طارت منى قمرية المحبة وقفّت

نافضاهن على بلد الحبيّب خفّت

براى خلتنى زى جاهلا يتيم اتلفت

تقطر عينى بى الدمعة الروية الصفت

قمزت وصفقت وضربت هوايا فوق

وخلست بى رشيشا اصلو مو ملحوق

نافضاهن قلب والداً رؤوف وشفوق

شاهد في المنام دم الصغير مدفوق

قط لا اتصددت لا اتصنتت لى قوق

وسوّت لى الهبوب لفحى الهدم مشقوق

هوّت بى صقيعا منطرح واقوق

في شوفو البعير متل الخلال مدقوق

الصقر المضر لا حسب لا راعى

لى مركب غرامى الجبدولها شراعا

شافا وانعدل ختف الجناح بسراعا

واتجمع تقول حرحافا ماضى ضراعا

يا صقر السواد عينك تشوف الابرة

يخرخر ماها جدول لا تطيب لا تبرى

جناحك بى حديد شركا سريع في الهبرة

يردخو لى الكتف ردخا منافى الجبرة

علّق فوق تقول نجمة وهجع شاتيها

جاها مخوى متل الصاقعة متواتيها

هيّق لى الكفت لاكين وقع خاتيها

قيّع وانعدل عقان سبح بى تيها

حست بى هواهو اتدلدمت وانصرت

وانبرمت متل مترار فلانة الترت

هوّت بى الصقيعة تقول نجمة خرّت

وخوّت جو تقول طنوب وجيبة درّت

غتسن في السماء وقطعن سبيبة الشوف

عقب ادنقسن لى الأرض بسون فوف

بجمّع عليها بشوف حمار الدوف

وهى بتنصرّ منو غادى تسو رحيل الخوف

كبدو انسل دم داير يقصّر قيدا

وهى بقت تحوّت في المِكَر رِقِّيدة

من ربط الحبيل تب فضلتلو عِقيدة

مقطوع النصيب دخلت طريدتو عَقيدة

نزلت في كتيرا اتركبت في فروعا

كلها تترجف من السفر والروعة

قالتلو القدام قالو البلد مضروعة

كان ما صب مطر ما تنبت المزروعة

غير اليوما تام قط ما بتموت لك صيدة

والبجدعها القدر قطعا حربتو تصيدا

معلوم في المقانص تربح الرصيدة

والنوم لى القماح أم الزرع حصيدة

علق يسوى جاك لامن شميشتو انجمعت

وضحكن من قماحو بروق قبلتو ولمعت

حنت لى القميرية سحيبة ماعت ودمعت

وكت الليل برد في الوعرة ناو انسمعت

طلعت فوق فريع من الهبوب لوّاج

وجدعت شوفا بى ضى البروق وجواج

رضيت بى سقط زيفة انطلق سوّاج

وقالت الزيفة اخير لى من اضافر اب عاج

كل الليل تهلع عدتو القمرية

من اب عاج مبيتة في مخافة وريا

قبل القبلة تشرب غبشتا البدرية

صبحت دارا خالية ترا السفر باكرية

حصّلت الفريق وديارو ساعة النافلة

نظرت في البنات من غير حفل والحافلة

لقت في محبوبتى كفل أم سبيبة الجافلة

وعنق اللريل وعيون الجدية الغافلة

نزلت فوق فرع سيالة تبكى تنين

مراتن تردد لك نغيمها حنين

مراتن تسوى القوق معاهو طنين

تطرى الزول حبيبا ليهو منو سنين

محبوبتى سمعت وفهمت نمة الغناية

ونظرت ليها بى عيون التملى تنايا

دميعة زى نداية مقدة متناية

قطرت بى الخديد متبعة مى وناية

قالت كيفن حالو يا قميرية

يبقى عليهو متل العلى حمة عضام نارية

بذّكرنى عند ساعة الهجعة ويقول يا ريا

والا خلاص نسانى وبقيت عندو ما مطرية

