تقويم الأسنان

موضوع: تقويم الأسنان الأحد فبراير 14, 2010 1:05 am

تقويم الأسنان

بسم الله الرحمن الرحيم

عيادة على الهواء

موضوع الحلقة : تقويم الأسنان - بثت يوم 21/ 1/ 2010م

مقدم البرنامج :
إسراء زين العابدين
الضيوف :
دكتورة/
شذي كمال عباس رئيس شعبة التقويم الأستاذ المساعد بكلية طب الأسنان جامعة
الخرطوم ، ودكتور/ عبد الباقي عبد القادر الزبير اختصاصي تقويم الأسنان
المحاضر بكلية طب الأسنان جامعة الخرطوم
مقدم البرنامج :
مرحبا
أهلا بكم أيها الأصدقاء ساعتنا تجاوزت التاسعة بنحو خمس دقائق ، مرحبا بكم
عبر هذا اللقاء الجديد معكم حتى العاشرة بمشيئة الله ، أيها الأصدقاء
تذكروا دائما أن هذا البرنامج نهدف من خلاله الى نشر الوعي الصحي أيضا
نحاول أن نزيل كثير من المفاهيم الخاطئة ونحاول أن نسلط الضو على بعض
الموضوعات الصحية والتخصصات الصحية وأيضا نحاول أن نحل بعض هذه المشكلات
في مجتمعنا ، بداءً هاكم تحايا الفريق الذي يصحبني عبر هذا اللقاء ، دوما
نسعد بمتابعتكم ونسعد أكثر بمشاراتكم لنا اتصالكم أسئلتكم واستفساراتكم هي
دوما محور اهتمامنا لا تنسوا رقم هاتف البرنامج ( 87553152
) ، أيها الأصدقاء أهلا مرحبا بكم سعداء في هذه الحلقة من عيادة على
الهواء إننا نفتح الحديث حول واحدة من التخصصات الطبية الهامة جدا والتي
أصبحت لها حضورها ولها وضعيتها في المرحلة الأخيرة والاهتمام أيضا بها كثر
جدا نود أن ندخل الى هذا العالم لنتعرف أكثر على ماهيته وما هي علاقة
المرضى بهذا التخصص هل هو ينتهي الى عالم التجميل أم الى التخصصات
العلاجية ، اذاً أهلا مرحبا بكم ونحن داخل شعبة التقويم ( تقويم الأسنان )
معنا دكتورة/ شذي كمال عباس رئيس شعبة التقويم بكلية طب الأسنان جامعة
الخرطوم أهلا بيك دكتورة شذي ونحنا سعيدين بحضورك وتلبتك لدعوة البرنامج
دكتورة/ شذي كمال :
أهلا إسراء ونحن اسعد بهذا اللقاء ونتمنى نكون عند حُسن ظنكم إنشاء الله
مقدم البرنامج :
إنشاء
الله مرحب بيك دكتورة شذي ، أيضا نحنا سعيدين جدا بضيف العيادة دكتور/ عبد
الباقي عبد القادر الزبير اختصاصي تقويم الأسنان بكلية طب الأسنان جامعة
الخرطوم ، دكتور عبد الباقي حبابك عشرة
دكتور/ عبد الباقي عبد القادر :
عليكم السلام وبركاته شكرا ليكم لإتاحتكم لنا هذه الفرصة وكل سنة وانت طيبين وإنشاء الله نكون معكم دائما متعاونيين .
مقدم البرنامج :

إنشاء الله نحنا حا ندخل هذا العالم نتعرف على تقويم الأسنان ما هو ونتحدث
عن موضوعات في هذه الحلقة ، ماذا نعنى بتقويم الأسنان هل هو حل لبعض
المشاكل الصحية أم انه جمالي وينتمي الى التقويم فيما يخص تعديل الأسنان
من نواحي جمالية ، أيضا نتحدث عن العيوب الخلقية وعلاقتها بهذا التخصص
وربما نعرض بالحديث الى اى الأعمار أكثر مناسبة هل هو في الصغر أم عندما
يصل الشخص الى مرحلة عمرية معينة وربما نعرج أيضا للتعرف لماذا هذه الكلفة
الغالية والسعر المرتفع لعمليات التقويم في وطننا ، مرحب بكم وأهلا في
البداية دكتورة شذي ذي عايزين نخش مباشرة عشان نتعرف على هذا القسم هل هو
قسم خاص وهل هو تخصص داخل تخصص نتعرف عليه شوية
دكتورة/ شذي كمال :

