يازمن لوحة من الزمن الجميل

يا زمن وقف شوية
يا زمن أرحم شوية
أهدى لى لحظات هنية
وبعدها وبعدها
شيل باقى عمرى
شيل شبابى
شيل عينى
يا عينى
يا زمن رفقا بحالى
بى حبيب عمرى عمرى المثالى
بى سعادتو بى حنانو
بى شرودى وإنشغالى
بى أحاسيسو ومشاعروا
وكل خاطر فى خيالى
يا زمن وقف شوية
يا زمن أرحم شوية
أهدى لى لحظات هنية
وبعدها
شيل باقى عمرى
يا زمن أرحم حبايب
لسه فى عمر الزهور
جود عليهم قبل ما
تمشى وتمر
يا زمن يا زمن
إنت جايى فى النهاية
جايى ما عارف الحكاية
جايى فى النهاية
جايى ما عارف البداية
يا زمن

رحم الله الأستاذ المطرب والفنان والرجل الشيك الذى تميز بهندامه وشكله المميزين وطيب الله ثراه بما طيب به النفوس وشنف به الاذان بعزوبه الحانه وصوته المميز والفريد فى زمن كان يتغنى فيه الناس للكلمه
رحمه الله ومطربى بلادى الذين تغنوا معه للكلمه أمثال عثمان حسين وابو داؤود والكاشف وغيرهم عسى أن لا تسع الصفحه لذكرهم

وتشكر الاستاذ والوالد قزقزعلى هذه المساحه والنافذه الجميله

وتقبل مرورى أم شفيف الروح

تشكر ياغالي--

الفنان الذري ابراهيم عوض :

اولا اهديك ولكل محبي فنه باقة من اغنياته ثم اعرج لسيرته الذاتية ..........
------------------------------------------------------------

عزيز دنياي

كنت معاك سعيد الليلة في بعدك ما أضناني
اصبر يمكن يفيد صبري ويمكن نرجع تاني
خايف الناس تغريك تنسي دموعي وتنسي حناني
وافضل مخلص ليك لو حتى سعادتك في حرماني
واضحي بزهرة عمري
علشان ما تعيش طول عمري هاني
بوري حقيقة أمري
عرفت الحب من قبلك وانت الحب العاش في كياني
بهرب منك لرضاك وبحاول من أجلك أنساك
أمهد ليك تتخلص مني القي خطاي تجمعني معاك
ولو تعرف عايش على عطفك وكل حياتي من أملاكك
بتعرف في دنيا غيابك يساوي سنين في دنيا هناك
يا اعز عزيز في دنياي أنا طامع ابقي عزيز دنياك

-----------------------------

لو داير تسيبنا

لو داير تسيبنا جرب وانت سيبنا
لو داير تحب حب وانساه ريدنا
يوم ترجع تصافى نسامحك يا حبيبنا
** **** **
يا عايش فى دنيا من اوهام خيالك
يا تاعب ضميرك وما رتيان لحالك
روق ..وهدى بالك وما تودر شبابك
رفقا بقلوبنا
ورفقا بحياتك
** *** **
لو حنيت لقربى او جافيت مذاهب
لو فارقت دربى
هواك فى دماى جارى
يكبر ويبقي قصه.. ارويها لصغارى
نعيش ونموت عليها
ويقولو غرام مثالى
** *** **
انت غرامى عارفه
غرام محراب وراهب
غرامى اخترته مذهب من اسمى المذاهب
ينور لى طريقى .. ويفتح لى مواهب
اشوف املى فى جزيرة
وحبك لى قارب

----------------------------------------------------------------------------------

أبقى ظالم أبقى قاسى

ابقى ظالم ابقى قاسى ابقى ناكر ابقى ناسى
تلقى حبك فى عيونى ونغمة فى رعشة حواسى
فى غرورك زيد وكتر وانا متحمل وصابر
يمكن الأيام تجيبك تطلب الغفران يا هاجر
يا حبيبى الدنيا دائما فيها دمعة وابتسامه
غيب وخلى الشوق يعذب وسيبنا فى بعدك يتامه
وخلى اعماق قلوبنا رعشة للحب والجمال
ياحنون ابدا جمالك ماخطر فى يوم ببال
فى النفوس اعماق خفيه تجمع ارواح الحبايب
تجمعهم مرات فى بسمة ومرة فى ليل نجمه غايب .