كل ما اطراهو يا قميرية ريشات فؤادى يفرن

تقول عقد انقطع يجرن دموعى يترن

قلبى مرات يجر مرات يقيف يتحرن

واحس بى تياب جمر فوق لى عضاى انشرن

يعلم خالقو يا قميرية قلبى بريدو

فكرى معاهو رحل شال المنام فوق ايدو
ا
لشوق العلى زايد تملى جديدو

والريد العلى فات العبار تحديدو

روّحى ليهو يا قميرية واحكى الحاصل

قوليلو الشوق عليك ليل بى النهار متواصل

قوليلو المنام بقى بى السهر متفاصل

قوليلو كفاك نجيع عود لى ديارك واصل

روّحى سافرى يا قميرية والله يعينك

ومن عقب الطريق مولاى يبقى ضمينك

جمّعى في هواك من الشمال ويمينك

لامن توصلى سيد حياك وفيهو بتنوم عينك

الصادق ود امنه:
ود شــوراني عيني السهر قبَّـــحَه
ولسنــــات الشمت في يانديم متحَّه
علي عانِس متو اللبى يتلى مني وحجه
سولك منكب جملي أب جريـــداً دحَّه
ودشوراني :
سمح الشوفة روقة الغمدة مني منحَّه
وأنا يا أب آمنه ما خلتلي توبه وصحه
ذوقه غريزة الحب في ضميري زرحه
هجَّام دوره تر عجلو وخبيرتو رفحَّه
الصادق :
بعد الشيب عمتني ونفسي مده قرحَّه
عُقب الليله عــادت للأذى البِسرحَّه
درعات القنوب بعد القلب صـارحه
مجبورين علي نـــار دقمه ندرحَّه
ودشوراني :
قلبي الليــــله منطقة القوافي فتحَّه
فــوق الاريل القمَّح كـــلابي شرحَّه
يا عوض الســلاحو الآن كبادي جرحَّه
خدو وسيم وروبتو على الكتـوف لفحَّه
الصادق :
العين ساقده بلحيل وقاسي نصحَّه
لبيع القامه في سهر الليالي دفحَّه
رب العزه في سابع السماوي رفحَّه
روَّق ذهنها وفطنها مـــاصفحَّه
ودشوراني :
وا أسفاي علي صبري الضِعفلو وشحَّه
سببو العارضه فوق شتم النحاس القحَّه
الخـــــــلاَّقه ليَّن طبعها وسمحَّه
زوله فدورة الــنوق في العجيج قمحَّه
الصادق :
تقيلة المجلس المن القبـــيح تسحَّه
من حر شوقه قلبي ينوح ودوفي إتلحَّه
الخلاني القــــايله فيكي ما بسمحَّه
مقطوع النصــيب بيك نفسو مامتحَّه
ودشوراني :
لهجك كُلمة الحنى السبيطه تفحَّه
أندى نداكي يالشتله أُم أدوباً نحَّه
الخلانه خِلَقِك بالشُكُر نمـــدحَّه
أردافك فلو وقدمـك تقيل ما رحَّه
الصادق :
إنتي فريدة العصر ونخـيل الشبره
شوفتك تذهِب الهم والليالي الغبره
بي فر براطمك وقــامتك المنتبره
أحيتيلي نـــار قُبره البتوقِد كَبره
ودشوراني :
البارح نسيم ريحــاً طلق من جبره
ذكَّر عقلي لي ود العنانــيس هبره
آح من فلانه وجرحها المــا بيبره
قلبي عليها ناح بعد اليقين والصبره
الصادق :
أخُش في مكتب الريِّس وأصُد بالعبره
أنا يا دُقمه طشَّت روحي مي منخبره
الخلاني أتختره النصيـــحه وأبره
ياقوت الحضيري الوازنو مية عبره
ود شوراني :
أرض الله الوسيعه علي بقت منشبره
من لهطي وتِقِربني كل صاحب يبره
عارفك يالظهــورِك مي رديه ودبره
فقدك أحرَّ من سم أب لـــدغةً نبره

