موضوع الحلقة : مشاكل آلام المفاصل الأسباب والوقاية

موضوع الحلقة : مشاكل آلام المفاصل الأسباب والوقاية

بسم الله الرحمن الرحيم

عيادة على الهواء

موضوع الحلقة : مشاكل آلام المفاصل الأسباب والوقاية – بثت4/ 2/ 2010م

مقدم البرنامج :
إسراء زين العابدين
الضيوف :
دكتورة/
امتثال محمد احمد السلمابى استشاري الطب الباطني والروماتيزم الأمين العام
لاختصاصي الطب الباطني ، ودكتورة/ مواهب بن إدريس السيد الحسن اختصاصي
الطب الباطني والأستاذ المساعد بجامعة الرباط وعضو منسق ورشة العمل الطبية
التابعة للجمعية الطبية
مقدم البرنامج :

أهلا مرحبا بكم نحييك كثيرا جدا عبر هذا اللقاء الجديد من عيادة على
الهواء ونسعد دائما أن تكونوا معنا ونسعد بمتابعتكم ونسعد أكثر باتصالكم
واستشاراتكم التي تلقى كل العناية ، تذكروا دائما أن هذا البرنامج نهدف من
خلاله الى نشر الوعي الصحي أيضا نحاول أن نسلط الضو على بعض الموضوعات
والقضايا الصحية وأيضا نركز على بعض الفعاليات الهامة التي تتعلق بالمجال
الطبي والصحي عموماً ، أهلا مرحبا بكم بداءً هاكم تحايا الفريق الذي
يصحبني عبر هذا اللقاء ، أيها الأصدقاء أهلا مرحبا بكم كثير جدا ونحنا
شاكرين لكل الذين يولون البرنامج عناية واهتمام وأيضا الذين يمدحون
البرنامج هذه الثقة في كثير من المشكلات الصحية التي نتعامل معها طيلة
أيام الأسبوع نأمل دائما أن تكون عند حُسن ظنكم ونأمل دائما إننا نوفق في
إننا نقدم الكثير من الاستشارات وربما المساعدة بنحيى دائما كل
الاستشاريين والأطباء الذين يتعاونوا مع البرنامج ، أيضا عبر هذا اللقاء
الجديد نرحب كثير جدا في هذا اللقاء معنا دكتورة/ امتثال محمد أحمد
السلمابى استشاري الطب الباطني والروماتيزم الأمين العام لاختصاصي الطب
الباطني مرحب بيك دكتورة امتثال ونحنا سعيدين بحضورك وتشريفك للعيادة أهلا
بيك
دكتورة/ امتثال محمد أحمد : أهلا بيك أستاذة إسراء وأنا كمان سعيدة جدا باللقاء
مقدم البرنامج :

مرحب بيك كثير جدا وأيضا أنا سعيدة وأرحب بضيفتنا دكتورة/ مواهب بن إدريس
السيد الحسن اختصاصي الطب الباطني والأستاذ المساعد بجامعة الرباط وعضو
منسق ورشة العمل الطبية التابعة للجمعية الطبية أهلا بيك دكتورة مواهب
سعيدين كثير جدا بحضورك للعيادة هذا المساء
دكتورة/ مواهب بن إدريس :
مرحب بيك أخت إسراء واشكر إذاعة أم درمان على هذه الاستضافة وعلى هذا البرنامج المفيد عيادة على الهواء

مقدم البرنامج :
نحنا
سعيدين بتلبيتكم لدعوة البرنامج والليلة البرنامج يسعد بهذا الحضور
النسائي البحت نحنا بنحييكم كثير جدا وبنحيى كل المستمعين الذين يتابعوا
معنا عيادة على الهواء اذاً مستمعي الأعزاء في هذه الحلقة سنتحدث عن أهم
قضايا مؤتمر جمعية اختصاص الطب الباطن في السودان والذي سيعقد في الأيام
القادمة ، ما هو الجديد فيما يتعلق بتخصص الطب الباطني وأيضا سنتحدث عن
أهم ما يميز هذه الدورة من دورات العمل وماذا يحملون لنا أطباء الطب
الباطني من جديد في مسألة العلاج في الفترة القادمة ، أيضا أيها الأصدقاء
سنتوقف عند مشاكل آلام المفاصل ما هي الأسباب وهل هناك خلط في بعض
الأحايين في تعاملنا مع هذه المشكلة الصحية ، أيضا في هذه الحلقة سنتحدث
عن مرض ( الذئـبة الحمراء
) ما هي هذه المشكلة الصحية عموماً وأيضا خشونة المفاصل ما هي الأسباب
وكيفية الوقاية من هذه المشكلة التي نراها كثيرا في هذه الفترة ، اذاً
أيها الأصدقاء أهلا مرحب بكم بذكركم برقم هاتفنا ( 87553152
) أهلا بيكم ومرحب بضيفات العيادة دكتورة/ امتثال محمد ودكتورة/ مواهب بن
إدريس استشارئى الطب الباطني والروماتيزم في البداية دكتورة امتثال دايرين
نتحدث عن مؤتمر جمعية اختصاصي الطب الباطني السوداني متين سينعقد هذا
المؤتمر وأهمية انعقاد مثل هذا المؤتمر في السودان .
دكتورة/ امتثال محمد أحمد :