-------------------------------------------------------------------------

اعاهدك
اعاهدك احلف احفظ عهدك
ابدا" مابحب تانى من بعدك
اعاهدك بالحب وارعى عهودى
اعاتبك بالدمعة الفى خدودى
اصلك لابتحس ولاحتى بتشعر بوجودى
اسهر فى غيابك وابكى كتير
واحمل همى وهمك وهموم الغير
تجهل حبى وانا حبى ليك اول واخير
اظهر اخلاصك كلمنى
قالو ايه الناس قالو ليك عنى
انا لو كل الناس بقو عزالى
قول الناس مابى إثر فينى

-------------------------------------------------------------------------------

أبيت الناس

أبيت الناس وابيت خلانى خاصمت الكل علشان حبانى
قلبك حنين على قاسى للناس بتلين وانا لى ناسى
لكن لى متين جارح احساسى صابر متحمل اذاك ياجافى
انا بالدموع ودعتا حبى وبالامل صبرتو قلبى
والصبر طال كتمتا غلبى ورضيت بالهم والهم ابانى
قطارو اتحرك شويه شويه من بعيد بايدو شوفتو لوح لى
بكت عينهو بكت عينيا ده حكمك يا اغلى يقوى على
ابيت الناس ابيت خلانى خاصمت الكل علشان حبانى

---------------------------------------------------------------------------

جرحى الاليم

جرحي الأليم الشايلو تذكار
طول حياتي أسى وهموم
جرحي الدفين العذبك يا قلبي
طول عمرك أنين
داريتو في الأعماق سنين
غنيتو للعشاق حنين
شكوى وشجون
غنيتو أصدق أغنيات
أصبح مجرد ذكريات
وين الصلات وين الشموع
الفي دروبنا منورات
وبقت هموم
أصلو القلوب الهايمة تعبد في الجمال
بتضيع سنينها الحلوة بالريد إبتهال
ولهانة تحكم بالوصال
مسكينة تحلم بالمحال
لي متين بتبني قصور رمال
ما كفاية يا قلبي الجمال
خلاك تذوب شكوى وسهر
ودر شباب عمرك هدر
شال النضال الكان مفرهد ومزدهر
خلا الشقا وخلا اليباب
الكل ثانية بعيشو لحظات من سراب
أحسو في روحي أقترب
أحسو شوق وشقا وعذاب
نار في الضلوع وجرح أليم

--------------------------------------------------------------------------------------------------

عزيز دنياى

كنت معاك سعيد والليل في بعدك ما اضناني
اصبر امكن يفيد صبري وامكن نرجع تاني
خايف الناس تنسي دموعي وتنسي حناني
وافضل مخلص ليك لو حتي سعادتك في حرماني
واضحي بزهرة عمري علشان ما تعيش طول عمرك هاني
واستشهد بي الحاني واوري حقيقة امري
عرفتا الحب من قبلك مره وانتي الحب العاش في كياني
بهرب منك لرضاك وبحاول من اجلك انساك
وامهد ليك تتخلص مني القي خطاي تجمعني معاك
لو تعرف عايش علي عطفك وكل حياتي من اجلك
بتعرف يوم في دنيا غيابك تساوي سنين في دنيا هناك
يا اعز عزيز في دنياي انا طامع ابقي عزيز دنياك

--------------------------------------------------------------------------------------------

الم الفراق - إبراهيم عوض

يوم الحبيب ودعني راح
ضاعف علي الم الجراح
كان لي أمل أجد انشراح
واجد مع المحبوب صراح
أحكي الم الفراق واشكي
لي مين أنا احكي

يا روحي ما هذا الصدود
وأنا دمعي جاري على الخدود
لو كان قليل خليك ودود
فرط الدلال فات الحدود