الحقيقة تخصص التقويم هو تخصص يعنى ذي ما قلتي انتى بجمال الأسنان نحنا
بنعالج المشاكل الوظيفية في الأسنان اى اعوجاج أو عدم انتظام في الأسنان
قد يؤثر على وظيفة الأسنان في مضغ الأكل وكل هذه الأشياء برضو بيؤثر على
الصحة بتاعة الفم اى مشاكل في الإطباق أو في عدم وجود الأسنان في مكانها
السليم قد يؤثر تأثير مباشر على صحة الأسنان من حيث النظافة إذا كان في
ترادف في اسنان المريض ما يقدر ينظف أسنانه بالطريقة الصحيحة مما يؤدى الى
تسوسها اكتر مما يؤدى الى مشاكل اكتر في اللثة وقد تؤدى الى فقدان الأسنان
خاصة الأمامية لو كان في ترادف كثير في الأسنان ، فهو علم يتضمن الوظيفة
والصحة والجمال .
مقدم البرنامج :
شكرا
دكتورة شذي ، دكتور عبد الباقي امكن برضو يعنى هذا الحديث الذي ذكرته
دكتورة شذي عايزين ننتقل به مباشرة الى كيف يبدأ أو متين يبدأ عمل اختصاصي
التقويم في هذا التخصص
دكتور/ عبد الباقي عبد القادر :
حقيقة
تقويم الأسنان ذي ما كثير من الناس بيعرفوا دائما بتعمل على الأسنان
الباذقة الىّ هي الدائمة ولكن دا مفهوم ما صحيح مية المية لأنو اخصائى
التقويم أو اختصاصي التقويم بيتدخل حتى في بعض الحالات الىّ هي شقوق سقف
الحلق عند ولادة الطفل الىّ هي بتكون في صعوبة بالغة في تناول الحليب الىّ
هي الرضاعة الطبيعية فبيتدخل اخصائى التقويم مع اخصائى آخر طبعا
مقاطعة من مقدم البرنامج : يعنى منذ الولادة
دكتور/ عبد الباقي عبد القادر :
نعم
منذ الولادة وبعداك لمن تجى الأسنان اللبنية برضو عندنا دور معروف ضمن
التخصص في بعض الأحايين بيكون في تشوهات خلقية منذ الولادة وبعد بذوق
الأسنان اللبنية وبالطبع عندها فترة الأسنان المختلطة بيكون في أسنان
لبنية وفى أسنان دائمة ودي فترة خصبة جدا لتعديل الأسنان واكتشاف برضو
المشاكل ونفتكر انو يفترض الناس تجى في مراحل في الأعمار دي يعنى لمن تكون
الأسنان كلها دائمة ممكن الزول مرات يتأخر شوية لكن ما يتعارض مع انو نعمل
العلاج بس الأفضل انو يتأخر حتى تطلع الأسنان الدائمة كلها وتكتمل

مقدم البرنامج :
طيب
امكن في هذه النقطة أحيانا ذي ما ذكرتوا يعنى الطفل يولد ومرات يقول ليك
والله الطفل دا قوم أسنان اللبن سريع يعنى في أطفال مرات في أربعة شهور
تبتدى الأسنان اللبنية تظهر مرات تكتمل قبل نهاية العام يعنى الأسنان
الكاملة في بعض الأطفال بتتأخر هل دي عندها علاقة يعنى أحيانا دي ممكن
تكون مؤشر أو يعنى هي عندها دلالة أنها قد تكون هناك بعض المشاكل إذا كانت
جات متقدمة أو جات متأخرة خاصة برضو مرات بتقع بدري ذي ما بتقول يعنى
الطفل بكسر سريع نعم
دكتورة/ شذي كمال :

النمو بتاع كل إنسان مختلف عن الأخر يعنى قد يكون عندك في نفس البيت طفلين
واحد بيطلع أول سن في أربعة شهور وواحد ما طلع سن لحدي سنة فكل واحد نحنا
بنقول عليها ساعة زمنية بتاعتوا مختلفة شوية من التانى فدى ما حاجة دائما
بتزعجنا شديد البيزعجنا اكتر انو يكون في سن طلع وأخوه بالجهة التانية
تأخر سته شهور أو سنة دي بنحب يا ريت الأم تنزعج وتجيبوا لاخصائى التقويم
أو اخصائى الأطفال في المرحلة دي كلانا ممكن يعمل شغل لبعض فدى الحته شوية
المزعجة لكن نمو الأسنان قبل مواعيدها أو ككلها أو متأخرة عن مواعيدها أو
انو يوقع الأسنان بدري دي كلها حاجات ما بتزعجنا قدر ما انو في أسنان تنمو
بجهة أو تطلع بجهة والجهة التانية نفس السن يتأخر عن أخوه سته شهور أو
أكثر نحنا بننزعج لأنو قد يكون السن يا إما ما في يا إما تكون في حاجة
عايقاهوا وبالتالي لمن تطلع السن البعدها قد تنيّـل في الحته الفاضية دي
فياريت في الحالات مثل هذه يرجعوا لاخصائى التقويم أو اخصائى الأطفال في
هذا الوقت هو يوريهم أفضل طريقة
مقدم لبرنامج :

امكن السؤال دا نحنا عنينا انو متين بيبدا التقويم يعنى أنا قبيل سألت
دكتور عبد الباقي مرات كتيرة نحنا الأطفال بتتردف أسنانهم ويوقعوا ويقعدوا
من غير أسنان فترة طويلة ومرات بيكسروا بدري وننتظر لمن يكملوا سته أو
سبعة سنوات حتى تقوم باقي الأسنان يعنى ما بنقوم ننتبه لكن مما يصلوا
الأولاد أو البنات سن المرحلة بتاعة المراهقة نبدأ ننزعج ونمشى ندفع
القروش الكتيرة دي لناس التقويم دكتور عبد الباقي متين يعنى يبدأ وشنو
المؤشرات البتخلى الأسر عشان ما ننتظر الزمن دا كله
دكتور/ عبد الباقي عبد القادر :