المؤتمر بينعقد بإذن الله يوم السبت من 6 – 8 – فبراير 2010م ولكن المؤتمر
دا بالذات يعنى كان مؤتمر مميز جدا بإذن الله لأنو نحنا ابتدينا من يوم 31
يعنى من يوم الأحد الماضي كان عندنا ورش عمل مصاحبة للمؤتمر ورش العمل دي
كان مسئوله عنها دكتورة / مواهب هي حا تتكلم عنها بإذن الله ، المؤتمر دا
نحنا حاشدين ليهو مجموعة من الأطباء من قارات من كندا – انجلترا – أوربا –
آسيا ومن الدول العربية ومجموعة خيرة من الأطباء السودانيين في منهم
مجموعة موجودة في الخارج حضروا يشاركونا في المؤتمر وفى من الداخل حا
تستمر فعاليات المؤتمر لمدة ثلاثة أيام وحا يناقشوا فيه جميع النواحي
الطبية يعنى ما حا يكون مركز على حاجة واحدة يعنى حا يكون فيهو متحدثين عن
أمراض الكلى وعن أمراض القلب والأمراض العامة وأمراض الروماتيزم دي حا
تكون في المؤتمر وعندنا كمان بعض المحاضرات نحنا عاملنها ذي تأبينية
لأساتذتنا الله يرحمهم بروفسير/ داؤد مصطفى ، بروفسير/ صالح يس ، بروفسير/
الضو مختار ، بروفسير/ محمد حسن الطيب ، وأيضا نحنا عاملين جائزة ودي يعنى
سبق في غير المؤتمرات التانية عاملنها لصغار الأطباء عشان نشجعهم على إنهم
يعملوا بحوث ويقدموها وحا تكون في جائزتين الأولى والثانية يعنى امكن 12
مليون و8 مليون يعنى تشجيع للناس للبحث العلمي .
مقدم البرنامج :

نحنا امكن حا نرجع مرة تانية دكتورة امتثال عشان نتكلم بوصفك الأمين العام
لجمعية اختصاصي الطب الباطن الى اى مدى يمكن أن تسهم هذه الجمعية في مثل
هذا التخصص الهام جدا وامكن المؤتمر دا رقم 23 وانت ذي ما ذكرتى هو يتميز
عن المؤتمرات السابقة عموماً حا نرجع عشان نتكلم برضو على انو الآن بقت في
كتير من المشكلات التي تدخل ضمن هذا التخصص الى اى مدى تسهم الجمعية في
كثير من التطور والتطوير في الاختصاصيين في هذا المجال نحنا ذي ما انت
ذكرتى حا نرجع لدكتورة مواهب بن إدريس اختصاصي الطب الباطني وعضو منسق
ورشة العمل الطبية التابعة للجمعية عشان نتكلم شنو هي هذه الورشة لماذا
انعقدت ومنو المستهدفين بها دكتورة مواهب
دكتورة/ مواهب بن إدريس :

الحقيقة ورش العمل ديا بدأت من يوم الأحد 31/ 1/ 2010م وسوف تستمر حتى غدا
الجمعة 5/ 2/ 2010م والحقيقة هذه الورش امتازت بأنها استهدفت كل الشرائح
الطبية نواب الاختصاصيين على حدة اختصاصي الطب الباطني والاختصاصيين
اساتذى الجامعات وامتازت أيضا هذه الورش بأنها استضافت ضيوف من خارج
السودان من المملكة المتحدة سودانيين وأجانب لتقديم محاضرات لكل فئات
الشرائح الطبية
مقدم البرنامج :
دكتورة
مواهب البلاحظ انو على الأقل تخصص الطب الباطن الناس بتلحظ انو في الفترة
الأخيرة أصبح يعنى زمان الزول بيقولوا ليهو أمشى اعمل صورة موجات صوتية
كانت القصة مقسمة الآن امكن أصبح الاختصاصى هو لازم يلم بكثير من هذه
الأشياء هل دي داخلة في التخصصات في مثل هذه الورش تناقش هل في تطور لها
ولى المسألة كيف
دكتورة/ مواهب بن إدريس :