الصادق :
راسيه وأديبه وعندك فوق ندايدك فوت
وضربك للعشوق كليح سيوف مو سوط
ناس دُقمه متلي مهددين بالمــــوت
زي كورة الهلال شــاتت قلوبُن شوت
ودشوراني :
مرجان الجواهر وفاخر الـــياقوت
غير حلاته زينة عينو ليَّ تفـــوت
الحويتو جاه بدوي الزيارتو سـبوت
شيخة كُل عارض ومن شلوخه ستوت
الصادق :
ياعوض الجســوم إتعودَّن لبلاهن
ميدان العصُر وعُقب القلوب قالأَّهن
بدر الكون كُبس الظلام ضــواهن
العال والوسط فاز بالجمـال خلاهن
ودشوراني :
سبيك الخيل ظبي القفَّرن بخــلاهن
راح يخرِّب شروط التوبه من منشاهن
فليج بسمها العُقد القلوب حـــلاَّهن
السما والأرض يا دقمه فوقنا كـفاهن

منقول

ومن شعراء الهمباته الطيب ود ضحوية

اسمه الطيب عبد القادر سليمان ود ضحوية " وضحوية جدته لابيه " ينتمي إلى قبيلة الجعليين ولد بقرية الضيقة بجبل أم علي وهو مسندابي عاليابي والعالياب هم فرع من فروع قبيلة الجعليين .

لما بلغ الشاعر العشرين من عمره اجتذبته حياة الهمبتة لما كان يشاع عنها من أساطير وقصص وبطولات تحكى في المجالس مقرونة بإشعارهم الحماسية وأخبارهم مع محبوباتهم ، استرعت هذه الحياة انتباه الشاعر فانضم إلى جماعة القديات والهواوير من البدو الهمباتة ، ليس بدافع الفقر وانما طلباً للبطولة والمتعة . صحب الطيب ود ضحوية في غاراته اعتى رجال الهمباتة كـ طه الضرير ورحمة التركاوي واحمد عمران وود فكاك وصار زعيماً للهمباتة لتفوقه عليهم في هذا الميدان .

الهمباتة

الهمباتة والمفرد همباتى والهمبته نوع من النهب فى وضح النهار والهمباتى معروف بين الناس بمهنة القلع وقطع الطريق جهارا وهو فخور بمهنته ولا يسمى سارق لان السارق هو الذى يسرق الاشيئا ء البسيطة ويسرق متخفيا أو خائفا عن غفلة اما الهمباتى لايرضى بالقليل ويقلع وجهاً لوجه
ومن المعروف ان الهمباتى يتميز بصفات الكرم والرجوله والشهامه ومساعدة المحتاجين ومن اشعار الهماته

كان بردن قروش مانى البخيل دسيت وكان حرن بكار ماهن صفائح زيت

ويعنى بالبكار الابل فى دلاله على كرمه ويقول كان الحكاية مرقت بوزعها على المساكين والاصدقاء واذا ما مرقت هو قالع ابل مش حرامى صغير وهو فخور بسرقته الاشياء الثمينه والكبيرة
2 / السالف
معروف قديما عند العرب اذا سرقت ابل يمشوا اعيان القبيله ادفعوا مبلغ من المال للحراميه وارجعوا المسروقات

الطيب ود ضحوية هو زعيم الهمباتة

قالوا ياهند أنو ود دوقة مرة شاف بت سمحة جدا بترقص وهو أول مرة يشوفها وسط الهيصة وتاني يوم البت ماجات الجماعة قالوا ود دوقة سحر البنية أها قام قال

يا باشة عموم الفي الحكم بتدول
فتيهو الشباب القام جديد والاول
الخلاهو يا أم ريد المرض يتحول
كنت بضيفو لي جرحي المنوسر طول