أنا يا جميل عاشق أسير
أعتز بيك وأهواك كتير
لو قلت لي غيرك سمير
مولانا عارف الفي الضمير

أنا يا حبيب الروح محال
أنساك ولو هجراني طال
لو أبعدك عني الدلال
لابد من يوم الوصال

----------------------------------------------------------------------------------------

غاية الآمال – كلمات عوض احمد خليفة

يا غاية الآمال لو دعاك الشوق
ماكان جفيتنا زمان وانت الحنان والذوق
********
في عالم الأشواق لو مره عشت معاي
وبلهفة العشاق حسيت معانى هواي
كان ياجميل حنيت ورددت لحن غناي
وسقيتني كأس الريد وعادت ليالي هناي
********
وريني ليه بتخاف تكتم عواطفك ليه
وحبك مع الأيام من قلبي ليك بحكيه
تبخل علي بلقاك وعطفك دوام تخفيه
وعطفك أمل قدرته عشت السنين راجيه
********
عارفك وديع ورزين أجمل ملاك في الكون
وعارف عفافك فطره لكن حنانك وين
مابصح وأنت قريب يكويني جمر البين
مادام قلوبنا أتلاقوا و أرواحنا قالت زين

-----------------------------------------------------------------------------------------
المصيــر - كلمات سيف الدين الدسوقي

ليه بنهرب من مصيرنا ونقضى ايامنا فى عذاب
ليه تقول لى انتهينا ونحن فى عز الشباب
***
نحن فى الأيام بقينا قصة ما بتعرف نهاية
ابتدت ريده ومحبه واصبحت فى ذاتها غاية
كنت تمنحنى السعادة ولى تتفجر عطايا
ولما أغرق فى دموعى تبكى من قلبك معايا
***
كنا فى ماضينا قوة قوة تتحدى الصعاب
نقطع الليل المخيم ونمشى فى القفر اليباب
كنا للناس رمز طيبة وكنا عنوان للشباب
وهسى تائهين لينا مدة نجرى من خلف السراب
***
تأنى ما تقول إنتهينا تنهى جيل ينظر الينا
بانى أماله وطموحه ومعتمد أبداً علينا
نحن قلب الدنيا ديه ونحن عز الدنيا بينا
تانى ما تقول إنتهينا نحن يا دوب إبتدينا

-------------------------------------------------------------------------------------

ليه بتسأل – كلمات محجوب سراج

ليه بتسأل عنى تاني بعد ما شلت الأماني
رحت خليتني لزماني و أنت عارفه على جاني
*******
لو بتفتكر الليالي تداوي غلبي
والله تاني ترجع الفراح لقلبي
أنت واهم ياحبيبي . . .
دي الليالي أمر لي من دموعي الفي عينيه
وكل لحظة تمر عليه تنقص الأيام شوية
وتطفئ شمعاتي القليلة وأفضل أبكى واقول حليله
في الدموع أنا كل ليله أدفن أشواقي وحنانى
*******
من حياتك كان حياتي . . كنت أجمل أمنياتي
عهدى راح ما أظنه أتى وما فضل غير أغنياتي
مره أضحك ومره أبكي مره أتحمل أساي
مره اهرب منه وأشكي واعتبر حبك حكاية
عشت فيها بكل روحي وارتضيت سهدي وجروحي
كنت داري وكنت دوحي وأنطفيت يانور زماني

-------------------------------------------------------------------------------------------
أنفاس الزهر – كلمات عبد الرحمن الريح

نفسك أبية وروحك خفيفة وليك جاذبية
**********
ليك جاذبية وروح من رقة الأنسام
مأخوذة من أنفاس السوسن البسام
سمت بأشواقي من عالم الأجسام
للعالم الروحي حيث الجمال يوحي روائع الالهام
*********
يا كوكبي الساري نورك يزيد ناري
أنا الذي اهديتك كل أشعاري
وسبحت بمعاني جمالك أوتاري
وهبت ليك باقات من روضة أزهاري
تعال ليل أو نهار شوف العلي جاري
أو أسال الأنجم حولك عن اخباري