الحقيقة يا أستاذة إسراء هذه الورش استهدفت ذي ما قلت جميع الشرائح الطبية
نواب الاخصائين حيث انفردوا النواب بثلاثة أيام من هذه الورش فيها تدريب
مكثف لكيفية التعامل مع المرضى وكيفية الكشف الدقيق على هؤلاء المرضى وتم
تدريبهم على طريقة جديدة على امتحانات سوف يتم بها تقييم الأطباء إضافة
الى ذلك اختصاصي الطب الباطني شاركوا في ورشة عمل لمدة يوم وكانت اليوم
تختص بالأشعة المقطعية والموجات الصوتية القلبية تم فيها تقديم بعض
الحالات وتم فيها توضيح بعض الحالات وكيفية التعامل معها
مقدم البرنامج :
التكنولوجيا نفسها حصل فيها تطور كبير جدا التكنولوجيا الطبية بالتحديد الناس بتصحى كل يوم بتلقي في حاجة جديدة
دكتورة/ مواهب بن إدريس :
أيوا صاح فكانت الاستضافة فعلا مفيدة جدا الأساتذة الضيوف وضحوا كتير من هذه التكنولوجيا لأخوانا الأطباء
مقدم البرنامج :
نحنا
بنرحب بيكم كتير جدا ضيفاتنا دكتورة مواهب ودكتورة امتثال ونرجع امكن
دكتورة امتثال قبل ما نمشى ونتكلم عن بعض المشكلات الصحية وأنا أكيد انو
موضوع المفاصل دا ما بقى موضوع كبار زمان كان مرض ناس كبار أسى بقى الصغار
والكبار القصة بقى فيها خلط لكن امكن دايرين شوية قبل ما نبرح الحته بتاعة
المؤتمر دي يعنى في مشكلات صحية بيتعرضوا لها الناس أصبحت الآن هي أكثر
انتشار يعنى بقينا نسمع عنها ما كانت موجودة الى اى مدى يستوعب هذا التخصص
هذه المشكلة بنلقى انو الزول باطني وكدا دائما يحصل خلط بين التخصصات
المختلفة
دكتورة/ امتثال محمد احمد :
هو
طبعا اى طبيب باطني لازم يكون مولم بجميع نواحي الطب الباطن الىّ هو مثلا
لازم أنا أكون طبيبة باطنية بكون بعرف في أمراض الكلى بعرف في أمراض
الروماتيزم بعرف في الجهاز الهضمي دا لازم يعنى حتى التجهيز لامتحاناتنا
بيمتحنونا فيهو الجزء الأول بيكون عام والجزء الثاني بيكون عام الى أن
ناخد الشهادة بتاعتنا يعنى اى حاجة نحنا بنكون عارفين عنها بعد كدا بيبتدى
الواحد ياخد جانب معين ويمشى فيهو وتخصص أدق لكن انت ما في حاجة اسمها
تخصص أدق مفصول من الحاجات التانية فالجسد البشرى دا واحد والعلم فإنت
لازم تعرف زول عندو سكري لو جاهوا مثلا مرض مفاصل لازم تكون عارف تعالجهم
الاتنين مع بعض يعنى عشان ما يكون المريض حايم لكن إذا في حاجة بتحتاج الى
تخصص تانى انت بعدين بتبعت المريض لواحد تانى يكون متخصص فيها بحيث انو
يجد عناية اكتر لكن في الأول لازم دا كلوا نكون عارفنوا ولازم يمتحنونا
فيهو ولازم ننجح فيهو عشان ما ناخد الشهادة ، بالنسبة لانتشار الأمراض
الانتى بتقولي عليها هو في الحقيقة حاجات كتيرة غير إنها انتشرت امكن
العلم بها بقى اكتر الوعي بتاع الناس بقى اكتر الإعلام النت التلفزيون
الإذاعة دا خلى الناس إنها تعرف الأمراض حقتها شنو والأنواع المختلفة يعنى
مثلا في الإذاعة بنلقى برامج كتيرة مثلا بتوعى الناس وتعنى بأمر التثقيف
الصحي ثانيا في أمراض مثلا بقت تظهر للناس الصغار وللناس الكبار يعنى
الناس ابتدت تعيش اكبر وبعدين بقوا زمان كنا يعنى أهلنا كلما بقت المرأة
كبيرة خلاص تقعد في كرسي في سرير تشرب القهوة وترتاح لكن أسى ما عادى
المجتمع تغير يعنى الحبوبات
مقاطعة من مقدم البرنامج : ما نظلم المرأة ، المرأة والرجل الاتنين
دكتورة/ امتثال محمد احمد : أيوا صاح الرجل بيكون قاعد في الكرسي برا
مقدم البرنامج :
دكتورة امتثال نحنا معانا اتصال حا نشوف المكالمة الجاية ونرجع إنشاء الله ونتابع هذا اللقاء الو السلام عليكم
مشاركة عبر الهاتف : معاكم الطيب خضر عجيل من الزريقة
مقدم البرنامج : مرحب أخ الطيب أدينا السؤال من البداية معليش نحنا ما تابعنا
مشاركة عبر الهاتف :
كان
عندي التهاب بتاع معدة ومشيت الدكتور وقال لي دا التهاب بتاع معدة دايرين
نعرف السبب شنو وهل في أشياء الزول بيمتنع منها ولى شنو
دكتورة/ امتثال محمد احمد :
هو
في الحقيقة التهاب المعدة دا ليهو أسباب مرات بيكون في جرثومة في المعدة
والجرثومة دي منتشرة كتير جدا يعنى بنلقى فوق 45% من الناس عندهم الجرثومة
دي مرات ما بيكونوا حاسين بها ومرات بتسبب آلام وحموضة فديل نحنا الحاجة
العايزنها ما نمنع المريض من ما يأكل دا ولى يأكل دا بنعالجها أسى عندها
مضادات حيوية بنديها ليها لفترة من الزمن ومعها حبوب للحموضة برضها لفترة
من الزمن وبعدين كدا الواحد إننا ما بنمنعوا انو يأكل دا ولى ما يأكل دا
لكن بتبقى شنو انت الحاجة التي تتعبك انت بتسيبها لكن ما في حاجة ممنوعة
مقدم البرنامج : أيوا يا الطيب تابعت
مشاركة عبر الهاتف : أيوا الآن في شطة كدا بتألم معانا والدهون برضو
دكتورة/ امتثال محمد احمد :
انت يا الطيب ما دام عرفت انو الشطة بتتعبك والدهون وأنا افتكر انو انت عملت منظار أصلا وقال ليك في التهاب معدة
مشاركة عبر الهاتف : أيوا وقال لي في التهاب معدة
دكتورة/ امتثال محمد احمد :