ود ضحوية يسخر من العاطلين والمتبطلين

كثيراً ما يسخر الشاعر من المتبطلين الراضين بحياة الذل والفقر، مفاخراً اياهم برفاقه الشجعان واصفاً الهباتي بأنه " الولد " الذي يسري الليالي واضعاً ساقيه واحدة فوق الاخرى على ظهر جمله " ابو قوائم " ، وهو يحمل قربته " وعاء يوضع فيه الماء يصنع من الجلد المدبوغ " ، كما يحمل ذلك النوع الفاتك من السلاح " أب كسرة " فشتان ما بينه وبين الخاملين " ناس يمه " الذين لاهم لهم غير أن يطالبوا امهاتهم بالمزيد من الطعام :

ولداً بطبـق المسـرى فوق المســرى
يخلف ساقـو فـوق ضهـر ابوقوائم ويسـرى
حقـب قربينـو فوق جربانــو خت ابكســرة
فرقــاً شتــى من ناس يمـه زيدي الكســـرة

كما يسخر من المتأنقين الذين لا فخر لهم غير نظافة ملابسهم ولف عمائمهم ، وتسخر منهم الفتاة الجميلة ذات "الشلوخ العوارض" هيهات لمثل هؤلاء أن يكون شأنهم كشأن الصناديد من امثال الشاعر و الهمباتة الذين عادوا ظافرين إلى محبوباتهم اللائي ليس لهن شغل غير احصاء الايام التي تغيبوا فيها عنهن شغفاً وكلفاً بهم :

ناس قدّر الله بـي الحلة مكبريــن عمامـن
عدمــو الصيبة والزول ابعـوارض لامن
اندرجو الصناديد والضـرير قدامـــن
نوو العـودة لي المسكيـن عواد ايامــن

الغنا الجبتو يا ودود غنا الطيب زاتو ونكملو :
مانى التمبل اللفى البيت صنعتى حليب
بدور الشدة فوق ابلا شوافى ونيب
ان حرن نخت الشكرة ما بنعيب
وان بردن نكافيبن سوالف ام طيب

وقال برضو :
مانى التمبل القاعد يقول سويت
ويشهد خالقى كان يوم السوال قريت
ان بردن نياق مال البخيل صريت
وان حرن بكار ماهن صفايح زيت
وهنا ينفى ود ضحوية عن نفسه صفة الخمول والتكالية وادعاء ما لم يفعل
ويشهد ربه انه اذا قبض عليه فهو لا يعترف للشرطة ولا للقاضى ولا يقر بجريمة
وان الت اليه ملكية المنهوبات دون نزاع فهى نوق الرجل الذى يكنز المال ولا ينفق
وان ادخل الى السجن فهو قد نهب ابكار الابل التى هى اعظم ما يمكن ان يؤخذ
وليست شئ حقير كالذى سرقه جاره فى السجن

الهمباتة والمفرد همباتى والهمبته نوع من النهب فى وضح النهار والهمباتى معروف بين الناس بمهنة القلع وقطع الطريق جهارا وهو فخور بمهنته ولا يسمى سارق لان السارق هو الذى يسرق الاشيئا ء البسيطة ويسرق متخفيا أو خائفا عن غفلة اما الهمباتى لايرضى بالقليل ويقلع وجهاً لوجه
ومن المعروف ان الهمباتى يتميز بصفات الكرم والرجوله والشهامه ومساعدة المحتاجين ومن اشعار الهماته

كان بردن قروش مانى البخيل دسيت وكان حرن بكار ماهن صفائح زيت

ويعنى بالبكار الابل فى دلاله على كرمه ويقول كان الحكاية مرقت بوزعها على المساكين والاصدقاء واذا ما مرقت هو قالع ابل مش حرامى صغير وهو فخور بسرقته الاشياء الثمينه والكبيرة
2 / السالف
معروف قديما عند العرب اذا سرقت ابل يمشوا اعيان القبيله ادفعوا مبلغ من المال للحراميه وارجعوا المسروقات

يا ودود الاصم نظمك اكيد سرانا
ونحن اصحاب مسرة والوداد يبرانا
تعال لينا الرياض خلينا نستر حالنا
نفديك بالنفوس قبال بيوتنا ومالنا