---------------------------------لو مشتاق حقيقة - كلمات إبراهيم الرشيد

لو مشتاق حقيقة ما بتغيب دقيقة
ما بتبخل علينا بالكلمة الرقيقة
********
لو مشتاق ياغالي ما بتروح ليالي
تتفنن في هجرك ما بتسأل في حالي
يا شاغل قليبي يا مانع وصالي
********
قلبي أسير غرامك مما قام وتب
من ينبوع حنانك ينهل حبه حبه
بين عطفك ولطفك أترعرع وشب
**********
كيف يرضيك تسيبه يا صداح حناني
في نار الصبابة يتعذب يعاني
عود جدد غرامك وابني صلاتنا تاني-
---------------------------------------------------------------------------

هذا غيض من فيض عزيزي قزقز وبقية العقد الفريد من مستمعي الفنان المهذب / ابراهيم عوض

والان ندلف الي سيرته الذاتية ..

الفنان الذري إبراهيم عوض

http://pr.indymedia.org/uploads/2009/05/luai-shammat-ibraheem-awad.jpg

- إبراهيم عوض عبد المجيد حسن حسين داؤود قلاش من مواليد 1933 م بحي العرب بمدينة أمدرمان وينحدر أصله إلى قبيلة الكنوز النوبية والتي تتخذ من منطقة القلاشاب بمنطقة اسوان مقرا لها وحتى الأن له جذور في دراوة وأبوهور وكبراش وقد إشتهر أهله الكنوز بفن النحت وقد شارك والده ووالد اللواء خالد حسن عباس في نحت تمثال وقاعدة كتشنر الموجودة مدخل وزارة المالية . . وفي مرحلة الطفولة المبكرة إلتحق بخلوة الفكي عثمان ثم خلوة الشيخ الشريف الثوري حيث درس القرآن الكريم والفقه والسنة وقد ساعده ذلك في التمكن من إجادة اللغة وسهولة نطق الكلمات ومخارج الحروف وبعد ذلك إنتقل إلى مدرسة العناية الإبتدائية والتي كانت تجاور منزل الفنان أحمد حسن جمعة وفي السنة الثالثة انقطع عن مواصلة الدراسة بعد عدة إنذارات تلقاها من إدارة المدرسة نتيجة لعدم دفع المصاريف الدراسية والتي بلغت وقتها 15 قرشا فقط ونسبة لمرض والده ونقله للمستشفى بمنطقة اسوان لم تتمكن أسرته من توفير ذلك المبلغ في غياب عائلها وقد عمل بعد توقفه عن الدراسة ببيع الاناتيك برفقة شقيقه كمال عوض حيث كانوا يذهبون لمحل الصادق الطاهر بمنطقة ( الاسكلا ) القديمة والتي كانت بمثابة سوق عام يستقبل البضائع من كل انحاء السودان وقد كانت مهمته أخذ هذه الاناتيك والمنحوتات الخشبية والأشكال الفنية من جلود التماسيح إلى محلات الامين عبد الرحمن حيث يقومون ببيعها للسياح الأجانب وبعد ذلك إنتقل للعمل بورشة ناصر بشير لصناعة أبواب الحديد والجمالونات وقد تعلم الكثير خلال وجوده بهذه الورشة وصار بارعا في هذا النوع من الصنعة .