هي عادة التهاب المعدة يعنى براهوا كدا ما بيؤثر لكن أكل الدهون ما متعب
شديد إلا معاهوا مثلا مرارة يعنى التهاب في المرارة أو انسداد في القناة
المرارية دا ممكن يؤثر لكن طالما انت عملت المنظار وأدوك العلاج بتاعك
لفترة معينة من الزمن بإذن الله ما بتتعب كتير من الأكل
مقدم البرنامج : إنشاء الله
مشاركة عبر الهاتف : يا دكتورة عندي ألم في الجسم
مقدم البرنامج :
الطيب
خضر انقطع الخط كنا دايرين نعرف ألم الجسم برضو إذا في مواصلة يبدو دكتورة
مواهب عندك إضافة في مسألة أخونا الطيب دي أحيانا يا دكتورة هل بتفرق
مسألة إذا الزول عندو اى سلوكيات مثلا تدخين استخدام تمباك أو خلافوا هل
تؤثر في مسألة المعدة أو الحرقان الممكن يشكوا منو في أحيان
دكتورة/ مواهب بن إدريس :

طبعا جدا بالذات التدخين والتوتر العصبي بيزيدوا إفراز المعدة للحموضة
وبتؤثر في المعدة بالذات إذا كان الشخص قابل لزيادة الحموضة المعدة بتفرز
حموضة زائدة فبننصح انو دائما يعملوا منظار ويعملوا تحليل وإنشاء الله
العلاج موجود
مقدم البرنامج :

إنشاء الله الطيب ربنا يديك الصحة والعافية وإنشاء الله تكون تابعت نصيحة
الطبيبات ونتمنى ذي ما قالوا ليك وقالت ليك دكتورة امتثال لازم انو ترجع
تشوف السبب أصلا شنو ما في ألم معدة براهوا من شطة ولى غيروا عموماً نحنا
بنتمنى ليك الصحة والعافية ونرجع مرة تانية دكتورة امتثال للجمعية الأمين
العام لاختصاصي الطب الباطن عايزين نتحدث يعنى شنو ما تقدموا الجمعية لهذا
التخصص يعنى الجديد ما تحملوا من تطور بيحدث في العالم امكن نحنا بنشهدوا
ونتمتع به في السودان
دكتورة/ امتثال محمد احمد :
أول
حاجة الجمعية دي في الدورة دي هو رئيسها بروفسير/ مأمون محمد على حميدة
ودا طبعا رجل سباق لإدخال التكنولوجيا فالدورة دي تختلف من دورات غيرا
لأنو عملنا ما لا يقل في ظرف السنتين دي عن 13 أو 14 لقاء اكاديمى ولاول
مرة يكون في دورة واحدة يكون في مؤتمرين عادة بيكون في مؤتمر واحد فدا
كلوا من حرص البروفسير على انو يجلب الناس والدكاترة والخبرات الأجنبية
عشان هنا الناس تستفيد منها وديل مش بس بيجوا يعملوا المؤتمر حقهم تلاتة
أيام لا بيكونوا بدرسوا الطلبة بدرسوا الدكاترة الصغار الأطباء وبيدرسونا
نحنا ذاتنا بنتعلم ونشوف الحاجة الجديدة ودا من الحرص الشديد من البروفسير
في الفترة ديا على انو يعلم ويثقف ويوعى
مقدم البرنامج : شكرا دكتورة امتثال معانا الآن الو السلام عليكم
مشاركة عبر الهاتف : عليكم السلام والرحمة
مقدم البرنامج : أهلا بيك يا سيدي مرحبا منو معانا
مشاركة عبر الهاتف : معاك نور الدائم احمد مكي من الهلبة – غرب الدويم
مقدم البرنامج : مرحبا أخ نور الدائم اتفضل
مشاركة عبر الهاتف :
بنسأل
عن كثرة استعمال الأدوية في التهاب المعدة مرة الإنسان تلقاهوا لبراسك مرة
قلوي هل دي لها تأثير في المعدة نمرة اتنين دايرين تعريف الجلطة بالكامل
ودايرين نعرف برضو التهاب المفاصل هل بيصيب كل الأعمار وشكرا ليكم
مقدم البرنامج :
شكرا
ليك يا نور الدائم نشوف استعمال الأدوية أحيانا نتنقل ذي ما قال أخونا نور
الدائم مرات كتيرة الزول يكون عندو التهاب مصران أو معدة فيبتدى يستخدم
مرة يلقى لبراسك يستعملوا ومرة أسماء تانى كتيرة لها علاقة نعم
دكتورة/ امتثال محمد احمد :