الحقيقة الموضوع كبير وأنا بفتكر مفروض الناس تكون فاهمة انو ما تمشى
للدكتور بالذات طبيب الأسنان لمن تحس بي انو في مشكلة نحنا بنفتكر انو
الأسرة كل أفرادها صغيرهم وكبيرهم يكون عندهم زيارات دورية لأطباء الأسنان
في منطقتهم ونحنا دائما بنقول كل سته شهور حاجة ذي دي على الأقل مرة في
السنة إذا ما مرتين وهنا بيجى الاكتشاف المبكر للمشكلة كل أطباء الأسنان
ضمن دراستهم بتاعة البكالوريوس بيتخرجوا وعندهم معلومات كافية جدا في تخصص
التقويم يقولوا انو في مشكلة مرتقبة في الحالة دي وهم عندهم حتى إمكانية
أنهم يعالجوا ويتدخلوا بالوقاية والإرشاد وحتى بعض العلاجات في المشاكل
الىّ هي ممكن تتطور وتبقى معقدة في التقويم وإذا كانت الحاجات بعيدة عن
إمكانياتهم أو معرفتهم فانا افتكر انو الحاجات المفترض انو يعملا طبيب
الأسنان العمومي انو يحولها مباشرة الى ذوى الاختصاص وبتالي عمل الفحوصات
اللازمة من كشف سريري أو اشعاعى الى أن يصل الى ماذا نفعل في هذه الحالة
لكن كل المراحل يمكن اكتشافها مبكرا بالكشف الروتيني الىّ هو موصى عليه
انو الناس تمشى الدكتور قبل ما تحس بمشكلة
مقدم البرنامج :
طيب
امكن نحنا بنركز دائما على الوقاية نحنا حا نرجع نتكلم عن العيوب الخلقية
أو المشاكل الممكن تسبب يعنى في ترادف الأسنان ذي ما ذكرت دكتورة شذي قبل
شوية أو انو يعنى يبقى في خلل في شكل الأسنان لكن برضو دايرين نركز على
الوقاية شنو يعنى هل في أحيانا سلوكيات بيعملا الإنسان هل أحيانا في بعض
المشاكل إذا كانت هي مرتبطة بأمراض أو أشياء خاصة عند الأطفال ما بننتبه
لها هي من الممكن أنها تسبب المشاكل دي لقدام
دكتورة/ شذي كمال :