- مسيرته الفنية بدأت عندما بلغ سن التاسعة عشرة وكان يتردد على منزلهم صديقه علي إبراهيم إبن أخت الشاعر الكبير عبد الرحمن الريح وفي تلك الفترة تعلم عزف العود على يد علي سالم وكان يقوم بترديد أغنيات عميد الفن أحمد المصطفى مثل ( أهواك ياملاك ) و عبد الحميد يوسف ( غضبك جميل زي بسمتك ) وقد إصطحبه علي إبراهيم إلى منزل خاله عبد الرحمن الريح دون أن يلتقي به لفترة طويلة حيث كان يكبره سنا مما يتعذر الجلوس معه حسب التقليد السائد في ذلك الوقت كما وأنه كان مشغولا ايضا بتصنيع الفلكوريات الشعبية ويتخذ من منزله مقرا لعمله إلا إنه كان يتابع مايقوم به إبراهيم عوض من عزف وغناء من خلال الشباك الذي يفصل بين الغرفة التي يجلس بها إبراهيم عوض والغرفة التي خصصها للعمل وداهمهم عبد الرحمن الريح ذات يوم وأشاد به وقال له : ( صوتك متفرد وجميل ) ونصحه بالذهاب للإذاعة لمقابلة مدير الإذاعة بعد أن أهداه ثلاث اغنيات وهي هيجتني الذكرى والتي تقول كلماتها :
هيجتني الذكرى
كيف عيوني الساحرة
يا نواعم تترى
الشجون مهتاجه
والخواطر سكرى

وعلمتنى الحب والتي تقول كلماتها :

علمتنى الحب وأختفت عني
أين القاها ملهمة فني ؟

وأسرار العيون التي تقول كلماتها :

عيونك فيها من سحرالجمال أسرار
عيونك حين تعاين لي أشوف الدنيا
باسمة علي ومايله قصور
أفكر فيك امام عيني كانك زهرة بين يدي . .

وبالفعل ذهب إلى الإذاعة وبرفقته الأغنيات الثلاثة والتي كانت شرطا لإعتماد أي فنان لإجازة صوته بالإذاعة وتمت إجازة صوته بواسطة متولي عيد مدير الإذاعة وقتها وكان ذلك في العام 1953 م وفي نفس اليوم تمت إجازة صوت الفنان الراحل صلاح محمد عيسى وطلب منه تقديم أغنية واحدة فقط لبثها للجمهور ومن ثم تحديد صلاحيته كفنان بعد أخذ راي الجمهور الذي سوف يبعث خطابات تشجعك أو لا . . وقام بتسجيل أغنية هيجتني الذكرى برفقة الفرقة الموسيقية المكونة من حسن خواض ورابح حسن وعلاء الدين حمزة وبدر التهامي وبرعي محمد دفع الله وموسى محمد إبراهيم بحضور النور موسى مسئول التسجيلات في ذلك الوقت وبعد إسبوع تم بث الأغنية ثم بعدها أرسل له مدير الإذاعة لكي يحضر ويأخذ الخطابات المتوالية من الجمهور لتشجيعه على مواصلة المشوار وكانت أغلب الخطابات تتحدث عن جمال صوته وجودة أدائه وعمق ورصانة كلماته . . وهكذا أعطاه الجمهور شهادة بالنجاح كانت جواز مروره ليتربع على عرش الغناء السوداني . وأستمر الحال على ماهو عليه إلى أن أعطاه عبد الرحمن الريح أغنية بسمة الأيام والتي قام بتلحينها إبراهيم عوض في أول تجربة لحنية له وكانت سببا في إنتقاله من الدرجة الثالثة دون المرور بالدرجة الثانية وتقول كلمات أغنية بسمة الأيام :

أبسمي أيامي . . بسمة الزهر النامي
في هوى الحب السامي . . روحي وأمالي وأحلامي

ويعتبر الشاعر عبد الرحمن الريح صاحب الفضل الأول في تقديم الفنان إبراهيم عوض للجمهور وترسيخ أقدامه على قمة الفن السوداني بمجموعة جديدة من الأغنيات في لحنها وكلماتها . . وتدفق شلال الغناء الجميل وكانت تجربة إبراهيم عوض مع الشاعر الطاهر إبراهيم وهو ايضا من حي العرب وهي مرحلة النضج الفني لإبراهيم عوض فظهرت أغنيات حبيبي جنني وعزيز دنياي وأبيت الناس وفارقيه دربي ويا خائن والذكرى الجميلة وغيرها من الأغنيات الخالدة ويعتبر الطاهر إبراهيم صاحب الإسهام الأكبر في تجربة إبراهيم عوض الفنية بأشعاره وألحانه . . وتعاون إبراهيم عوض بعد ذلك مع كوكبة من الشعراء منهم إبراهيم الرشيد وسيف الدين الدسوقي والنعمان علي الله ومصطفى عبد الرحمن .