هي دائما اى استعمال الأدوية من غير استشارة الطبيب دا نحنا ما بنحبذوا
ولكن إذا انت مشيت الطبيب وهو أداك العلاج وبيكون عارف الحالة الصحية
العامة حقتك ممكن انت تستعمل الأدوية لكن تكون تحت الإشراف في أدوية مثلا
نستعملا عند الروماتيزم بنقول للمريض حا نستعمل الدواء باقي عمرك كلوا حتى
مثلا النسوان يقول ليك والله بلعنا تسعين حبة أقول ليهم ما تحسبوا لأنو
الحاجة دي لباقي العمر طول ما انو الدكتور عارف وبتابع معه لأنو نحنا
بنحسب لو الدواء دا لو استعملناهوا ممكن يسبب الحاجة الفلانية
مقاطعة من مقدم البرنامج :
بس
أحيانا الأدوية خطورتها يعنى امكن بعض التي ذكرها أخونا نور الدائم دي
مرات بنمشي الصيدلية برانا نشيلا يعنى خاصة التي لها علاقة بالتهابات
المصران ولى المعدة لو ساكت زول حكيت ليهو أعراضك دي وقال ليك والله أنا
قاعد ابلع الحبوب دي أداها ليك من المضبقة أو الجزلان أمشى جيبا من
الصيدلية بتمشى تجيبا
دكتورة/ امتثال محمد احمد :
طبعا
دي فيها خطورة وأقول ليك حاجة حتى امكن من الصيدلية اقل خطورة من تبادل
الأدوية بين الأصحاب وفى قعدات الونسة فدى بتكون خطيرة لكن دائما الأفضل
انو يكون تحت إشراف الطبيب خاصة (Libras) دا هو ذي حبوب (valium) لكن دائما أفضل الواحد يعرف السبب شنو بتاع المرض عشان ياخد العلاج المناسب
مقدم البرنامج :
شكرا
دكتورة امتثال امكن دكتورة مواهب لو رجعنا عندو سؤال امكن أخونا نور
الدائم عن الجلطة نحنا خلينا ناخد جزء منها هل في ناس اكتر عرضة للإصابة
بالجلطات من غيرهم نعم
دكتورة/ مواهب بن إدريس :

طبعا الجلطة يا أستاذة إسراء هي عبارة عن تخسُر بسيط في الدماء أو نزيف قد
تكون بسبب التخسر أو النزيف الدموي وتؤدى الى ما يسمى بالجلطة أو تسبب شلل
في بعض الأعضاء فعلا في جزء معين من الناس هم أكثر عرضة للجلطة وهم الناس
العندهم ارتفاع في ضغط الدم والمصابين بالسكري طبعا ما كلهم طبعا بس
المجموعة البتكون ما محافظة اكتر من غيرهم الجلطة قد تصيب الناس العندهم
زيادة في الوزن المابتحركوا كتير يعنى الجلطة بتجيهم اكتر من بقية الناس
مقدم البرنامج : اتفضلى دكتورة امتثال
دكتورة/ امتثال محمد احمد :
يعنى
كلام دكتورة مواهب انو انسداد الوعاء الدموي الذي يغذى المنطقة المعينة
إذا كانت في الدماغ بيعمل ليك الشلل إذا كانت في الرئة بيعمل ليك ضيق نفس
شديد إذا كانت في رجلك يمكن يسبب قرقرينة دي هنا الجلطة وذي ما قالت ليك
عندها أسباب كتيرة
مقدم البرنامج :
نحنا
بنحييكم امكن في سؤالوا بتاع التهاب المفاصل أخونا نور الدائم بنقول ليك
بنشكرك نور الدائم وحا نرجع لالتهاب المفاصل كواحدة من الموضوعات الأساسية
إنشاء الله في هذه الحلقة أهلا مرحب بيكم ونتابع عيادة على الهواء
*** فاصل موسيقى ***
مقدم البرنامج :
مرحبا
أهلا بكم أيها الأصدقاء بنحييكم كتير جدا عبر عيادة على الهواء ونحنا
بنتواصل معكم ضيفات العيادة في هذا المساء دكتورة امتثال محمد ودكتورة
مواهب بن إدريس بنرحب بهم كتير جدا وبكل المستمعين البيتابعونا ويبدو انو
حا نبدأ باتصال طوالى الو السلام عليكم
مشاركة عبر الهاتف : عليكم السلام ورحمة الله
مقدم البرنامج : أهلا بيك يا سيدي
مشاركة عبر الهاتف : معاك عباس محمد احمد بابكر من ريفي الحوش
مقدم البرنامج : مرحبا أخ عباس اتفضل
مشاركة عبر الهاتف :

للاستشاريين ديل عندي أطفال ثلاثة بيشكوا من آلام في الساقين بيقولوا وجع
كرعين مما الشمس تغيب طوالى كلهم بيشكوا بيقولوا عندهم وجع كرعين
مقدم البرنامج : يا عباس أعمارهم كم
مشاركة عبر الهاتف : والله البنت الكبيرة الىّ هي بدت أول عمرها ست سنة
مقدم البرنامج : والباقين اصغر
مشاركة عبر الهاتف : أيوا اصغر رضع يعنى
مقدم البرنامج : يعنى شنو وجع كدا وبيروح
مشاركة عبر الهاتف :
والله
بيشكوا والبنت الكبيرة دي بتبكى منو عديل كدي ومشيت وديتا للدكتور في سنار
اخصائى أطفال وقال لي ما في رطوبة وما في اى حاجات بالشكل دا بس أدانا
علاجات واستعملتا وبقت كويسة لكن تانى جاها الألم
مقدم البرنامج :
طيب خليك معانا لحظة يا عباس ، دكتورة امتثال لو عندك ليهو اى أسئلة قبل ما ينقطع الخط
دكتورة/ امتثال محمد احمد :
ممكن
أجاوب على انو مثلا الأطفال ديل محتمل يكون في نقص في الكالسيوم دا بسبب
ليهم آلام لأنهم أطفال صغار ومادام استبعدوا وجود الرطوبة فالرطوبة دائما
ما بتسبب آلام في الساق لكن بتسبب آلام في المفاصل نفسها والمفاصل بيكون
فيها تورم وبيكون فيها ألم وبيكون فيها سخونة وبعدين تلاتة أطفال مع بعض
يعنى بيكون عندهم نفس الأعراض فنحنا لازم نشوف الكالسيوم ومرات بيكون في
حاجات بتجى في العائلة أو بتتوارث فهنا هو لازم يمشى يشوف دكتور أطفال
عشان يعرف السبب شنو
مقدم البرنامج : عباس يا ريت تكون استمعت لنصيحة دكتورة امتثال
مشاركة عبر الهاتف : أيوا جزاكم الله خير
مقدم البرنامج :