ذي ما قال دكتور عبد الباقي التدخل في الوقت المناسب من أهم الحاجات بس
أضيف نقطة نحنا بنحب نشوف كل الأطفال لو مثلا في وضع مثالي نشوف كل
الأطفال في عمر تسعة سنين بصورة بسيطة جدا جدا بيقدر الطبيب العمومي أو
حتى الاختصاصى بيقدروا يعرفوا وضعيات الأسنان وإحجامها كيف وهل حا تطلع في
حتتها أو لا ويقدر يتدخل في الوقت المناسب لمنع حدوث المشكلة نفسها ،
الحاجة التي سألتى منها حاجة مهمة جدا الىّ هي هل في اى من العادات أو من
الأمراض لها يعنى شيء سالب من التقويم أو هي بتؤدى لحدوث مشاكل تقويم
الأسنان من أهم الحاجات الىّ هي مص الاصبع البنشوفوا عند كتير من أطفالنا
برضو من الأمراض المشاكل بتاعة التنفس فالأطفال البنلقى عندهم دائما مشاكل
بتاعة لحمية أو لوز بتتكرر كتير جدا وبيطروا في هذه الأوقات إنهم يتنفسوا
بفمهم ودي طبعا ما المثالية حتى لمن يكون الطفل نائم بيحاول انو يفتح فمه
طول الوقت عشان يتنفس دا بيؤثر على نمو الفكين وبيؤدى الى انو عضتوا في
النهاية لمن يقفل بيكون ما بيقدر يقفل على اسنانوا يقدر يطبق على اسنانوا
إطباق كويس بيكون ذي ما بيقولوا عليها العضة المفتوحة لقدام شوية أو
الزائدة يعنى بيكون فاتح طول الوقت دي برضو من الحاجات لو اكتشفت بدري
والطبيب تتدخل في الوقت المناسب ما تحتاج بعدين للأجهزة البنشوفا بتاعة
التقويم الشوية غالية في السعر يعنى مثلا عندك قصة مص الاصبع فمص الاصبع
قد يكون من الحاجات البيفتكروها قبل الولادة حاجة طبيعية كتير من الأطفال
البيشوفوهم في بطون امهاتهم بيكونوا يمصوا صباعهم حتى داخل رحم الأم يعنى
لكن مفروض بعد ما يطلع الطفل وانو خلاص يبدأ يرضع من أموا ويبدأ يأكل يبطل
العادة دي لكن بعض الأطفال بيكون فيها ذي راحة نفسية فلحدي سن تلاتة
لأربعة سنين نحنا البيهمنا لحدي الأسنان اللبنية ما تقوم تكون قاعدة ما
بتعمل مشاكل حتى لو انتى كأم شايفة إنها مثلا عامله بروز في الأسنان أو
عاملة مشاكل في الأسنان نحنا بنفتكر انو في الوقت دا يعنى دي ما مشكلة
وبتتصلح من عند نفسها لكن المشكلة تبدأ لو انو مص الاصبع دا لسه استمرا
لحدي ما برزت الأسنان الدائمة الىّ هو تقريبا في عمر ستة سنين نحنا بنقول
عنها لمن الطفل يبدأ يخش المدرسة فلو لسه بيمص صباعه لحدي ما يخش المدرسة
دي بتبدا المشكلة الحقيقة لأنو بعدا كل المشاكل حتى في عظم الفك بتبقى
مشاكل ثابته وما بتتغير إلا بالتقويم قد لقدام لو العمر زاد زيادة الى انو
يحتاج الى جراحة في بعض الأحيان فدى من الحاجات دائما نحنا بنبه انو لعمر
ستة سنين انو الطفل لو ما وقف العادة دي لازم يراجعوا اخصائى التقويم
مقدم البرنامج :
عموما
بنرجع وبنرحب بضيوفنا دكتورة شذي كمال عباس ودكتور عبد الباقي عبد القادر
أهلا مرحب بيكم وما زلنا نتواصل معكم عبر عيادة على الهواء
*** فاصل موسيقى ***
مقدم البرنامج :
مرحبا
أهلا بيكم بنتابع معكم عيادة على الهواء دكتور عبد الباقي حا نرجع مرة
تانية امكن كنا بنتكلم انت قبل شوية ذكرت انو يحدث تدخل اختصاصي التقويم
بعد الولادة مباشرة كشيء ضروري في كثير من الحالات طيب أحيانا بيتعرضوا
الأطفال لبعض المشكلات حتى في الولادات الصعبة يعنى أحيانا بيحصل إلتواء
في الفك أو قد يشفى منه الطفل لقدام لكن بتحس بي انو اسنانوا مايله بجنبه
لو كبر حتى بعد سنوات هل دي ممكن تكون مرتبطة بمشاكل كان الناس ممكن
تتلافاها
دكتور/ عبد الباقي عبد القادر :
في
الحقيقة دي مشاكل واردة جدا انو يحصل أثناء الولادة بالجفط أو بطريقة
معينة يحصل انحراف أو ضغط زائد في واحد من جوانب الفك وبعداك يحصل تغيير
في اتجاه النمو ويصبح انحراف مستمر وطبعا إذا انحرف الفك الىّ هو بيحمل
الأسنان أكيد الأسنان نفسها بيحصل فيها مشكلة فبنلقى انو شكل الزول خارجيا
ما بيكون شكلوا جميل مثلا جنبوا اليمين ما ذي جنبوا الشمال لمن تعاين ليهم
مثلا من قدام في تشويه خلقي واضح الأسنان كذلك الىّ هي بتنمو لاحقا بتكون
القفلة بتاعتا مع الفك المقابل لها بتكون غير طبيعية ودا غير المشاكل
النفسية الممكن يسببا للطفل وأسرته طبعا يعنى مشاكل في المضغ وفى النطق
فنحنا لو اكتشفنا الحاجات دي من بدري على الطفل لو جابوا لينا ممكن نحنا
نتدخل بي اى أجهزة تقويمية نعدل في اتجاه النمو نغير في اتجاهات النمو
وبنسرع جهة على حساب جهة تانية ويحصل تعديل أما إذا الحكاية دي استمرت وما
في كان علاج ففي الغالب بعد ما الزول يكبر يطرأ عشان يعالج نفسو إلا
بعملية جراحية جراحين الأسنان والوجه والفكين على ناس التقويم يقوموا بدور
كبير جدا في الحالات دي للناس الوصلوا مرحلة تعدوا فترة البلوغ وبتكون في
تشوهات كبيرة بتتعمل عملية طبعا مكلفة جدا في الزمن وفى المال ونحنا
بنفتكر انو الحاجات دي من بدري أحسن الناس تكتشفا وتعالجها
مقدم البرنامج :
نحنا
حا نرجع دكتور عبد الباقي لسه يعنى في هذه النقطة وخاصة الناس الواحد تلقى
عندو ضرسوا واجعوا يخليهوا تلاتة أربعة سنين يكون يأكل باتجاه واحد
والأسنان كلها مرات تلقاها إتلفت في حته معينة ودي بتحصل كتير جدا ، بنرحب
بكل المستمعين البيتابعونا وبنأكد لهم انو رقم هاتفنا ( 87553152 ) ونحنا ما زلنا بنتواصل معكم عبر عيادة على الهواء
*** فاصل موسيقى ***
مقدم البرنامج :
أهلا مرحب بيكم دكتور عبد الباقي طيب أحيانا ذي ما أنا قلت ليك مرات الشخص يقلع ضرس أو ضرسين في اتجاه هل دا بيؤثر في رصة الأسنان
دكتور/ عبد الباقي عبد القادر :
طيب
هو قبل ما يؤثر في رصة الأسنان هو طبعا الأسنان ما بتتأثر بالسهولة دي
لأنها عملية بتاخد زمن أثناء تطور الشخص ونموه لكن تأثيره الاساسى بيكون
في كونك تأكل بجهة على حساب جهة لفترة طويلة انو يكون عندك وجع في ضرس أو
تعودت حتى على حاجة ذي دي طبعا ديا بتؤدى الى تراكم الأوساخ في المنطقة
غير المستعملة لأنو مع المضغ بتتحرك العضلات المحيطة بالمنطقة وبتعمل
نظافة الأكل نفسو هو واحد من وسائل النظافة بالمناسبة خاصة أنواع معينة من
الأكل الىّ هو الفيهو ألياف والفواكهة وبعض الخضروات ، فبتحصل التهابات
وبيطر بمرور الزمن الإنسان يفقد بعض الأسنان بسبب الحاجات دي
مقدم البرنامج :
نحنا حا نرجع ليك إنشاء الله دكتور عبد الباقي ودكتورة شذي لكن معانا اتصال الو السلام عليكم
مشاركة عبر الهاتف : عليكم السلام ورحمة الله
مقدم البرنامج : منو معنا
مشاركة عبر الهاتف : معاك عبد الكريم جاد الله من قرية مريحة ريفي بارا
مقدم البرنامج : مرحب بيك أخ عبد الكريم اتفضل
مشاركة عبر الهاتف : أنا عمري 38 سنة لكن عادم الضرس الواحد البأكل بيهو
مقدم البرنامج : كلهم قلعتهم
مشاركة عبر الهاتف : القلعوا قلعوا والمقرقر قاعد لكن نركب الأسنان ولى نعمل شنو
مقدم البرنامج :

عبد الكريم نشوف السادة الأطباء ويمكن يوجهوا ليك بعض الأسئلة ونشوف السبب
شنو ذاتوا زول عمرو 38 سنة قلت الأسنان كلها ولى قلت الأضراس كلها وقعت
شيء وقع وشيء مخليهوا في حتته اتفضلوا
دكتور/ عبد الباقي عبد القادر : السلام عليكم
مشاركة عبر الهاتف : وعليكم السلام
دكتور/ عبد الباقي عبد القادر :
يا سيد عبد الكريم حقيقة نحنا عايزين نعرف وضع الأسنان الحالي شنو يعنى أسى بالضبط
مشاركة عبر الهاتف :
الأسنان القدامية نضيفة أما الضروس فيها ذي تمانية فيها ستة مقلوعة والاتنين تعبانات
دكتور/ عبد الباقي عبد القادر : أيوا دي مقلوعة كلها في جانب واحد