قال طه الضرير أنه كان يبحث عن رفيق درب في مشاوير الهمبتة. فوجد شاباً قوي البنية يجيد فنون القتال معروف بالشجاعة والإقدام... فقال وحات هذا الصبي وأيقن أنه قد وجد ضالته المنشودة. قال فخرجنا في أول مشوار وعدنا بالإبل وبعناه في سوق تمبول ولجأنا لمكان بعيد و بركنا الجمال وجلسنا. قال طه قلتلو يا ولد قوم سولنا شاي. فقام الشاب بكل أدب بعمل الشاي وعاد لطه الضرير يحمل الشاي... فوجد طه قد قسم عائد بيع الجمال إلى ثلاثة أكوام . وعندما سأله قال له طه الضرير: هذا الكوم لي وهذا لك والكوم الثالث هذا لجملي. فقبل الولد بتلك القسمة الضيزى ولم يعترض. قال طه عند ذلك عرفت بأن ذلك الصبي ما هو زولي ... وإلا كيف يرضى بالضيم وبتلك القسمة الجائرة. يقول طه وواصلت البحث … فوجدت شاباً آخر يقل عني عمراً وحجماً وله نفس صفات ال “Candidate” السابق. فخرجت معه في أول مشوار وكررت معه نفس ما فعلت مع الشاب السابق. رضي الشاب الجديد بعمل الشاي وعاد فوجد أكوامي الثلاثة وقلت له هذا الكوم لي وهذا لك والكوم الثالث لجملي. فما كان من ذلك الشاب إلا أن ركل الأكوام الثلاثة برجلة فأصبحت كوماَ واحداً... واستل سيفه... وقال لطه الضرير " أها يالأخو... كيمانك بقن كوم واحد يا أشيلو أنا يا تشيلو إت... أها ... قوم على سيفك" ... قال طه الضرير عندها عرفت أن ذلك هو زولي.. فاستسمحته وهدأت ثورته...وبدأت معه رحلة عمر في الهمبته... وما كان ذلك الشاب إلا الطيب ود ضحوية أشهر همباتي.... اسمه الطيب عبد القادر سليمان ود ضحوية. ينتمي إلى قبيلة الجعليين ولد بقرية الضيقة بجبل أم علي وهو مسندابي عاليابي والعالياب هم فرع من فروع قبيلة الجعليين.
منقول
http://www.al-nafitha.com/vb/showthread.php?t=3306

" محكمة الغرام" :