الله يبارك فيك ونحنا بنتمنى ليهم الصحة والعافية إنشاء الله ليهم العمر
كلوا ونتمنى انو برضو لو عايز متابعة تتصل بينا عبر البرنامج إنشاء الله
ربنا يعافيهم ، بنرجع مرة تانية دكتورة مواهب امكن الشكوى الآن البيشكوا
منها كل الناس يعنى اى زول يقول ليك والله الزول دا قالوا عندو خشونة ركب
خشونة مفاصل يعنى عشان ما تقولوا الناس السمان بس يا دكتورة مواهب حتى
الناس الضعاف مرات بتكون عندهم المشكلة دي الحاصل شنو
دكتورة/ مواهب بن إدريس :
الحقيقة
خشونة المفاصل هي موجودة لكن أسى كتير بقت تظهر لأنو الناس بدأت تشخص
لأمراض المفاصل فالخشونة ممكن تكون خشونة نتيجة لتآكل في الغضاريف قد تنتج
نتيجة لتقدم في السن أو قد تكون نتيجة لبعض الأمراض المفصلية وناتجة عنها
خشونة في الغضاريف وطبعا الغضروف أهميته انه بيقلل الاحتكاك في المفصل بين
العظمتين مما يؤدى الى سهولة في الحركة قلة في الآلام وكلما قل الاحتكاك
بين المفصلين كلما كان ما في مشاكل وكلما زاد الاحتكاك نتيجة لتآكل في
الغضاريف كلما شعر الإنسان بآلام وشعر ببعض الأصوات الطقطقة والكركبة الىّ
هي بيشتكوا منها اكتر الناس

مقدم البرنامج :
شنو
الوقاية منها دكتورة مواهب يعنى الناس عشان توقى نفسها ترا الكبر بيجى
وزيادة الوزن بتجى وكلوا لكن بتلقي في ناس بيعانوا من الشكوى دا وفى ناس
لا
دكتورة/ مواهب بن إدريس :
الحقيقة
فعلا يعنى ما في حاجة واضحة كدا السبب شنو لكن الوقاية منها الرياضة كلما
كانت في رياضة يعنى في ناس بيقولوا ليك في خشونة في المفاصل خلاص ما بتريض
بقعد دا غلط يعنى كلما كانت في خشونة في المفاصل واتحرك الإنسان وعمل
سباحة كلما كان في تثبيت للركبة في مكانها يعنى بيزيد من قوة العضلات
حولين الركبة فالحقيقة الرياضة المشي السباحة المشي اكتر حاجة بيساعد
مقدم البرنامج :

إنشاء الله شكرا دكتورة مواهب امكن حا ننتقل دكتورة امتثال لموضوع يعنى
نقلنا ليهو المستمع السابق مباشرة مسألة آلام المفاصل والخلط الكتير الذي
نسمعه زول يقول ليك والله أنا عندي رطوبة زول تانى مثلا يقول ليك عندي
قاوت آخر يقول ليك أصلا كانت عندي من طفل هذه الآلام الناس ابتديت تتخوف
من الروماتيزم شنو أسباب آلام المفاصل
دكتورة/ امتثال محمد احمد :
طبعا
أسباب آلام المفاصل دي كتيرة جدا جدا يعنى نحنا كلمة الواحد يقول ليك أنا
عندي رطوبة يعنى رطوبة دي بتشمل حاجات كتيرة يعنى آلام في العضلات في
الأربطة في المفاصل يعنى كل الحاجات دي الناس بيسموها رطوبة يعنى عندها
أسبابها كتيرة وأسبابها مختلفة امكن عندي إضافة شوية لدكتورة مواهب الىّ
هي بتقول في تآكل في الغضاريف يعنى لو الواحد شاف المفصل يعنى حتى مفاصل
الحيوان وكدا الكوارع دي فدى بتقوم تتآكل غير كدا بيكون في مادة سائلة
يعنى ذي زيت المكنة يعنى ذي البتزيت المكنة يعنى لمن يكون فيها الزيت دا
كويس المكنة بتتحرك لمن الزيت دا ينشف بتكركب كان أجمل وصف وصفها لي كان
جاني واحد راجل كبير قال لي والله يا بتي الايوقة دي نشفت وفعلا يعنى هي
الايوقة هي نشفت ، أسباب المفاصل كتيرة مثلا عندنا امكن دكتورة مواهب حا
تتكلم عن الذئبة الحمراء وعندنا احتكاك المفاصل فاحتكاك المفاصل مشكلتوا
انو ابتدأ يبقى كتير جدا جدا لأنو الناس ذي ما قبيل قلت بتكبر في العمر
والحركة حقتها بقت كتيرة عشان كدا بتلاحظ انو الواحد ما بيقدر يتحرك بها
ذي الأول ما بيقدر يسوى شغلوا ودي بالظبط واضحة جدا يعنى هو من علامات
الاحتكاك انو الواحد لمن يقعد ويقوم على حيلوا ما بيقدر يقوم بسهولة
الواحد يقول ليك ما بقدر أقوم كان قعت ارفعوني فيحصل ذي بتتلصق المفاصل دي
لأنو ما فيها المادة السائلة دي لمن الواحد يجى قائم هي بتكركب ويفكها
برضو في واحد مصري قال لي بفك السيراميك يعنى
مقدم البرنامج :
لكن
فعلا هل بتفيد بعض الرياضات ذي ما قالت دكتورة مواهب وكتير من الدكاترة
يقول ليك اتحركوا والمسألة والزول بيكون حاسى بي انو فيها عنت يعنى خاصة
للناس الكبار