مشاركة عبر الهاتف :
طبيب الأسنان قال لي ركب أسنان والضرس الواحد يكلف 120 جنيه
دكتور/ عبد الباقي عبد القادر :
طيب
هو طبعا أخ عبد الكريم دي المشكلة الىّ هي نحنا بنقول درهم وقاية خير من
قنطار علاج دي بتنطبق علينا حرفيا في مجال الأسنان ، انت كان من الأول
إلتزمت ببعض التعليمات في الوقاية والمحافظة ما كان وصلت المرحلة دي طبعا
حا نحاول نحل ليك مشكلتك لكن نحنا لازم نشير الى سبب المشكلة وبعداك نشوف
حلها عشان ما تتكرر لأنو إذا الواحد يعنى أهمل حتى في اسنانوا الطبيعية
وباظت بعدين برضو الحاجات الحا تجى تركبا في النهاية أقل درجة من الشيء
الطبيعي مهما كانت كفاءتها بالنسبة لك انت طبعا على وجه الخصوص مفروض
أسنانك الموجودة كلها تكشف كشف سريري يعنى على كرسي الأسنان تتشاف وتتفحص
بطريقة كويسة جدا ويتعمل أشعة ويشوف امكانات المحافظة على قدر الامكان حتى
لو اطر الأمر انو نعمل حاجة اسمها علاج الجذور أو صاحب العصب لو كلموك بها
أو سمعت به الىّ هي الضرس لمن يصل فيه السوس مرحلة متقدمة ويصل مرحلة
بتاعة الألم البيحميك النوم ويحصل ورم لازم تعمل حاجة اسمها علاج الجذور
ويتحشى الضرس ويبقى طبيعي كأن لم تكن هناك مشكلة بعداك بنعيد صياغة
الأسنان الىّ هي الما موجودة دي ويتعمل تركيب بأنواع متعددة بداية
بالتركيب المتحرك إذا عدد كبير من الأسنان المفقودة بس هي فعلا بتاخد زمن
طويل أول حاجة الزمن دا أهم من القروش انت لو عندك زمن ما بتكون في مشكلة
لأنو العلاج متاح في كتير من المرافق الموجودة حتى عندنا في كلية الأسنان
وبأسعار امكن غير قابلة للمنافسة أبدا انت فعلا لو مشيت العيادات فعلا حا
تلقاها غالية لكن لو جيتنا في الكلية كلية الأسنان جامعة الخرطوم نحنا
بنوجهك التوجيه السليم وفى أقسام متخصصة حا تتناول الأقسام كل واحد بيعمل
مهمته وبتكون في عناية أنا افتكر عناية متميزة جدا لأنو ما بيعالجك فرد
واحد بتعالجك مجموعة من المتخصصين بمختلف التخصصات
مقدم البرنامج :
نعم
يا عبد الكريم نحنا بنتمنى ليك الصحة والعافية وذي ما قال ليك دكتور عبد
الباقي الوقاية هي خير من العلاج لكن انت برضو ممكن تتصل بينا في اى وقت
إنشاء الله عبر العيادة وإنشاء الله نحولك للإخوة الأطباء مشكورين بكلية
طب الأسنان جامعة الخرطوم شكرا جزيلا
*** فاصل موسيقى ***
مقدم البرنامج :
نرجع
دكتورة شذي كمال امكن الحديث الذي ذكره دكتور عبد الباقي قبل شوية انو
أصبحت الآن متوفرة يعنى وسائل التقويم مرات بنلقى في حاجات مختلفة حاجات
حديد مركب مرات بنلقى ذي أسلاك يعنى الى اى مدى أمنية هذه الوسائل أو
الأساليب المتبعة في التقويم وهل بتختلف في مدتها بتتراوح ناس بنلقاهم
سنوات هم ما زالوا في المسألة بتاعة التقويم مرات في ناس دايرين يدخلوا
ليهم فكهم برا ومرات في ناس دايرين يطلعوا رصة الأسنان مرات برا ومرات لي
جوه المسألة دي لي اى مدى ممكن تكون بقت آمنة أو مضمونة النتائج
دكتورة/ شذي كمال :
نحنا
دائما بنقول النتائج لأنو دائما بيكون في دراسة وافيه وخطة علاج شاملة
دائما النتائج بنتوقع إنها تكون جيدة جدا لو ما كانت ممتازة ، وعن أنواع
أجهزة التقويم مختلفة بتبدا من أجهزة التقويم الىّ هي بتكون حافظة
للمسافات عند خلع الأضراس مثلا اللبنية ما بنحب الأسنان التانية تزح
لمحلها عشان دا بيؤثر بعدين في الأسنان الدائمة ، في أجهزة بتاعة تقويم
وظيفية ودي شكلها شوية كبير بيلبسوها دائما الأطفال لمدة تتراوح من سنة
الى سنة ونص ، في أجهزة بعداك المتحركة دي برضها ذات فاعلية يعنى دائما
بفتكر انو عندها فاعليتها محدودة لكن بنستخدمها في أوقات كتيرة ما بتكون
ظاهرة كتير شكلها ، وفى جهاز التقويم الحسي بقى يعنى بتشوفي اغلب الناس
لابسنوا كحديد ملصق في الأسنان دا برضو بيجى بأنواع متعددة منها الحديد دا
ومنها أنواع بتاعة سراميك الىّ هي بتكون لونها ابيض كلون الأسنان وحتى
واحدين لونهم ذي لون الزجاج شفاف ما ممكن تشوفيهوا وما تقدري تعرفي انو
الإنسان لابس جهاز تقويم أو لا وكمان في بعضها ممكن يتركب بالجهة الداخلية
على اللسان ما بتقدرى تشوفي حتى انو في جهاز تقويم ودا هو دائما بيعملوهوا
مذيعين التلفزيون والممثلين عشان ما يكون شكلهم غريب طبعا جهاز التقويم
شوية مزعج وبيكون في شكل غريب وبيكون شكل الإنسان غريب شوية
مقدم البرنامج :
نحنا حا نرجع امكن للمسألة دي تانى برضو نشوف رأى دكتور عبد الباقي بس معانا اتصال الآن الو السلام عليكم
مشاركة عبر الهاتف : عليكم السلام والرحمة
مقدم البرنامج : أهلا بيك يا ستى مرحبا منو معانا
مشاركة عبر الهاتف : معاك عجبت عبد الولي من كرري
مقدم البرنامج : أهلا بيك أخت عجبت اتفضلى
مشاركة عبر الهاتف :
بسأل الدكتور طبعا أنا اسنانى لمن اتسوك بتنزف دم وما فيها اى ألم دا في أثناء السواك
مقدم البرنامج : يعنى أثناء السواك بتحسى انو في دم
مشاركة عبر الهاتف : أيوا
مقدم البرنامج :
عمرك كم يا عجبت وخليك معانا امكن الدكاترة يوجهوا ليك بعض الأسئلة وبعدين نسمع نصيحتهم
مشاركة عبر الهاتف : عمري 18 سنة
مقدم البرنامج : والمشكلة دي ليها كم سنة يعنى أسنانك بتنزف دم
مشاركة عبر الهاتف : والله طولت
مقدم البرنامج : اتفضلى دكتورة