الشاعر المدني الكردوسي

طالبني الغرام رسل لي خمسة عساكر
وأنا عامل جنايات والعقل مو فاكر
بعد ودوني قابلتو القبيح الماكر
قال ختوه يرقد في السجن لا باكر
*****
بعد الصبح أصبح والسجن فتحوه
والمكتب عمر قالوا الأسير جيبوه
قال ليهم الولد ياتو هــــو ؟
قالوا عشوق خدود اللينة ماعرفتوه؟
*****
قالوا ها بالحيل بنعرف الغرام شاويهو
ومن فضلك تسامحو وغايتو لا تقاويهو
الماسكو الهوى العذري نازل فيهو
في حكم الشرع لا يكون جناية عليهو
*****
اتنفش الغرام برنيطو شالها نفاها
ضرب الكوبيا لا من سرحا وشقاها
إتناول قلم غيرها وكتابتو محاها
قال أمسكتو خمسين جلده إتنين نجمة غايتو معاها
*****
بعدما فاق بقول ودوه للباشكاتب
يمكن يلقى أورنيكو ويزيدلو الراتب
وجد عندو جمهور ناس فلانة مراتب
قال ليهو كون جالس لا تخاطب
*****
أخد ساعتين مصنقر فوق جمر قلاية
لا سمع رد جواب لا جاتني راجعة حكاية
فتش أوراقي أبد ما وجد لي خطايا
قال ودوهو للنائب غلبت براية
*****
يا خلاي بعد ما جيت وصلت النايب
قال أووك يا سلام أورنيكو فيهو نصايب
دا أصلو حرامي كان مسحب وغايب
ودوه للمامور براه الشايـــــب
*****
المامور بعدما جيت وقف قابلتو
شخص أبصاروا وعاين لي مسك في شغلتو
قال للعسكر التابعني كيف عملتو
ده ودوه للمستر يشوف مسألتو
*****
المستر بعدما جيت وقف قدامـو
عاين لي نص ساعة وطلب ترجامو
ترجاميهو ترجملو وعدل لو كلامو
قال ودوه لي مولاه قاضي إسلامو
*****
قاضي المحكمة الشرعية جيت عن بابو
مقدار ثانية فورا رد لي جوابو
قال لي معاك ما أحوال الغرام وأسبابو؟
قت لو القصة من زولا حرير قربابو
*****
القاضي إتمحن والمفتي برضو معاهو
قال ودو لي حكيم الصحة يكشف داهو
يمكن تكون مسألتو هينة والدوا بيلقاهو
ما يدروه حسرور المزرقن فاهو
*****
قم من حيني قاصد لي حكيم الصحة
امشي عليهو أردف كل مرة الوحة
قت لي سيبني ما عندك دوايا صح
أنا طبي .. ( ليم القرنهن ما شح )..
*****
سبتو براهو في اودتو ومرق خليتو
والحسس العلي جوه الضلع دسيتو
كل ما يهف لي عجلول الترى الفي قيدتو
ما لدواي طب أكان ما صديهن جسيتو
*****
يا خلاي خلاص هذا الحديث إنتم
والنوم فر والعينان دموعهن جم
مريودة أمها السولها السوار والكم
تجمع شملنا وبعد الفراق نتلم.
_________________
الناس في العروض ما تقيسه بي تيبانه
مايغرك لباسن والعروض عريانه
ديل حراس رزق زي التكنو أمانه
زي إبل الرحيل شايله السقى وعطشانه

هلا تكرمتم يا عشاق الدوبيت بالقاء نظرة ولو سريعة - مع ابداء الرأي ...

السلام عليكم الوالد عادل عثمان

قصت اليوم فى عالم الدوبيت ومن خلالك تعرف على شعراء بلادى ومايحمل هذا الشعر من معانى عميقه فى ( الشهامه .......الحب....... الكرامه الى........)

اولاً....نشكرك على المعلومه والتعريف بتراثنا

ثانياً....وفى البد عزرا أن كنت ساثقل عيك ولكن صعب على فهم (فصل الصيف عندهم يبداء بعينه النطح ) فما المقصود بعينه النضح

اكرر أسفى للمره الثانيه وتقبل مرورى

تحياتى أم شفيف الروح

الابنة الكريمة الفاضلة / أم شفيف الروح . عزاك الله ومتعك بالصحة والعافية . ومشكورة علي المرور- وانا ماعارف ايه لزوم الاسف . ولايهمك . المقصود ب ( عينة النطح ) هو ظهور نجم في الافق يعرف به اهل البادية بداية فصل الصيف وكذلك سائر فصول السنة لكل فصل نجم يظهر في وقت معين وهذا الفن لايعلمه احد غيرهم . ولعل هذا مستمد من قوله تعالي ( وعلامات وبالنجم هم يهتدون ) . والله تعالي اعلم .

الأحباب الأعزاء تحياتي
لمحت من على البعد قد أنتصبت مرة اخرى خيمة ودشنتير ويالها من روعة وإبداع بس أردت من هذا البوست التعريف بفن المسادير وأنواع المسادير وشعراء البطانة وفطالحتها وسوف أحاول جاهداً التوثيق لهذا الفن من خلال الكتابات والأشعار التي تهتم بفن المسادير والدوبيت وأبتدي بموضوع كتب عن فن المسادير سوف أقوم بإنزاله مجزاءً حتى تعم الفائدة وهو منقول