دكتورة/ امتثال محمد احمد :

شوفي نحنا مثلا السباحة دي طبعا ما موجودة في البلد كتير لكن في بعض
المحلات لكن في تمارين بسيطة نحنا بنوصفها للمريض الذي يكون عندو آلام في
المفاصل نتيجة للاحتكاك الىّ هو مثلا يفرد رجلوا يلمها عليهو نحنا كلها
القصد منها التقوية بتاعة العضلات والأربطة حولين الركبة لانا دي بتثبتها
لكن كمان برضو ما بقول يعنى الواحد عندو احتكاك المفاصل ما بقول خلاص أمشى
اقطع الكبرى وتعال وخاصة معظم الناس هنا بيكونوا وزنهم تقيل يعنى بيجونى
بألم اكتر من الأول فديل أنا مثلا بقول ليهم اعملوا الرياضة المابيكون
فيها حمل كتير على الرجلين يعنى واحدة تكون راقدة وتتحرك قاعدة في كرسي
وتحرك رجليها يعنى في حاجات كتيرة ممكن تتعمل من غير ما انو الزول يتعب
وتقلل وزنها ودي طبعا أهم حاجة

مقدم البرنامج : شكرا جزيلا معانا اتصال الو السلام عليكم
مشاركة عبر الهاتف : عليكم السلام ورحمة الله أستاذة إسراء
مقدم البرنامج : أهلا بيك يا سيدي يديك العافية تسلم منو معانا
مشاركة عبر الهاتف : معاك قسم الله إسماعيل عوض الله قرية مستورة قلابة الهوارة – محلية تندلتى ولاية النيل الأبيض
مقدم البرنامج : أهلا بيك اتفضل
مشاركة عبر الهاتف : والتحية للمرأة السودانية تقتحم كل المجالات
مقدم البرنامج : شوفت الركب دي النسوان قدروا يتكلموا فيها بصورة يوروك المشكلة شنو اتفضل يا قسم الله
مشاركة عبر الهاتف :

وجع الركب ووجع المفاصل وتركيبة البشر دي كلها أنا ذاتي حاليا مكعكع وعندي
رطوبة وشغالين 24 ساعة مفروض الرطوبة دي ما تجى علينا ذاتا داير اعرف
أسبابها ومسبباتها والعلاج منها كيف
مقدم البرنامج : يديك العافية يا قسم الله عمرك كم انت
مشاركة عبر الهاتف : والله يا أستاذة تقريبا 51 سنة
مقدم البرنامج : طول العمر إنشاء الله يا رب وربنا يديك الصحة والعافية قلت انو الحركة وانت ما زول قاعد وزنك كتير ولى بسيط
مشاركة عبر الهاتف : والله شغال في الشمس ال 12 ساعة دي أنا ما قاعد ارتاح فيها إلا عشرة بالليل
مقدم البرنامج : وزنك كيف عشان الناس ديل قالوا مسألة الوزن دي مهمة
مشاركة عبر الهاتف : الوزن كم و60 تقريبا
مقدم البرنامج : يلا قسم الله دا مشكلتوا شنو اتفضلى
دكتورة/ امتثال محمد احمد :
والله
طبعا قسم الله ممكن يكون السن بتاع احتكاك المفاصل بالمناسبة احتكاك
المفاصل دا ما الزول لازم يبقى عجوز يعنى مثلا سيدنا عيسى عليه السلام مش
يقول ليك رفعناهوا كهلا الكهولة هو عمرو كم 33 سنة مش كدا فالكهولة بتبتدى
من السن دي صاح ما بيظهر احتكاك المفاصل وآلام المفاصل من الوقت دا لكن
بتبتدى لكن لو جينا حسبنا 33 و51 في وقت مناسب لكن في حاجات تانية برضو
عند الرجال غير احتكاك المفاصل أهم حاجة من آلام المفاصل عندهم بيكون
عندهم القاوت فهو اكتر نوع منتشر عند الرجال بعد سن البلوغ
مقدم البرنامج : اكتر عند الرجال من النساء
دكتورة/ امتثال محمد احمد :
أيوا اكتر عند الرجال من النساء لأنو النساء الدورة الشهرية بتحميهم من القاوت لكن بعد انقطاع الطمث بيكونوا معرضين للقاوت
مشاركة عبر الهاتف :
والله
برضو يا أستاذة عندي حكاية الرطوبة دي الحبوب بتاعة الرطوبة دي استعملتها
كتير جدا ومتخوف من قصة تنتهي متين أنا ذاتي ما عارفا يوم ما تقيف يوم
واحد ولى يومين خلاص المفاصل تتورم والأحوال تتغير
دكتورة/ امتثال محمد احمد :
هو
معاك حق انو ما ممكن الواحد يستعمل حبوب الرطوبة لفترات طويلة لازم المرض
يشخص انت ما دام قلت في تورم حق مفاصل معناها المسألة شوية جادة يعنى ما
تستمر تشتغل بي مرضك أحسن تجى مثلا تعال لينا في المستشفى الاكاديمى
الخيري يوم الثلاثاء الساعة 11 نحنا نشوفك لأنو دايرين نعرف هل انت عندك (
روماتويد) الىّ هو التهاب المفاصل ولى هل هو قاوت ولى هل هو احتكاك يعنى
في أمراض كتيرة جدا جدا ما بتشخص إلا نشوف المريض شخصيا
مشاركة عبر الهاتف : جدا يا دكتورة اجى وين ولى ممكن أشيل بطاقة
مقدم البرنامج : ممكن تجينا إنشاء الله يا قسم الله في اى وقت وإنشاء الله نديك بطاقة
مشاركة عبر الهاتف : اجى الإذاعة
مقدم البرنامج :