دكتورة/ شذي كمال :
الأخت
عجبت مرات التحولات الهرمونية عند النساء تؤدى لي مثل هذا النزيف عند
السواك لكن برضو دا له علاقة كبيرة جدا بالنظافة حول الانسجة ما حول
الأسنان وأحسن حاجة انتى تعمليها ذي ما بيقولوا الوقاية خير من العلاج
نحنا برضو ما بنقدر نقيم الحالة مية في المية لحدي ما نشوف الحاصل شنو
فاخصائى اللثة دائما هو أحسن واحد يقدر يوريك الحاجة دي إذا كانت محتاجة
لمعالجة تانية أو فقط تغيري في طريقة نظافتك لأسنانك ونرجع تانى نقول
بزيارة بسيطة ليكى لطبيب الأسنان في اقرب مكان جنبك أو حتى لو بتجينا نحنا
في الكلية بتاعة طب الأسنان من السهولة جدا انو يراجعك اخصائى اللثة لكن
قد تكون حاجة طبيعية نسبة لتغير الهرمونات في هذا السن
مقدم البرنامج : في إضافة دكتور عبد الباقي
دكتور/ عبد الباقي عبد القادر :
لا
بس في أهم حاجة هي انو في الأعمار دي بتكون في تغيرات هرمونية مصاحبة
ونحنا ننصحك في الوقت دا لحدي ما تصلى إنشاء الله انك تحافظي على انك
تنظفي أسنانك بفرشاة ناعمة غير خشنة ما اقل من مرتين في اليوم بالذات قبل
النوم ذي ما دائما بننصح وبننصحك برضو لحدي ما تصلى اقرب دكتور تعملي
مضمضة بموية دافئة فيها شوية ملح إذا ما قدرتي تستطيعي تحصلي على مضمضة
طبية من اى صيدلية وبعداك إذا شوفتى الحاجة دي ما ماشه لقدام بسهولة ذي ما
قالت ليك دكتورة شذي تجينا في الكلية أو اقرب طبيب جنبك حا يساعدك إنشاء
الله
مقدم البرنامج :
شكرا
عجبت نحنا نتمنى انو تكوني استمعتى لهذه النصائح وذي ما ذكرتوا مسألة
النظافة مرات كتيرة يا إما بنسرف يعنى الفرشاة قوية جدا ونبتدى نتعامل مع
الأسنان بقسوة بدعوى إننا حا ننظفها حتى لو لونها فيهو تغيير وأحيان كتيرة
بتسبب في خدوش في اللثة هل أحيانا مسألة النظافة بتؤثر في شكل الأسنان أو
تعمل لينا اى فرقات بين اللثة والأسنان نعم
دكتورة/ شذي كمال :
نحنا
دائما بننصح انو نظافة الأسنان تتم بفرشاة ناعمة أو متوسطة النعومة والقصة
ما بالقوة هي القصة بالوقت يعنى الواحد يصرف وقت في تسويك الأسنان فنحنا
دائما بننصح بالذات الأطفال لأنهم دائما مستعجلين وعايزين يخلصوا سريع
بنقول ليهم يضعوا ساعة أو أمهم تكون ماسكة ساعة دا في وقت التدريب ،
السواك ما لازم يقل عن دقيقتين ، 120 ثانية دي اقل شيء عشان تقدري تنظفي
كل الأسنان من كل الجهات يعنى الدراسات كلها وجدت انو ما ممكن تعمليها في
اقل من دقيقتين فدائما انتى في الأول بتعتادى تمسكي الساعة لولدك أو هو
يمسكها لكن بعداك بتبقى حاجة اتومتيكية يعنى هو بيصرف فيها وقت يعنى الوقت
دا خلاص ذي ما هو بيستحمى في الوقت دا حا ياخد الوقت دا في السواك فدى
حاجة ذي ما بيقولوا الزول بيتعلما وعدم نظافة الأسنان تؤثر في صحة اللثة
والأنسجة المحيطة بالأسنان وإذا تأثرت بالصحة بتاعة الانسجة المحيطة
بالأسنان فالأسنان قاعدة في اللثة وقاعدة في العظم واللثة حولين الأسنان
دي فلو بدت دي تتأثر وتنزل لي تحت فعلا حا تبدأ الأسنان تتفرق وتطلع لبرا
لأنو ما في حاجة ماسكاها فكل الحاجات بتاعة الأسنان مرتبطة ببعضها ارتباط
وثيق وشديد جدا جدا نرجع نقول انو نظافة الأسنان مهمة جدا جدا للصحة
وللوظيفة وللجمال
مقدم البرنامج : نحنا معانا اتصال الو السلام عليكم
مشاركة عبر الهاتف : عليكم السلام معاك محمد حسن
مقدم البرنامج : مرحبا أخ محمد حسن
مشاركة عبر الهاتف :
أنا
بقول للدكتور الفك التحت بتاع الغضروف التحت دا ما بستحمل حاجة باردة ولا
حاجة ساخنة بعدين ما في اى سوسه وما في اى أعراض يعنى ذي نظام الكهرباء
لمن تشرب ليك حاجة ساخنة ولى حاجة باردة
مقدم البرنامج : يعنى حساسية يعنى بتحس بحساسية في أسنانك ذي الكهرباء
مشاركة عبر الهاتف :
يعنى موية باردة شديد ما يستحملا حاجة ساخنة ما يستحملا يعنى ما فيهو اى سوسة ولا اى شيء
مقدم البرنامج : اتفضل دكتور
دكتور/ عبد الباقي عبد القادر :
طيب
أخ محمد حسن امكن دي تكملة إذا كنت بتسمع للبرنامج من الأول في انو شرط
نتكلم عن استعمال الفرشاة الخشنة لفترة طويلة بطريقة أفقية أو بطريقة
واحدة وبعنف كمان دا مرات وبعض المعاجين كمان فيها خشونة زائدة ممكن تؤدى
الى تأكل الطبقات الواقية بتاعة الأسنان أسى أسنانك دي مكونة من طبقات
طبقة أولى وتانية لحدي ما تصل مرحلة العصب جوه المنطقة الأكثر حاجة بتكون
حساسة في الغالب هي منطقة التقاء السنه باللثة ويسموها (عمق الأسنان
) دي مع الفرشاة لفترة طويلة أو لفترة قصيرة كأنك انت ماسك ليك منشار لكن
ميت شوية وبزمن طويل تتأكل المنطقة دي وتتزال الطبقات الواقية دي وطوالى
تحصل ليك الحاجة ذي الكهرباء دي وانت لو فتشت في أسنانك بظفرك وهبشتا
بتلقي في ذي حفرة أو شق في المنطقة احتمال تلقى الحاجة دي ودا بالمناسبة
الفلاسفة بيمشوا فيهو لحل لحدي ما السن ممكن تتكسر ذي الزول بينشر ليهو في
ساق شجرة لحدي ما تقع كلها لكن في احتمالات تانى طبعا واردة انت لمن تعاين
في فمك وما تلقى سوس ما معناتا مافى سوس ودي حاجة ما بتقدر تحددها انت
لأنو السوس في بداياته وبالذات في المناطق المخفية ما بين السن والسن ما
بتكون ظاهرة حتى الطبيب ذاتوا بالعين ما بيقدر يشوفا مهما عاين إلا يطر
يعمل صورة بتاعة أشعة ومرات برضو التهاب اللثة يؤثر فأنت عندك عدة أسباب
محتملة ودي طبعا عشان تعرف السبب شنو برضو ننصحك بالزيارة لأقرب طبيب ليك
أو تجينا مرحب بيك وحبابك عشرة في كلية الأسنان جامعة الخرطوم في اى وقت
نحنا ممكن نستقبلك خلال ساعات الدوام الرسمية