*كلمة المُسدار مشتقة من الفعل سدر بمعني ذهب‎ ‎او ورد ، وتحتمل هذه الكلمة عدة معاني ‏مرتبطة بالاشتقاق الذي ذكرناه ، فالمسدار في‎ ‎البطانة " وسط السودان " يعني المرعى أو ‏المورد الذي تتجه اليه البهائم . ولفروع‎ ‎وبطون القبائل المختلفة مسادير معلومة تسدر اليها ‏مواشيهم طلباً للماء والكلأ , وقد‎ ‎استعمل عبد الله ابوسن شاعر قبيلة الشكرية كلمة مسدار في ‏هذا المعنى حين قال‎ :
عنــــاق الاريل المسدارهـــــــــا جَبــرة‎
تحدِّثنــــي‎ ‎حديثـــــــاً كُلــــــــّوْ عَبـــــرة‎
أنا إن جَنَّيـــــت قط ما‎ ‎ظنَّـــــي بَبْــــــره‎
واستعملت بعض القبائل الاخرى كلمة المسدار في‎ ‎هذا المعنى ، فقال ود ضحوية شاعر قبيلة ‏الجعليين‎ :
مادام بت أم‎ ‎قجة* واردة وصادرة بي المسدار‎
‎*‎وأم قجة هي الناقة‎.
وكلمة مسدار تعني‎ ‎القصيدة ، واستعمل هذا المعنى في القصائد الغزلية من فن " الدوباي " أو ‏الدوبيت‎ ‎وقصائد المدح النبوي . وقد وردت كلمة مسدار في هذا المعنى في بعض المدائح ‏النبوية‎ ‎مثل قصيدة "حاج الماحي " "شوقك شوى الضمير " التي يقول فيها‎ :‎
الشمــــس في العِصيَر ردّاها وجات الــــعـِيـر‎
يا اخواني‎ ‎بـــي تشمير* شيلو لِيْ المســــادير‎
تشمير : شمر عن ساعده ، أي اجتهد‎ .
فالمسدار يمثل نوعاً معيناً من القصائد الشعبية التي تسير على نمط الرجز‎ ‎الرباعي، وهي ‏شبيهة بالقصائد العربية القديمة ، وتعني بسرد ومتابعة رحلة الشاعر إلى‎ ‎ديار محبوبته . وقد ‏تكون هذه الرحلة واقعية كما في مسدار " قوز رجب " للشاعر‎" ‎الصادق حمد الحلال" ، أو ‏خيالية كما هو الحال في كثير من المسادير . واحياناً تكون‎ ‎الرحلة مجرد رصد وتتبع لسير ‏الحسان كما في " مسدار الصيد " للحاردلو‎ .
وفي‎ ‎بعض الاحيان تكون هذه الرحلات زمانية تعنى بتتبع منازل وفصول العام مع ذكر ‏عواطف‎ ‎الشاعر المتأججة ولوعته لفراق محبوبته . يدل هذا النوع من المسادير على معرفة‎ ‎ودراية تامة بعلم الفلك والظواهر الطبيعية المختلفة التي تواكب الانواء و " المنازل‎ " ‎المختلفة ‏للنجوم ، وخير مثال لهذا النوع مسدار الشاعر"عبد الله ود شوراني" الذي‎ ‎يستهله بقوله‎ :
غاب نجــــــــم النَطِح* والحر علينا إشتدَ‎
ضَيـَّـقـْنـــــا وقِصــــــر لَيلُو ونهــــارُوْ إمتدَّ‎
نَظِرة‎ ‎المنـــــــــــُّو للقانون بِقيـــت إتحدَّى‎
فتحـــت عنــــــدي منطقـــة‎ ‎الغُنا الإنســَدَّ‎
يخبرنا الشاعر عن غياب نجم النطح واشتداد الحر وقصر‎ ‎الليل، وكل هذه الدلالات الطبيعية ‏تصاحب " عِينة " النطح وهي مؤشر لدخول فصل الصيف‎ ‎و النطح : اول " عينة " من " عين ‏‏" الصيف‎ .

» وقفات مع عباقرة اهل المسادير ؟؟
» ناس النم هوووى السلام جاكم
» وقفات مع سجن كوبر