أيوا تجى الإذاعة يديك العافية تسلم ، أيها الأصدقاء ما زلنا بنتابع معكم
عيادة على الهواء ربع ساعة فقط تفصلنا عن نهاية هذا اللقاء
*** فاصل موسيقى ***
مقدم البرنامج :
مرحبا
أهلا بيكم بنحييكم كتير جدا ونحنا بنتابع عيادة على الهواء ضيفات العيادة
دكتورة امتثال محمد احمد استشاري الطب الباطن والروماتيزم الأمين العام
لجمعية اختصاصي الطب الباطن ودكتورة مواهب بن إدريس استشاري الطب الباطن
والأستاذ المشارك بجامعة الرباط ، دكتورة مواهب امكن نحنا عايزين ننتقل
لواحدة من المشكلات الصحية المتعلقة بأمراض الدم أنا ما عارفة وصفها دا
صاح لأنو نسمع بمرض الذئبة الحمراء شنو يعنى مرض الذئبة الحمراء ولماذا
سميت بهذا الاسم في عدد كبير من الأسئلة ورد للبرنامج حول هذه المشكلة
والآن أصبح التشخيص لها كتير يعنى في الفترة الأخيرة كتير بين الناس عبر
أعمار مختلفة في سن البلوغ في مراحل عمرية مبكرة شوية بيصيب شنو يعنى
البنات ولى الأولاد مرحبا

دكتورة/ مواهب بن إدريس :
الذئبة الحمراء سميت بالذئبة الحمراء من كلمة لاتينية الىّ هي (lobes- retry -matotes ) ، ( lobes) الىّ هي الذئبة و (retry matotes )
الاحمرار فجات التسمية قالوا كان فيها إحمرار في وجنتين لذئبة عندهم هناك
ومنها ظهرت التسمية دي حقيقة الذئبة الحمراء تتصف ببعض المواصفات فعلا ذي
ما انتى قلتي هو يعنى مرض في الدم نتيجة لاضطرا بات في الجهاز المناعي
اسبابوا قد تكون فيها جزء من الجينات وقد يكون في جزء من الاضطرابات
المناعية بتظهر ببعض التحليل الدقيق
مقدم البرنامج :
شنو اعراضوا مرات زول بس يقول ليك آلام عجيبة في جسمي من غير سبب مهم
دكتورة/ مواهب بن إدريس :

أيوا صاح الحقيقة هي يا أستاذة إسراء بتصيب النساء اكتر من الرجال بتصيب
كل تسعة نساء مقابل رجل واحد بتتميز بي انو في احمرار في الوجنتين آلام في
المفاصل جميع مفاصل الجسم صغيرة وكبيرة وقد يصحبها بعض التورم في المفاصل
تساقط في الشعر صداع مزمن وقد تؤدى في بعض الأحيان وتؤثر على الكلى
مقدم البرنامج :

أحيانا هل عندها علاقة انو إحساس الشخص بالأم بيكون اكتر مما هو متوقع
يعنى مرات يقول ليك انو واحدة من المستمعات كانت اتصلت وقالت إنها بنتها
ساكت لو مسكتها مسكة شوية بتصرخ بألم شديد وقالت إنها شخصوا ليها إنها هي
عندها الذئبة الحمراء بعد إجراء الفحوصات ذي ما انتى قلتي
دكتورة/ مواهب بن إدريس :
أيوا
لأنها بتصيب كل مفاصل الجسم يعنى الصغيرة والكبيرة وذي ما قلتي بتصيب
البنات اكتر وفى سن مبكرة يعنى من سن 20 - 30 سنة بتبدا تظهر عليهم
الأعراض
مقدم البرنامج : وممكن تصيب أعمار اقل
دكتورة/ مواهب بم إدريس : ممكن تصيب أعمار اقل نادر
مقدم البرنامج :
شنو
يعنى خطو

» موضوع الحلقة : مشاكل النساء بعد سن الخمسين
» ودع الانتفاخ والغازات نصائح تجنبك آلام القولون في رمضان
» موقف جميل