مقدم البرنامج :
إنشاء
الله محمد حسن نحنا بنتمنى ليك الصحة والعافية وبرضو بنقول لكل المستمعين
البيتابعونا نحنا ما زلنا معكم عبر عيادة على الهواء وبنذكركم برقم هاتفنا
( 87553152 ) وتذكروا حدود البرنامج العاشرة بمشيئة الله
*** فاصل موسيقى ***
مقدم البرنامج :
مرحبا
أهلا بكم أيها الأصدقاء وما زلنا بنتواصل معكم عبر عيادة على الهواء هذا
المساء ضيوف العيادة دكتورة / شذي كمال عباس وأيضا دكتور/ عبد الباقي عبد
القادر الزبير نحنا بنرحب بهم مرة تانية والحقيقة امكن عايزين ننتقل لنقطة
مهمة جدا أنا قبيل لمن قلت انو يعنى الناس أو الإنسان دا أصلا هو في تخوف
من الدكتور بتاع الأسنان لأنو مسألة علاج الأسنان دي مسألة صعبة يعنى
الزول مرات أخير يعصر على وجع السن لمن خلاص يصل مرحلة ما يقدر معها يتحمل
حتى يمشى متين بيصبح التقويم كواحدة من هذه التخصصات مهم مرات كتيرة بننظر
ليها مسألة طرفية مسألة جمالية بالرغم من أهميتها لكن في اغلب الأحايين
إلا زول يعنى براهوا يصر على المسألة أو تكون بنات في مرحلة عمرية وقبيل
ذي ما ذكرت دكتورة شذي ناس بترتبط مهنهم بالمسألة لكن هل هو في كل الأحوال
يعنى هو مسالة مرتبطة بالنواحي الجمالية ولى أحيانا بيصبح ضرورة علاجية
نعم
دكتور/ عبد الباقي عبد القادر :

حقيقة التقويم يعنى حرفيا لمن نجى نعرفه هو العلم الذي يختص باكتشاف
والتعرف على المشاكل التي تتعلق بالفم والأسنان ذي ما بتثقل الوظيفة
بتاعتا كل الوظائف بتاعتا الىّ هي من بينها المضغ والنطق ومنها الجمال
طبعا بشكل الأسنان لمن تكون مصفوفة وافتكر من الحاجات الجميلة ذكروها
الشعراء انو المسألة تكون مرصوصة
مقاطعة من مقدم البرنامج : وعضت على العناب بالبرد
دكتور/ عبد الباقي عبد القادر :