- ذكر البروفسير الفاتح الطاهر في كتابه تاريخ الموسيقى في السودان عن الفنان إبراهيم عوض مايلي :- ( إبراهيم عوض حين بدا الغناء لم يقلد أحد بل على العكس حافظ على إستقلاله لأسلوبه الخاص بالغناء وبذلك فقد أسس مدرسة جديدة في فن الغناء السوداني تتميز بالحيوية والحماس العاطفي . . ولعب دورا كبيرا في إثراء الغناء بعد تبلور أغنية الكسرة بصفتها نوعا مستقلا بعد أن كانت تؤدى في الماضي مع نهاية الأغنية الأساسية ويعود الفضل في ذلك إلى المذيع صلاح أحمد محمد صالح والفنان عثمان حسين اللذين وقفا مع فكرة الفصل التام بين الأغنية الأساسية والكسرة . . وفي ندوة بجامعة الخرطوم في اواسط العام 1956 م اشترك فيها عدد كبير من الفنانين بينهم أحمد المصطفى وعبد العزيز محمد داؤود رفض المشاركون في البداية أفكار صلاح أحمد محمد صالح إلا أنهم توصلوا بعد نقاش طويل إلى إقرار فصل الكسرة عن الأغنية الأساسية وهكذا استطاع إبراهيم عوض المتميز بصوته الجميل والمعبر كمؤدي للأغاني الخفيفة الراقصة أن ينتصر للكسرة ) .

- أول زيارة فنية لإبراهيم عوض كانت إلى جمهورية مصر العربية وجاء ذلك بسبب ترشيح الموسيقار برعي محمد دفع الله له ليقدم أغنية ( إظهر وبان عليك الأمان ) في فيلم ( إسماعيل يس طرزان ) وتلك الأغنية أعجب بها الشاعر سيف الدين الدسوقي بلحنها وأراد الإستفادة منها فوضع لها كلمات جديدة وعلى نفس لحن برعي محمد دفع الله كان مولد انشودة ( أعز مكان وطني السودان ) . . كما زار ايضا كل من لبنان والكويت والعراق وقطر والإمارات وسلطنة عمان والبحرين والسعودية واليمن وأثيوبيا واريتريا والصومال وإنجلترا والمانيا وتشيكوسلوفاكيا السابقة وفرنسا وروسيا والصين والولايات المتحدة الأمريكية .

- إشتهر إبراهيم عوض بتسريحته والتي سميت ( بالبقوديه ) وتعود قصتها إلى محض الصدفة ففي أثناء عمله في ورشة ناصر بشير لصناعة ابواب الحديد والجمالونات وكانت عملية إستخدام الزيت ( الرجيع ) ملازمة لطبيعة عمله ودون قصد منه كان يقوم بحك شعره ومسحه ونتيجة لإختلاط الشعر بذلك الزيت أصبح غزيرا بصورة ملفتة وكان وقتها مولعا بحضور الأفلام الغربية في سينما الوطنية امدرمان وأقتبس تلك التسريحة من خلال أحد أبطال تلك الأفلام وقام بهندسة الشعر وعمل ( الشقة ) الشهيرة له ونتيجة لإنتشار أغنياته صارت مجموعة من الشباب تقوم بتقليده وسميت التسريحة فيما بعد بتسريحة إبراهيم عوض . . واكثر ما يلفت الأنظار إليه إهتمامه بمظهره وهندامه وأناقته والصور المرفقة مع هذا البوست تثبت لنا ذلك ورغم تلك الأناقة والوسامة فقد كان قوي البنية حيث أكسبه عمله في الورشة قوى جسمانية هائلة وهناك نادرة تحكى في حي العرب أن الشباب تقسموا فرق للمراقبة الليلية اللصوص وفي الليلة التي كانت نوبة إبراهيم عوض تسلل أحد اللصوص إلى الحي ليفاجأ بلكمة قوية من إبراهيم عوض أفقدته الوعي وعرضت إبراهيم عوض إلى المسألة القانونية وهي حكاية مشهورة ومتواترة في حي العرب .

