قصيدة دار جعل

موضوع: قصيدة دار جعل الخميس أكتوبر 22, 2009 2:25 am

هذه القصيدة الرائعة كتبها الشاعر الفذ والفنان الفرجوني وألقاها في حفل تكريم الشاعر يوسف البنا بنادي النقعة بالخرطوم والذي نظمه ابناء ولاية نهر النيل بالخرطوم.

ساس العروبة وعزها ... شندي ومتمة دار جعل
صالب السيوف ما بحزها ... شندي ومتمة دار جعل
القال قبيلتي بهزها ... بلقالو قول في دار جعل
شم الجبال ما بلزها ... قول الشقي الحاسد جعل
**
سحب السحاب وكتين يشيل ... شاف الكرم في دار جعل
برق البروق وكتين يكيل ... عاجبو الكرم في دار جعل
مطر المطور وكتين يسيل ... في الجود بقارب لـ جعل
نيل السما البنزل بهيل ... أجواد وما بلحق جعل
**
أسألني ما بسأل طفيق ... من التواريخ في جعل
لوك الصبر ما تكون شفيق ... واسمع غناي فوق دار جعل
سند الرهيف عون الرفيق ... نعم الأرابيب في جعل
أكرم من المطر الدفيق ... شندي ومتمة دار جعل

أسألني ما تسأل بلاي ... من المتمة ودار جعل
وأصبر لي واتصنت غناي ... فوق المتمة ودار جعل
أهلي وسبب عزي وبناي ... نعم الأرابيب في جعل
حاقين تواريخي وثناي ... شندي ومتمة دار جعل
**
جبل الضرا القصدو الهميل ... شندي ومتمة دار جعل
سند الصفوف وكتين تميل ... شندي ومتمة دار جعل
الدبرح الكرم الشميل ... شندي ومتمة دار جعل
الباشا ردولو الجميل ... في شندي فرسان دار جعل
**
نمر العزيز الما أنكري ... مك المكوك في دار جعل
شب الجمر متل الشرا ... شهدتّلو اجمع دار جعل
الباشا بعد الإزدرا ... شاف الوجع في دار جعل
لي مصر تلغراف سرا ... حرقوهو فرسان دار جعل
**
الباشا مقطوع الطرا ... ما اتملي في عزة جعل
مسّخ طلِعتو وكتّرا ... ما اتأمل العز في جعل
خلفولو فوق بيعتو الشرا ... في شندي فرسان دار جعل
ورّوهو معني الافترا ... وشمخو الارابيب في جعل

نمر النبيه المو بليد ... مك المكوك في دار جعل
حرّقلك الباشا الغليد ... وطّاهو نيران دار جعل
رايو الهميم مو راي وليد ... عرف البتقصد دار جعل
رحّل قبيلتو صبح بعيد ... سلم عوايل دار جعل
**
نمر النبيه صاحب العرف ... يا نعم ارباب دار جعل
ما بلملم الراي من طرف ... يا نعم ارباب دار جعل
رحّـل قبيلتو من الهرف ... يا نعم ارباب دار جعل
سلـّم عقاب اهل الشرف ... يا نعم ارباب دار جعل
**
نمر اب كتالاً مو هدد ... عاجبني ارباب دار جعل
ما برضي بالذلة ام قدد ... عاجبني ارباب دار جعل
إستهوش اب لوتاً خدد ... نمر النمور في دار جعل
ضوّق خدوينا الغدد ... حرّقلو كبدو نمر جعل
**
ضاق الخديوي النار شديد ... قلبو انحرق في دار جعل
قال للترك شيلو الحديد ... ما تخلو زول في دار جعل
كان في القبايل قام نديد ... شال شيلتو زي ارباب جعل
كان حرّروها الدار جديد ... قدامهم المك مك جعل

جات الالوف جارّة العُدد ... طالباها تار في دار جعل
وابن القبايل بالمدد ... ما تممن سطوة جعل
كان في الديار صابر مدد ... زي منية الحاسدين جعل
كانت قبيلتو تروح بدد ... واتهنو حساد دار جعل
**
نمر الضرا أب كفاً بصول ... أرباب ارابيب دار جعل
عرّف الباشا الفصول ... ورّاهو ليل عزة جعل
درس السياسة علي الاصول ... قدّر سلامة دار جعل
والهجرة للغالي الرسول ... جازت وجازت لي جعل
**
شمس النهار الفي السما ... بغرانة من عزة جعل
وصافي الحديد وكتين حما ... مين البفرتقو غير جعل
بحر الروا المهل الضما ... شندي ومتمة دار جعل
جعل الحما ونعم الحما ... شندي ومتمة دار جعل

خلي التواريخ الزمان ... واسمع غناي فوق دار جعل
واصبر لي بشرحلك كمان ... ما عز يعز فوق عز جعل
الضمة والضي والضمان ... مجموعة جمعاً في جعل
والعفة والحيا والأمان ... فيهم طبيعة عيال جعل
**
قول لقبيلات الشمت ... ما فيكم البلحق جعل
عينكم من الواجب عمت ... ما صلتو زي صولة جعل
شمخت قبيلتي وما انقمت ... وأبت المهانة ديار جعل
والنار علي اسماعيل حمت ... والمك شمخ في دار جعل
**
قول للجحود خاين الوطن ... منكر تواريخ دار جعل
تركاوي بلسانك رطن ... كونو الترك كارهين جعل
رقدن طبايعك بيك بطَن ... ما عرفن فوت دار جعل
نمر العزيز صاحب الفطن ... عَز الوطن في دار جعل

والله كلام يخلي الزول يتب من كرسي
القاعد فيهو ,الزول دة وصف وصف جد
وليك التحية ياودالعاص

بالجد الفرجوني ما قصر في مدح دار جعل ربنا يديو الصحة والعافية ومشكور اخي ود العمدة علي المرور الطيب

الفرجوني عزاءنا بالمدح ماقصر تب
ابشربالخير ياودالعاص

صحي والله يا سوط العنج .. ابشر

لك التحية ود العاص وأنت تتحف المنتدي بهذه الروعه والتحية للشاعر الفذ الفرجوني وهو يمدح دار جعل ورمز دار جعل المك نمر

مشكور ود العاص لك التحية وللفنان الفرجوني
ماقصر تب في حق دار جعل

مشكورين الرازي ومرافئ علي المرور وحقيقة كل ما اقرأ هذه القصيدة اشعر بالفخر لانتمائي لهذه القبيلة العريقة.

ودالعاص
تسلم والله شكرك ما بقيسو الفم
لك الف تحية

الله يسلمك يا سوط العنج والف شكر ليك

» قصيدة اعجبتنى
» قصيدة الليث بن فار الغضنفري
» قصيدة الاصمعي - صوت صفير البلبل