أيوا حاجات ذي دي فنحنا كتير من الأحيان بيجونا ناس يعنى ما قادرين حتى
يخشوا في الحياة الاجتماعية بصورة قوية إذا كانت أسنانهم متشوهه في وضعها
وفى شكلها فالتقويم هنا بيحل لينا مشكلة كبيرة جدا هي المشكلة النفسية
الىّ هي مشاكل الناس حتى في بلدنا السودان ما عاملين لها حساب كبير يعنى
الزول لمن يقول أسى نفسياتك كويسة بتشتغل كويس والناس يتقبلوك بطريقة
كويسة ويكون أداءك كلوا بيكون ممتاز فنحنا بنساعد في النقطة دي الحاجة
الثانية الوظائف بتاعة الأسنان ما يختص بنطق الحروف والمضغ طبعا الطحن
الجيد للأكل انتى عارفه في بعض الناس ما بتقدر تأكل مثلا حبة تسالية مع
انو أنا ما عارف مغذى قدر شنو وفيهو أضراره لكن ما يقدر يقطعها لأنو
اسنانوا مثلا عندو حاجة اسمها عضه أمامية مفتوحة يعنى الأضراس بس هي
البتلتقى والأسنان من النائب الى النائب ما بيلتقوا يعنى هو يفتح فموا
تلقى لسانوا طوالى في النص فاتح بينهم فدا عيب كبير الىّ هو وظيفة الأسنان
الىّ هي قطع الطعام ثم بعد ذلك مضغه ثم بعداك يجى برا الىّ هي واحدة من
الأساسيات الهضم التي يقوم بها الوظيفة في الفم وخلطوا باللعاب تكون
معدومة ما بيقدر يقطع وعليها ممكن الناس تقيس فالتقويم جزء كبير لا يتجزأ
من الحاجات فالمفترض تكون الأبعاد البيشتغل فيها تكون كبيرة جدا اكتر من
النطاق الضيق الىّ هو محصور في حكاية تقول ليهو تنظف أو كدا
مقدم البرنامج :

أحيانا الحوادث يعنى يحصل للشخص حادث يفقد سنين تلاتة إذا كان هو لسه في
المرحلة العمرية المابتسمح ليهو انو تقوم اسنانوا ودي بتحصل كتير بنلقاهم
يا إما اتلصقوا على بعض أو طلعوا يعنى المشكلة ما بتكون في الفك كله أو في
الرصة بتاعة الأسنان كلها هل دي في إمكانية مثلا الى تعديلها أو في بعض
الناس كتير يتخوفوا من إنها هي يقول ليك إنها تنقلع من الأول
دكتورة/ شذي كمال :
دائما
بتقولى مثلا يحصل حادث والسن تنقلع برضو في الأوقات ذي دي نحنا بنحب الحته
حتى لو كانت الأسنان لبنية يعنى لازم طبيب أسنان عمومي أو اخصائى يشوفا لو
هي محتاجة فعلا الحته دي تتمسك عشان الأسنان التانية ما تزح في مكانها
لأنو بعداك بيصعب ترجيعها عشان الأسنان الدائمة ترجع في مكانها أو لو كانت
الأسنان الدائمة هي حصل ليها وقوع لحدي ما العمر يسمح بي انو يحصل ليهو
زراعة يعنى المصاب يزرعوا ليهو أسنان أو يتركب لازم يكون في حافظ للمسافات
مقدم البرنامج : يعنى بتوضع دعامات
دكتورة/ شذي كمال :

يعنى في أشكال كتيرة من حافظي المسافات حتى بعضها الأسنان الأمامية تكون
غير مرئية يعنى ما بتقدرى تشوفيها من برا لكن لازم يراجع من قبل الطبيب
مقدم البرنامج :
نرجع
لموضوعنا ذي ما ذكرتوا قبيل انو أحيانا يعنى المسألة شكل الوجه ولى الفكين
بتكون ذي حاجة هي شكل اسر يعنى الزول بيشبه أهلوا بيكون شكل فكهم كدا إذا
كان بارز لقدام أو في الرصة بتاعة الأسنان أو اياً كان شكلها فهل المسألة
بتاعة التقويم دي أو المسألة بتاعة لخبطة الأسنان أو الفك مرتبطة يعنى
عندها عوامل وراثية هل هناك اى مشاكل ممكن تكون عندها علاقة بعظام الإنسان
بتؤثر على شكل الأسنان أو رصتها أو كثافتها أو قيامها قبل كدا الأخوان
بيشيروا انو معانا اتصال الو السلام عليكم
مشاركة عبر الهاتف : عليكم السلام والرحمة
مقدم البرنامج : أهلا بيك يا سيدي مرحبا منو معانا
مشاركة عبر الهاتف : معاك محمد عمر من القضارف
مقدم البرنامج : أهلا بيك أخ محمد عمر اتفضل
مشاركة عبر الهاتف :

الحقيقة أنا عندي مشكلة في السن يعنى السن دي اتقرقرت وانكسرت وخلت بواقي
بالجنبه فأسى الجنبه دي تلاتة سنين ما قاعد أكل بها وبأكل بالجنبه التانية

مقدم البرنامج : الضرس يعنى اتقرقر يا محمد عمر
مشاركة عبر الهاتف : أيوا الضرس داير أشوف نصيحة الدكتور لي شنو

مقدم البرنامج :
شكرا
يا محمد عمر ، امكن دا السؤال الذكرناهوا قبيل يا دكتور يعنى مرات الزول
يقعد ما بس تلاتة سنين ذي محمد عمر أنا شخصيا ممكن عشرة سنين استحمل أعطل
جانب تماما نعم
دك