- أطلق عليه الصحفي الراحل رحمي سليمان لقب الفنان الذري ذلك حين كانت اثار القنبلة الذريه في العالم قد فعلت فعلتها في هيروشيما بعد الحرب العالمية الثانية . . وهو أول مطرب سوداني تغنى من خلال التلفزيون السوداني في العام 1963 م على عهد الرئيس الأسبق المرحوم إبراهيم عبود .

- أغنية عزيز دنياي من الأغنيات الرائعة التي سكنت في وجدان الشعب السوداني وأصبح يطلق إسمها على كل من إسمه عبد العزيز . . وأغنية تحدي للشاعر إبراهيم الرشيد توقف عن تقديمها لان كلماتها تقول : ( أتحداك لو ماتنسيني ) إكراما للمرأة السودانية .. وأغنية أبو عيون كحيلة هي مجاراة لأغنية ( أبو عيون جرئية ) للفنان المصري عبد الحليم حافظ . . وأغنية ياصباح يازاكي العبير مجاراة لأغنية ( القمح الليلة ) للفنان المصري محمد عبد الوهاب .

- تزوج من السيدة الكريمة علوية حامد خريجة جامعة القاهرة فرع الخرطوم سابقا وله من الأبناء عوض ( منذر ) ومازن والتؤام هاشم وحسن ومجتبى ومحمد وسمي عوض أيضا بإسم منذر ولذلك قصة تعود حينما كان الفنان إبراهيم عوض في الحرم المكي بمكة المكرمة وفي مقام سيدنا إبراهيم دخل أحد الأشخاص وقال له مبروك منذر وسلم عليه إبراهيم عوض بدهشه لأنه لم يكن يعرفه وبعد يومين وضعت زوجته ولد وعند عودته للسودان وجد
اخوته أسموه عوض تيمنا بوالده وصار له بذلك إسمان . . وله من الأخوان و الأخوات محمد , شرف , كمال , حسن ونفيسة . . وعرف عنه حميمته مع أسرته وعندما تعرض أحد أبنائه لمشكلة في أفغانستان في احداث 11/ سبتمبر تأثر إبراهيم عوض ودخل في حالة من الحزن والإحباط لم يخرج منها إلا عندما أطلق سراح إبنه وعاد إلى أحضانه . .

- الأغنيات :-
- الشاعر عبد الرحمن الريح : هيجتني الذكرى , علمتني الحب , أسرار العيون , بسمة الآيام , تحية الشروق , ألم الفراق , ياغائب عن عيني , أنفاس الزهر ( نفسك أبية وروحك خفيفة وليك جاذبية ) , الدنيا منى وأحلام , ياعيد تعود ياعيد , هوى الروح , ابوعيون كحيلة , كيف أنسى سيد روحي , ليه ياقاسي , أه ياناري , بعد الوداع , أيامي الحلوة , متين ياربي تاني تلمنا .

الشــــعراء :

- الشاعر الطاهر إبراهيم :
عزيز دنياي , حبيبي جنني , لو بعدي بيرضيه , ياخائن , الذكرى الجميلة لو تعرف معناها , مهما تغيب عني يالحبيب , ملاذ أفكارنا , عهود , إعتذار , غصبا عني , شاركي حياتي , ليه تظلمني , الايام ( إختاروا اسايا ) , انت ليه سهرت عيني , أبيت الناس , متين ياروحي نتلاقى فراقك ناره حراقه , فارقيه دربي وحبايب .

- الشاعر إبراهيم الرشيد :
لو داير تسيبنا , يازمن وقف شوية , لو مشتاق حقيقة , سحابة صيف ( الزمان أشقاني مرة ) , ابقى ظالم , وشاية , وسيم الطلعة , غالي علي , صوت فلسطين , تحدي .
- الشاعر محجوب سراج : ليه بتسأل , مين قساك , قاصدني مامخليني .

- الشاعر سيف الدين الدسوقي :
المصير , أيوه جيتكم يا حبايب, المرأى الجميل , كفاح شعب , ياوطن , أعز مكان وطني السودان .

- الشاعر حسين عثمان منصور :
شهر العسل .

- الشاعر إسحاق الحلنقي :
دنيا غريبة , جمال الثوار .

- الشاعر عبد المنعم عبد الحي :
جمال دنيانا .

- الشاعر عثمان خالد :
قلبك حجر .
- الشاعر بشير عبد العال :
سلوى .
- الشاعر النعمان علي الله :
مابقدر أبوح مابقدر أصرح

- الشاعر محجوب بكر :
بيتنا نور .

- الشاعر حسين محمود جقود :
بي حنيني .

- الشاعر مصطفى عبد الرحيم :
تذكار عزيز .

- الشاعر عوض احمد خليفة :
غاية الامال .

- الشاعر صديق موسى :
مشاعل النور .

- الشاعر السر دوليب :
عني مين قول ليا حاجبك .

- الشاعر محمد مرجان :
حكمة رمضان .

- الشاعر محمد الطيب عربي :
طريق الثوار .

- الشاعر مصطفى عبد العزيز :
زهرة ناديه .

- الشاعر مهدي فرح :
يا حليلكم .

- من اغنيات التراث :
الوافر ضراعه .

- وقام بتلحين أغنيات إبراهيم عوض :-

عبد الرحمن الريح :
هيجتني الذكرى , تحية الشروق , ياغائب عن العين , انفاس الزهر , علمتني الحب , أسرار العيون , هوى الروح , الدنيا منى وأحلام , كيف انسى سيد روحي , بعد الوداع , ياعيد تعود يا عيد , أيامي الحلوة , أبو عيون كحيلة, متين ياربي تاني تلمنا .

الطاهر إبراهيم :
عزيز دنياي , الأيام , لو بعديه بيرضيه , أبيت الناس , عهود , يا خائن , حبيبي جنني , غصبا عني , إعتذار , شاركي حياتي , ليه تظلمني , الذكرى الجميلة , مهما تغيب , ملاذ أفكارنا ,فارقيه دربي , انت ليه سهرت عيني , متين ياروحي نتلاقى , فارقيه دربي وحبايب .

عبد اللطيف خضر :
غاية الأمال , تذكار عزيز , دنيا غريبة , لو مشتاق حقيقة , المصير , زهرة ناديه , قلبك حجر , أبقى ظالم , سحابة صيف ( الزمان اشقاني مرة ) , لو داير تسيبنا , ما بقدر أبوح , وسيم الطلعة , وشاية , يا زمن وقف شوية , طريق الثورة , يا وطن , جمال الثوار .

السني الضوي :
ليه بتسال , مين قساك , قاصدني مامخليني , المرأى الجميل .
برعي محمد دفع الله : جمال دنيانا , أعز مكان وطني السودان .
احمد زاهر :
بي حنيني .

بشير عبد العال :
سلوى , مشاعل النور .

عبد الكريم الكابلي :
عني مين قول ليا حاجبك . يا حليلكم .

إبراهيم عوض لحن الأغنيات :
بسمة الأيام , شهر العسل , ألم الفراق , تحدي , غالي علي , لو قلت ليك , أيامي الحلوة , ليه ياقاسي , كفاح شعب , بيتنا نور , دائما مساهر ليه , صوت فلسطين , أه ياناري .

- توفي الفنان إبراهيم عوض يوم الثلاثاء 25 من ربيع الأخر 1427 هـ الموافق 23/5/2006 م رحمه الله رحمة واسعة تليق بمقدار ما قدم لفنه ووطنه من عطاء خالد وإن رحل بجسده فأنه سيظل في وجدان كل الشعب السوداني من خلال أغنياته المستقرة في الأفئدة وطبت حيا وطبت ميتا وسلام عليك في الخالدين . .

» وداعا وردة الجزائرية فنانة الزمن الجميل
» الجنة ذلك الحلم الجميل
» قيمة الزمن